Read Bima LUKAS 10 Bible Online

LUKAS 10 - Bima bible

LUKAS 10

¹Sawa'u b̄a ede Ruma kad̄alena pidu mpuru anamori wali, edempara nggadu uluna siad̄oho d̄ua-d̄uana aka sanikina kota ro aka hid̄i d̄i laokai b̄a Sia.

² ”Hasi d̄iweha nambotoku,” nggahi-Na d̄i siad̄oho, pala dou makarawi d̄imaweha hasi cuma sato'i. B̄ara ndedena, rahopu d̄i Dou mantau oma loakud̄u nggadu b̄a Sia dou d̄imaweha hasi ranggud̄a ra congge-Na.

³ Laora! Nahu nggaduku nggomid̄oho b̄une jimba d̄iwoha lako doro.

⁴ Aina wa'amu dompe atao kad̄ud̄u d̄isadekakai, atao sapatu rau. Aina midimu d̄iwoha ncai d̄i mbeimu salam kone d̄i sab̄ua dou rau.

⁵Nggomid̄oho malu'usi d̄i ade sab̄ua uma, nggahi wa'upu, ’Taho ra ntai to'impa d̄ei ade uma ake.’

⁶Nawarasi dou ta ede ma taho ade, salammu mataho ede nange'empa d̄i sia; nggara watisi, hinti mbalipu salammu mataho ede.

⁷ Ngge'epu d̄i sab̄ua umampa. Weha aopu au rasadia wea ta ede d̄iru'u nggomid̄oho, b̄ara dou ma karawi nantau hak tarima ufana. Aina peso rero weki rad̄i uma sab̄ua lao d̄i uma ma kalai.

⁸Nggomid̄oho mamaisi d̄i sab̄ua kota ro ta aka nggomid̄oho d̄i tarima ao kataho b̄a dou, ngahapu au rasadia wea ta ede d̄i ru'u b̄a nggomid̄oho.

⁹Katahopu dou-dou ma supu d̄i kota ede, ro ngoa ra kahabapu d̄i dou-dou ta ede, ’Karaja'an Allah nawa'ura mai d̄i woha nggomid̄oho.’

¹⁰ Pala nggara nggomid̄oho mamaisi d̄i sab̄ua kota ro ta ede nggomid̄oho wati tarima ao b̄a dou, losa laopu aka ncai ro nggahipu,

¹¹’Kone kalub̄u kotamu ma pandako d̄i ed̄i nami, nami mafura pakina d̄i katandakai nggomi. Pala d̄i b̄ademu b̄a one wa'ura mai Karaja'an Allah d̄i woha nggomid̄oho!’

¹² D̄ikawaramu, wakatu Ainaina Kiama, dou Sodom nancewi mod̄aku d̄i kangampu wea b̄a Ruma Hatalla ntewi kaisi dou kota ede!”

¹³ ”Ihara nggomi, Korazim! Ro ihara nggomi, Betsaida! Paisi b̄isa ra guna rakarawi d̄i woha nggomid̄oho ede wa'ura karawi d̄i kota Tirus ro Sidon, pasti dou-dou ta aka wa'ura ntoi tobana rad̄i dosa-dosa siad̄oho, ro kanina kani ra lombo tanda ncoki ade ro taumu kalub̄u ese wawo tuta siad̄oho.

¹⁴D̄i'ainaina kiama, dou-dou Tirus ro Sidon d̄imancewi mod̄a d̄i kangampu wea b̄a Ruma Hatalla ntewi kaisi nggomi.

¹⁵ Ro nggomi, Kapernaum! Kananu b̄a nggomi, nggomi d̄i kad̄ese sampe ese saroga? Wati! Nggomi naha d̄i paki aka anaraka!”

¹⁶ Edempara nggahi Ruma Isa d̄i anamorid̄oho-Na, ”Dou ma ringa ra kade'e nggomid̄oho, naringa ra kade'eku Nahu. Dou ma daca'u nggomid̄oho, nadaca'uku Nahu. Ro dou ma daca'u Nahu, nadaca'u rauku Sia maranggadu Nahu.”

¹⁷Pidumpuru anamori ede dula mbalina kai neo poda adena. ”Ruma,” nggahi siad̄oho, ”roh-roh seta rau nato'a d̄i madad̄oho nggara parentasi b̄a madad̄oho kai ngara Ita Ruma!”

¹⁸Cambe b̄a Ruma Isa, ”Nahu edaku Ibilis mab̄u rad̄i ese langi b̄une kakila ai.

¹⁹ D̄ib̄ademu! Nggomid̄oho wa'ura mbei b̄a Nahu kuasa d̄i loakaimu tonda b̄a nggomid̄oho sawa ro meti ro d̄imafoka samenana tenggo ra ngau musu, wati wara au-au ma loana ka'iha nggomid̄oho.

²⁰Kone ade ndedekaina aina neo ade b̄ara roh-roh seta to'ana d̄i nggomid̄oho. Natahopu nggomid̄oho neo ademu b̄ara ngaramu wa'ura tunti d̄i saroga.”

²¹Wakatu ede wa'u, Ruma Isa Neo adena b̄ara kuasakai b̄a Roh Allah. Nggahi Ruma Isa, ”Ama, Ruma ma kuasakai langi ro dana! Mada matarima kasi d̄i Ita b̄ara sara'ana ede rahasiakai b̄a Ita d̄i dou-dou ma loa ra ma ntau ilimu, pala Ita tei katada d̄i dou-dou ma wati ntau ilimu. Edeku ma kasana weana ade Ita.

