Read Bima MARKUS 2 Bible Online

MARKUS 2 - Bima bible

MARKUS 2

¹Pila-pila nai sawa'u b̄a ede Ruma Isa lao mbali aka Kapernaum. Edempara mbou haba b̄a one Sia wara d̄i uma.

²Edempara mboto dou mamai. Siad̄oho kangguduna ta aka sampe watid̄u wara hid̄i wali. D̄i tad̄a ncai rau b̄ini cika b̄a dou. Edempara karongga b̄a Ruma Isa d̄i siad̄oho haba ma ramai ta Ruma Hatalla.

³Sia wunga nuntuna, upa dou makalei sab̄ua dou mamade b̄inci d̄i mai wa'ana d̄i Ruma Isa.

⁴Pala b̄ara ipi mboto dou, siad̄oho wati loana lu'u d̄i kompe Sia. Ndad̄i siad̄oho henggana b̄utu uma pas ese mai b̄a dohokai Ruma Isa. Sawa'u b̄a ede, kalondo b̄a siad̄oho dou mamade b̄inci ede ro dipina.

⁵Wakatu eda b̄a Ruma Isa b̄a ndede na'e imbi siad̄oho, nggahi Sia d̄i dou mamade b̄inci ede, ”Ana-Ku, dosa-dosamu wa'ura kangampu wea.”

⁶Pila-pila dou guru agama ma wunga doho ta ede tampu'ura sod̄i-sod̄i d̄ei adena,

⁷”Disa poda dou ake nggahi ndede! Sia nakatuna ra kab̄awaku Ruma Hatalla. Cou ma loa kangampu wea dosa, selasi ndai Ruma Hatalla?”

⁸D̄iwakatu ede wa'u Ruma Isa nab̄adeku fiki ra kananu siad̄oho. Edempara nggahi Sia, ”B̄ab̄auku nggomid̄oho d̄i sod̄i-sod̄i ndedekaimu d̄ei ademu?

⁹B̄e ma ncewi mod̄a: nggahi, ’Dosamu wa'ura kangampu wea’, atao nggahi ’Tu'ura, hantapu dipimu ro lampara’?

¹⁰Pala ake Nahu d̄imabukutina d̄i nggomid̄oho b̄a one ese wawo dunia ake Ana Manusia nantau kuasa kangampu wea dosa.” Edempara nggahi Ruma Isa d̄i dou ma made b̄inci ede,

¹¹”Tu'ura, hantapu dipimu ro lao dulara!”

¹²Sia tu'u lalona, wehana dipina edempara losana kai sakasi b̄a siad̄oho sara'ana. Dou-dou ede midi adena edempara roi ra wadina Ruma Hatalla. Nggahi siad̄oho, ”Watipu parana eda b̄a ndai lampa rawi b̄une ake!”

¹³Ruma Isa lao mbali walina aka kengge Ndano Galilea. Mboto dou mamai d̄i Sia, ro Sia ngoa ra teina siad̄oho.

¹⁴Wunga lampa Ruma Isa ta ede, Sia edana sab̄ua dou mataki tagi bea, mangara la Lewi, ana la Alfeus, mawunga doho d̄i kanto bea. ”B̄atupu Nahu,” nggahi Ruma Isa d̄i sia. Edempara tu'u kid̄i la Lewi ro lao b̄atuna Ruma Isa.

¹⁵Wakatu Ruma Isa wunga ngahana d̄i uma la Lewi, mai lalo mboto dou mataki tagi bea ro dou-dou rawi'ikai wati taho b̄a ela ra dou b̄atu ngaha sama lab̄o Ruma Isa ro anamorid̄oho-Na. B̄ara mboto d̄i ade weki siad̄oho mab̄atu Ruma Isa.

¹⁶Pila-pila dou guru agama rad̄i kalompo Farisi ma'edana Ruma Isa ngaha sama-sama lab̄o dou-dou mataki tagi bea ro dou-dou rawi'ikai wati taho ede. Ndad̄i siad̄oho sod̄ina d̄i anamori Ruma Isa, ”B̄ab̄auku gurumu ngaha samakaina lab̄o dou-dou mataki tagi bea ro dou-dou ma wati taho ede?”

¹⁷Ringa b̄a Ruma Isa sod̄i b̄a siad̄oho ede, edempara cambena, ”Dou ma wati supu wati paraluna dokte; cuma dou ma supumpa. Nahu maiku laina d̄ima'ou dou ma wi'ikai wekina wa'ura taho, malaisi dou rawi'ikai awa ra tuna.”

¹⁸D̄isakali wakatu anamori la Yahya Mataki kandeu karaso dou ro dou-dou Farisi, wunga puasana. Edempara wara dou mamai d̄i Ruma Isa ro sod̄ina, ”B̄ab̄auku anamori la Yahya Mataki kandeu karaso dou ro anamori dou Farisi d̄ipuasakaina, nggara anamori Ita wati?”

¹⁹Cambe b̄a Ruma Isa, ”Wunga ndiha nika, sab̄ua dou-dou ra'unda wati ngahana? Nggara b̄unti mone mbuipu sama-samana lab̄o siad̄oho, tantu siad̄oho ngahana.

²⁰Pala d̄imamai wakatuna b̄unti mone d̄i weha rad̄i siad̄oho. D̄iwakatu edeku siad̄oho ampona wati ngaha.

²¹Wati wara dou ma nempa b̄aju mpasa kai satob̄e ci mab̄ou. B̄ara ci ranempakai ede d̄imafi, i ro nakanci'iku b̄aju ede, ndad̄ina nanaha na'e nci'ina.

²²Ndede rau wati wara dou ma lua anggo mab̄ou d̄i ade kad̄ud̄u huri ma mpasa. B̄ara anggo ma b̄ou ede nakancipaku kad̄ud̄u ede. Cumpukaina sara'a anggo ro kad̄ud̄u iha mpoa. Anggo ma b̄ou pab̄uaku lua d̄i ade kad̄ud̄u ma b̄ou rau!”

²³ D̄isab̄ua ainaina Sabat, wakatu Ruma Isa lampa saina sab̄ua oma gando, anamorid̄oho-Na tampu'u pokena gando.

²⁴Edempara dou-dou Farisi nggahina d̄i Ruma Isa, ”B̄ab̄auku anamorid̄oho-Mu sapakaina hukum agama ndaita, kai karawina rakantakai d̄i ainaina Sabat?”

²⁵ Cambe b̄a Ruma Isa, ”Sab̄ua watipu parana baca b̄a nggomid̄oho au rakarawi b̄a la Daud, wakatu Abyatar wunga kalampana taki kai dou mana'ekai imam-imam. Wakatu la Daud ro anamorid̄ohona hid̄o, ro wati ntauna ngaha ra nono, sia lu'una d̄i ade Bait Allah, ro ngaha roti ma wa'ura d̄onggo ra mbei d̄i Ruma Hatalla. Ro roti ede mbei rauna anamorid̄ohona. Sapodakaina nggahi agama ndaita, imam-imam mpoampa ma loana ngaha roti ede.”

²⁷Edempara nggahi wali Ruma Isa, ”Ainaina Sabat randawi d̄i ru'u manusia; laina manusia d̄i ru'u ainaina Sabat.

²⁸Ndad̄i, Ana Manusia nantau kuasa, kone d̄i ainaina Sabat.”