Read Bima LUKAS 11 Bible Online

LUKAS 11 - Bima bible

LUKAS 11

¹D̄isab̄ua ainaina Ruma Isa do'ana d̄i sab̄ua hid̄i. Sawa'u b̄a nggori do'ana, sab̄ua dou d̄i ade weki anamorid̄oho-Na manggahi, ”Ruma, tatei to'ipu d̄i la madad̄oho do'a b̄une Yahya matei do'a d̄i anamorid̄ohona.”

²Edempara nggahi Ruma Isa d̄i siad̄oho, ”Nggara nggomid̄oho mado'asi, nggahi ndakepu, ’Ama, Itaku Ruma Hatalla ma Kese Weki. Raho-raho to'impa Ita d̄inemba ro d̄ihoroma.

³Mbeipu d̄i saniki ainaina ngaha ra nono d̄i paralu b̄a la madad̄oho.

⁴Takangampu wea to'ipu dosa-dosa la madad̄oho, b̄ara la madad̄oho rau makangampu wea sanikina dou ma ncara d̄i la madad̄oho. Ro aina co'o b̄a Ita mbora imbi la madad̄oho wakatu la madad̄oho hina b̄a coba'a.’ ”

⁵Nggahi Ruma Isa d̄i anamorid̄oho-Na, ”Misakai sab̄ua dou d̄i ade weki nggomid̄oho lao aka uma lengana wakatu b̄oha ai, ro nggahina, ’Cina, mbei to'ipu sepe roti tolu mbua,

⁶b̄ara lengaku ma wunga ade lampa ra laokaina, b̄oupura saina d̄i uma ro nahu wati ntauku ngaha ra nono d̄i ru'u b̄a sia!’

⁷Misampara lengamu ramaikaimu ede cambe ndakena, d̄i ade umana, ’Aina kasusamu nahu! Tad̄a wa'ura kunci ro nahu lab̄o ana-anaku wa'ura maru. Nahu wati loaku tu'u mbei au-au d̄i nggomi.’ ”

⁸”Edempara b̄uneku?” nggahi Ruma Isa sawa'u b̄a ede. ”Nahu manggahi, io! Konena nggomi lengana, sia wati d̄imangawa tu'u ro mbeina au-au d̄i nggomi. Pala b̄ara nggomi wati ntaumu maja raho ncau-ncau d̄i sia, edempara sia natu'u rau ro mbeina d̄i nggomi au rad̄iparalumu.

⁹Ndad̄i, Nahu manggahi d̄i nggomi: Rahopu, ndad̄i nggomid̄oho d̄i mbei; ngupapu, ndad̄i nggomid̄oho d̄imaraka; tokepu tad̄a, ndad̄i tad̄a d̄i hengga wea d̄i ru'u b̄a nggomid̄oho.

¹⁰B̄ara dou ma raho d̄imatarimana; dou ma ngupa d̄imarakana, ro dou ma toke tad̄a, d̄ihengga wea tad̄ana.

¹¹D̄i ade weki nggomid̄oho sab̄ua wara ama ma mbei sawa d̄i ru'u b̄a anamu, narahosi b̄a sia uta?

¹²Atao mambei meti, narahosi b̄a sia dolu?

¹³Kone madab̄ae nggomid̄oho, nggomid̄oho mab̄ade rauku mbei ma taho d̄i ru'u b̄a anamu. Au walipu Ama d̄i saroga! Sia d̄imambei Roh-Na d̄i ru'u b̄a siad̄oho ma raho d̄i Sia!”

¹⁴D̄isab̄ua ainaina Ruma Isa b̄aka kalosana roh seta rad̄i sab̄ua dou mampongi. Sawa'u b̄a losa roh seta ede, dou ede tampu'ura nuntu ra nggahina. Mboto dou mamidi ade,

¹⁵ pala wara ma nggahi, ”Sia loakaina b̄aka kalosa roh seta b̄ara kuasa Beelzebul, mana'ekai roh seta ede.”

¹⁶ Wara rauja dou-dou makalai ma ne'e kamab̄u Ruma Isa, ndad̄i siad̄oho rahona Sia karawi lampa rawi mab̄isa ra guna tanda b̄a one Sia ramaina rad̄i Ruma Hatalla.

¹⁷Pala Ruma Isa nab̄adeku kananu siad̄oho. Edempara nggahi Sia d̄i siad̄oho, ”Nggara sab̄ua negara nambi'asi ade golonga-golonga macua musu angi, negara ede wati ntoina. Ro sab̄ua kaluarga ma mbi'a ro cua musu angi, d̄ima'iha leli.

¹⁸Ndede rauja ade karaja'an Ibilis; nggara sab̄ua kalompo mancao lab̄o kalompo makalaina, karaja'an ede d̄imaleli. Nggahi nggomid̄oho b̄a one Nahu b̄aka kalosaku roh seta b̄ara kuasa Beelzebul.

