Read Bima LUKAS 8 Bible Online

LUKAS 8 - Bima bible

LUKAS 8

¹Wati ntoina sawa'u b̄a ede, Ruma Isa laona aka kota-kota ro rasa-rasa, d̄ikahabakaina Haba Mataho mab̄oha Karaja'an Allah. Sampuru d̄ua anamori-Na lao sama lab̄o Sia.

² Ndede rau pila-pila dou siwe rawa'u kataho wea rad̄i roh seta ro supu. Siad̄oho eded̄u la Maria d̄i oukai la Magdalena (pidu roh seta rakalosa d̄i sia);

³la Yohana rau, wei la Khuza, mab̄ora d̄i asi Herodes; Susana, ro mboto wali dou siwe makalai. Kai cola b̄a ndaina, siad̄oho bantuna Ruma Isa ro anamorid̄oho-Na.

⁴Dou-dou namai ntuwuku d̄i Ruma Isa rad̄i mboto kota. Ro wakatu mboto dou makab̄oro weki, Ruma Isa mbeina conto ra ibara d̄i siad̄oho b̄une ake:

⁵”Sab̄ua dou makanggihi lao parina d̄ei. Wakatu pari b̄a sia, wara d̄ei ma mab̄u d̄i ncai. Sarundena tonda b̄a dou ro ma kalaina ngaha b̄a nasi.

⁶Wara rauja ma mab̄u d̄ihid̄i mambotokai wadu. Wakatu losa woro-worona ranggud̄a ede male b̄ara dana mango.

⁷Wara rauja d̄ei ma mab̄u d̄i ade woha mpori rui. Mpori rui ede woko samana lab̄o d̄ei rapari ede, ro apina sampe madekaina.

⁸Pala wara rauja d̄ei ma mab̄u d̄i dana ma ngawa, edempara wokona ro mbuana wua saratu kali lipa.” Sawa'u b̄a caritana conto ra ibara ede, nggahi Ruma Isa, ”Nggara mantausi fiko, ringa ra kade'epu!”

⁹Anamori Ruma Isa sod̄ina d̄i Sia auku aona conto ra ibara ede.

¹⁰ Cambe b̄a Ruma Isa, ”Nggomid̄oho wa'ura mbei anugera b̄ade d̄ib̄adekaimu rahasia mab̄oha Karaja'an Allah. Pala dou-dou makalai d̄ingoa ra tei kai conto ra ibara, loakud̄u siad̄oho ringa ra kade'e kab̄aena, pala wati b̄adena au ma ndad̄i; ro siad̄oho naringaku, pala wati loana ka'ao.”

¹¹”Akeku aona conto ra ibara ede: D̄ei ede eded̄u nggahi ra eli Ruma Hatalla.

¹²D̄ei ma mab̄u d̄i ncai b̄une santika dou-dou ma ringa nggahi ra eli ede. Pala mai Ibilis ro weha rampana haba ede d̄i ade siad̄oho, loakud̄u siad̄oho aina imbina ro d̄i kasalama

¹³D̄ei ma mab̄u d̄ihid̄i mbotokai b̄a wadu b̄une santika dou ma wakatu ringana haba ede, tarimana kai adena mataho. Pala haba ede wati ciana d̄i ade siad̄oho. Siad̄oho imbina cuma samporompa, ro wakatu mai coba'a, siad̄oho murta.

¹⁴D̄ei ma mab̄u d̄i ade woha mpori rui b̄une santika dou maringa haba ede, pala nambali mbua adena mab̄oha mori ra woko siad̄oho ro ne'ena mori ra woko ma'ipi taho poda ro sanakai d̄i ade dunia ake. Sara'ana ede ma'apina siad̄oho ndad̄ikaina wati mbuana wua ma ntasa.

¹⁵D̄ei ma mab̄u d̄i dana ma ngawa b̄une santika dou ma ringa haba ede, edempara wi'ina d̄ei adena ma taho ra rombo. Siad̄oho natenggo sampe mbuakaina.”

¹⁶ ”Wati wara dou ma ka'a ilo edempara b̄ontokaina roa, atao wi'ina awa wombo hid̄i marukai. Sia nawi'iku ilo ede d̄i ed̄i ilo, loakud̄u dou ma lu'u naloaku eda taroana.

¹⁷ Wati wara ma cili weki d̄i daloa d̄i eda; ro wati warana ra rahasia d̄imadahengga weki ro d̄idab̄ade b̄a dou.

¹⁸ B̄ara ndedena kade'e kab̄aepu au raringa b̄a nggomid̄oho. B̄ara dou ma wa'ura ntau, d̄i mbei mancewi mboto wali; pala d̄i dou ma wati ntau, sato'i ma mbuipu wara d̄i sia d̄iweha rau.”

¹⁹Ina ro ari-ari Ruma Isa maina d̄i Sia, pala siad̄oho wati loana rongga d̄i Sia b̄ara mboto poda dou.

