Read Bima LUKAS 12 Bible Online

LUKAS 12 - Bima bible

LUKAS 12

¹ Riwu-riwuna dou macici angi sampe wara ratonda-tonda wea ed̄ina. Wakatu mbuipu dou-dou ede macici weki, nggahi Ruma Isa d̄i anamorid̄oho-Na, ”Aina kabaremu d̄i b̄uha dou Farisi, aona nggahi Nahu, siad̄oho maca'u coro-coro.

² Wati warana ma cili weki d̄i daloa eda, ro wati wara rarahasia d̄i dahengga.

³Ranggahi b̄a nggomid̄oho aipu wakatu aimangad̄i, d̄i ringa wakatu aimarai; ro rangoa nari b̄a nggomid̄oho d̄i fiko dou d̄i ade kama rakab̄u, d̄i ngoa kana'e rero.”

⁴”Kawarapu, lengad̄oho-Ku! Aina dahu d̄i siad̄oho ma hade sarumbu pala wati loana karawi ari mai b̄a ede.

⁵Taho Nahu d̄imateina d̄i nggomid̄oho couku d̄i pab̄ua dahukai b̄a nggomid̄oho. Dahukaipu d̄i Ruma Hatalla! B̄ara sawa'u b̄a hade, Sia nakuasa rau, paki d̄i ade anaraka! Imbipu, Siaku d̄i pab̄ua dahukai b̄a nggomid̄oho.

⁶Lima mbua nasi kari'i d̄i landa kai co'i d̄ua mbua piti ma cumpukai to'i co'ina. Kone ade ndedekaina wati kone sab̄ua rau d̄i nefa b̄a Ruma Hatalla.

⁷Honggo d̄i tuta raumu wa'ura reke sara'ana, b̄ara ndedena aina dahu; nggomid̄oho nancewi ntaumu co'i ntewi kaisi lab̄o nasi kari'i!”

⁸”Kawara kab̄aepu: Dou ma mangaku d̄i tando dou mamboto b̄a one sia b̄atuna Nahu, sia d̄imangaku rau b̄a Ana Manusia d̄i tando mala'eka-mala'eka Ruma Hatalla.

⁹Pala dou ma wati mangaku d̄i tando dou mamboto b̄ara sia b̄atuna Nahu, sia rau wati mangaku b̄a Ana Manusia d̄i tando mala'eka-mala'eka Ruma Hatalla.

¹⁰ Nanggahisi b̄a dou au-au daca'u Ana Manusia, sia loa d̄i kangampu wea; pala nakatuna ra kab̄awasi Roh Allah, sia wati loa d̄i kangampu wea.

¹¹ Nggara nggomid̄oho nawa'asi aka uma-uma sambeakai d̄i paresa ncihi ra ncaramu d̄i tando pamarenta atao dou mana'ekaina, aina daruramu mab̄oha b̄uneku carana nggomid̄oho horukai weki atao auku d̄i nggahi b̄a nggomid̄oho.

¹²B̄ara auku d̄i nggahi b̄a nggomid̄oho ede d̄i tei b̄a Roh Allah d̄i nggomid̄oho rakasi wakatuna.”

¹³Sab̄ua dou d̄i ade weki dou mamboto manggahi d̄i Ruma Isa, ”Pa Guru, takau to'i b̄a Ita d̄i sa'e mada mbei d̄i ru'u mada sarundena rad̄i pasaka rawi'i b̄a ama madad̄oho mamade.”

¹⁴Cambe b̄a Ruma Isa, ”Cina, cou ma rahanta Nahu ndad̄i hakim atao dou d̄imacengga pasaka d̄i ade weki nggomid̄oho d̄ua?”

¹⁵Edempara d̄i sara'ana dou ma wara ta ede nggahi Ruma Isa, ”Aina kabare ro tio kab̄aepu, ai to'ina nggomid̄oho na'e ademu. B̄ara mori manusia laina b̄ara ntau ra warana, konena mboto poda ntau ra warana.”

¹⁶Edempara Ruma Isa mbeina conto ra ibara ake, ”Waraku sab̄ua dou mantau ra wara. Sia wara danana ma mboto hasi.

¹⁷Dou mantau ra wara ede tampu'u kananuna d̄i adena, ’Watid̄u wara walina hid̄i d̄i wi'ikai hasi danaku. Auku aka nahu ake?’

¹⁸Edempara kananu wali b̄a sia ro nggahina d̄i weki ndaina, ’Ya, nahu wara akaku; jompa-jompaku nahu d̄imakau dou rungka edempara nahu d̄imatu'una ma ncewi na'e. Ta'edeku d̄i wi'ikai b̄a nahu sara'a gando ro barang-barang ma kalai.

