Read Bima LUKAS 6 Bible Online

LUKAS 6 - Bima bible

LUKAS 6

¹ D̄isab̄ua ainaina Sabat, wakatu Ruma Isa lampa saina oma gando, anamorid̄oho-Na pokena gando. Siad̄oho rujuna gando ede kai rimana, edempara ngahana.

²Pila-pila dou Farisi manggahi, ”B̄ab̄auku nggomid̄oho sapakaimu hukum-hukum agama ndaita kai karawimu rakantakai d̄i ainaina Sabat?”

³ Cambe b̄a Ruma Isa, ”Sab̄ua watipu baca b̄a nggomid̄oho mab̄oha rakarawi b̄a la Daud, aipu sia ro dou-dou mab̄atuna iu hid̄o?

⁴ Sia lu'una d̄i ade Bait Allah ro wehana roti ma wa'ura d̄onggo ra mbei d̄i Ruma Hatalla, edempara ngahana. Wa'u b̄a ede mbei rauna roti ede d̄i dou-dou mab̄atuna. Sapodakaina nggahi hukum agama ndaita, imam-imammpa maloana ngaha roti ede.”

⁵Edempara nggahi Ruma Isa, ”Ana Manusia nantau kuasa d̄i ainaina Sabat!”

⁶D̄isab̄ua ainaina Sabat ma kalaina, Ruma Isa lao ngoa ra teina d̄i uma sambeakai. Ta ede wara dou mamade b̄inci sab̄ae rimana.

⁷Pila-pila dou guru agama ro dou Farisi mane'e ngupa rawi ncara Ruma Isa loakud̄u da'awana Sia. Ndad̄i siad̄oho tio kab̄ae ncauna sab̄ua Sia nakatahoku dou d̄i ainaina Sabat.

⁸Pala Ruma Isa nab̄adeku kananu siad̄oho. Edempara nggahi Sia d̄i dou mamade b̄inci rimana ede, ”Mai kid̄ipu ta tando ake!” Dou ede tu'una, edempara kid̄ina ta ede.

⁹Edempara Ruma Isa sod̄ina d̄i dou-dou ma wara ta ede, ”Nggahi agama, auku d̄i loa karawi b̄a ndai d̄i ainaina Sabat? Karawi mataho atao karawi ma'iha? Kasalamaku dou atao ka'ihaku dou?”

¹⁰Tio heko b̄a Ruma Isa d̄i dou sara'ana, edempara nggahina d̄i dou ede, ”D̄alapu rimamu.” Dou ede d̄alana rimana, ro rimana taho.

¹¹Pala guru-guru agama ro dou-dou Farisi ede nambani podaku, ro tampu'ura mafakana mab̄oha auku d̄ikarawi b̄a siad̄oho d̄i Ruma Isa.

¹²D̄iwakatu ede Ruma Isa tekana sab̄ua doro to'i b̄a ne'ena do'a. Ta ede Sia do'ana d̄i Ruma Hatalla sab̄ala ai.

¹³Wakatu wa'ura taroa ai, Sia ouna anamorid̄oho-Na, edempara kad̄alena sampuru d̄ua dou d̄i ade weki siad̄oho. Tangarakai b̄a Sia sampuru d̄ua dou ede rasu-rasu. Siad̄oho eded̄u:

¹⁴la Simon (d̄ipehekai rau-Na la Petrus), ro la Andreas ari la Simon; la Yakub ro la Yahya, la Filipus ro la Bartolomeus,

¹⁵La Matius ro la Tomas, la Yakub ana la Alfeus, ro la Simon (d̄ipehe kai la Patriot),

¹⁶la Yudas ana la Yakub ro la Yudas Iskariot macumpukaina mad̄onggona d̄i dou-dou ma musu-Na.

¹⁷Edempara Ruma Isa londona d̄i doro to'i ede sama-sama lab̄o rasu-rasu ede, edempara midi ro kid̄ina d̄i sab̄ua hid̄i ma piri. Ta ede wara mboto poda anamori-Na ma kalai ro mboto dou ma ramai tab̄e-b̄e d̄i sara'a Yudea, Yerusalem, ro kota-kota Tirus ro Sidon ma d̄ikengge moti.