²⁰Edempara wara sab̄ua dou ma nggahi d̄i Ruma Isa, ”Pa, ina ro ari-ari Ita wara ta ari lua. Siad̄oho nane'e eda angi lab̄o Ita.”

²¹Pala nggahi Ruma Isa d̄i siad̄oho, ”Dou-dou ma ringa nggahi ra eli Ruma Hatalla ro makarawina, siad̄oho edeku ina ro arid̄oho-Ku.”

²²D̄isab̄ua ainaina Ruma Isa lab̄o anamorid̄oho-Na ne'e ese sampa. ”Mai ndai talaoku aka ipa b̄ae b̄a ndano na'e,” nggahi Ruma Isa d̄i siad̄oho. Edempara siad̄oho laona.

²³Wakatu siad̄oho wunga lojana, Ruma Isa wunga maruna. Wed̄i lalompa angi na'e maina d̄i ndano ede. Oi tampu'u lu'una d̄i ade sampa, ndad̄ina d̄i'ihakai siad̄oho sara'ana.

²⁴Anamori Ruma Isa lao rakana Sia ro rod̄una Sia. Nggahi siad̄oho, ”Pa Guru, Pa Guru ihara ndaita!” Tu'u Ruma Isa edempara b̄akana angi ro balumba ma wunga mbani ede. Angi ro balumba ede rau dengga lalona edempara ndano ndad̄i midi poda.

²⁵Edempara nggahi Ruma Isa d̄i anamori-Na, ”B̄ab̄au nggomid̄oho wati imbikaimu d̄i Nahu?” Siad̄oho ndad̄i midi poda adena ro dahu. Ro nggahira siad̄oho d̄i sab̄ua lab̄o sab̄ua dou, ”Couku sapodakaina dou ake sampe loana parenta angi ro balumba, ro nab̄atuku nggahi Sia!”

²⁶Ruma Isa ro anamori-Na loja ntuwuna sampe aka dana ra rasa Gerasa d̄i ipa b̄ae b̄a Ndano Galilea.

²⁷Wakatu Ruma Isa londo awa dana, Sia mai raka b̄a sab̄ua dou mone ralu'ukai b̄a roh seta. Dou ede ra'aka kotana. Wa'ura ntoira sia wati kanina b̄aju ro wati ngawana ngge'e d̄i uma. Sia nangge'empa d̄i karombo-rombo rade.

²⁸Wakatu edana Ruma Isa, sia kanggicana edempara suju nembana d̄itando Ruma Isa ro nggahina, ”Isa, Ana Ruma Hatalla Ma Wancu D̄ese Ra Ntasa! D̄i kab̄une b̄a Ita mada ake? Mada maraho nemba ai to'ina kancokimu mada!”

²⁹Nggahi ndede kai dou ede b̄ara Ruma Isa makauna roh seta ede losa d̄i dou ede. Wa'ura ntuwu poda sia kuasakai b̄a roh seta ede konena rima ra ed̄ina wa'ura ndante ro sia rajaga kataho poda, sia nawa'uku b̄isa rante ede edempara wa'a b̄a roh seta ede aka so sarae.

³⁰Sod̄i b̄a Ruma Isa d̄i dou ede, ”Cou ngaramu?” ”Ngara mada ’Legiun’,” cambe b̄a dou ede — b̄ara wara mboto roh seta mawa'ura lu'u d̄i sia.

³¹Roh-roh seta ede raho nemba podana loakud̄u Ruma Isa aina b̄aka kalosana siad̄oho lu'u ade Karombo Made.

³²D̄eni lab̄o hid̄i ede wara mboto poda wawi ma wunga ngupa ngaha d̄ikengge doro to'i. Roh-roh seta ede raho nemba podana d̄i Ruma Isa loakud̄u kauna lu'u d̄i ade wawi-wawi ede. Ro Ruma Isa nangawa.

³³Edempara roh-roh seta losana d̄i ade dou ede ro lu'una d̄ei wawi-wawi ede. Edempara wawi-wawi ede rai ro nggoncuna d̄i kengge dembi lu'u d̄ei ndano na'e, edempara mimina.

³⁴Dou-dou majaga wawi ede ma'edana au ma wa'ura ndad̄i. Edempara rai siad̄oho ro ngoa rerona haba ede d̄i kota ro d̄i rasa kompe ra peina.

³⁵Edempara dou-dou losana b̄a ne'ena eda au ma wa'ura ndad̄i. Siad̄oho mai rakana Ruma Isa, ro ta ede siad̄oho edana dou ma wa'ura hori rad̄i roh-roh seta ede mawunga doho d̄eni lab̄o ed̄i Ruma Isa. Sia wa'ura kanina b̄aju ro wa'ura taho kananuna. Siad̄oho nandad̄i dahu.

³⁶Siad̄oho ma edana mandad̄i ede ngoa rerona d̄i dou-dou ra b̄unena dou ede d̄itahokaina.