¹⁹Sawa'u b̄a ede ampoku nggahi d̄i weki ndaiku: Nggomi malaba! Sara'ana ma taho wa'ura kantau b̄a nggomi ro wati d̄imampoi sampe pila-pila mba'a. Sanawara ake! Ngaha ra nonopu ro iupu caru morimu!’

²⁰Pala nggahi Ruma Hatalla d̄i sia, ’Oe sampula! Aimangad̄i ake wa'u nggomi d̄imamade, edempara couku d̄imarakana sara'a ntau ra wara rakab̄oro b̄a nggomi d̄i ru'u b̄a ndaimu ede?’

²¹Ndedeku ndad̄ina d̄i sanikina dou mane'e ndad̄i ntau ra wara d̄i ru'u b̄a weki ndai kesena, pala wati ne'ena usaha ndad̄i ntau ra wara d̄i tando Ruma Hatalla.”

²²Edempara nggahi Ruma Isa d̄i anamorid̄oho-Na, ”B̄ara ndedena nggahi b̄a Nahu, ’Aina daruramu mab̄oha morimu, eded̄u auku d̄i ngaha ra nono b̄a nggomid̄oho, atao auku d̄i kani ra lombo b̄a nggomid̄oho.’

²³Mori eded̄u nancewi taho ntewi kaisi lab̄o ngaha ra nono, ro sarumbu ncewi taho ntewi kaisi lab̄o kani ra lombo.

²⁴Tio kab̄aepu nasi garaha! Siad̄oho wati nggud̄a ra conggena, wati pakona, wati ntau rauna jompa ra lengge. Pala Ruma Hatalla mantadi kataho siad̄oho! Nggomid̄oho ncewi ntaumu co'i ntewi kaisi lab̄o nasi-nasi ede!

²⁵Cousi d̄i ade woha nggomid̄oho kai darura adena loa kad̄ondo umuna konena sato'i?

²⁶Nggara lampa rawi mato'i ede mpoa daloa karawi b̄a nggomid̄oho, b̄ab̄auku darurakaimu d̄i lampa rawi-lampa rawi makalaina?

²⁷ Tio kab̄aepu b̄une b̄unga-b̄unga bakung wokona; b̄unga-b̄unga ede wati karawina, wati muna rauna. Pala Sangaji Sulaiman ma'ipi poda ntau ra wara rau wati kanina kani ra lombo b̄une ntika b̄unga-b̄unga ede!

²⁸Mpori d̄i so woko d̄i ainaina ake ro naisi d̄i ka'a kampoi. Pala Ruma Hatalla makantikana mpori ede macaru ntika. Au walipu nggomid̄oho! Pala nggomid̄oho kura imbimu!

²⁹Ndad̄i, aina daruramu ro dahu ademu mab̄oha auku d̄i ngaha ra nono b̄a nggomid̄oho.

³⁰Lampa rawi b̄une ede d̄i mpou b̄a dou ma wati pata Ruma Hatalla. Sapodakaina Amamu nab̄adeku b̄a one nggomid̄oho maparalu sara'ana ede.

³¹Pala nggomid̄oho pab̄uaku usahamu loakud̄u Ruma Hatalla maparentana d̄imorimu, ndad̄i ma kalaina ede d̄i mbei b̄a Ruma Hatalla d̄i nggomid̄oho rau.”

³²”Nggomid̄oho ma cuma sato'i wekimu, aina dahumu! B̄ara Amamu nasana mbei d̄i nggomid̄oho pasaka Karaja'an-Na.

³³Landapu ntaumu ro mbeipu pitina d̄i ru'u b̄a dou mancoki mori. Ndawipu d̄i ru'u ndaimu dompe ma wati loa mpasa, eded̄u ntau ra wara rawi'i d̄i saroga. Ntau ra wara ede wati loana moda b̄ara dou mampanga wati loana weha ro ane wati loana ka'iha.

³⁴B̄ara tab̄era warakai ntau ra waramu, ta ede rauku ademu!”

³⁵ ”Jaga-jagapu d̄i sanikina lampa rawi. Nggomid̄oho pab̄uapu kani ncau kani ra lombo ro ilomu ngge'empa kaleana,

³⁶ sama b̄une ada-ada ma wunga ngena rumana dula d̄i ndiha nikakai. Nggara dulasi rumana ede ro tokena tad̄a, siad̄oho nahengga rociku tad̄a.

³⁷Nalaba poda ada-ada ma raka b̄ade b̄a rumana wunga ngena wakatu maikai rumana. Imbipu: ruma ede d̄imasadia ro kauna adad̄ohona ede doho, edempara sia d̄imakarawi wea d̄i ru'u b̄a siad̄oho.

³⁸Ndad̄i laba poda ada-ada ede nggara rakasi eda b̄a rumana siad̄oho wunga ngenana, kone rumana mai wakatu b̄oha ai atao ncewi aho walipu rad̄i wakatu ede!

