Read Bima LUKAS 17 Bible Online

LUKAS 17 - Bima bible

LUKAS 17

¹Nggahi Ruma Isa d̄i anamorid̄oho-Na, ”Lampa rawi-lampa rawi ma kandad̄ina dou karawina dosa pasti d̄imawara. Pala ihara dou ma rakandad̄ina!

²Natahopu wadu nggirukai d̄iki d̄i wo'ona, edempara sia d̄ipaki d̄i ade moti nggarasi sia makandad̄ina sab̄ua dou ade weki dou-dou mato'i ake karawina dosa.

³ B̄ara ndedena, aina kabare! Nggarasi cinamu makarawi dosa, rojopu sia. Nggara sincisi adena, kangampu weapu sia.

⁴Nggarasi sia nakarawisi mancara d̄i nggomi pidu kali sanai ro saniki maina d̄i nggomi ro nggahina, ’Nahu raho kangampu,’ kangampu weapu sia.”

⁵Nggahi rasu-rasu d̄i Ruma Isa, ”Ruma, takatenggo to'ipu imbi la madad̄oho.”

⁶Cambe b̄a Ruma, ”Nggara nggomid̄oho mantausi imbi b̄une na'e isi sawi, nggomid̄oho maloaku nggahi d̄i fu'u murbei ake, ’Tambonggepu nggomi ro nconggepu d̄i moti,’ pasti fu'u haju ake d̄imab̄atu parenta nggomid̄oho.”

⁷”Misakai sab̄ua dou d̄i ade weki nggomid̄oho mantau ada ma rawi dana d̄i oma atao mangena jimba. Nadulasi ada ede, sab̄ua sia nanggahiku d̄i adana, ’Mai ngaha rocipu’?

⁸Tantu wati! Pala sia nanggahiku d̄i adana ede, ’Sadia weapu ngaha ra nono nahu. Kanipu kani ra lombo maraso ro doho tonggupu nahu mawunga ngaha ra nono; sawa'u b̄a ede nggomi ampomu loa ngaha.’

⁹Ada ede wati paraluna d̄iroi b̄ara wa'ura b̄atuna parenta rumana.

¹⁰Ndede rauja nggomid̄oho. Nggara wa'usi nggomid̄oho karawi sara'a rakaukai d̄i nggomid̄oho, nggahipu, ’Madad̄oho ake adampa; madad̄oho cuma karawi d̄i pab̄ua karawi b̄a madad̄oho.’ ”

¹¹Wunga lampa laona aka Yerusalem, Ruma Isa lampana tancai makahampakai dana ra rasa Samaria ro Galilea.

¹²Wakatu lu'u d̄i sab̄ua kampo, Sia mai raka b̄a sampuru dou ma supu ncola. Siad̄oho kid̄i d̄o'ona

¹³ro kanggicana, ”Ruma Isa! Takasi ade to'ipu d̄i madad̄oho!”

¹⁴ Wakatu eda b̄a Ruma Isa siad̄oho, nggahi Sia, ”Laopu d̄i imam-imam, rahopu siad̄oho paresa wea sarumbumu.” Wunga ade lampa laona siad̄oho, mbora lalompa supu siad̄oho.

¹⁵Wakatu sab̄ua dou ade weki siad̄oho kawarana weki b̄a one sia wa'ura taho, sia dula mbalina ro roi ra wadina Ruma Hatalla.

¹⁶Edempara d̄i tando Ruma Isa, sia sujuna ro nggahina tarima kasi d̄i Sia. Dou ede dou Samaria.

¹⁷Edempara nggahi Ruma Isa, ”Sab̄ua laina wara sampuru dou ra kataho wea supuna? Tab̄eku ma ciwi dou walina?

¹⁸B̄ab̄auku dou lai rasa ake mpoampa ma dula mbali marenta tarima kasi d̄i Ruma Hatalla?”

¹⁹Edempara nggahi Ruma Isa d̄i dou ede, ”Tu'ura, ro laora. B̄ara nggomi imbimu d̄i Nahu, nggomi taho.”

²⁰Pila-pila dou Farisi sod̄ina d̄i Ruma Isa b̄une aiku mai Karaja'an Allah. Cambe b̄a Ruma Isa, ”Karaja'an Allah wati tampu'ukaina kai tanda-tanda d̄i loa eda b̄a dou,

²¹ndad̄ina dou naloaku nggahi, ’Mai tio, akeku sia!’ atao, ’Ta'akaku sia!’ B̄ara Karaja'an Allah wa'ura maina d̄i ade woha nggomid̄oho.”

²²Sawa'u b̄a ede nggahi Ruma Isa d̄i anamorid̄oho-Na, ”D̄imamai wakatuna nggomid̄oho mane'e eda sanai d̄i ainain-ainain Ana Manusia, pala nggomid̄oho wati loamu eda.

²³Peade dou d̄imanggahi d̄i nggomid̄oho, ’Tiopu, ta ede!’ atao, ’Tiopu, ta ake!’ Pala nggomid̄oho aina losa ngupamu sia.

²⁴B̄une kakila ai mamai ese langi, ro mataroa rad̄i sumpu sampe d̄i sumpuna, ndede raujaku peasi ka'ada'ana Ana Manusia rakasi ainaina.

²⁵Pala wakatu saramba-rambana Sia pab̄uaku mbotona susa ra ncoki ro wati tarima b̄a dou-dou jamana ake.

²⁶ Wakatu ainaina Ana Manusia d̄i katada peasi, ka'ada'ana b̄une jamana la Nuh ntoina.

²⁷ Dou mangaha ra nono, ro nika ra neko; ndede ncauku sampe la Nuh lu'una d̄i ade lopi ro mai mbere ro hadena dou-dou ede sara'ana.

²⁸ B̄une wakatu jamana la Lot rau. Dou mangaha ra nono, malanda ra lajo, manggud̄a ra congge ro matu'u uma.

²⁹Pala wakatu la Lot losa d̄i Sodom, wakatu ainaina ede afi ro pure londona rad̄i langi ro kalelina siad̄oho sara'ana.

³⁰Ndedeku ka'ada'ana peasi wakatu ainaina Ana Manusia d̄i katada.

³¹ D̄i'ainaina ede dou ma wunga wara d̄i ese wawo b̄utu umana aina londo d̄i wehakaina barang-barangna ma wara d̄i ade umana. Ndede rauja dou ma wunga wara d̄i omana aina dula mbali d̄i umana.

³² Kawarapu au ma wa'ura ndad̄i lab̄o wei la Lot!

³³ Dou ma ne'e kasalama morina, d̄imambora morina. Pala dou mambora morina d̄imakasalamana.

³⁴Imbipu: Wakatu aimangad̄i ede, d̄ua dou mawunga maru d̄i sab̄ua ranja, sab̄ua dou d̄iwa'a ro sab̄ua walina d̄i wi'i.

³⁵Dou siwe d̄uana mawunga mbajuna gando, sab̄ua dou d̄iwa'a ro sab̄ua wali d̄iwi'i. [

³⁶D̄ua dou mawunga karawi d̄i oma, sab̄ua dou d̄i wa'a, ro sab̄ua dou wali d̄i wi'i.]”

³⁷Anamori Ruma Isa masod̄i, ”Tab̄eku d̄i ndad̄ikaina ede, Ruma?” Cambe b̄a Ruma Isa, ”Tab̄era warakai timba, ta ede wara nasi mataki ngaha timba.”