Read Bima MARKUS 4 Bible Online

MARKUS 4 - Bima bible

MARKUS 4

¹ Ruma Isa tei walina d̄ikengge Ndano Galilea. Mboto poda dou makanggudu d̄i Sia. B̄ara ndedena Sia lao dohona d̄i ade sab̄ua sampa d̄i wawo oi, ro dou mamboto ede kid̄ina d̄i kengge ndano.

²Edempara Ruma Isa ngoa ra teina siad̄oho mboto lampa rawi kai kanina conto ra ibara. Ndakeku Sia ngoa ra teina siad̄oho.

³”Ringa ra kade'epu! Waraku sab̄ua dou makanggihi lao pari d̄ei.

⁴Wakatu sia wunga parina d̄ei, wara d̄ei ma mab̄u d̄i ncai. Edempara mai nasi ro ngaha kampoina d̄ei ma mab̄u ede.

⁵Wara rau ma mab̄u d̄i hidi mamboto waduna kura danana. D̄ei-d̄ei ede woko rocina b̄ara danana sato'i,

⁶pala wakatu teka liro, woro-woro d̄ei ede tampu'ura malena edempara mango ro made b̄ara wati ipi lu'u d̄ei amuna.

⁷Wara rau d̄ei ma mab̄u d̄i woha mpori marui. Mpori marui ede woko ro apina woro-woro ede ndad̄ina wati loana mbua.

⁸Pala wara rau d̄ei ma mab̄u d̄i dana ma ngawa. D̄ei ede woko, edempara ndad̄i nana'e ro mbuana, wara ma tolu mpuru, wara ma ini mpuru, ro wara ma saratu kali lipa.”

⁹Sawa'u b̄a caritana conto ra ibara ede, nggahi Ruma Isa, ”Nggomid̄oho ma ntau fiko ringa ra kade'epu!”

¹⁰Wakatu Ruma Isa kesena, dou-dou ma wa'ura ringa ngoa ro tei-Na mai rakana Sia sama sama lab̄o sampuru d̄ua dou anamori-Na. Siad̄oho narahoku Sia ngoa kab̄ae auku aona conto ra ibara ede.

¹¹Edempara Ruma Isa nggahina d̄i siad̄oho, ”Nggomid̄oho wa'ura mbei b̄a Ruma bareka d̄i b̄adekaimu rahasia Karaja'an Allah. Pala dou-dou ma kalai rangoa ra tei kai conto ra ibara,

¹² Loakud̄u ’Siad̄oho d̄imatio ra kade'e ncau pala wati b̄adena au ma ndad̄i, siad̄oho d̄imaringa ncau-ncau, pala wati loana ka'ao, ake ndad̄ina loakud̄u siad̄oho aina edana ro loana ka'ao ro aina maina d̄i Ruma Hatalla ro Ruma Hatalla makangampu wea siad̄oho.’ ”

¹³Edempara Ruma Isa nggahina d̄i siad̄oho, ”Nggara nggomid̄oho watisi loamu ka'ao conto ra ibara ede, b̄uneku loamu ka'ao b̄a nggomid̄oho conto ra ibara ma kalaina?

¹⁴Dou ma pari d̄ei ede eded̄u dou ma ngoa ra kahaba haba ma ramai ta Ruma Hatalla.

¹⁵D̄ei ma mab̄u d̄incai ibara kai dou-dou ma ringa haba b̄uneku Ruma Hatalla ma parenta. Ndede ringana ede, mai Ibilis ro wehana au rawa'u pari d̄ei ade siad̄oho.

¹⁶D̄ei ma mab̄u d̄i hid̄i mamboto kai wadu ibara kai dou-dou ma ringa haba ede, ro tarima lalona kai sana adena.

¹⁷Pala haba ede wati ntauna amu d̄ei ade siad̄oho, ndad̄ina wati ntoina. Ndede siad̄oho iuna susa ra ncoki atao kancoki b̄a dou b̄ara haba ede, siad̄oho murta lalona.

¹⁸D̄ei ma mab̄u d̄i ade woha mpori marui ede ibara kai dou-dou ma ringa haba ede,

¹⁹pala nafiki ra kananuku mab̄oha mori siad̄oho ro nane'eku mori ntau ra wara. Nawasu mamboto pahu lu'u d̄ei ade siad̄oho. B̄ara ndedena haba ma ramai ta Ruma Hatalla na'apiku wekina d̄ei ade siad̄oho, ndad̄ina wati ntauna wua.

²⁰Ro d̄ei ma mab̄u d̄i dana ma ngawa ra howo ede ibara kai dou-dou ma ringa haba ede ro tarimana, siad̄oho nambua mboto, wara ma tolu mpuru, ma ini mpuru, ro wara ma saratu kali lipa hasina.”

