Read Bima LUKAS 18 Bible Online

LUKAS 18 - Bima bible

LUKAS 18

¹Sawa'u b̄a ede Ruma Isa caritana sab̄ua conto ra ibara d̄i teikaina anamorid̄oho-Na loakud̄u siad̄oho do'a ntuwuna ro aina to'i ade.

²Nggahi Ruma Isa, ”D̄isab̄ua kota wara sab̄ua dou hakim ma wati dahu d̄i Ruma Hatalla, ro wati rekena kone cou-cou rau.

³D̄i kota ede wara rau sab̄ua dou siwe mbaru mboha ma ntuwura mai satando d̄i hakim ede rahona parakarana d̄i bela wea. ’Tabantu to'ipu mada mancao tando lab̄o musu mada,’ nggahi dou siwe mbaru mboha ede.

⁴Pila-pila wakatu ntoina hakim ede wati ngawana bantu dou siwe mbaru mboha ede. Pala cumpukaina kananu b̄a hakim ede, ’Nahu konena wati dahuku d̄i Ruma Hatalla ro wati rekeku d̄i cou-cou rau,

⁵pala b̄ara dou siwe mbaru mboha ake nahako ntuwuku nahu, natahopu nahu bela weaku parakarana. Nggara watisi ndedena, sia namai ntuwuku ro kasusa ncauna nahu.’ ”

⁶Edempara nggahi Ruma, ”Kade'e kab̄aepu au ranggahi b̄a hakim ma wati adi ede!

⁷Sab̄ua Ruma Hatalla wati d̄imabela weana parakara ela ndai-Na ma ou d̄i Sia d̄i aimarai aimangad̄i? Sab̄ua Sia nakanajo-najoku wakatuna d̄i bantukaina siad̄oho?

⁸Imbipu: Sia nabela rociku parakara siad̄oho! Pala namaisi Ana Manusia, sab̄ua mbuipu d̄i raka eda dou ma imbi d̄i Sia d̄i dunia ake?”

⁹Ruma Isa carita rauna conto ra ibara ake nggahi b̄a Sia d̄i ru'u b̄a dou ma kab̄awa dou makalai, pala na'imbi podaku b̄a one weki ndaina taho.

¹⁰Nggahi Ruma Isa, ”Waraku d̄ua dou ma lao aka Bait Allah ne'e sambea. Ma sab̄ua dou Farisi, ma kalai sab̄ua dou mataki tagi bea.

¹¹Dou Farisi ede kid̄i lao kalai ndaina ro sambeana, ’Io Ruma Hatalla, mada matarima kasi d̄i Ita, b̄ara mada wati b̄une dou makalai, ma na'e ade, kali leko, atao makarawi jina. Mada syuku poda b̄ara mada wati b̄une dou mataki tagi bea aka.

¹²Mada puasaku d̄ua kali saminggu, ro mada d̄onggo ra mbeiku d̄i ru'u b̄a Ita cengga sampuru d̄i ade sara'ana au raraka mada.’

¹³Pala dou mataki tagi bea ede kid̄i kad̄o'ona wekina ro wati disana d̄onga langi. Sarere salahona lawilina nggahi sia, ’Io Ruma Hatalla, Takasi ade to'ipu d̄i la mada, dou mawa'ura dosa ake!’ ”

¹⁴ ”Imbipu,” nggahi Ruma Isa, ”wakatu dula d̄i uma, dou mataki tagi bea edeku d̄i tarima b̄a Ruma Hatalla ro laina dou Farisi ede. B̄ara sanikina dou ma ka'ese weki d̄i kab̄awa; ro sanikina dou ma kab̄awa weki d̄i kad̄ese.”

¹⁵Wara dou-dou mawa'a d̄ambe-d̄ambe to'i d̄i Ruma Isa loakud̄u Sia d̄ama ro mbeina bareka d̄i siad̄oho. Wakatu eda b̄a anamorid̄oho-Na lampa rawi ede, siad̄oho mbanina d̄i dou-dou ede.

¹⁶Pala Ruma Isa ouna d̄ambe-d̄ambe to'i ede edempara nggahina d̄i anamorid̄oho-Na, ”Co'opu d̄ambe-d̄ambe to'i maina d̄i Nahu! Aina kantamu siad̄oho, b̄ara dou b̄une akeku ma ndad̄i anggota ela Karaja'an Allah,

¹⁷Kawarapu! Dou ma wati mai satando d̄i Ruma Hatalla b̄une d̄ambe to'i, wati d̄imandad̄i anggota ela Karaja'an Allah.”

¹⁸Sab̄ua dou mana'ekaina dou Yahudi masod̄i d̄i Ruma Isa, ”Pa Guru ma taho, auku d̄i karawi b̄a mada loakud̄u rakaku mori masapodakaina ro ma'ederahid̄i?”

¹⁹”B̄ab̄auku nggomi nggahimu Nahu taho?” sod̄i b̄a Ruma Isa d̄i sia. ”Wati warana ma taho, selasi ndai Ruma Hatalla.

