Read Bima LUKAS 14 Bible Online

LUKAS 14 - Bima bible

LUKAS 14

¹D̄i sab̄ua ainaina Sabat Ruma Isa lao ngahana aka sab̄ua uma dou mana'ekai Farisi. Ta ede dou-dou tio kab̄ae podana Ruma Isa.

²Edempara Ruma Isa mai raka b̄a dou ma supu mbowi, ed̄i ro rimana wa'ura winte.

³Edempara sod̄i b̄a Ruma Isa d̄i guru-guru agama ro dou-dou Farisi ma wara ta ede, ”Nggahi b̄a hukum agama ndaita, sab̄ua loaku ndaita kataho dou masupu d̄i ainaina Sabat atao wati?”

⁴Guru-guru agama ro dou-dou Farisi ede namidimpa. Edempara ou b̄a Ruma Isa dou ede ro katahona sia, edempara kauna lao sia.

⁵ Sawa'u b̄a ede nggahi Ruma Isa d̄i dou-dou, ”Misampara sab̄ua dou d̄i ade weki nggomid̄oho mantau ana atao sab̄ua capi ma mab̄u ade temba d̄i ainaina Sabat, sab̄ua sia wati hinti kalosa rocina anana atao capi ede d̄i ainaina ede wa'u?”

⁶Pala wati kone sab̄ua dou maloana cambe d̄i Ruma Isa mab̄oha lampa rawi ede.

⁷Eda b̄a Ruma Isa wara tamu-tamu ma kad̄ale hid̄i-hid̄i ma ipi taho. B̄ara ndedena Sia mbeina ngoa ra tei ede d̄i siad̄oho sara'ana.

⁸ ”Na'undasi b̄a dou nggomid̄oho aka ndiha nikakai, aina lao dohomu d̄i hid̄i mataho tad̄eina. B̄ara wara deka dou makalai ma ncewi penti ntewi kaisi lab̄o nggomid̄oho ra'unda rau,

⁹ndad̄ina dou mantau uma ma wa'ura unda nggomid̄oho d̄uana ede, kai tani adena maina d̄i nggomid̄oho ro nggahina, ’Mboto kangampu, hid̄i ake wa'ura sadia d̄i ru'u b̄a dou mamai aka.’ Edempara kai maja poda ademu nggomi pesomu weki lao dohomu ta ari nganto podana.

¹⁰B̄ara ndedena, na'undasi b̄a dou nggomid̄oho, kad̄alepu hid̄i ma ari nganto podana, loakud̄u dou mantau uma d̄imamai rakana nggomid̄oho ro nanggahiku d̄i nggomid̄oho, ’Soba, mai tadohoku d̄i hid̄i ma ncewi taho.’ Ade ndendekaina nggomid̄oho d̄i horoma b̄a dou d̄i tando sara'a dou ra'unda ma kalaina.

¹¹ B̄ara sanikina dou ma ka'ese weki d̄i ka'awa, pala ma ka'awa weki d̄i kad̄ese.”

¹²Edempara nggahi Ruma Isa d̄i dou mantau uma, ”Ma'undasi dou d̄imangaha ndiha aimarai atao ngaha ndiha aimangad̄i, aina undamu lenga atao sa'e ro arimu atao iwa ra wekimu atao dou-dou d̄ikompe ra peimu ma ntau ra wara. B̄ara peade siad̄oho d̄ima'unda nggomi rau, ro kai ndedena nggomi d̄i matarima cepekai rakarawimu ede.

¹³Ndad̄i, makarawisi ndiha, undapu dou mancoki mori, dou mampako ra mpedu, dou mamade b̄inci, ro dou mambuda.

¹⁴Nggomi d̄i mbei bareka, b̄ara dou-dou ede wati loana cepe ratahomu ede. Rawimu mataho ede d̄i cepe b̄a Ruma Hatalla wakatu dou-dou ma taho rakamori mbali rad̄i madena.”

¹⁵Wakatu sab̄ua dou d̄i ade weki dou ma ngaha sama-sama ta ede ringana nggahi ra eli Ruma Isa, nggahi sia, ”Taho ra ntika dou maraka ngaha ra nono rakab̄ua wea b̄a Ruma Hatalla d̄i ade Karaja'an Allah!”

