Read Bima LUKAS 16 Bible Online

LUKAS 16 - Bima bible

LUKAS 16

¹Nggahi Ruma Isa d̄i anamorid̄oho-Na, ”Waraku sab̄ua dou mantau ra wara. Sia nantau dou mab̄ora pitina ma uru wea ntau ra warana. Dou mantau ra wara ede rakana b̄ade b̄a one dou mab̄ora pitina ede balanja ka'ihana piti sia.

²Ndad̄i ou b̄a sia dou mab̄ora pitina ede ro nggahina, ’Au ake raringa b̄a nahu mab̄oha nggomi? Ake, mbeipu d̄i nahu lapora malengka mab̄oha karawimu ma'uru wea ntau ra wara nahu. Nggomi wati loa walimu ndad̄i dou mataki b̄ora piti nahu.’

³Edempara kananu b̄a dou mab̄ora piti ede, ’Auku d̄i karawi b̄a nahu ake? Ruma nahu nane'eku kalosa nahu ade karawikaiku. Maco dana nahu wati tenggoku; raho sadeka rero, nahu maja.

⁴Nahu wara akaku; nakalosasi b̄a ruma nahu ade karawikaiku, nahu pab̄uaku ntau mboto lengaku ma ngawa weha ngge'e lab̄o nahu d̄i umana!’

⁵Ndad̄i dou mab̄ora piti ede ouna sanikina dou ma nconggo d̄i rumana. D̄imasarambakaina, nggahi sia, ’Sab̄une nconggomu d̄i ruma nahu?’

⁶Cambe b̄a dou ede, ’Saratu roa mina zaitun.’ Nggahi dou mab̄ora piti ede d̄i sia, ’Ake sura nconggomu. Dohopu ro tunti rocipu: lima mpuru.’

⁷Edempara nggahi sia d̄i dou ma kad̄uakaina, ’Ro nggomi cina, sab̄une nconggo nggomi?’ Cambe b̄a dou ede, ’Sariwu karu gando.’ Nggahi dou mab̄ora piti ede d̄i sia, ’Ake sura nconggomu. Tuntipu: waru ratu.’

⁸Edempara ruma dou mab̄ora piti ede ma wati ntiri ra rombo ede roina d̄i dou mab̄ora pitina ede b̄ara ruku ra rawina ma mboto aka ede; b̄ara dou-dou dunia ake nancewi loa akana ma'ato d̄i ru'u siad̄oho ntewi kaisi lab̄o dou-dou ma mori ade taroakaina.”

⁹Edempara Ruma Isa nuntu ra nggahi walina, nggahi-Na, ”Ringapu! Kanipu ntau ra wara dunia ake d̄i rakakaimu lenga, loakud̄u watisi ntauna co'i ntau ra wara dunia ake wali, nggomid̄oho d̄i tarima d̄i hid̄i ngge'ekai ma'ederahid̄i.

¹⁰Dou ma loa d̄i imbi d̄i ade lampa rawi mato'i, loa d̄i imbi rau d̄i ade lampa rawi mana'e. Pala dou ma wati loa d̄i imbikai d̄i ade lampa rawi mato'i, wati loa d̄i imbi rau d̄i ade lampa rawi mana'e.

¹¹Ndad̄i, nggara mab̄oha ntau ra wara dunia ake nggomid̄oho wati loa d̄i imbikai, couku mangawana imbikai d̄i nggomid̄oho ntau ra wara maraso?

¹²Ro mab̄oha barang ntau dou makalai, nggomid̄oho wa'ura wara bukutina wati loa d̄i imbikai, couku mangawa mbei d̄i nggomid̄oho au ma ndad̄i ntaumu?

¹³ Wati wara kone sab̄ua dou maloa karawi d̄i ru'u b̄a d̄ua dou ruma; b̄ara sia nancewi meci ra ca'uku ma sab̄uana ntewi kaisi lab̄o ma kalaina, atao sia nancewi to'aku d̄i rumana ma sab̄ua ntewi kaisi lab̄o ma kalaina. Ndede rau nggomid̄oho. Nggomid̄oho wati loamu karawi d̄i ru'u b̄a Ruma Hatalla ro d̄i ru'u b̄a ntau ra wara raumu.”

¹⁴Dou-dou Farisi naringa sara'aku nggahi ra eli Ruma Isa. Edempara siad̄oho harikaina Sia, b̄ara siad̄oho naca'u d̄i piti.

