Read Bima MARKUS 12 Bible Online

MARKUS 12 - Bima bible

MARKUS 12

¹ Edempara Ruma Isa tampu'una nuntu kai conto ra ibara d̄i dou-dou mana'ekai imam, guru-guru agama, ro dou-dou mana'ekai Yahudi ede. Nggahi Ruma Isa, ”Waraku sab̄ua dou ma nggud̄a anggo d̄i sab̄ua nggaro, edempara kuta hekona. Sawa'u b̄a ede sia ngarina kancoa d̄i ru'u puakaina anggo, edempara tu'una sab̄ua salaja mad̄ese d̄i jaga ra tonggukaina. Sawa'u b̄a ede sia kauna sewa dou nggaro anggo ede d̄i pila-pila dou makarawi cengga hasi, edempara laona d̄i rasa ra dana makalai.

²Rakara wakatu pokekai wua anggo, dou ede kauna lao adana sab̄ua aka dou-dou makarawi nggaro ede d̄imatarima ru'una.

³Pala dou-dou makarawi ede wa'u ra letona ada dou ede. Edempara b̄oe b̄a siad̄oho ada ede, edempara kauna dula kai rima ntaru.

⁴Edempara dou mantau nggaro ede kauna lao sab̄ua adana ma kalai. Pala dou-dou makarawi ede b̄oena tuta ada dou ede, edempara b̄aka kalosana ro i'a ra b̄a'ana.

⁵Dou mantau nggaro ede kauna lao wali sab̄ua dou adana ma kalai. Pala hade b̄a doud̄oho ada ede. Ro ndede ncau karawi b̄a siad̄oho mboto adana ma kalai rau: wara rab̄oe ro wara rau rahade.

⁶Cou waliku d̄i loa kau lao ake b̄a dou mantau nggaro ede? Cuma d̄i sab̄ua dou mpoampa, eded̄u ana ndaina rameci ra ca'una. Ndad̄i cumpukaina kauna lao anana ede d̄i dou-dou makarawi ede. ’Pasti ana nahu d̄i lia ra horomana,’ kananu b̄a sia.

⁷Pala dou-dou makarawi ede nggahina d̄i sab̄ua lab̄o sab̄ua dou, ’Akeku d̄imakapasakana. Mai ndai tahadeku sia, loakud̄u raka b̄a ndaita pasakana!’

⁸Edempara anana ede wa'u ra leto b̄a siad̄oho, edempara hadena. Timbana paki b̄a siad̄oho ari mai b̄a nggaro ede.”

⁹Edempara sod̄i b̄a Ruma Isa, ”Auku d̄i karawi b̄a dou mantau nggaro ede? Pasati sia namai hadeku dou-dou makarawi nggaro ede, edempara nambeiku dou ma kalai nggaro ede.

¹⁰ Nggomid̄oho tantu wa'ura bacamu ayat ake ade Alkitab, ’Wadu ma wati d̄i kani b̄a dou mataki tu'u uma wadu nawa'ura ndad̄i wadu ma sarambakaina.

¹¹Akeku rawi Ruma; nawancuku ntikana!’ ”

¹²Edempara samenana dou-dou mana'ekaina bangsa Yahudi ma ringa conto ra ibara ede, na'usahaku wa'u ra leto Ruma Isa, b̄ara siad̄oho nab̄adeku conto ra ibara ede kab̄oha b̄a Ruma Isa d̄i ru'u siad̄oho. Pala siad̄oho nadahu d̄i dou mamboto. Ndad̄i, siad̄oho lao tu'u wi'ina Ruma Isa.

¹³Pila-pila dou Farisi ro pila-pila dou anggota golonga Herodes rakau sod̄i-sod̄i loakud̄u kamab̄u Ruma Isa.

¹⁴Siad̄oho maina d̄i Ruma Isa ro nggahina, ”Pa Guru, madad̄oho mab̄adeku Ita dou marombo ro wati kandad̄i aumu cou-cou rau, Ita matei kantiriku mab̄oha kane'e Ruma Hatalla d̄i ru'u b̄a manusia, b̄ara Ita wati tio kalaita dou. Tanggahijapu b̄a Ita d̄i madad̄oho, ’Nggahi agama ndaita, sab̄ua loaku cola bea d̄i Kaisar atao wati? Pab̄uaku ndai colata bea ede, atao wati?’ ”

¹⁵Ruma Isa nab̄adeku siad̄oho ma coro-coro. Cambe b̄a Sia, ”B̄ab̄auku nggomid̄oho ne'ekaimu b̄ab̄u Nahu? Teijapu d̄i Nahu sab̄ua piti salaka.”