¹⁶Pala nggahi Ruma Isa d̄i dou ede, ”D̄isab̄ua wakatu waraku sab̄ua dou makarawi ndiha ma na'e ro undana mboto dou.

¹⁷Rakara wakatuna d̄i tampu'ukai ndiha, dou ede kauna adana lao d̄i dou-dou ra'unda ro nggahina, ’Santab̄eta tamaira, sara'ana wa'ura sadia!

¹⁸Pala siad̄oho sara'ana, sab̄ua-b̄ua dou tampu'u raho kangampu. Ma sarambakaina manggahi d̄i ada ede, ’Nahu b̄ou podapu raweliku dana, ro paraluku lao paresa. Kangampu weapu nahu.’

¹⁹Ma kalaina manggahi, ’Nahu b̄ou podapu raweliku lima oka capi, ro ne'eku coba tio capi-capi ede. Kangampu weapu nahu.’

²⁰Ma kalai walina manggahi, ’Nahu b̄ou podapu nikaku, b̄ara ndedena nahu wati loaku lao.’

²¹Ada dou ede dulana ro ngoana lampa rawi ede d̄i rumana. Rumana ede nambani podaku, ro nggahina d̄i adana ede, ’Lao rocipu d̄i ncai-ncai ro d̄i gang-gang d̄i kota. Mai wa'apu ta ake dou mancoki mori, dou mampako ra mpedu, dou mambuda ro dou mamade b̄inci.’

²²Edempara nggahi adana ede, ’Ruma, rakaukai b̄a Ita wa'ura karawi b̄a mada, pala hid̄i mbuipu mbotona.’

²³Edempara nggahi dou mantau rawi ede, ’Laopu d̄i ncai-ncai bari ro d̄i ncai-ncai to'i ari mai b̄a kota, ro kau pab̄uapu dou-dou mai, loakud̄u uma nahu b̄inina.

²⁴Kawarapu! Wati kone sab̄ua dou d̄i ade weki dou ra'unda ede d̄imaloana ngaha ra nono d̄i ade ndihakai nahu ake.’ ”

²⁵Mboto dou malampa b̄atu Ruma Isa. Tambari Ruma Isa ro nggahina d̄i siad̄oho,

²⁶ ”Nggara dou namaisi d̄i Nahu, pala nancewipu meci ra ca'una inana, amana, weina, anad̄ohona, sa'e ra arid̄ohona, kone sarumbu ndaina, sia wati loana b̄atu Nahu.

²⁷ Dou ma wati ngawa tundu salibna ro b̄atuna Nahu, wati loana d̄imab̄atu Nahu.

²⁸Nggara sab̄ua dou d̄i ade weki nggomid̄oho mane'e tu'u sab̄ua uma d̄ese, tantu sia nadoho reke wa'uku piti d̄i tu'ukai loakud̄u sia b̄adena sab̄ua piti rasadia nancihi d̄i kanggorikai uma d̄ese ede atao wati.

²⁹B̄ara watisi wa'u b̄a sia kanggorina, sapodakaina dasa wa'ura ndawi, ndad̄i sara'a dou ma edana rawi ede d̄imaharikaina.

³⁰Siad̄oho d̄imanggahi, ’Ii, dou ake natu'u uma, pala wati wa'una kanggori!’

³¹Nggara sab̄ua dou sangaji ma ntau sampuru riwu tentara mane'e lewa lab̄o sangaji makalai ma ntau d̄ua puru riwu tentara, tantu sangaji ede nadoho kananu wa'uku sab̄ua sia natenggo d̄imalewa lab̄o musuna ede.

³²Nggara nab̄adesi b̄a sia b̄a one sia wati wa'una ao musuna, tantu wakatu musuna mbuipu d̄o'ona, sia nanggaduku dou d̄i rahokaina taho ro musuna ede.”

³³Cumpukaina nggahi Ruma Isa, ”Ndede rau nggomid̄oho. Wati kone sab̄ua dou d̄i ade weki nggomid̄oho d̄imaloa b̄atu Nahu, nggarasi sia watisi koroba sara'ana au-au.”

³⁴”Sia ede taho, pala nandad̄isi cab̄a, sab̄ua loaku d̄i kandanga mbali?

³⁵Watira wara one walina, nataho d̄i ru'u b̄a oma ro d̄i ru'u b̄a pupu. Ndad̄i d̄i pakimpa. Nggara mantausi fiko, ringa ra kade'epu!”