¹⁵Pala nggahi Ruma Isa d̄i siad̄oho, ”Nggomid̄ohora ma d̄i tando dou makalai d̄i edamu nancihiku, pala Ruma Hatalla nab̄adeku isi ademu. B̄ara au rawi'ikai b̄a manusia ese, nantanda ka'awa b̄a Ruma Hatalla.

¹⁶ Hukum rambei b̄a la Musa ro ngoa ra tei b̄a nabi-nabi, ngge'empa kani sampe jamana la Yahya Mataki kandeu karaso dou. Ratampu'u wakatu ede Haba Mataho mab̄oha Karaja'an Allah d̄i ngoa ra kahaba ncau. Ro dou mapab̄ua weki d̄imandad̄i anggota ela Karaja'an Allah.

¹⁷ Pala nancewi mod̄apu mbora langi ro dana, ntewi kaisi lab̄o sab̄ua huruf d̄i ade Hukum Allah madandad̄i.

¹⁸ Cou mawi'i weina edempara nika walina lab̄o dou siwe makalai, dou ede najinaku. Ro dou ma nika lab̄o dou siwe rawi'i b̄a rahina, najina rauku.”

¹⁹”Waraku sab̄ua dou mantau ra wara. Kani ra lombona na'ipiku nggalina. Ro mori ra wokona sanai-nai na'ipiku caruna.

²⁰D̄itando tad̄a umana wara rawi'i sab̄ua dou mancoki mori mangara la Lazarus. Sarumbuna b̄ini b̄a mba'a.

²¹Sia nane'e isi lokona kai onu-onu maramab̄u rad̄i meja dou mantau ra wara ede. Lako namai nelaku mba'ana.

²²Dou mancoki mori ede madena, edempara wa'a b̄a mala'eka aka hid̄i mataho ra ntika d̄i kompe Ibrahim d̄i saroga. Dou mantau ra wara ede made rauna ro umbu b̄a dou.

²³D̄i dunia dou mamade sia na'ipiku susa ra ncoki iuna. Ro wakatu ntanda ca'ese b̄a sia, sia edana Ibrahim d̄i hid̄i ma d̄o'o ro la Lazarus wara d̄i kompe Ibrahim.

²⁴’Ama Ibrahim!’ nggao b̄a dou mantau ra wara ede. ’Takasi to'ipu ademu d̄i mada. Takau to'ipu la Lazarus d̄eta kanggena d̄i ade oi edempara mai b̄eca weana rera mada. Mada susa ra ncoki poda iuku d̄i ade afi ake!’

²⁵Pala cambe b̄a Ibrahim, ’Kawarapu anaku: selama morimu nggomi wa'ura rakamu sara'ana ma taho-taho, la Lazarus rakana ma iha ncau. Ake sia nasana iuna ta ake, ro nggomi susa ra ncoki iumu.

²⁶Ari mai b̄a ede, d̄i hela nggomi ro nami wa'ura ndawi sab̄ua rengge ma na'e, loakud̄u dou ta ake wati loana lao ta aka ro dou ta aka wati loana mai ta ake!’

²⁷’Nggara ndedesi, Pa,’ nggahi dou mantau ra wara ede, ’mada maraho nemba d̄i Ita takau to'ipu la Lazarus lao aka uma ama mada.

²⁸Wara lima sa'e ro ari mada ta ede. Takau to'ipu la Lazarus ngoa ra kawara siad̄oho, loakud̄u aina siad̄oho rau mab̄u d̄i hid̄i kancokikai ake.’

²⁹Cambe b̄a Ibrahim, ’Siad̄oho wa'ura ntauna buku-buku Musa ro buku-buku nabi-nabi! Co'opu siad̄oho b̄atuna au ratunti d̄i ade buku-buku ede!’

³⁰Pala cambe b̄a dou mantau ra wara ede, ’Ede wati ncihina, Ama Ibrahim. Pala nggara warasi dou mamade mamori mbali ro maina d̄i siad̄oho, siad̄oho natoba rad̄i dosa-dosa siad̄oho.’

³¹Pala nggahi Ibrahim, ’Nggara siad̄oho watisi kade'ena ra kaukai b̄a la Musa ro nabi-nabi, pasti siad̄oho wati d̄i ma'imbi rau, konena wara dou mamade ma mori mbali.’ ”