Read Bima LUKAS 23 Bible Online

LUKAS 23 - Bima bible

LUKAS 23

¹Sara'a dou d̄i sida ede kid̄i mena, edempara lao wa'ana Ruma Isa d̄i tando Pilatus.

²Ta ede siad̄oho tampu'ura b̄ab̄u ra lo'ona Sia. Nggahi siad̄oho, ”Madad̄oho rakamu eda dou ake kasantudana ela ra dou. Sia kauna dou-dou loakud̄u aina cola bea d̄i Kaisar, b̄ara nggahi Sia, Sia eded̄u Al Masih, sab̄ua dou sangaji.”

³Edempara Pilatus sod̄ina d̄i Ruma Isa, ”Sab̄ua poda Nggomi sangaji dou Yahudi?” Cambe b̄a Ruma Isa, ”Ndedeku nggahi b̄a ndaimu.”

⁴Edempara nggahi Pilatus d̄i dou-dou mana'ekai imam ro d̄i dou mamboto ede, ”Nahu wati rakaku eda kone sab̄ua rawina mancara d̄i Dou ake d̄i hukumkaiku Sia.”

⁵Pala Siad̄oho nanaha pakasa waliku, ”Kai ngoa ra tei-Na, Sia sad̄u'una dou-dou d̄i sara'a Yudea; saramba-rambakaina d̄i Galilea, ro ake wa'ura raka ta ake rau.”

⁶Wakatu ringa b̄a Pilatus ede, sod̄i b̄a sia, ”Sab̄ua dou ake dou Galilea?”

⁷Sawa'u b̄a rangoa b̄a one Ruma Isa rad̄i dana ra rasa kuasakai b̄a Herodes, Pilatus nggaduna Ruma Isa aka Herodes, ma wakatu ede wara rau d̄i Yerusalem.

⁸Herodes neo poda ade wakatu edana Ruma Isa, b̄ara wa'ura ntoi sia ringana haba mab̄oha Sia ro nane'e podaku eda Sia. Ne'e poda b̄a sia eda Ruma Isa karawina lampa rawi mab̄isa ra guna.

⁹B̄ara ndedena Herodes sod̄i mbotona d̄i Sia, pala Ruma Isa wati kone wara cambena.

¹⁰Dou-dou mana'ekai imam ro guru-guru agama mai satando rauna ta ede ro b̄ab̄u ra lo'o kapodana Ruma Isa.

¹¹Herodes ro anggota-anggota tentarana kampa'a-mpa'akaina ro kasungge-sunggena Ruma Isa, edempara kakanikaina Sia kai kani ra lombo sangaji, edempara nggadu mbalina Sia aka Pilatus.

¹²Ainaina ede wa'u Herodes ro Pilatus, ma ntoina mamusu angi, wa'ura taho mbali.

¹³Pilatus kab̄orona dou-dou mana'ekai imam, dou-dou mana'ekaina, ro ela ra dou,

¹⁴edempara nggahina d̄i siad̄oho, ”Nggomid̄oho mai wa'amu dou ake d̄i nahu ro nggahimu b̄a one Sia kasantudana dou-dou. Ake d̄i tando ndai nggomid̄oho nahu wa'ura paresaku Sia, pala nahu poda-poda wati rakaku eda kone sab̄ua rawi-Na mancara rab̄ab̄u ra lo'okai b̄a nggomid̄oho d̄i Sia.

¹⁵Ndede rauja nggahi Herodes, b̄ara sia rau wa'ura nggadu mbalina Isa ede d̄i nami. Dou ake wati karawina au-au ma patu d̄i b̄ab̄ukai hukuma made.

¹⁶B̄ara ndedena nahu d̄imacambona Sia sawa'u b̄a ede nahu d̄imahori Sia.” [

¹⁷D̄i sanikina ndiha Paskah, Pilatus pab̄uaku horina sab̄ua dou rabui d̄i ru'u b̄a ela dou.]

¹⁸Sara'ana dou ma kab̄oro weki ta ede kanggicana, ”Hadepu Sia! Horipu la Barabas d̄i ru'u b̄a madad̄oho!” (

¹⁹Barabas rabuikai b̄ara rakandad̄ina ngango d̄i kota ro b̄ara hadena dou.)

