Read Bima LUKAS 22 Bible Online

LUKAS 22 - Bima bible

LUKAS 22

¹ Aruraja Roti Mawati ntau B̄uha eded̄u ainaina Paskah nad̄enira wakatuna.

²Dou-dou mana'ekai imam ro guru-guru agama mawunga ngupana ncai ne'e hade Ruma Isa kai nari-nari, b̄ara siad̄oho nadahu d̄i dou mamboto.

³Edempara Ibilis lu'una d̄ei la Yudas ma d̄i oukai la Iskariot, eded̄u sab̄ua dou d̄i ade weki sampuru d̄ua anamori Ruma Isa.

⁴B̄ara ndedena la Yudas lao mafaka lab̄ona dou-dou mana'ekai imam ro dou-dou mana'ekai jaga Bait Allah mab̄oha b̄uneku carana sia d̄onggo mbei Ruma Isa d̄i siad̄oho.

⁵Siad̄oho neo poda adena ro sakena mbei piti d̄i sia.

⁶La Yudas rau ngawa ro sia tampu'una ngupa wakatu mataho d̄i d̄onggokaina Ruma Isa d̄i siad̄oho, kai wati b̄ade b̄a dou.

⁷Rakara ainaina d̄i ade Aruraja Roti Mawati ntau B̄uha b̄a one jimba d̄i ngaha Paskah kai d̄i sambelera.

⁸Edempara Ruma Isa kauna la Petrus ro la Yahya, ”Lao sadiapu ngaha ra nono Paskah d̄i ru'u b̄a ndai.”

⁹Santab̄e Ruma, ”Tab̄eku d̄i ne'eta ngaha ra nono Paskah d̄i sadia wea b̄a madad̄oho?” sod̄i b̄a siad̄oho.

¹⁰Cambe b̄a Ruma Isa, ”Wunga wakatu lu'u nggomid̄oho d̄i kota, sab̄ua dou mone ma wunga wa'a sab̄ua gandi mawara isi oi d̄ima'eda angi lab̄o nggomid̄oho. Lampa b̄atupu sia d̄i uma ralu'ukai b̄a sia,

¹¹ro nggahipu d̄i dou mantau uma ede: Nggahi Guru, ’Tab̄eku hid̄ina d̄i ru'u b̄a anamori-Ku ro Nahu ngaha kai ngaha ra nono Paskah?’

¹²Dou mantau uma ede d̄imateina d̄i nggomid̄oho sab̄ua kama pamoka mana'e, wa'ura lengka lab̄o tauratu'ina. Sadia sara'apu ta aka.”

¹³Edempara lao la Petrus ro la Yahya, edempara edana sara'a b̄unera nggahi Ruma Isa. Siad̄oho rau sadiana d̄i ngaha ra nono Paskah ede.

¹⁴Aipu rakara wakatuna d̄i ngaha ranonokai Paskah ede, Ruma Isa doho sama lab̄o anamori-Na d̄i hid̄i ngaha ra nonokai.

¹⁵Edempara nggahi Sia d̄i siad̄oho, ”Nahu wancuku ne'e-Ku Paskah ngaha ra nono sama lab̄o nggomid̄oho sawatipu susa ra ncoki Nahu!

¹⁶B̄ara, imbipu: Nahu wati d̄imangaha ra nono ake wali sampe aona do'a jamu Ruma ake d̄i katada d̄i Karaja'an Allah.”

¹⁷Sawa'u b̄a ede Ruma Isa hantana canggi anggo, edempara renta do'a syuku d̄i Ruma Hatalla, edempara nggahina, ”Wehapu ake, ro cengga-cenggapu;

¹⁸b̄ara d̄i b̄ademu: tampu'u ake Nahu wati d̄imanono anggo ake wali sampe maikai Karaja'an Allah makuasa sara'ana.”

