Read Bima MARKUS 3 Bible Online

MARKUS 3 - Bima bible

MARKUS 3

¹Ruma Isa lao mbali walina aka uma sambeakai. Ta ede wara sab̄ua dou mamade b̄inci sab̄ae rimana.

²Ta ede rau wara duo-dou ma ne'e ngupa rawi ncara Ruma Isa, loakud̄u da'awana Sia. Ndad̄i siad̄oho tio kab̄ae ncauna Sia sab̄ua Sia nakatahoku dou d̄i ainaina Sabat.

³Ruma Isa nggahina d̄i dou mamade b̄inci sab̄ae rimana ede, ”Mai kid̄i ta ake, ta d̄ei tando.”

⁴Edempara Sia sod̄ina d̄i dou-dou ma wara ta ede, ”Nggahi agama, ndaita loa karawi au d̄i ainaina Sabat? Karawi mataho atao karawi ma'iha? Kasalamaku dou atao hadeku dou?” Siad̄oho namidimpa.

⁵Kai mbanina Ruma Isa tiona d̄ikompe ra pei-Na, pala Sia ncoki ade rauna, b̄ara siad̄oho nawancuku tera tutana. Edempara Sia nggahina d̄i dou mamade b̄inci sab̄ae rimana ede, ”D̄alapu rimamu.” D̄ala b̄a dou ede rimana, ro rimana ede ndad̄i taho.

⁶Edempara dou-dou Farisi tu'u wi'ina uma sambea ede, edempara mafaka rocina lab̄o pila-pila dou mahoru Herodes, d̄i hadekaina Ruma Isa.

⁷Ruma Isa ro anamorid̄oho-Na lao pesona weki aka Ndano Galilea. Edempara mboto poda dou rad̄i Galilea ma lao b̄atu Ruma Isa. Mboto rau ma rad̄i Yudea,

⁸rad̄i Yerusalem, rad̄i dana ra rasa Idumea, ro rad̄i dana ra rasa ele mai b̄a Yordan, ro rad̄i kompe ra pei kota-kota Tirus ro Sidon. Siad̄oho sara'ana mai d̄i Ruma Isa, b̄ara siad̄oho nawa'ura ringa lampa rawi-lampa rawi rawa'u karawi b̄a Sia.

⁹ Dou-dou ede nawancuku mbotona, ndad̄ina Ruma Isa kauna anamorid̄oho-Na sadia sampa d̄i ru'u b̄a Sia, b̄aib̄a dacici b̄a dou-dou mamboto ede.

¹⁰Sia katahona dou mawancu mboto, ndad̄ina sara'a dou masupu naciciku angina b̄a ne'ena d̄eni lab̄o Sia loakud̄u rakana d̄ama Sia.

¹¹Ro dou-dou ralu'ukai b̄a roh seta, saniki edana Sia, nasuju ncauku d̄i tando Sia ro nakanggicaku ”Nggomira Ana Ruma Hatalla!”

¹²Pala Ruma Isa nakanta kapodaku roh-roh seta ede ngoa dou couku Sia.

¹³Edempara Ruma Isa tekana ese sab̄ua doro to'i, ro ouna dou-dou rakane'ekai-Na. Dou-dou ede maina,

¹⁴edempara kad̄ale b̄a Sia sampuru d̄ua dou ade weki doud̄oho ede. Nggahi-Na, ”Nahu kad̄aleku nggomid̄oho, loakud̄u nggomid̄oho d̄imalab̄ona Nahu, loakud̄u nggadu b̄a Nahu nggomid̄oho d̄imangoa ra kahaba Haba Mataho rad̄i Ruma Hatalla,

¹⁵ro nggomid̄oho d̄imaraka kuasa d̄i b̄aka kalosakaimu roh-roh seta.”

¹⁶Akeku ngara sampuru d̄ua dou ede: la Simon (mad̄ipehekai rau-Na la Petrus),

¹⁷la Yakub ro la Yahya arina, eded̄u ana-ana la Zebedus (siad̄oho ake tangarakai b̄a Sia Boanerges aona ”ana karece ai”),

¹⁸la Andreas, la Filipus, la Bartolomeus, la Matius, la Tomas, la Yakub ana la Alfeus, la Tadeus, Simon la Patriot,

¹⁹ro la Yudas Iskariot ma d̄onggo Ruma Isa d̄i dou-dou ma musu-Na.

²⁰Edempara Ruma Isa dulana aka uma. Pala dou mamboto mai kab̄oro walina weki, sampe Ruma Isa ro anamorid̄oho-Na wati kone loana ngaha.

²¹Nggahi b̄a dou-dou, ”Sia nawa'ura ringu!” Ro wakatu ringa b̄a iwa ra wekina mab̄oha lampa rawi ede, siad̄oho lao weha aona Sia.

²² Guru-guru agama ma ramai ta Yerusalem manggahi, ”Sia lu'ukai b̄a Beelzebul! Mana'ekaina roh-roh seta edeku ma rambeina kuasa d̄i Sia d̄i b̄aka kalosakaina roh seta.”

²³Edempara ou b̄a Ruma Isa dou mamboto ede, ro caritana d̄i siad̄oho pila-pila mbua conto ra ibara. ”B̄uneku loana roh seta mab̄aka kalosa roh seta,” nggahi Ruma Isa.

²⁴”Nggara sab̄ua negara mab̄i'a ade kalompo-kalompo ma cua-cua musu angi, negara ede wati d̄imantoi.

²⁵Ro nggara ade sab̄ua kaluarga wati wara sab̄ua nggahi ra rawi ro ade weki anggota kaluarga cua musu angina, kaluarga ede d̄imaleli.

²⁶Nggara d̄i ade karaja'ana Ibilis nambi'a ro namususi angina, karaja'ana ede wati ntoina ro pasti d̄imambora.

²⁷Wati wara kone sab̄ua dou rau maloa lu'u d̄i ade uma dou ma tenggo ro weha rampana ntau ra warana, nggara watisi sia d̄iki ra leto ulu wa'una dou ma tenggo ede. Sawa'u b̄a ede, ampona sia loa weha rampa ntau ra warana.

²⁸D̄ib̄ademu! Dou nakarawisi dosa ro narentasi ma iha-iha, sia loa d̄ikangampu wea.

²⁹ Pala sia nakatuna ra kab̄awasi Roh Allah, sia wati loa d̄ikangampu! B̄ara katuna ra kab̄awana ede eded̄u dosa ma'ederahid̄i.” (

³⁰Nggahi ndedekai Ruma Isa b̄ara wara dou ma nggahi b̄a one Ruma Isa ralu'ukai b̄a roh seta.)

³¹Sawa'u b̄a ede ina ro ari-ari Ruma Isa maina. Siad̄oho ngenana ta ari lua ro kauna dou ma'ou Ruma Isa.

³²Wakatu ede mboto dou mawunga doho heko Ruma Isa. Nggahi siad̄oho d̄i Sia, ”Pa, ina ro ari-ari Ita wara ta ari lua. Siad̄oho nangupaku Ita.”

³³Cambe b̄a Ruma Isa, ”Cousi ina Nahu? ro cousi ari-ari Nahu?”

³⁴Edempara ntanda b̄a Sia dou-dou ma doho heko Sia ro nggahina, ”Akeku ina ro ari-ari-Ku!

³⁵Dou ma rakarawi au rakane'ekai b̄a Ruma Hatalla, sia edeku ari ra sa'e mone, ama ncawa, ro ina-Ku.”