²⁰Pilatus nane'e hori Ruma Isa, b̄ara ndedena sia nuntu ra nggahina sakali wali d̄i dou mamboto ede.

²¹Pala siad̄oho kanggicana, ”Salibpu Sia! Salibpu Sia!”

²²Edempara katolu kalikaina Pilatus nggahi kana'ena d̄i siad̄oho, ”Pala auku rawina mancara Sia? Nahu wati rakaku kone sab̄ua rawi-Na mancara ma patu d̄ihukum kai hukuma made! Nahu d̄imacambona Sia, edempara Sia d̄i hori.”

²³Pala siad̄oho kanggica kana'e ncau podana b̄a one Ruma Isa pab̄uaku d̄i salib. Ro cumpukaina kanggica siad̄oho ede wara onena.

²⁴Edempara Pilatus b̄ab̄ukaina hukuma made d̄i ru'u b̄a Ruma Isa b̄une rakane'e b̄a dou-dou ede,

²⁵ro horina dou raraho b̄a siad̄oho, eded̄u dou rabui b̄ara kangangona rasa ro rahadena dou. Edempara Ruma Isa d̄onggo mbeira d̄i siad̄oho d̄i kalampakaina rawi rakane'e b̄a siad̄oho.

²⁶Edempara Ruma Isa wa'a b̄a siad̄oho. D̄iwoha ncai, siad̄oho eda angi lab̄o sab̄ua dou ma ngara la Simon, dou Kirene ma wunga ne'e lao aka kota. Siad̄oho wa'una sia, ro kau pakasana sia tundu haju salib ede ta ari mai b̄a Ruma Isa.

²⁷Mboto dou malampa b̄atu ta ari mai b̄a Ruma Isa — d̄i ade wekina ede wara rauja pila-pila dou siwe. Dou-dou siwe ede nangi ro d̄uru ra d̄ala weana d̄i ru'u Ruma Isa.

²⁸Pala Ruma Isa tambarina d̄i siad̄oho ro nggahina, ”Dou-dou siwe Yerusalem! Aina nangi weamu d̄i ru'u b̄a Nahu. Nangipu d̄i ru'u b̄a sarumbu ndaimu ro anad̄ohomu.

²⁹B̄ara d̄imamai wakatuna dou d̄imanggahi, ’Nalaba podaku dou-dou siwe ma watipu iu na'e loko, ma wati parana ntau ana ro watipu iuna susu ana!’

³⁰ D̄iwakatu edeku dou d̄imanggahi d̄i doro-doro, ’Mab̄u pitapu d̄i nami!’ Ro d̄i doro to'i-doro to'i, ’Umbupu nami!’

³¹B̄ara nggara d̄ihaju ma mbuipu mori, dou wa'ura karawina b̄une ake, au waliku d̄i karawi b̄a siad̄oho d̄i haju ma wa'ura mango!”

³²Wara rauja d̄ua dou makalaina — d̄uana ede eded̄u dou madab̄ae — ra wa'a b̄a siad̄oho d̄i hukum kai hukuma made sama-sama lab̄o Ruma Isa.

³³Wakatu rakara hid̄i d̄i pehekai ”Rangka”, siad̄oho salibna Ruma Isa lab̄o d̄ua dou madab̄ae ede — sab̄ua dou d̄i sab̄ae wana ro sab̄ua walina d̄i sab̄ae ku'i Ruma Isa.

³⁴ Edempara do'a Ruma Isa, ”Ama, takangampu weapu siad̄oho! Siad̄oho wati b̄adena au rakarawi b̄a siad̄oho.” Kani ra lombo Ruma Isa cengga-cenggana ta ede d̄i weki siad̄oho kai undi d̄i hid̄i ede.

³⁵ Dou-dou makid̄i ta ede ro ntanda salahona, dou-dou mana'ekai dou Yahudi kasungge-sunggena Ruma Isa kai nggahina, ”Sia wa'ura kasalamana dou makalai; coba ake Sia kasalamana weki ndai-Na, nggara poda-podasi Sia Sangaji Mambei salama rakad̄ale b̄a Ruma Hatalla!”