¹⁹Nggara ndedesi, kai kuasa couku anamorid̄ohomu mab̄aka kalosana roh seta ede? Anamori-anamorimu ede ma bukutina b̄ara nggomid̄oho mancara!

²⁰Pala Nahu b̄aka kalosaku roh seta kai kuasa Ruma Hatalla, ro ede aona b̄a one Karaja'an Allah nawa'ura mai d̄i woha nggomid̄oho.

²¹Nggara sab̄ua dou ma tenggo, kai d̄aha ra d̄ano mancihi, najagaku uma ndaina, sara'a ntauna d̄imasalama.

²²Pala nawarasi dou ma tenggo ese mai b̄a sia mai deina sia ro kakoana sia, edempara dou ma ncewi tenggo ede d̄imaweha rampa sara'ana d̄aha ra d̄ano rabanggakai b̄a dou mantau uma ede, edempara cengga-cengga sara'ana ntau ra warana ede.

²³ Dou ma wati horu Nahu, sapodakaina sia na'aoku Nahu, ro dou ma wati bantu Nahu, sapodakaina naka'ihaku karawi Nahu!”

²⁴”Nawi'i pakisi b̄a roh seta sab̄ua-b̄ua dou, roh ede nalampa rero d̄i hid̄i-hid̄i ma mango d̄i ngupakaina hid̄i d̄i sanawakaina, pala sia wati rakana. B̄ara ndedena, nggahi sia, ’Nahu d̄imadula mbali aka uma ratu'u wi'i b̄a nahu!’

²⁵Wakatu rongga sia ta aka, sia rakana uma ede raso ro moci.

²⁶Edempara sia laona ro wa'ana pidu roh makalai ma ncewi dab̄ae ntewi kaisi sia. Edempara siad̄oho lu'una d̄ei dou ede edempara ngge'ena ta ede. Ro cumpukaina ka'ada'ana dou ede nancewi iha ntewi kaisi ma'uluna.”

²⁷Sawa'u b̄a nggori nggahi ndede Ruma Isa, sab̄ua dou siwe d̄i ade weki dou mamboto ede manggahi d̄i Ruma Isa, ”Na'ipiku taho ra ntikana dou siwe ma ranggana ro marasusuna Ita!”

²⁸Pala cambe b̄a Ruma Isa, ”Nancewi taho ra ntika walipu dou ma ringa ra kade'e nggahi ra eli Ruma Hatalla ro makalampana!”

²⁹ Wunga mbuipu kahumbu b̄a dou-dou Ruma Isa, Sia nuntu ra nggahi wali-Na, ro nggahi-Na, ”Nawancuku dab̄aena dou-dou jamana ake. Siad̄oho rahona lampa rawi mab̄isa ra guna loakud̄u siad̄oho imbi d̄i Nahu, pala siad̄oho wati d̄i mbei kone sab̄ua lampa rawi mab̄isa ra guna, selasi b̄isa ra guna Nabi Yunus.

³⁰ B̄une santika Nabi Yunus eded̄u b̄isa ra guna d̄i ru'u b̄a dou-dou d̄i kota Niniwe, ndede rauja Ana Manusia d̄imandad̄i sab̄ua b̄isa ra guna d̄i ru'u b̄a dou-dou jamana ake.

³¹ Wakatu ainaina kiama, Sangaji siwe dana ra rasa tawela D̄ona d̄imamori mbali sama-sama lab̄o dou-dou jamana ake, ro b̄ab̄u ra lo'ona siad̄oho. B̄ara, b̄a ne'ena ringa ra kade'e ngoa ra tei b̄a Sulaiman maloa timba ra lemba, Sangaji siwe ede nakarawiku lampa ra lao ma d̄o'o poda ratampu'u aka sumpu dana. Pala ta ake wakatu ake wara ma ncewi na'e ntewi kaisi Sulaiman!

³² Wakatu ainaina kiama, dou-dou d̄i Niniwe d̄imamori mbali sama-sama lab̄o dou-dou jamana ake, ro b̄ab̄u ra lo'ona siad̄oho, b̄ara dou Niniwe ede wa'ura tobana rad̄i dosa-dosa siad̄oho wakatu la Yunus mahotoba d̄i siad̄oho. Pala ta ake wakatu ake wara ma ncewi na'e ntewi kaisi la Yunus!”

³³ ”Wati wara dou ma ka'a ilo edempara cilina atao b̄ontokaina roa. Sia nawi'iku ilo ede d̄i ed̄i ilo, loakud̄u dou ma lu'u naloaku eda taroana.

³⁴Mada eded̄u ilo d̄i ru'u b̄a sarumbu. Nggara taho taroasi madamu, sara'a sarumbumu nataroa poda. Pala nggara gawusi madamu, sara'a sarumbumu nandad̄i rindi ncaki.

³⁵B̄ara ndedena, aina kabare, ai to'ina taroa ma wara d̄i nggomi ede ndad̄i rindi poda.