¹⁹Sawa'u b̄a ede Ruma Isa wehana roti. Ro sawa'u b̄a rentana do'a syuku, Sia b̄i'a-b̄i'ana roti ede kai rima-Na edempara mbeina d̄i siad̄oho, ro nggahina, ”Akeku sarumbu Nahu [rad̄onggo d̄i ru'u b̄a nggomid̄oho. Karawipu ake d̄i kawarakaimu Nahu.”

²⁰ Ndede rauja sawa'u b̄a ngaha, Sia mbeina Canggi ede d̄i siad̄oho ro nggahina, ”Canggi ake eded̄u rasake Ruma Hatalla ma b̄ou, rakasaha kai ra'a Nahu — ra'a rab̄oho d̄i ru'u b̄a nggomid̄oho].”

²¹ ”Pala tio kab̄aepu! Dou d̄imad̄onggo Nahu d̄i dou-dou ma musu Nahu wara ta ake masama-sama lab̄o Nahu!

²²Ana Manusia poda d̄imamade b̄une rakatantu b̄a Ruma Hatalla; pala ihara dou mad̄onggo Sia d̄i dou-dou ma musu-Na!”

²³Edempara siad̄oho tampu'ura sod̄i-sod̄i d̄i ade weki ndaid̄ohona, couku d̄i ade weki siad̄oho d̄imakarawina lampa rawi ede.

²⁴ D̄i ade weki anamori Ruma Isa wontu cence ncihi mab̄oha couku d̄i ade weki siad̄oho d̄i wi'ikai ma ipi na'e.

²⁵ Nggahi Ruma Isa d̄i siad̄oho, ”Sangaji-sangaji bangsa ma wati pata Ruma Hatalla ma'iha mori ra woko elana, ro dou-dou mana'ekaina d̄i pehekai ’Dou mahoru Elana’.

²⁶ Pala nggomid̄oho wati loamu kandede. Dou ma na'e d̄i ade wekimu pab̄uaku ndad̄ina b̄une ma ipi to'i, ro dou mana'ekaina pab̄uaku ndad̄i ada.

²⁷ Cou ma ncewi na'e: dou ma doho ngaha d̄i meja, atao dou ma d̄onggo weana ngaha ra nono? Tantu dou ma doho edeku. Pala Nahu wara d̄i ade woha nggomid̄oho kai b̄une ada.

²⁸D̄i ade sara'a susa ra ncoki-Ku, nggomid̄oho sama-sama ncau lab̄o Nahu.

²⁹B̄une rambei b̄a Ama d̄i Nahu hak d̄i parenta, ndede raujaku Nahu d̄imambei rau hak ede d̄i nggomid̄oho.

³⁰ Ade ndedekaina nggomid̄oho loa b̄atu kad̄ihi ade lab̄o Nahu d̄i ade Karaja'an-Ku. Ro nggomid̄oho d̄imadoho ta ese sampuru d̄ua hid̄i dohokai sangaji d̄imaparenta d̄i sampuru d̄ua suku bangsa Israel.”

³¹”Simon, Simon, ringapu! Ibilis wa'ura mbei iji d̄ima'uji nggomid̄oho; b̄une gando rakalai lab̄o ropena ndad̄ina ma taho rakalai lab̄o ma iha.

³²Pala Nahu wa'ura do'aku d̄i ru'u b̄a nggomi, Simon, loakud̄u imbimu wati mapuna. Ro nggara dula mbalisi nggomi d̄i Nahu nggomi pab̄uapu katenggo cina ra angimu.”

³³Cambe b̄a la Petrus, ”Ruma, mada kangawa lu'u ade uma bui ro made sama-sama lab̄o Ita!”

³⁴”Imbipu, Petrus,” nggahi Ruma Isa, ”sawatipu b̄a koko janga ainaina ake, nggomi tolu kali rungkamu sake d̄i Nahu.”

³⁵ Sawa'u b̄a ede nggahi Ruma Isa d̄i siad̄oho, ”Ntoina wakatu nggadu b̄a Nahu nggomid̄oho kai kanta b̄a Nahu wa'a dompe, kad̄ud̄u atao sepatu, sab̄ua nggomid̄oho wara mada ncihimu?” ”Io watita!” cambe b̄a siad̄oho.

