Read Bima MARKUS 7 Bible Online

MARKUS 7 - Bima bible

MARKUS 7

¹Sakalompo dou Farisi ro pila-pila dou guru agama ma ramai ta Yerusalem maina d̄i Ruma Isa.

²Siad̄oho na'edaku pila-pila dou anamori Ruma Isa mangaha kai rima ma wati raso sacara agama, eded̄u kai watira waca uluna rima b̄une atora agama.

³Dou-dou Farisi, ndede rau sara'a dou Yahudi, nawancuku to'ana b̄atu lampa rawi ranginakai d̄i wa'i ra waro siad̄oho. Siad̄oho wati d̄imangaha, sawatipu b̄a wacana rima b̄une cara rawa'u katantukai.

⁴Au rawelina d̄i amba wati d̄imangaha, sawatipu b̄a waca ulu wa'una. Ro mbotopu atora makalai d̄i wa'i ra waro siad̄oho ma mbuipu cia nenti b̄a siad̄oho; b̄une misakai atora alo gala, mangko, ro tau ra tu'i randawi kai romba.

⁵B̄ara ndedena dou-dou Farisi ro guru-guru agama ede sod̄ina d̄i Ruma Isa, ”B̄ab̄auku anamori-Mu ngaha kai rima wati rawaca? B̄ab̄auku siad̄oho wati b̄atukaina lampa rawi ranginakai d̄i wa'i ra waro ndaita?”

⁶ Cambe b̄a Ruma Isa, ”Nggomid̄oho dou ma ca'u coro-coro! Nancihi podaku nggahi rakarongga b̄a Ruma Hatalla d̄i Yesaya mab̄oha nggomid̄oho, eded̄u, ’Ndake nggahi Ruma Hatalla, Dou-dou ede cuma nembana Nahu kai nggahi ra eli, pala ade siad̄oho d̄o'o d̄i Nahu.

⁷Mpoampa siad̄oho nembana Nahu, b̄ara atora manusia ratei b̄a siad̄oho b̄une-b̄une ede atora Nahu!’

⁸Parenta-parenta Ruma Hatalla wati kaco'i b̄a nggomid̄oho, ro atora-atora manusia nenti kacia b̄a nggomid̄oho.”

⁹Edempara nggahi wali Ruma Isa, ”Nggomid̄oho maloa poda tula parenta Ruma Hatalla loakud̄u ngge'empa nenti kaciamu rangoa ra tei b̄a ndaimu.

¹⁰ Musa nawa'ura mbei parenta ake, ’Lia ra horomapu ama ro inamu,’ ro cou-cou ma'i'a ra b̄a'a ama ra inana, pab̄uaku d̄i hukum made.’

¹¹Pala nggomid̄oho ngoa ra teimu: Nggara dou manggahi d̄i dou matuana, ’Au ma d̄i pab̄ua d̄imbei b̄a mada d̄i ru'u ama ro inaku, wa'ura d̄onggo ra mbei b̄a mada d̄i Ruma Hatalla,’

¹²edempara nggomid̄oho wati pab̄uamu dou ede d̄i pab̄ua karawi d̄i bantukaina ama ra inana.

¹³Ndad̄i kai ngoa ra tei b̄a ndaimu rambei b̄a nggomid̄oho d̄i dou-dou, nggomid̄oho makamboraku nggahi ra eli Ruma Hatalla. Mbuipu mboto walina lampa rawi b̄une ake rakarawi b̄a nggomid̄oho.”

¹⁴Edempara ou b̄a Ruma Isa sakali wali dou mamboto ede ro nggahina d̄i siad̄oho, ”Ringa ra kade'epu loakud̄u loamu ka'ao!

¹⁵Wati wara au-au ma ramai ta ari lua ma lu'u d̄ei dou ma loa kandad̄i dou ede najis. Pala, ma ralosa rad̄i sab̄ua-b̄ua dou, edeku ma kandad̄ina sia najis. [

¹⁶Ndad̄i, nggara mantausi fiko ringa ra kade'epu.]”

¹⁷Wakatu Ruma Isa tu'u wi'ina dou mamboto ede ro lu'una d̄ei uma, anamorid̄oho-Na sod̄ina d̄i Sia mab̄oha aona conto ra ibara ede.

¹⁸Edempara nggahi Ruma Isa d̄i siad̄oho, ”Sab̄ua nggomid̄oho wati ngge'epu loamu ka'ao? Sab̄ua nggomid̄oho wati loamu ka'ao b̄a one ma ralu'u d̄ei sab̄ua-b̄ua dou wati loana kandad̄i najis dou ede?