³⁶Nggara sara'a sarumbumu taroa, ro wati kone sato'i ma rindi, ndad̄i sara'a sarumbumu ede nawancuku taroa podana b̄une hina b̄a taroa ilo.”

³⁷Sawa'u b̄a nggori nuntu ra nggahi-Na, sab̄ua dou Farisi ma'unda Sia mai ngaha d̄i umana. Edempara Ruma Isa lao ngahana ta ede.

³⁸Dou Farisi ede midi adena eda Ruma Isa ngaha kai wati waca wa'u rima-Na b̄une atora agama.

³⁹B̄ara ndedena nggahi Ruma d̄i sia, ”Poda nggomid̄oho dou-dou Farisi ranginakaimu karaso mangko ro pingga tawela arina, pala ta d̄ei sarumbu ndaimu b̄ini b̄a toku ro rawi madab̄ae.

⁴⁰Nggomid̄oho sampula! Sab̄ua laina Ruma Hatalla ma ndawina ta wela arina ede, ro wa'ura ndawina wela d̄ei rauna?

⁴¹Ma wara d̄i ade mangko ro pinggamu ede, edeku d̄i pab̄ua mbei b̄a nggomid̄oho d̄i dou-dou mancoki mori. Kai cara ede, sara'ana d̄imandad̄i raso d̄i ru'u b̄a nggomid̄oho.

⁴² Ihara nggomid̄oho, dou-dou Farisi! Hasi nggud̄a ra conggemu b̄une selasih ro inggu ro marakani makalaina; nggomid̄oho mbeimu cengga sampuru d̄i Ruma Hatalla, pala adi ro meci ra ca'u d̄i Ruma Hatalla wati kandad̄i au b̄a nggomid̄oho. Sapodakaina edeku d̄i pab̄ua karawi b̄a nggomid̄oho, kai wati nefamu ma kalai-lai rauna.

⁴³Ihara nggomid̄oho, dou-dou Farisi! Nggomid̄oho maca'u hid̄i-hid̄i ma taho d̄i ade uma sambeakai, ro maca'u d̄i horoma b̄a dou d̄i amba-amba.

⁴⁴Ihara nggomid̄oho! Nggomid̄oho b̄une rade mawati ntau wadu tanda, ratonda-tonda b̄a dou kai wati b̄adena.”

⁴⁵Sab̄ua dou guru agama ade weki siad̄oho manggahi d̄i Ruma Isa, ”Pa Guru, kai nggahi ndede Ita, aona Ita kab̄awa ro katunamu madad̄oho rau!”

⁴⁶Cambe b̄a Ruma Isa, ”Ihara nggomid̄oho rau, guru-guru agama! Nggomid̄oho raho pab̄uamu lampa rawi ma nggonggi ro mbeimu atora-atora ma tani, pala ndai nggomid̄oho kone sato'i rau wati ne'emu bantu dou makalampana.

⁴⁷Ihara nggomid̄oho! Nggomid̄oho ndawimu rade d̄i ru'u b̄a nabi-nabi, ma sapodakaina rahade b̄a wa'i ra waro ndaid̄ohomu.

⁴⁸Ndad̄i ndai nggomid̄oho mangakumu b̄a one nggomid̄oho satuju au rawa'u karawi b̄a wa'i ra waromu; b̄ara siad̄oho romo mahade nabi-nabi ede ro nggomid̄oho ma ndawi radena.

⁴⁹B̄ara ndedena Loa Timba Ra Lemba Ruma Hatalla manggahi, ’Nahu d̄imanggadu d̄i siad̄oho nabi-nabi ro dou-dou ranggadu b̄a Nahu; sarundena d̄i hade ro sarunde walina d̄i kancoki!’

⁵⁰Ruma Hatalla karawina ede loakud̄u dou-dou jamana ake d̄i hukum b̄ara rahadena d̄i sara'ana nabi ra'aipu saramba kand̄adi dunia,

⁵¹ ratampu'u aipu rahade la Habel sampe wakatu rahade la Zakaria, ma ndad̄i d̄i hela mezeba ro Bait Allah. Imbipu: Dou-dou jamana ake pasti d̄i hukum b̄ara sara'ana ede.

⁵²Ihara nggomid̄oho, guru-guru agama! Kunci d̄i henggakai tad̄a loa ra tingi d̄i wi'i d̄i nggomid̄oho, pala ndai nggomid̄oho wati ngawamu lu'u tad̄eina d̄i ngupakaimu loa ra tingi ede. Pala nggomid̄oho matapa-tapana dou-dou ma ne'e lu'u ta d̄eina!”

⁵³Wakatu tu'u wi'i b̄a Ruma Isa hid̄i ede, guru-guru agama ro dou-dou Farisi katanda kab̄ae podana rawi Ruma Isa ede. Siad̄oho tampu'ura nggawi-nggawina Sia loakud̄u Sia ngawana nuntu ra nggahi Mab̄oha mboto lampa rawi.

⁵⁴Ro wunga ede siad̄oho tio kab̄aena Sia d̄i ngupakaina renta-Na ma ncara.