³⁶ Tentara-tentara rau makasungge-sunggena Sia. Siad̄oho maina ro mbeina anggo ngonco d̄i Sia

³⁷ro nggahina, ”Nggara Nggomisi Sangaji dou Yahudi, kasalamapu weki ndai-Mu!”

³⁸Tawela ese haju salib Ruma Isa, ratunti nggahi ra eli ake: ”Akeku Sangaji Dou Yahudi.”

³⁹Sab̄ua dou madab̄ae rasalib ta ede makab̄awa ra katuna Ruma Isa. Nggahi sia, ”Nggomi Sangaji Mambei salama? Io, kasalamapu weki ndai-Mu ro nami!”

⁴⁰Pala dou madab̄ae ma sab̄ua wali rojona d̄i lengana ede, nggahina, ”Sab̄ua nggomi wati dahumu d̄i Ruma Hatalla? Nggomi sama-sama rakamu hukuma made b̄une Sia.

⁴¹Hukuma ndai d̄ua ake ncihi ncao lab̄o rawi ndaita. Pala Sia wati wara kone ncarana!”

⁴²Edempara nggahi sia, ”Ruma Isa, takawara to'ipu mada, wakatu Ita maimu kai Sangaji!”

⁴³”Imbipu,” nggahi Ruma Isa d̄i sia, ”ainaina ake nggomi d̄imasama-sama lab̄o Nahu d̄i Firdaus.”

⁴⁴Kira-kira b̄oe sampuru d̄ua aimarai, wati kalea liro, ro sara'a dana ra rasa ede ndad̄i rindi poda sampe b̄oe tolu aimambia.

⁴⁵ Satampa ratero d̄i ade Bait Allah, ncipa d̄ua.

⁴⁶ Edempara Ruma Isa kanggicana kai eli mana'e, ”Ama! D̄i ade rima-Mu d̄onggo mbei b̄a Mada nawa-Ku!” Sawa'u b̄a nggahi ndedena, Sia madena.

⁴⁷Wakatu eda b̄a perwira tentara au ma wa'ura ndad̄i, sia roi ra wadina Ruma Hatalla. Edempara nggahi sia, ”Poda, Sia wati wara ncarana!”

⁴⁸Dou mamboto ma mai ta ede b̄a ne'ena ntanda, edana au ma wa'ura ndad̄i. Siad̄oho dula sara'ana kai sinci poda adena.

⁴⁹ Ro sara'a dou mapata Ruma Isa, lu'u rauja dou-dou siwe mab̄atu Sia rad̄i Galilea, makid̄i sando'o ro eda sara'ana ede.

⁵⁰Wara sab̄ua dou mangara la Yusuf, rad̄i kota Arimatea d̄i dana ra rasa Yudea. Sia dou mataho ro nalia ra horomaku b̄a dou, ro ma wunga ngena wakatu maikai Karaja'an Allah. Konena sia anggota Mahkama Agama, sia wati satujuna kai kaputusa ro rakarawi b̄a mahkama ede.

⁵¹

⁵²Yusuf ake lao satandona Pilatus ro rahona loakud̄u timba Ruma Isa mbeina d̄i sia.

⁵³Edempara sia kalondona timba Ruma Isa d̄i haju salib ede, edempara pontekaina salolo randawi kai linen. Sawa'u b̄a ede wi'i b̄a sia ade rade randawi d̄i doro to'i wadu — rade ede watipu parana rakani.

⁵⁴Ainaina ede ainaina Jama'a; ro ainaina Sabat ne'empara tampu'u.

⁵⁵Dou-dou siwe ma ramai lab̄o Ruma Isa rad̄i Galilea lampa b̄atuna la Yusuf ro edana rade ede. Siad̄oho eda rauna b̄uneku timba Ruma Isa rawi'i ade rade.

⁵⁶ Edempara siad̄oho lao dulana ro sadiana lo'i ra oi ro mina mengi d̄i kaminakaina timba Ruma Isa. D̄i ainaina Sabat, siad̄oho denggana karawi d̄i to'akaina hukum agama.