Read Bima MARKUS 9 Bible Online

MARKUS 9 - Bima bible

MARKUS 9

¹”D̄ib̄ademu!” Nggahi Ruma Isa. ”Rad̄i ade weki nggomid̄oho ta ake wara ma wati d̄imamade, sawatipu b̄a edana karaja'an Allah lab̄o kuasana!”

² Ini nai sawa'u b̄a ede, wa'a b̄a Ruma Isa la Petrus lab̄o la Yakub ro la Yahya, kalai weki d̄i sab̄ua doro ma d̄ese. D̄itando mada siad̄oho Ruma Isa rungka pahuna.

³Kani ra lombona ndad̄i lanta kancilo. Wati wara kone sab̄ua dou rau mataki dub̄a d̄i dunia ake ma wa'u dub̄a b̄une lanta ede.

⁴Edempara anamori-Na toluna ede edana Ruma Isa manuntu ra nggahi lab̄o la Elia ro la Musa.

⁵Edempara la Petrus nggahina d̄i Ruma Isa, ”Pa Guru, nawancuku caruna ndai ta ake. Tahompara madad̄oho matu'u tolu mbua kema: sab̄ua d̄i ru'u Ita, sab̄ua d̄i ru'u Musa, ro sab̄ua wali d̄i ru'u b̄a Elia.”

⁶Sapodakaina la Petrus wati b̄adena auku d̄i pab̄ua nggahina, b̄ara sia lab̄o lengana d̄uana ede wunga dahu podana.

⁷ Edempara b̄onto b̄a apu siad̄oho ro ade apu ede wara ringa eli ma nggahi, ”Akera Ana-Ku rameci-Ku, ringa ra kade'epu Sia!”

⁸Roci-roci tio b̄a siad̄oho d̄i kompe ra pei siad̄oho, ro wati eda wali b̄a siad̄oho cou-cou rau ta ede masama-sama lab̄o siad̄oho, selasi Ruma Isa mpoampa.

⁹Wakatu siad̄oho londona d̄i doro ede, Ruma Isa ngoa ra kawarana siad̄oho, ”Aina ngoamu d̄i cou-cou rau au ra'eda b̄a nggomid̄oho akande sawatipu Ana Manusia d̄i kamori mbali rad̄i made-Na.”

¹⁰Siad̄oho b̄atuna rangoa ra tei ede, pala d̄i ade weki ndai siad̄oho tampu'u nuntu ra nggahina auku aona nggahi Ruma Isa ”mori mbali rad̄i made”.

¹¹ Edempara sod̄i b̄a siad̄oho d̄i Sia, ”B̄ab̄auku guru-guru agama nggahikaina b̄a one Elia pab̄uaku mai uluna?”

¹²Cambe b̄a Ruma Isa, ”La Elia poda mamai ulu d̄imakanggorina sara'a urusa. Pala b̄uneku lampa rawi mab̄oha Ana Manusia? B̄ab̄auku d̄i ade Alkitab wara ratunti b̄ara Sia d̄imamboto iu susa ra ncoki ro d̄i katuna ra kab̄awa b̄a dou?

¹³Pala Nahu manggahi d̄i nggomid̄oho: la Elia nawa'ura mai, ro ruku ra rawi dou-dou d̄i sia b̄e rane'e siad̄oho, ede ncihi ncao lab̄o ratunti ade Alkitab mab̄oha weki ndaina.”

¹⁴Wakatu Ruma Isa lab̄o anamori-Na toluna kab̄oro mbali lab̄o anamori-Na ma kalai, eda b̄a siad̄oho mboto dou ta ede. Pila-pila dou guru agama wunga cence lab̄o anamori Ruma Isa ede.

¹⁵Dou-dou ede ndede edana Ruma Isa, siad̄oho mbora akana, edempara rai aona Sia.

¹⁶”Au cence nggomid̄oho lab̄o guru-guru agama ede?” Sod̄i b̄a Ruma Isa d̄i anamorid̄oho-Na.