¹⁸Siad̄oho maina nane'eku ringa Ruma Isa, ro d̄ikataho rad̄i supu-supu siad̄oho. Siad̄oho ralu'ukai b̄a roh seta mai rauna ro d̄ikataho wea.

¹⁹Sara'ana dou na'usahaku d̄ama Ruma Isa, b̄ara wara kuasa ma losa d̄i sarumbu-Na ma kataho siad̄oho sara'ana

²⁰Ruma Isa ntandana anamorid̄oho-Na edempara nggahina, ”Taho ra ntikara nggomid̄oho dou-dou mancoki mori, b̄ara nggomid̄oho eded̄u anggota ela Karaja'an Allah.

²¹Taho ra ntikara nggomid̄oho ma hid̄o ake; nggomid̄oho d̄ipaha kambocu! Taho ra ntikara nggomid̄oho ma nangi ake; nggomid̄oho d̄imahari!

²² Taho ra ntikara nggomid̄oho nggara d̄idaca'u b̄a dou, wati tarima ao b̄a dou, d̄ikab̄awa ra katuna ro rafitina b̄ara Ana Manusia!

²³ Nabi-nabi aipu jamana mantoi rakarawi b̄une ede rau. Nggara ndad̄isi lampa rawi ede pab̄uapu nggomid̄oho neo ade ro joge kad̄ihipu ademu, b̄ara nana'eku ufamu rasadia wea d̄i ru'u b̄a nggomid̄oho aka saroga.

²⁴Pala ihara nggomid̄oho ma ntau ra wara ake; b̄ara nggomid̄oho wa'ura iumu mori macaru!

²⁵Ihara nggomid̄oho ma mbocu ake; b̄ara nggomid̄oho d̄imasarahid̄o! Ihara nggomid̄oho ma hari wakatu ake; b̄ara nggomid̄oho d̄imancoki ade ro manangi!

²⁶Ihara nggomid̄oho, nggara sara'ana dou maroimu; b̄ara ndede rauja wa'i ra waro siad̄oho naroiku nabi-nabi palasu jaman mantoina.”

²⁷”Pala d̄i ru'u b̄a nggomid̄oho maringa ra kade'e nggahi Nahu wunga ake, Nahu mangoa wi'imu ake: meci ra ca'upu musu-musumu, ro karawipu mataho d̄i dou-dou ma daca'umu.

²⁸Do'a mbeipu bareka d̄i dou-dou ma sumpa ka'ihamu, ro do'a weapu d̄i dou-dou ma iha d̄i nggomi.

²⁹Nggara natopasi b̄a dou rawemu ma sab̄ae, co'opu sia topana rawemu ma sab̄ae rauna. Naweha rampasi jumbamu, mbei raupu b̄ajumu.

³⁰Narahosi b̄a dou au-au d̄i nggomi, mbeipu ede d̄i sia; ro narampasi ntaumu, aina raho mbalimu.

³¹ Karawipu mataho d̄i dou makalai b̄une d̄i ne'e b̄a nggomid̄oho karawi b̄a dou d̄i weki ndaimu.

³²Nggara nggomid̄oho mameci ra ca'usi dou mameci ra ca'u nggomid̄oho mpoa, auku d̄i rakamu? Dou madosa rau nameci ncauku d̄i dou-dou ma meci ra ca'u siad̄oho!

³³Ro nggarasi nggomid̄oho karawimu mataho d̄i dou-dou ma karawi mataho d̄i nggomid̄oho mpoa, aujaku d̄i rakamu? Dou madosa rau nakarawi b̄une ede!

³⁴Ro nggomid̄oho nggara mambeisi sepe piti d̄i dou-dou ma wa'u mbei cepe mbali, aujaku d̄i rakamu? Dou madosa rau nambeiku sepe piti d̄i dou madosa, edempara naraho mbaliku!

³⁵Sapodakaina laina ndede! Pala nggomid̄oho ndakeku pab̄uapu meci ra ca'u musumu ro karawipu mataho d̄i siad̄oho. Nggomid̄oho pab̄uaku mbeimu sepe, ro aina kade'emu d̄i mambali. Makarawisi b̄une ede, ufamu d̄imana'e ro nggomid̄oho d̄imandad̄i ana-ana Ruma Hatalla Ma Wancu D̄ese Ra Ntasa. B̄ara Ruma Hatalla nataho adena d̄i dou-dou ma dantau tarima kasi, ro d̄i dou ma iha rau.