³⁶”Pala ake,” nggahi Ruma Isa, ”cou mantau dompe, atao kad̄ud̄u, pab̄uapu wa'amu; ro cou mawati ntau peda, pab̄uaku landa jumbana d̄i welikaina peda.

³⁷ B̄ara, imbipu, ayat Alkitab ma eli ndake, ’Sia d̄i wi'ikai sab̄ua dou madab̄ae,’ pab̄ua kandad̄ina d̄i ndai Nahu. B̄ara au ratunti d̄i ade Alkitab mab̄oha Nahu wunga ndad̄ina wakatu ake.”

³⁸”Ruma,” nggahi anamori Ruma Isa, ”Tatio to'ipu, ta ake wara d̄ua lona peda.” Tahora cambe b̄a Ruma Isa.

³⁹Ruma Isa tu'u wi'ina kota ro laona b̄une ranginakai-Na lao aka Doro to'i Zaitun, ro anamorid̄oho-Na lao rau b̄atu Sia.

⁴⁰Wakatu rongga ta ede, nggahi Sia d̄i siad̄oho, ”Sambeapu loakud̄u nggomid̄oho wati dosamu nggara nggomid̄oho hinasi b̄a coba.”

⁴¹Edempara Sia lao d̄o'o narina lab̄o siad̄oho, kira-kira b̄une d̄o'o sekali tob̄a kai wadu, edempara doho sujuna ro sambeana.

⁴²”Ama,” nggahi-Na, ”nggara loasi, takad̄o'o to'ipu d̄i Mada susa ra ncoki d̄i iu b̄a Mada ake. Pala aina rakane'e b̄a ndai Mada, malaisi rakane'e b̄a ndai Itampa.” [

⁴³Sab̄ua mala'eka maina d̄i Sia ro katenggona Sia.

⁴⁴Ruma Isa na'ipiku susa ra ncokina kai b̄a ade mpida-Na ndad̄ina Sia nanaha ipiku do'ana. Howina b̄une ra'a makatab̄a awa dana.]

⁴⁵Nggori do'a-Na, Ruma Isa dula mbali d̄i anamorid̄oho-Na. Sia edana siad̄oho wunga maruna b̄ara ipiku ncoki adena.

⁴⁶Edempara nggahi Sia d̄i anamori-Na, ”B̄ab̄auku nggomid̄oho marukaimu? Tu'ura ro do'apu loakud̄u nggomid̄oho b̄oha b̄a coba'ana.”

⁴⁷Wunga mbuipu Ruma Isa nuntuna, maimpara sakalompo dou mamboto. Ma na'ekai siad̄oho eded̄u la Yudas, sab̄ua dou ade weki anamori Ruma Isa. Edempara la Yudas lao rakana Ruma Isa edempara ngiluna Sia.

⁴⁸Pala nggahi Ruma Isa d̄i sia, ”Yudas, sab̄ua kai ngilumu ede nggomi ka'ihakaimu Ana Manusia?”

⁴⁹Wakatu anamori Ruma Isa ma wara ta ede edana au d̄i ma ndad̄i, nggahi siad̄oho, ”Ruma, madad̄oho d̄imadei aona kai peda!”

⁵⁰Edempara sab̄ua dou ade weki siad̄oho ede fatina kai peda dou mana'ekai imam-imam edempara kori fiko wanana.

⁵¹Pala nggahi Ruma Isa, ”Ncihira!” Edempara Sia d̄amana fiko dou ede ro katahona.

⁵²Edempara nggahi Ruma Isa d̄i dou-dou mana'ekai imam ro perwira-perwira majaga Bait Allah, ro d̄i dou-dou mana'e kai dou Yahudi mamai ta ede mane'e wa'u Sia, ”Sab̄ua Nahu ake dou madab̄ae, sampe mai nggomid̄oho lab̄o peda ro kapodo d̄i ne'emu wa'u Nahu?