¹⁷Sab̄ua dou d̄i ade weki dou mamboto ede macambe, ”Pa Guru, mada wa'aku anaku d̄i Ita. Sia nampongi b̄a lu'ukai b̄a roh seta.

¹⁸Nggara nadeisi b̄a roh seta ede sia, nab̄ate-b̄ateku sarumbuna d̄i dana, asana nambob̄o, nandu'uku woina, ro kiro sara'a sarumbuna. Raho b̄a mada anamori Ita mab̄aka kalosana roh seta ede, pala wati loa karawi b̄a siad̄oho.”

¹⁹Edempara nggahi Ruma Isa d̄i siad̄oho, ”Heba poda nggomid̄oho ake! Nggomid̄oho poda-poda dou ma wati imbi. Sampe b̄une aiku Nahu pab̄uaku midi sama lab̄o nggomid̄oho ro saba kai d̄i nggomid̄oho? Wa'a ca'arapu ana dou ede!”

²⁰Edempara wa'a b̄a siad̄oho ana dou ede d̄i Ruma Isa. Ndede roh seta ede edana Ruma Isa, kandad̄i b̄a sia sarumbu ana dou ede kiro, ndad̄ina ana dou to'i ede mab̄u kali worena d̄i dana. Asana mambob̄o.

²¹Edempara sod̄i b̄a Ruma Isa d̄i amana, ”Sab̄unera ntoina sia ndakena?” ”Ra'aipu to'i wa'una!” cambe b̄a amana.

²²”Nawa'ura ntuwu roh seta ede ne'ena hade sia ake kai kamab̄una d̄i ade afi atao d̄i ade oi. Pala nggara Ita taloasi bantu, kasi to'i ade Ita d̄i madad̄oho ro bantuta madad̄oho!”

²³”Bune nggahimu? Nggara loasi b̄a Ita?” cambe b̄a Ruma Isa. ”Sara'ana loa, sura imbi b̄a dou!”

²⁴Kanggica lalo ama ede, ”Ruma, mada ka'imbi, pala imbi mada mbuipu kurana. Bantu to'ipu mada loakud̄u ncewi imbi waliku!”

²⁵Wakatu Ruma Isa edana b̄a one mboto dou matampu'u mai kanggudu. Parenta b̄a Sia roh seta ede kai nggahi-Na, ”Roh mpinga ro mpongi, Nahu maparenta nggomi losa d̄ei ana dou ake, ro aina sakali-kali lu'u walimu d̄ei ana dou ake!”

²⁶Roh seta ede kanggicana, edempara kandad̄ina sarumbu ana dou ede ndad̄i kiro, edempara losana d̄ei ana dou ede. Ana dou ede d̄i edamu b̄une timba, ndad̄ina sara'a dou manggahi, ”Sia nawa'ura made!”

²⁷Pala Ruma Isa nentina rima ana dou ede ro bantuna katu'u. Ana dou ede tu'una.

²⁸Sawa'u b̄a Ruma Isa d̄i uma, anamorid̄oho-Na mai kai sacara weki d̄i Sia ro sod̄ina, ”B̄ab̄auku madad̄oho wati loakaimu b̄aka kalosa roh seta ede?”

²⁹Cambe b̄a Ruma Isa, ”Roh seta b̄une ede wati loa d̄i b̄aka kalosa kai cara au-au rau, selasi kai do'a.”

³⁰Ruma Isa ro anamorid̄oho-Na tu'u wi'ina hid̄i ede ro lao lampa walina lao ta Galilea. Ruma Isa wati ne'ena b̄ade b̄a dou tab̄e warakai Sia,

³¹b̄ara Sia wunga ngoa ra teina anamorid̄oho-Na. ”Ana Manusia d̄i d̄onggo d̄i kuasa manusia,” ndede nggahi Ruma Isa, ”ro Sia d̄ihade, pala d̄i ainaina katolukaina Sia d̄imamori mbali!”

³²Anamorid̄oho-Na wati loana ka'ao au rangoa ra tei b̄a Ruma Isa, pala siad̄oho nadahuku sod̄i d̄i Sia.