³⁶Pab̄uapu nggomid̄oho kasi ade angi b̄une Amamu makasi ade rau!”

³⁷”Aina kancaramu dou makalai, b̄ab̄aina ndai nggomid̄oho wati d̄ikancara b̄a Ruma Hatalla. Aina hukumu dou makalai, loakud̄u ndai nggomid̄oho wati d̄ihukum b̄a Ruma Hatalla. Kangampu weapu dou makalai, loakud̄u Ruma Hatalla rau makangampu wea nggomid̄oho.

³⁸Mbeipu d̄i dou makalai, loakud̄u Ruma Hatalla rau mambei nggomi; nggomid̄oho d̄imatarima rambei maremba-remba ma wa'ura taka rase d̄i ru'u nggomid̄oho. B̄ara taka rakana b̄a nggomid̄oho d̄i ru'u b̄a dou makalai d̄i kani b̄a Ruma Hatalla d̄i ru'u nggomid̄oho.”

³⁹ Edempara Ruma Isa caritana d̄i siad̄oho conto ra ibara ake, ”Nggara dou mambuda mad̄ende ra wa'a dou mambuda ma kalaina, pasti d̄uana ede d̄imamab̄u ade lapa.

⁴⁰ Wati wara anamori ma ese mai b̄a guruna. Pala anamori ma wa'ura nggori sakolana, d̄imandad̄i sama b̄une guruna.

⁴¹B̄ab̄au nggomid̄oho loakaimu eda fai haju ade isi mada cina ra angimu, pala haju balo d̄i ade isi mada ndaimu wati tio kab̄aemu b̄a nggomid̄oho?

⁴²B̄uneku loamu nggahi b̄a nggomid̄oho d̄i cina ra angimu, ’Mai, cina, nahu d̄imakalosana fai haju ede d̄i ade isi madamu,’ sapodakaina d̄i ade mada ndaimu wara haju balo mawati loamu eda? Oe maca'u coro-coro! Kalosa wa'upu haju balo ma wara d̄i isi mada ndaimu. Ede ampomu loa eda kab̄ae b̄a nggomid̄oho ro loamu kalosa fai haju d̄i ade isi mada cina ra angimu.”

⁴³”Fu'u haju ma ngawa wati mbuana wua ma iha. Ndede rauja fu'u haju ma wati ngawa wati mbuana wua ma taho.

⁴⁴ Sanikina fu'u haju mapataku d̄i wuana. Humpa rui wati mbuana wua ara, ro mpori rui wati mbuana wua anggo.

⁴⁵ Dou ma taho nakalosaku lampa rawi mataho b̄ara adena rembakai b̄a rawi mataho. Dou ma iha nakalosaku lampa rawi ma'iha b̄ara adena b̄ini kai b̄a rawi ma iha. B̄ara au rarenta b̄a asa edeku ma remba rad̄i adena.”

⁴⁶”B̄ab̄auku nggomid̄oho oukaimu Nahu, ’Ruma, Ruma,’ pala wati karawimu au rangoa ra rakaukai b̄a Nahu d̄i nggomid̄oho?

⁴⁷Ro couku loa d̄i kasamakai b̄a ndai dou ma mai d̄i Nahu, ro ringa rakade'ena nggahi Nahu, ro karawina — Taho Nahu d̄i mateina d̄i nggomid̄oho — .

⁴⁸Sia b̄une dou ma wunga tu'u uma mangari kad̄ei poda-podana, edempara ndawina dasa ese wawo wadu. Wakatu mai mbere ro oi d̄i sori mai ncorana uma ede, uma ede wati wa'una kinda b̄a mbere, b̄ara wa'ura tu'u ese wawo dasa ma tenggo.

⁴⁹Pala dou ma ringa ra kade'e nggahi ra eli Nahu ro wati karawina, eded̄u b̄une sab̄ua dou ma tu'u uma wati kanina dasa. Namaisi mbere mab̄oha uma ede, uma ede nandumba; ro na'ipiku ihana!”