¹⁶Ndad̄i mbei b̄a siad̄oho d̄i Sia sab̄ua piti salaka. Edempara sod̄i b̄a Ruma Isa, ”Gamba pahu ro ngara cou ake?” ”Kaisar,” cambe b̄a siad̄oho.

¹⁷”Nggara ndedesi,” nggahi Ruma Isa, ”mbeipu Kaisar au rantau Kaisar, ro d̄i Ruma Hatalla au rantau Ruma Hatalla.” Siad̄oho mbora akana ringana nggahi Sia.

¹⁸ Pila-pila dou rad̄i golongana Saduki maina d̄i Ruma Isa. (Siad̄oho eded̄u golonga ma nggahi b̄a one dou mamade wati d̄imamori mbali.)

¹⁹ ”Pa Guru,” nggahi siad̄oho d̄i Ruma Isa, ”La Musa tuntina hukum ake d̄i ru'u ndaita: ’Nggara sab̄ua dou mone namadesi ro wati ntauna ana, ndad̄i arina pab̄uaku nika lab̄ona wei ratu'u wi'ina ede loakud̄u mbeina londo ra mai d̄i ru'u b̄a dou ma wa'ura made ede.’

²⁰Parana ntoina wara pidu dou masa'e lab̄o arina. Masasa'e nika, edempara made kai wati ntauna ana.

²¹Sawa'u b̄a ede ma kad̄uakaina nika lab̄o dou mbaru mboha ede, pala sia made wali kai wati ntauna ana. Lampa rawi ma sama ndad̄i rau d̄i arina ma katolukaina,

²²ndede ncau sampe ma kapidukaina. Cumpukaina ndai dou siwe ede made rauna.

²³D̄i ainana d̄i mori mbali kai dou-dou mamade, wei couku dou siwe ede? B̄ara wekina pidu ede nawa'ura nika lab̄o dou siwe ede!”

²⁴Cambe b̄a Ruma Isa, ”Nggomid̄oho makaliru poda. B̄ara nggomid̄oho wati loamu ka'ao Alkitab ro kuasa Ruma Hatalla.

²⁵B̄ara dou-dou mamade namori mbalisi, siad̄oho wati d̄imanika wali, malaisi siad̄oho namori b̄une santika mala'eka d̄i saroga.

²⁶ Ro mab̄oha dou mamade d̄i kamori mbali, sab̄ua watipu parana baca b̄a nggomid̄oho d̄i ade kitab Musa mab̄oha rompa ma kalea ede? D̄i ade ayat-ayat ede ratunti b̄a one Ruma Hatalla manggahi d̄i la Musa, ’Nahura Ruma Hatalla Ibrahim, Ruma Hatalla Ishak ro Ruma Hatalla Yakub’

²⁷Ruma Hatalla ede laina Ruma Hatalla dou mamade. Sia Ruma Hatalla dou mamori. Nggomid̄oho makaliru podaku!”

²⁸ Edempara mai sab̄ua dou guru agama kade'ena nuntu ra nggahi Ruma Isa lab̄o dou-dou rad̄i golongana Saduki ede. Guru agama ede edana b̄a one Ruma Isa nawa'ura cambe kai kataho d̄i dou-dou ede. Ndad̄i sod̄i b̄a sia d̄i Ruma Isa, ”Parenta mab̄eku ma penti poda rad̄i samenana parenta?”

²⁹ Cambe b̄a Ruma Isa, ”Parenta ma sarambakaina, eded̄u: ’Ringapu, oe bangsa Israel! Ruma Hatalla ndaita, Ruma ede kese weki-Na.

³⁰Meci ra ca'upu Ruma Hatalla Rumamu kai sapoda-poda ademu, kai samenana nawa ra sarumbumu, kai sara'a fiki ra kananumu ro kai samenana tenggo ra walemu.’