¹⁹B̄ara ma ralu'u ede wati saina d̄i ade, pala nalampa ta loko, edempara nalosa wali.” Kai nggahi ra eli ede Ruma Isa nakatadaku b̄a one sara'ana ngaha ra nono halal.

²⁰Edempara Ruma Isa nggahi walina, ”Ma ralosa d̄i dou, edeku ma kasampuna sia.

²¹B̄ara ramaina ta d̄ei, eded̄u ramaina ta d̄ei ade, woko fiki ra kananu madab̄ae ma kandad̄i dou karawi madab̄ae, mpanga, hade dou,

²²zina, matipu dou, mafitina, ro makarawi sara'a madab̄ae, mandad̄i na'e ade, wati sopa, hiana, sombo, ro ncoki d̄i ngoa ra tei.

²³Sara'a ma iha ra dab̄ae ede ramai d̄ei maina, ro edeku ma kandad̄ina najis dou.”

²⁴Sawa'u b̄a ede Ruma Isa tu'u wi'ina hid̄i ede, ro laona aka dana ra rasa d̄eni lab̄o kota Tirus. Sia lu'una d̄ei sab̄ua uma ro wati ne'ena d̄i b̄ade b̄a dou b̄a one Sia wara d̄i uma ede. Pala Sia wati loana cili weki.

²⁵Sab̄ua ina, ma ana siwena lu'ukai b̄a roh seta, naringaku mab̄oha Ruma Isa. Sia maina d̄i Ruma Isa ro sujuna d̄i tando Sia,

²⁶narahoku loakud̄u Ruma Isa b̄aka kalosa roh seta rad̄i anana ede. Dou siwe ede laina dou Yahudi, warakaina d̄i dana ra rasa Fenisia d̄i Siria.

²⁷Nggahi Ruma Isa d̄i sia, ”D̄ambe-d̄ambe to'i pab̄uaku mbei ulu ngahana. Wati tahona weha wea ngaha ra nono d̄ambe to'i, sawa'u b̄a ede d̄i b̄ale mbei lako.”

²⁸”Poda Ruma,” cambe b̄a dou siwe ede, ”lako-lako mawara awa wombo meja rau nangaha sewi-sewi rab̄ab̄u d̄ambe-d̄ambe to'i!”

²⁹Edempara Ruma Isa nggahina d̄i sia, ”B̄ara cambemu ede, dulara; roh seta nawa'ura losa rad̄i anamu!”

³⁰Ina ede dulana. D̄i'uma, sia edana anana mawunga maru d̄i hid̄i marukai, ro roh seta nawa'ura poda-poda losa d̄ei ana dou ede.

³¹Sawa'u b̄a ede Ruma Isa tu'u wi'ina dana ra rasa Tirus, ro lampa sai-Na Sidon lao aka Ndano Galilea. Sia wehana ncai malampa sai dana ra rasa Sampuru Kota.

³²Ta ede wa'a b̄a dou d̄i Sia sab̄ua dou ma mpongi ra mpinga. Raho b̄a siad̄oho toho to'ina rima-Na ese wawo dou ede.

³³Ruma Isa wa'a peso kalaina dou ede rad̄i dou mamboto, edempara kalu'una kangge-Na d̄i b̄ali b̄ae fiko dou ede. Edempara fela b̄a Ruma Isa, ro d̄amana rera dou ede.

³⁴Sawa'u b̄a ede Ruma Isa d̄ongana langi, edempara sasi ka'ipina nawa-Na ro nggahi-Na d̄i dou ede, ”Efata,” aona ”Hengga ra weki!”

³⁵Fiko dou ede loana ringa ro rerana ndad̄i mapu mbali, ro sia tampu'ura loana nuntu.

³⁶Edempara Ruma Isa kantana siad̄oho sara'a nuntu ra nggahi mab̄oha lampa rawi ede d̄i cou-cou rau. Pala nanaha kanta b̄a Ruma Isa, nanaha edeku kambou b̄a siad̄oho.

³⁷Ro samenana dou ma ringana ede nawancuku mbora akana. Nggahi siad̄oho, ”Sara'a rakarawi-Na kai taho! Sia nakandad̄iku dou mampinga ndad̄i loa ringa ro dou mampongi ndad̄i loa nuntu!”