³³Siad̄oho ronggara d̄i Kapernaum. Sawa'u b̄a d̄i uma, sod̄i b̄a Ruma Isa d̄i anamorid̄oho-Na, ”Au cence ncihi nggomid̄oho d̄i woha ncai akana ede?”

³⁴ Siad̄oho wati cambena, b̄ara d̄i woha ncai siad̄oho cence ncihina mab̄oha couku ma ipi na'e.

³⁵ Ruma Isa dohona, edempara ouna sampuru d̄ua dou anamori-Na ede. Nggahi Sia d̄i anamorid̄oho-Na, ”Dou ma ne'e ndad̄i sarambakaina, sia pab̄uaku ndad̄i ma cumpukai ro pab̄uaku ndad̄ina ada d̄i samenana dou.”

³⁶Edempara weha b̄a Ruma Isa sab̄ua ana dou to'i, ro kakid̄ina ana dou to'i ede d̄i tando siad̄oho sara'a. Pohu b̄a Ruma Isa ana dou to'i ede ro nggahina d̄i anamorid̄oho-Na,

³⁷ ”Dou ma tarima ana dou to'i b̄une ake b̄ara Nahu, ede aona natarimaku Nahu. Ro dou ma tarima Nahu, sia laina tarimana Nahu mpoa, pala natarima rauku Sia ma ranggadu Nahu.”

³⁸Edempara la Yahya nggahina d̄i Ruma Isa, ”Pa Guru, madad̄oho edamu sab̄ua-b̄ua dou b̄aka kalosana seta kai ngara Ita. Ro madad̄oho kantamu sia b̄ara sia laina lenga ndaita.”

³⁹Pala nggahi Ruma Isa, ”Aina kantamu sia, b̄ara wati wara kone sab̄ua dou ma karawi mab̄isa ra guna kai ngara Nahu, maloa lalo ka'iha-iha Nahu.

⁴⁰ B̄ara dou ma wati ao ndaita, ede aona nahoruku ndaita.

⁴¹ Kawarapu! Dou ma mbei nono d̄i ru'u nggomi b̄ara nggomid̄oho anamori Sangaji Mambei salama, sia pasti d̄imatarima ufana.”

⁴²”Cou makandad̄ina sab̄ua dou ade weki dou-dou ma to'i ake wati imbi walina d̄i Nahu, nancewi tahopu wadu nggirukai d̄id̄iki d̄i wo'ona, ro sia d̄i paki d̄i ade moti.

⁴³ Nggara rimamu makamaikaimu dosa, dompopu rimamu ede! Nancewi tahopu nggomi morimu lab̄o Ruma Hatalla kone dawara sab̄ae rimamu ntewi kaisi nggomi lab̄o rimamu b̄ali b̄ae lu'umu ade anaraka, eded̄u afi ma'ederahid̄i. [

⁴⁴Ta aka afi wati loana made, ro kako wati loana made.]

⁴⁵Ro nggara ed̄imu makamaikaimu dosa, dompopu ed̄imu ede. Nancewi tahopu nggomi morimu lab̄o Ruma Hatalla konena dawara ed̄imu sab̄ae, ntewi kaisi nggomi lab̄o ed̄imu b̄ali b̄ae d̄ipaki d̄i ade anaraka. [

⁴⁶Ta aka afi wati loana made ro kako wati loana made.]

⁴⁷ Nggara madamu makamaikaimu dosa, cingga pakipu isi madamu ede! Nancewi tahopu nggomi lu'umu d̄i ade Karaja'an Allah kone wati wara sab̄ae madamu, ntewi kaisi nggomi lab̄o madamu b̄ali b̄ae d̄ipaki d̄i ade anaraka.

⁴⁸ Ta aka afi wati loana made ro kako wati loana made.

⁴⁹Sanikina dou d̄ikaraso kai afi, b̄une koroba d̄ikaraso kai sia.

⁵⁰ Sia ede taho, pala nggara sia nawa'usi cab̄a, sab̄ua loaku d̄i kandanga mbali? Ndad̄i, pab̄uapu nggomid̄oho ndad̄imu b̄une sia — mori sama-samapu kai taho ra meci angi.