Read Bima LUKAS 20 Bible Online

LUKAS 20 - Bima bible

LUKAS 20

¹D̄isab̄ua ainaina, Ruma Isa wunga ngoa ra teina ro ngoa ra kahabana Haba Mataho ma ramai ta Ruma Hatalla d̄i dou-dou d̄i ade Bait Allah. Dou-dou mana'ekai imam, guru-guru agama, masama-sama lab̄o dou-dou mana'ekai Yahudi, maina

²ro nggahina d̄i Ruma Isa, ”Coba ngoa to'ipu d̄i nami kai dasa au Nggomi karawimu sara'ana ake? Cou marambei hak ede d̄i Nggomi?”

³Cambe b̄a Ruma Isa, ”Nahu wara ne'eku sod̄i. Ngoajapu d̄i Nahu,

⁴la Yahya Mataki kandeu karaso dou kai hak cou? Ruma Hatalla atao manusia?”

⁵Edempara siad̄oho tampu'ura mafakana, ”Nggara nggahisi b̄a ndai, ’Kai hak Ruma Hatalla,’ Sia nanggahiku, ’Nggara ndedesi, b̄ab̄au nggomid̄oho wati imbikaimu d̄i sia?’

⁶Pala nggara nggahisi b̄a ndai, ’Kai hak manusia,’ sara'ana dou d̄imatob̄a ndai kai wadu, b̄ara siad̄oho na'imbiku b̄a one la Yahya sab̄ua dou nabi.”

⁷Ndad̄i siad̄oho cambena, ”Nami wati b̄ademu.”

⁸Edempara nggahi Ruma Isa d̄i siad̄oho, ”Nggara ndedesi Nahu rau wati d̄imangoa d̄i nggomid̄oho kai hak cou Nahu karawi-Ku sara'ana ake.”

⁹ Ruma Isa caritana d̄i dou-dou ede, conto ra ibara ake, ”Waraku sab̄ua dou ma nggud̄a d̄i salob̄e dana kai anggo. Sia kauna sewa nggaro ede d̄i pila-pila dou makarawi weana edempara sia laona aka dana ra rasa makalai ro ngge'e ntoina ta aka.

¹⁰Rakara wakatuna d̄ipokekai wua anggo, dou mantau nggaro ede nggaduna adana d̄i dou-dou makarawi wea nggarona d̄iwehakai ru'una. Pala dou-dou makarawi wea nggaro ede ndukuna ada ede ro kauna sia dula kai rima ntaru.

¹¹Edempara dou mantau nggaro ede nggadu walina sab̄ua ada ma kalai; pala ada ede nduku rauna ro kasungge-sungge b̄a dou-dou makarawi ede, edempara kauna dula kai rima ntaru.

¹²Edempara dou mantau nggaro ede nggaduna adana ma katolukaina. Pala ada ede nduku rau b̄a dou-dou makarawi d̄i nggaro ede ro pakina ari mai b̄a nggaro ede.

¹³Edempara dou mantau nggaro ede nggahina, ’Auku d̄ikarawi wali b̄a nahu? Nahu d̄imanggadu ana ndaiku rameci ra ca'uku. Pasti nalia ra horoma aoku b̄a siad̄oho!’

¹⁴Pala wakatu eda b̄a dou-dou makarawi sewa d̄i nggaro ede ana dou mantau nggaro ede, nggahi siad̄oho d̄i angi ndaid̄ohona, ’Akeku sia d̄imakapasakana. Mai ndai tahadeku sia, loakud̄u ndai d̄imaraka pasakana.’

¹⁵Edempara siad̄oho randa kalosana sia ari mai b̄a nggaro ede edempara hadena sia.” Edempara sod̄i b̄a Ruma Isa, ”Nggara nadulasi dou mantau nggaro ede, auku d̄ikarawina d̄i dou-dou makarawi cengga nggarona ede?

¹⁶Pasti sia d̄imamai ro hade kampoina dou-dou makarawi cengga hasi nggarona ede, edempara d̄onggona nggarona ede d̄i dou-dou makarawi cengga hasi nggaro ma kalai.” Ringana ede, nggahira dou-dou d̄i Ruma Isa, ”Sakali-kali wati!”

¹⁷ Ntanda b̄a Ruma Isa siad̄oho edempara nggahi-Na, ”Nggara ndedesi, auku aona ayat Alkitab ake? ’Wadu ma wati d̄ikani b̄a dou mataki tu'u uma, wa'ura ndad̄i wadu ma penti poda.’

¹⁸Sara'ana dou ma mab̄u d̄i wadu ede d̄i maleli; ro cou-cou mamab̄u b̄oha b̄a wadu ede d̄imamub̄u leli ndad̄i kalub̄u.”

¹⁹Guru-guru agama ro dou-dou mana'ekai imam nab̄adeku b̄a one conto ra ibara ede tei b̄a Ruma Isa d̄i ru'u b̄a siad̄oho. B̄ara ndedena siad̄oho nane'eku wa'u ra leto Sia wakatu ede wa'u, pala siad̄oho nadahuku d̄i dou mamboto.

²⁰Ndad̄i siad̄oho ngupana wakatu ma taho. Siad̄oho ufana dou d̄imacoro-coro taho, ro kauna dou-dou ede kamab̄u Ruma Isa kai sod̄i-sod̄i, loakud̄u siad̄oho loana d̄onggo Sia d̄i dou-dou makuasa ro d̄ikuasakai gubernu.