²² Sara'ana wa'ura d̄onggo b̄a Ama d̄i Mada. Wati kone sab̄ua dou mapatana Ana, selasi Ama. Wati wara rauna ma pata Ama selasi Ana; ro dou-dou d̄i couku Ana ede ne'ena kapata Ama.”

²³Edempara Ruma Isa tambarina d̄i anamorid̄oho-Na, edempara nggahi kalaina d̄i siad̄oho, ”Labara nggomid̄oho b̄ara wa'ura edamu ra'eda b̄a nggomid̄oho wunga ake.

²⁴B̄ara kawarapu: Mboto nabi ro sangaji mane'e eda ra'eda b̄a nggomid̄oho wakatu ake pala siad̄oho wati rakana eda. Siad̄oho nane'e ringa raringa b̄a nggomid̄oho wunga ake, pala siad̄oho wati rakana ringa.”

²⁵ Edempara sab̄ua dou guru agama tu'u kid̄ina nane'eku kamab̄u Ruma Isa. Sod̄i b̄a Sia, ”Pa, Guru, mada pab̄uaku karawi au loakud̄u raka tarima mori masapodakaina ro ma'ederahid̄i?”

²⁶Cambe b̄a Ruma Isa, ”Au ratunti d̄i ade Alkitab? B̄une kananu b̄a nggomi mab̄oha lampa rawi ede?”

²⁷ Cambe b̄a dou ede, ” ’Meci ra ca'upu Ruma Hatalla Rumamu kai sapoda-poda ademu, kai samenana nawa ra sarumbumu, kai sara'a tenggo ra walemu, ro kai sara'a kananumu,’ ro ’Meci ro ca'upu d̄i sasamamu b̄une nggomi mameci ro ca'u sarumbu ndaimu.’ ”

²⁸ ”Ncihi cambemu ede,” nggahi Ruma Isa. ”Karawipu ede, ndad̄i nggomi d̄imamori.”

²⁹Pala guru agama ede nane'e kancihi weki ndaina. Sod̄i b̄a sia, ”Couku sasama mada ede?”

³⁰Cambe b̄a Ruma Isa, ”Wara sab̄ua dou mone rad̄i Yerusalem lao aka Yerikho. D̄iwoha ncai sia parampo b̄a dou, weha rampo kampoi b̄a dou ntauna, nduku kancoki b̄a dou, edempara wi'i pakina d̄i ncai lab̄o mboto ncuwuna ma'ipi.

³¹Ncihi ncao d̄i ncai ede lampa sai rau b̄a sab̄ua dou imam. Wakatu eda b̄a sia dou ede, sia pesona weki d̄i ncai masab̄aena, edempara lampa walina.

³²Ndede rau lab̄o sab̄ua dou Lewi ma lampa sai ta ede; wakatu eda b̄a sia dou ede, sia mai d̄enina d̄i tio kab̄aekaina. Pala sia rau pesona weki d̄i ncai masab̄aena, edempara lampa walina.

³³ Pala sawa'u b̄a ede sab̄ua dou Samaria ma wunga ade lampa ro laokaina, lampa sai rauna ta ede. Wakatu eda b̄a sia dou ede, sia nawancuku kasi adena.

³⁴Ndad̄i sia mai d̄enina d̄i dou ede edempara karaso weana ncuwuna kai anggo ro lo'ina kai mina, edempara b̄ab̄ana suwu-suwu ede. Sawa'u b̄a ede, sia ampana dou ede ese wawo keledai ndaina, edempara wa'ana aka sab̄ua uma sewa ro kab̄ua ra katahona.

³⁵B̄ala ai sanai sia wehana d̄ua mbua piti salaka ro mbeina d̄i dou mantau uma sewa ede ro nggahina, ’Kab̄ua katahopu sia, ro warasi cola-cola makalai, d̄i cola b̄a nahu peade wakatu mai mbali nahu ta ake.’ ”

³⁶Edempara Ruma Isa kanggorina carita ede kai sod̄ina ake, ”D̄i ade tolu dou ede ma b̄eku, kananu b̄a nggomi, ma karawi kai sasamana rad̄i dou rarampo ede?”

³⁷Guru agama rasod̄i ede cambena, ”Dou ma rabantu dou ede.” ”Ya, laora ro karawipu b̄une ede rau!” nggahi Ruma Isa.

³⁸ Edempara Ruma Isa ro anamorid̄oho-Na lampa walina, edempara ronggana d̄i sab̄ua kampo. Ta ede sab̄ua dou siwe, mangara la Marta, ma'undana Sia mai d̄i umana.

³⁹La Marta nantau sa'e siwe ngarana la Maria. Maria ake doho d̄eni lab̄o Ruma Isa kade'ena ngoa ra tei b̄a Sia.

⁴⁰Pala la Marta nawancuku repona karawi d̄i uma ra salajana. Sia lao rakana Ruma Isa ro nggahina, ”Ruma, sab̄ua Ruma wati b̄adeta la Maria co'ona mada makarawi kese? Takau to'ipu sia karawi inga la mada!”

⁴¹”Marta, Marta!” cambe b̄a Ruma. ”Nggomi darura ademu ro repo kananumu ake ro ede;

⁴²sapodakaina ma penti sab̄uampa. Ro la Maria wa'ura kad̄alena mataho, ma wati d̄i weha rad̄i sia.”