²¹ Sawa'u b̄a ede Ruma Isa nggahi rauna, ”Sab̄ua parana dou ma ka'a ilo edempara b̄ontokaina roa, atao mawi'i awa wombo hid̄i marukai? Sab̄ua sia wati wi'ina ilo ede ese wawo ed̄i ilo?

²² Wati wara ma ili weki ma wati d̄i da'eda, ro wati wara lampa rawi rarahasia d̄imadahengga weki.

²³B̄ara ndedena, nggara ma ntausi fiko, ringapu!”

²⁴ Edempara nggahi wali Ruma Isa, ”Kade'e kab̄aepu au raringa b̄a nggomid̄oho ake! Taka rakani b̄a nggomid̄oho d̄i ru'u dou makalai d̄ikani rau b̄a Ruma Hatalla d̄i ru'u nggomid̄oho — ro nanaha ncewi mboto wali.

²⁵ B̄ara dou ma wa'ura wara ntauna, d̄imbei kamboto wali; pala dou ma wati wara ntauna, sato'i ma mbuipu wara d̄i ndaina d̄iweha mbali rau.”

²⁶Ruma Isa tuwu walina nuntu-Na, ”Karaja'an Allah, ka'ada'ana loa d̄i conto ra ibara kai b̄une sab̄ua dou ma pari d̄ei d̄i omana.

²⁷Aimangad̄i sia namaruku; aimarai sia nab̄olaku. Ro wakatu ede d̄ei-d̄ei ede woko ro nanaha na'e. Pala rab̄une carana d̄ei-d̄ei ede wokona ro nanaha na'e, dou ede wati b̄adena.

²⁸Dana edeku tantu ma kalosana hasi: saramba-rambakaina takona, sawa'u b̄a ede wurina, edempara wuana.

²⁹ Ro nggara nawa'usi tua gando ede, dou ede rau natampu'ura rombena b̄ara rakara wakatuna d̄i wehakai.”

³⁰”Karaja'an Allah, kai auku ndai loata ntewikai?” Sod̄i wali b̄a Ruma Isa, ”Kai conto auku d̄ikani b̄a ndai d̄i tarangkakai?

³¹Karaja'an Allah, ka'ada'ana b̄une conto ra ibara ake: Sanggini isi sawi raweha b̄a sab̄ua dou edempara nggud̄ana d̄i dana. Isi sawi eded̄u d̄ei ma cumpukai to'ina d̄i dunia.

³²Pala nawa'usi rawoko, sia ndad̄i ma wancu na'e d̄i ade woha ntadi ra ntedi. Sanga-sangana nawancuku nggarina ndad̄ina nasi-nasi loa mai, ro nandawiku sob̄u d̄i sanga-sangana.”

³³Ndedeku Ruma Isa ngoa ra teina dou kai kanina mboto conto ra ibara b̄une ede, saloa ka'ao b̄a siad̄oho.

³⁴Ruma Isa nakani ncauku conto ra ibara nggara Sia nangoa ra teisi dou-dou ede. Pala nggara ndai Sia lab̄o anamorid̄oho-Na, Sia nangoa kab̄aeku sara'ana d̄i siad̄oho.

³⁵D̄i'aimambia ede wa'u Ruma Isa nggahina d̄i anamorid̄oho-Na, ”Maira ndai talaoku ipa b̄ae b̄a ndano.”

³⁶Edempara Ruma Isa ne'ena ese sampa, ro anamorid̄oho-Na tu'u wi'ina dou mamboto d̄i kengge ndano, edempara ne'ena ese sampa ra ne'ekai Ruma Isa. Sampa-sampa makalaina wara rau ta ede. Edempara Ruma Isa ro anamorid̄oho-Na tampu'ura lojana.

³⁷Wati ntoina sawa'u b̄a ede mai angi na'e. Balumba tampu'ura b̄oena sampa ro lu'una ade sampa ndad̄ina sampa ede d̄i sato'i dab̄inikai b̄a oi.

³⁸D̄i keto sampa ede, Ruma Isa wunga maruna kai lingga d̄i tuta-Na. Anamorid̄oho-Na rod̄una Sia. Nggahi siad̄oho, ”Pa guru, sab̄ua wati ne'eta b̄ade Ita, ndai ihara?”

³⁹Tu'u Ruma Isa, edempara b̄akana angi ede, ro nggahina d̄i ndano, ”Midi, denggara!” Angi rau denggana, ro ndano nawancuku midina.

⁴⁰Edempara Ruma Isa nggahina d̄i anamorid̄oho-Na, ”B̄ab̄auku nggomid̄oho dahukaimu? B̄ab̄auku nggomid̄oho wati imbikaimu d̄i Nahu?”

⁴¹Edempara siad̄oho ndad̄i dahu ro nggahina d̄i sab̄ua lab̄o sab̄ua dou, ”Cousi sapodakaina dou ake, sampe angi ra balumba rau nato'a d̄i Sia.”