³⁹ Kawarapu ake! Paina b̄adesi b̄a dou mantau uma jam pila dou mampanga maina, sia najagaku loakud̄u dou mampanga wati lu'una ade umana.

⁴⁰B̄ara ndedena nggomid̄oho rau pab̄uaku sadiamu, b̄ara Ana Manusia d̄imamai wakatu wati d̄i sangka-sangka b̄a nggomid̄oho.”

⁴¹”Ruma, sab̄ua ngoa ra tei ede d̄i ru'u b̄a madad̄oho atao d̄i sara'ana dou?” sod̄i b̄a la Petrus.

⁴²Cambe b̄a Ruma, ”Couku ada ma to'a ro loa timba ra lemba ndad̄ina d̄i hanta b̄a rumana ndad̄i dou mana'ekaina d̄i ade ada-ada makalai loakud̄u sia mbeina ngaha siad̄oho rakasi wakatuna?

⁴³Ndad̄i neojara adena ada ede nadula mbalisi rumana ro rakana eda sia wunga kalampana taki ra putana!

⁴⁴Imbipu: Rumana ede na'imbikaiku d̄i sara'a ntau ra warana d̄i adana ede.

⁴⁵Pala nggarasi ada dou ede nanggahisi d̄i adena, ’Ruma nahu na'ahopu dula mbalina,’ edempara sia nduku sara'ana ada ro ngaha ra nonona sampe mawukaina,

⁴⁶ndad̄i dula rumana d̄i ainaina ro jam wati rasangka-sangka b̄a sia. Ro adana ede kancoki podana b̄a rumana ro kandad̄ina sama b̄une dou-dou ma wati to'a d̄i Ruma Hatalla.

⁴⁷Ada ma b̄ade d̄i ne'e b̄a rumana, pala wati sadiana ro wati karawina rakane'e b̄a rumana ede, d̄i cambo ka'ipi.

⁴⁸Pala ada ma wati b̄ade rakane'e b̄a rumana, edempara karawina ma ncara ndad̄ina pab̄uaku d̄i cambo, d̄i cambo kanarimpa. B̄ara dou rawa'u mbei kamboto, d̄i sia d̄i raho pab̄ua mamboto rau. Ro dou marawa'u imbi kambotokai, d̄i sia d̄iraho kamboto rau.”

⁴⁹”Nahu maiku d̄imakawontu ngga'a na'e d̄i dunia ake. Nawancuku tahona nggarasi afina wa'ura kalea!

⁵⁰ Wara walipu susa ra ncoki ma ipi poda d̄i pab̄ua kalampa b̄a Nahu. Ro ngango poda ade-Ku sawatipu ndad̄ina ede.

⁵¹Sab̄ua kacai b̄a nggomid̄oho Nahu maiku d̄i dunia ake mai wa'a d̄i damekai? Wati, laina d̄i damekai, malaisi d̄i aokai angi.

⁵²Tampu'u ake, iwa ra weki ma wara lima dou d̄imamusu angi, tolu b̄ae d̄uana, atao d̄ua b̄ae toluna.

⁵³ Ama d̄ima'ao anana ma mone ro ana monena d̄ima'ao amana. Ina ma'ao ana siwena ro ana siwena ma'ao inana. Ina riana d̄ima'ao rido siwena ro rido siwena d̄ima'ao ina rianana.”

⁵⁴Ruma Isa nggahi rauna d̄i dou mamboto, ”Nggara edasi b̄a nggomid̄oho apu mateka d̄i sab̄ae d̄ina, nggomid̄oho nggahi lalomu, ”D̄imalondo ura.’ Ro poda-poda ura.

⁵⁵Nggara iusi b̄a nggomid̄oho mai angi mamai d̄o mai, nggomid̄oho manggahiku, ’D̄imapana.’ Ro poda-poda pana.

⁵⁶Nggomid̄oho dou ma ca'u coro-coro! Nggomid̄oho maloaku takasi ka'ada'ana ai ra liro kai tiomu ka'ada'ana langi ra dana. B̄ab̄auku tanda-tanda jamana ake wati loa tab̄i b̄a nggomid̄oho?”

⁵⁷”B̄ab̄auku nggomid̄oho wati loakaimu kad̄ale b̄a ndaimu au ma taho?

⁵⁸Nggara warasi dou mada'awa nggomid̄oho aka kanto pangadila, usaha sawa'u-wa'upu d̄i kanggorimu parakara ede lab̄o sia wunga mbuipu nggomid̄oho d̄i woha ncai. Nggara watisi, pea sia narandaku nggomid̄oho d̄i tando hakim ro hakim ede nad̄onggoku nggomid̄oho d̄i palisi, ro palisi nakalu'uku nggomid̄oho ade uma bui.

⁵⁹Imbipu! Nggomid̄oho wati d̄imalosa d̄i ade uma bui sawatipu cola kanggori dendamu.”