²¹Edempara nggahi b̄a dou-dou ra'ufa ede d̄i Ruma Isa, ”Pa Guru, madad̄oho b̄ade b̄a one sara'ana ranggahi ro ngoa ra tei b̄a Ita ede ncihi. Madad̄oho b̄ade rau b̄a one Ita ngoa ra teimu kai ngoa ntiri mab̄oha rakane'e b̄a Ruma Hatalla d̄iru'u b̄a manusia, b̄ara Ita wati ntanda kalaita dou.

²²B̄ara ndedena coba Ita tanggahipu d̄i madad̄oho, nggahi b̄a agama ndaita, sab̄ua loaku cola bea d̄i Kaisar atao wati?”

²³Pala Ruma Isa nab̄adeku kananu siad̄oho madab̄ae. B̄ara ndedena nggahi Sia,

²⁴”Coba katadapu d̄i Nahu sab̄ua piti salaka. Pahu ro ngara cou ake?” ”Kaisar!” cambe b̄a siad̄oho.

²⁵”Nggara ndedesi,” nggahi Ruma Isa d̄i siad̄oho, ”mbeipu d̄i Kaisar, au rantau Kaisar ro d̄i Ruma Hatalla, au rantau Ruma Hatalla.”

²⁶Pala d̄i tando dou mamboto ede siad̄oho wati loana raka kone sab̄ua rawi mancara d̄i Ruma Isa. Siad̄oho namidimpa ro midi adena ringa cambe b̄a Ruma Isa.

²⁷ Pila-pila dou golonga Saduki maina d̄i Ruma Isa. (Siad̄oho eded̄u golonga ma nggahi b̄a one dou mawa'ura made wati d̄imamori mbali.) Sod̄i b̄a siad̄oho d̄i Ruma Isa,

²⁸ ”Pa Guru, Musa tuntina hukum ake d̄i ru'u b̄a ndaita: Nggara namadesi sab̄ua dou mone ro sia wati ntauna ana, ndad̄i arina pab̄uaku nikana lab̄o dou siwe mbaru mboha rara'a wei sa'ena loakud̄u mbeina londo ra mai d̄i dou ma wa'ura made ede.

²⁹Parana wara pidu dou sa'e ra arina. Ma sasa'ekaina nika, edempara madena wati ntauna ana.

³⁰Edempara ma kad̄uakaina nika lab̄o dou siwe mbaru mboha ede, pala sia rau made wati ntauna ana.

³¹Lampa rawi ma sama ndad̄i rau lab̄o ari makatolukaina sampe ana ma kapidukaina.

³²Cumpukaina dou siwe ede made rau.

³³Wakatu ainaina dou mamade d̄ikamori mbali, wei couku dou siwe ede? B̄ara pidu-piduna dou wa'ura nika lab̄o sia.”

³⁴Cambe b̄a Ruma Isa, ”Dou-dou ma mori wakatu ake nika,

³⁵pala dou-dou ma patu d̄ikamori mbali sawa'u b̄a madena, ro mori d̄i jamana ma kento, siad̄oho wati nikana.

³⁶Ka'ada'ana siad̄oho b̄une mala'eka, ro wati d̄imamade. Siad̄oho eded̄u ana-ana Ruma Hatalla, b̄ara siad̄oho wa'ura kamori mbali rad̄i madena.

³⁷ Ndai la Musa manggahi kapodana b̄a one dou mamade d̄ikamori mbali. D̄i ade ratuntina mab̄oha rompa ma kalea ede sia pehena Ruma kai ’Ruma Hatalla Ibrahim, Ruma Hatalla Ishak ro Ruma Hatalla Yakub’.

³⁸Ruma Hatalla ede laina Ruma Hatalla dou mamade! Sia Ruma Hatalla dou-dou ma mori! B̄ara d̄i ru'u Ruma Hatalla, sara'ana dou mori.”

³⁹Pila-pila dou guru agama manggahi, ”Cambe Pa Guru ncihi poda.”

⁴⁰B̄ara ndedena siad̄oho wati disa walina sod̄i au-au d̄i Ruma Isa.

⁴¹Sod̄i b̄a Ruma Isa d̄i siad̄oho, ”B̄uneku loa d̄i nggahi b̄a one Sangaji Mambei salama londo ra mai la Daud?

⁴² Sapodakaina ndai la Daud manggahi d̄i ade buku Zabur, ’Ruma Hatalla manggahi d̄i Rumaku: Dohopu d̄i sab̄ae wana-Ku,

⁴³sampe Nahu makandad̄ina musu-musu-Mu oko ra dahu d̄i Nggomi.’

⁴⁴Ndad̄i nggara la Daud manggahina Sangaji Mambei salama ede ’Ruma’, b̄uneku loana ndad̄i Sia londo ra mai la Daud?”

⁴⁵Wunga mbuipu dou-dou kade'ena nuntu ra nggahi Ruma Isa, nggahi Sia d̄i anamorid̄oho-Na,

⁴⁶ ”Aina kabaremu d̄i guru-guru agama. Siad̄oho naca'u lampa-lampa kai jumba ma d̄ondo, ro naca'u d̄i lia ra horoma d̄i amba-amba. Siad̄oho naca'u hid̄i-hid̄i mataho d̄i ade uma sambea kai ro d̄i ndiha-ndihakai.

⁴⁷Siad̄oho makeko dou-dou siwe mbaru mboha ro marampa wea umana. Ro d̄i b̄ontokaina rawi siad̄oho madab̄ae ede, siad̄oho nado'aku mad̄ondo-d̄ondo! Hukuma d̄i ru'u b̄a siad̄oho peade nataniku!”