⁵³ Saniki ainain Nahu wara lab̄o nggomid̄oho d̄i Bait Allah, nggomid̄oho wati wa'umu Nahu. Pala akeku wakatuna d̄i rukukaimu nggomid̄oho, wakatu kuasa marindi manentina nggahi ra rawi.”

⁵⁴Siad̄oho wa'una Ruma Isa ro lao wa'a-Na aka uma dou mana'ekai imam-imam. La Petrus lampa b̄atu slandona.

⁵⁵D̄i ade woha sarei ede, afi unggu wa'ura kalea ro la Petrus lao doho samana lab̄o dou-dou ma doho heko ta ede.

⁵⁶Sab̄ua ada siwe ma'eda la Petrus madoho kengge afi unggu ede; edempara ada siwe ede tio kab̄aena la Petrus, edempara nggahina, ”Dou ake rau akana wara sama-sama lab̄o Isa!”

⁵⁷Pala la Petrus wati mangakuna. Nggahi sia, ”Nahu wati poda pataku dou ede!”

⁵⁸Wati ntoina sawa'u b̄a ede, sab̄ua dou makalai walina edana la Petrus, ”Nggomi rau sab̄ua dou ade weki siad̄oho!” Pala cambe b̄a la Petrus, ”Wati, laina nahu!”

⁵⁹Kira-kira sajam sawa'u b̄a ede, sab̄ua dou wali manggahi kana'e, ”Ncihi romo dou ake mab̄atu Isa, b̄ara sia rau dou Galilea!”

⁶⁰Pala b̄a la Petrus cambe, ”Ausi aona nggahi nggomi, nahu wati b̄adeku!” Wakatu ede wa'u, wunga mbuipu la Petrus nuntu lab̄ona dou, koko janga.

⁶¹Ruma Isa tambarina ro ntandana la Petrus. Edempara la Petrus kawarana b̄a one Ruma wa'ura nggahina d̄i sia, ”Sawatipu b̄a koko janga ainaina ake, nggomi tolu kali rungkamu sake d̄i Nahu.”

⁶²Edempara losa la Petrus d̄i hid̄i ede ro nangi sased̄ina.

⁶³Dou-dou ma wunga jaga Ruma Isa, kampa'a-mpa'akaina ro ndukuna Sia.

⁶⁴Siad̄oho b̄ontona mada-Na ro sod̄ina d̄i Sia, ”Pehejapu cou manduku-Mu?”

⁶⁵Mboto walipu nggahi ra eli siad̄oho makab̄awa ra katuna Ruma Isa.

⁶⁶D̄i aimasid̄i, dou-dou mana'ekai Yahudi, dou-dou mana'ekai imam, ro guru-guru agama kab̄oro weki, edempara Ruma Isa lao wa'a aka tando Mahkama agama siad̄oho.

⁶⁷”Ngoapu d̄i nami,” nggahi siad̄oho d̄i Sia ”sab̄ua poda Nggomi ake Sangaji Mambei salama?” Cambe b̄a Ruma Isa, ”Nggara ngoasi b̄a Nahu d̄i nggomi, nggomid̄oho wati d̄ima'imbi.

⁶⁸Ro nggara sod̄isi b̄a Nahu d̄i nggomid̄oho, nggomid̄oho wati d̄imacambe.

⁶⁹Pala tampu'u ake, Ana Manusia d̄imadoho d̄i sab̄ae wana Ruma Hatalla Ma Wancu Na'e Kuasa.”

⁷⁰Nggahi sara'a siad̄oho, ”Nggara ndedesi, Nggomi ake Ana Ruma Hatalla?” Cambe b̄a Ruma Isa, ”Ndedeku nggahi b̄a nggomid̄oho.”

⁷¹Edempara nggahi siad̄oho, ”Wati paralu walina sakasi! Ndaita wa'ura ringa rad̄i asa ndai-Na!”