³⁷Edempara sara'ana dou d̄i dana ra rasa Gerasa ede raho poda-podana d̄i Ruma Isa loakud̄u Ruma Isa tu'u wi'ina hid̄i ede, b̄ara siad̄oho sara'ana nadahu ipiku. Ndad̄i Ruma Isa ne'ena ese sampa nane'e lao dula.

³⁸Dou rawa'u hori wea rad̄i roh-roh seta ede raho nembana d̄i Ruma Isa loakud̄u sia b̄atu Ruma Isa. Pala Ruma Isa kauna sia lao, nggahi-Na,

³⁹”Dulara ro kahabapu au rawa'u karawi b̄a Ruma Hatalla d̄i nggomi.” Edempara dou ede lao kahabana d̄i sara'a kampo ra mporo d̄i kota ede, au rawa'u karawi b̄a Ruma Isa d̄i sia.

⁴⁰Wakatu Ruma Isa dula mbali d̄i ipa b̄ae b̄a ndano, Sia rai ao b̄a dou mamboto kai neo ade b̄ara siad̄oho wunga ngenana Sia.

⁴¹Edempara mai b̄a sab̄ua dou mana'ekaina uma sambeakai d̄i hid̄i ede. Ngarana la Yairus. Sia doho sujuna d̄itando Ruma Isa ro raho poda-podana loakud̄u Ruma Isa mai d̄i uma sia,

⁴²b̄ara sab̄uampa menana ana siwena ma umu sampuru d̄ua mba'a nane'era made. Wunga ade lampakai Ruma Isa lao aka uma la Yairus, dou-dou macici weki d̄i Sia taku'i tawana takontu ro tatandona.

⁴³D̄i ade wekina ede wara rau sab̄ua dou siwe ma wa'ura sampuru d̄ua mba'a supu mboho ra'a ma wara ndapo angi lab̄o mai takina. Sia wa'ura kampoi sara'a ntau ra warana d̄i lo'ikaina d̄i dokte, pala wati wara ma wa'una kataho.

⁴⁴Dou siwe ede mai d̄enina d̄i Ruma Isa ta ari kontuna, edempara tuduna sumpu jumba Ruma Isa. Wakatu ede lalo supu mboho ra'a dou ede denggana.

⁴⁵Sod̄i b̄a Ruma Isa, ”Cou ma tudu Nahu?” Sara'a dou wati mangaku menana. Edempara nggahi la Petrus, ”Ruma, wara mboto poda dou maheko Ita; siad̄oho macici weki d̄i Ita!”

⁴⁶Nggahi Ruma Isa, ”Pala wara dou ma tudu Nahu. Nahu b̄ade ede, b̄ara wara tenggo ra wale ma losa rad̄i Nahu.”

⁴⁷Dou siwe ede kawarana weki b̄a one karawina ede wa'ura b̄ade. Ndad̄i sia maina kai b̄ib̄i sarumbuna edempara sujuna d̄i tando Ruma Isa. Edempara sia caritana d̄itando sara'ana dou, b̄ab̄auku sia d̄amakaina Ruma Isa, ro b̄a one supuna taho wakatu ede wa'u.

⁴⁸Nggahi Ruma Isa d̄i sia, ”Ana-Ku, b̄ara imbimu d̄i Nahu, nggomi tahora. Laora kai salama.”

⁴⁹Wunga mbuipu Ruma Isa nuntuna, dou rakakai rad̄i uma la Yairus. Nggahi sia d̄i la Yairus, ”Ana siwe ita wa'ura made. Aina ita kamaki walimu Pa Guru.”

⁵⁰Wakatu ringa b̄a Ruma Isa ede, nggahi Sia d̄i la Yairus, ”Aina dahu. Imbimpa ro anamu d̄imataho.”

⁵¹Sawa'u b̄a ronggana d̄i uma la Yairus, Ruma Isa wati kauna kone sab̄ua dou lu'u lab̄o Sia selasi la Petrus, la Yahya, la Yakub ro ina ra ama ana dou edempa.

⁵²Sara'ana dou wunga nangina ro d̄uru ra d̄alana b̄ara made ana dou ede. Pala nggahi Ruma Isa, ”Aina nangi. Ana dou ede wati madena, sia wunga maruna!”

⁵³Siad̄oho harikaina Ruma Isa, b̄ara siad̄oho b̄ade ana dou siwe ede wa'ura made.

⁵⁴Edempara Ruma Isa nentina rima ana dou ede ro nggahina, ”Tu'ura, Ana!”

⁵⁵Nawa ana dou ede dula mbalina d̄i ndai ana dou ede, ro wakatu ede lalo ana dou ede tu'una. Sawa'u b̄a ede Ruma Isa kauna siad̄oho mbei ngaha ra nono d̄i ana dou to'i ede.

⁵⁶Dou matua ana dou ede midi poda adena. Pala kanta b̄a Ruma Isa siad̄oho ngoa rero lampa rawi ede kone d̄i cou-cou rau.