³¹ Parenta makad̄uakaina eded̄u: ’Meci ra ca'upu sasamamu manusia, b̄une nggomid̄oho meci ra ca'umu sarumbu ndaimu.’ Wati wara walina parenta makalai ma ncewi penti selasi d̄ua mbua parenta ede.”

³² Edempara guru agama ede nggahina d̄i Ruma Isa, ”Nancihi poda, Pa Guru! Napodaku au ranggahi b̄a Ita: Ruma eded̄u Ruma Hatalla ma kese weki, ro wati wara walina Ruma Hatalla ma kalai.

³³ Ro manusia pab̄uaku meci ra ca'una Ruma Hatalla kai sapoda-poda adena, ro kai sara'a fiki ra kananuna ro kai samenana tenggo ra walena. Ro sia rau pab̄uaku meci ra ca'una sasama manusia b̄une meci ra ca'una sarumbu ndaina. Ede nancewi tahopu ntewi kaisi lab̄o d̄onggo ra mbei koroba raka'a ro koroba-koroba makalai d̄i ru'u Ruma Hatalla.”

³⁴Ruma Isa edana b̄a one guru agama ede nawa'ura cambe kai mancihi poda. Ro nggahi Ruma Isa d̄i sia, ”Nggomi mane'empara ndad̄imu anggota ela Karaja'an Allah.” Sawa'u b̄a ede wati kone wara sab̄ua dou ma disa wali sod̄i Ruma Isa.

³⁵Wunga ngoa ra tei d̄i Bait Allah, sod̄i b̄a Ruma Isa, ”B̄uneku guru-guru agama loakaina nggahi b̄a one Sangaji Mambei salama ede londo ra mai la Daud?

³⁶ Sapodakaina ndai la Daud — b̄ara rangoa b̄a Roh Allah — nggahina, ’Ruma nggahina d̄i Rumaku: Dohopu tawela wana-Ku sampe Nahu mandawina musu-musu-Mu suju ra oko d̄i Nggomi.’

³⁷Ndad̄i Nggara la Daud mapehe Sangaji Mambei salama ede ’Ruma’, b̄uneku loana Sia londo ra mai la Daud?” Dou mboto ma wara d̄i Bait Allah ede d̄ihi adena ringa tei b̄a Ruma Isa.

³⁸Nggahi Sia d̄i dou-dou ede, ”Aina kabare d̄i guru-guru agama. Siad̄oho naca'u lampa-lampa kai jumba ma d̄ondo ro naca'u d̄i lia ra horoma d̄i amba-amba.

³⁹Siad̄oho naca'u d̄i hid̄i-hid̄i ta d̄ei tando uma sambeakai ro d̄i ndiha-ndihakai.

⁴⁰Siad̄oho natipuku dou-dou siwe mbaru mboha ro narampaku umana. Ro d̄i b̄ontokaina dab̄ae siad̄oho ede, siad̄oho naca'u sambea mad̄ondo-d̄ondo. Hukuma d̄i ru'u b̄a siad̄oho ede peasi nataniku!”

⁴¹Wakatu doho ncao tandona lab̄o hid̄i taukai d̄onggo ra mbei d̄i Bait Allah, Ruma Isa tio kab̄aena dou-dou makalu'u pitina d̄i ade hid̄i taukai d̄onggo ra mbei ede. Mboto dou mantau ra wara makalu'u mboto piti;

⁴²edempara sab̄ua dou siwe mbaru mboha ma ncoki mori mai rauna. Sia kalu'una d̄ua mbua piti romba, eded̄u piti ece ma cumpukai to'i co'ina.

⁴³Ndad̄i Ruma Isa ouna anamorid̄oho-Na, edempara nggahina d̄i siad̄oho, ”Tio kab̄aepu ake: Dou siwe mbaru mboha ma ncoki poda mori ede kalu'una d̄i ade hid̄i taukai d̄onggo ra mbei ede nancewi mbotopu sia ntewi kaisi lab̄o rakalu'u b̄a sara'a dou makalaina.

⁴⁴B̄ara siad̄oho sara'a mbeina ma rancewi rad̄i ntau ra warana. Pala dou siwe mbaru mboha ede konena ipi ncoki morina, sia nambei sara'aku ma wara d̄i ndaina — sapodakaina naparalu b̄a sia d̄i ru'u morina.”