²⁰ Nggomi wa'ura b̄ademu rakaukai b̄a Ruma Hatalla: ’Aina jina, aina hade dou, aina mpanga, aina sakasi cowa, ro lia ro horomapu ama ra inamu.’ ”

²¹”Sara'a rakaukai ede wa'ura b̄atu b̄a mada ra'aipu to'i wa'uku,” cambe b̄a dou ede.

²²Ringana ede, nggahi Ruma Isa, ”Mbuipu wara sab̄ua lampa rawi d̄i pab̄ua karawi b̄a nggomi: Landa kampoipu ntau ra waramu ede, mbeipu pitina d̄i dou mancoki mori, ro nggomi d̄imaraka ntau ra wara d̄i saroga. Sawa'u b̄a ede mai b̄atupu Nahu.”

²³Pala wakatu ringa b̄a dou ede, sia susa adena b̄ara sia na'ipiku ntau ra warana.

²⁴Ruma Isa nab̄adeku dou ede masusa ade, b̄ara ndedena nggahi Sia, ”Nanggonggi podaku d̄i ru'u b̄a dou mantau ra wara d̄imandad̄i anggota ela Karaja'an Allah!

²⁵Nancewi mod̄apu sab̄ua onta lu'u d̄i karonga nda'u, ntewi kaisi lab̄o sab̄ua dou mantau ra wara lu'u d̄i Karaja'an Allah.”

²⁶Dou-dou maringa nggahi ndede Ruma Isa sod̄ina, ”Nggara ndedesi, couku ma loa salama?”

²⁷Cambe b̄a Ruma Isa, ”Ma wati lu'u kai aka b̄a manusia, naloaku b̄a Ruma Hatalla!”

²⁸Edempara nggahi la Petrus, ”Tatio to'ipu! La madad̄oho wa'ura tu'u wi'imu uma ra salaja d̄i b̄atukaimu Ita.”

²⁹”Imbipu!” nggahi Ruma Isa. ”Dou ma wa'ura tu'u wi'i umana, atao weina, atao sa'e lab̄o arina, atao ama lab̄o inana atao ana-anana b̄ara karawi weana d̄i ru'u b̄a Ruma Hatalla,

³⁰dou ede d̄i cepe wea kai mboto mancewi d̄i jamana ake, ro d̄i jamana ma kento, sia d̄i mbei mori masapodakaina ro ma'ederahid̄i.”

³¹Ruma Isa kab̄oro kalaina sampuru d̄ua anamori-Na, edempara nggahina, ”Ringa ra kade'epu! Ndai ake wunga lao aka Yerusalem. Ta aka, sara'ana ratunti b̄a nabi-nabi mab̄oha Ana Manusia, d̄imandad̄i.

³²Sia d̄i d̄onggo mbei d̄i dou-dou malaina Yahudi, d̄imakasungge-sunggena, kab̄awa ra katunana ro makatufe Sia.

³³Siad̄oho d̄imakancokina ro d̄imahade Sia, pala d̄i ainaina makatolukaina, Sia d̄imamori mbali.”

³⁴Sara'ana ede wati loa ka'ao kone sato'i b̄a anamori Ruma Isa. Aona d̄i ade nggahi ra eli-Na ede wati d̄i katada d̄i siad̄oho. Siad̄oho wati b̄adena auku nuntu ra nggahi Sia.

³⁵Wakatu Ruma Isa ne'era rongga d̄i Yerikho, sab̄ua dou mambuda mawunga doho raho ngende d̄i kengge ncai.

³⁶Wakatu ringa b̄a sia dou mamboto lampa sai ta ede, sod̄i b̄a sia, ”Au mandad̄i?”

³⁷”Isa, dou Nazaret ede malampa sai,” nggahi siad̄oho d̄i sia.

³⁸Edempara dou mambuda ede kanggicana, ”Isa, ana Daud! Takasi to'ipu adeta d̄i mada!”

³⁹Dou-dou ma lampa ulu, mbanina d̄i sia ro kauna sia midi. Pala sia kanggica kana'e walina, ”Ana Daud! Takasi to'ipu adeta d̄i mada!”

⁴⁰Midi Ruma Isa ro kauna dou wa'a dou mambuda ede d̄i Sia. Wakatu sia ronggana, sod̄i b̄a Ruma Isa,

⁴¹”Auku d̄i ne'e b̄a nggomi d̄i karawi wea b̄a Nahu?” ”Ruma,” cambe b̄a dou mambuda ede, ”mada kane'e loa eda.”

⁴²Edempara nggahi Ruma Isa, ”Nggara ndedesi, edara! B̄ara nggomi imbimu d̄i Nahu, nggomi tahomu.”

⁴³Wakatu ede lalo sia loana eda, edempara sia b̄atuna Ruma Isa ro rentana tarima kasi d̄i Ruma Hatalla. Wakatu eda b̄a dou mamboto ede lampa rawi ede, siad̄oho sara'ana roi ra wadina Ruma Hatalla.