Read Bima LUKAS 9 Bible Online

LUKAS 9 - Bima bible

LUKAS 9

¹Ou b̄a Ruma Isa sampuru d̄ua dou anamori-Na, edempara mbeina d̄i siad̄oho kuasa d̄ib̄aka kalosakaina roh seta ro d̄ikatahokaina supu.

²Edempara Sia kauna lao siad̄oho kataho dou masupu ro ngoa ra kahabana Haba Mataho mab̄oha Karaja'an Allah.

³ ”Aina wa'amu au-au d̄i ade lampa ra laokaimu,” nggahi Ruma Isa d̄i siad̄oho. ”Aina wa'amu tiki, atao kad̄ud̄u d̄i raho sadekakai, atao ngaha ra nono, atao piti, atao d̄ua ndo'o kani ra lombo.

⁴Tab̄era tarima aokai b̄a dou nggomid̄oho, ngge'epu ta ede sampe nggomid̄oho tu'u wi'ikaimu kota ede.

⁵ Ro tab̄era nggomid̄oho wati tarima ao b̄a dou, wakatu tu'u wi'i b̄a nggomid̄oho kota ede, furapu kalub̄u d̄i kopa ed̄imu, d̄imakawarana siad̄oho.”

⁶Anamori Ruma Isa laona, edempara laona aka kampo-kampo d̄i ngoa ra kahabana Haba Mataho ede ro kataho rerona dou masupu.

⁷ Wakatu Herodes, ma parenta d̄i Galilea, ringana mab̄oha sara'ana mandad̄i ede, sia darura adena. B̄ara wara ma nggahi la Yahya Mataki kandeu karaso dou wa'ura mori mbali.

⁸Wara rau ma nggahi b̄a one la Elia wa'ura wontu wali. Dou makalai manggahi rau b̄a one sab̄ua dou nabi d̄i ade weki nabi-nabi ntoi podana wa'ura mori mbali.

⁹Nggahi la Herodes, ”Nahu wa'ura kakaiku dou fati kakori tuta la Yahya. Pala dou ake, couku sapodakaina Sia? Wara mboto ra ringa b̄a nahu mab̄oha Sia.” Ndad̄i la Herodes nane'e podaku eda Ruma Isa.

¹⁰Rasu-rasu Ruma Isa dula mbali ro ngoana d̄i Ruma Isa sara'a rawa'u karawi b̄a siad̄oho. Ruma Isa recena siad̄oho, edempara lao sama-samana lab̄o siad̄oho lao kalai weki aka kota Betsaida.

¹¹Pala wakatu b̄ade b̄a dou-dou mab̄oha lampa rawi ede, siad̄oho lao b̄atuna Ruma Isa. Sia tarima aona siad̄oho, edempara nuntu ra nggahina d̄i siad̄oho mab̄oha Karaja'an Allah. Ro Sia rau katahona dou masupu d̄i ade weki siad̄oho.

¹²Wakatu tampu'u nci'i liro, sampuru d̄ua dou anamori Ruma Isa maina d̄i Sia ro nggahina, ”Pa, hid̄i ake d̄o'o lab̄o rasa. Natahopu Ita kauta dou-dou ake lao, loakud̄u siad̄oho ngupana ngaha ra nono ro hid̄i d̄imarukai d̄i kampo-kampo ro rasa-rasa d̄ikompe ra pei ake.”

¹³Pala cambe b̄a Ruma Isa, ”Nggomid̄ohompa mambei ngaha siad̄oho.” Nggahi anamori Ruma Isa, ”Madad̄oho cuma wara ntaumu lima mbua roti ro d̄ua tembe uta. Sab̄ua madad̄oho pab̄uaku lao weli d̄i ngaha ra nono d̄i ru'u b̄a sara'ana dou ake?”

¹⁴(Wara kira-kira lima riwu dou mone ta ede.) Nggahi Ruma Isa d̄i anamori-Na, ”Kaupu dou-dou ake doho kalompo-kalompo, kira-kira lima mpuru dou sakalompo.”

¹⁵Anamori Ruma Isa ede karawina au rakaukai b̄a Ruma Isa d̄i siad̄oho.

¹⁶Edempara weha b̄a Ruma Isa lima mbua roti ro d̄ua tembe uta ede, edempara d̄ongana langi ro rentana tarima kasi d̄i Ruma Hatalla. Sawa'u b̄a ede Sia tob̄e-tob̄ena roti ro uta ede kai rima-Na edempara mbeina d̄i anamorid̄oho-Na d̄icengga-cengga d̄i dou mamboto ede.

¹⁷Siad̄oho sara'ana ngaha sampe mbocuna. Edempara anamori Ruma Isa kab̄orona mancewi ngaha ra nono ede sampuru d̄ua wonca mbotona.

¹⁸D̄isab̄ua ainaina, wakatu Ruma Isa wunga do'a kesena, anamorid̄oho-Na mai rakana Sia. Sod̄i b̄a Ruma Isa d̄i siad̄oho, ”Ranggahi dou, couku Nahu ake?”

¹⁹ Cambe b̄a siad̄oho, ”Wara ma nggahi la Yahya Mataki kandeu karaso dou. Wara rauja ma nggahi la Elia, ma kalai walina manggahi sab̄ua ade weki nabi jaman ma'ulu ma wa'ura mori mbali.”

²⁰ ”Pala nggahi ndai nggomid̄oho, Nahu ake couku?” sod̄i b̄a Ruma Isa. Cambe b̄a la Petrus, ”Ita eded̄u Sangaji Mambei salama rasakekai b̄a Ruma Hatalla.”

²¹Edempara nggahi Ruma Isa d̄i anamorid̄oho-Na, ”Aina sakali-kali ngoamu dou lampa rawi ede kone d̄i cou-cou rau.”

²²Nggahi rau Ruma Isa, ”Ana Manusia poda pab̄uaku mboto susa ra ncoki ro daca'u b̄a dou-dou mana'ekaina ro dou-dou mana'ekai imam, ro guru-guru agama. Sia d̄i hade, pala d̄i ainaina makatolukaina d̄ikamori mbali.”

²³ Edempara nggahi Ruma Isa d̄i sara'ana dou ma wara ta ede, ”Dou ma ne'e b̄atu Nahu, pab̄uaku tu'u wi'ina d̄i paralu b̄a ndaina, matundu salibna sanai-nai, ro b̄atu ncauna Nahu.

²⁴ B̄ara dou ma ne'e taha morina, d̄imambora morina. Pala dou ma koroba morina d̄i ru'u b̄a Nahu, d̄imakasalamana.

²⁵Auku rakana d̄i ru'u b̄a sab̄ua dou nggara sara'a dunia ake ndad̄i ntauna, pala sia naka'ihaku ro mbora morina?

²⁶Nggara dou namajasi mangaku Nahu ro ngoa ra tei b̄a Nahu, Ana Manusia rau namajaku mangaku dou ede wakatu Sia maina peade kai kuasa-Na, ro kai kuasa Ama ra kuasa mala'eka-mala'eka ma raso!

²⁷D̄ib̄ademu: ade weki nggomid̄oho ta ake wara ma wati d̄imamade sawatipu b̄a edana d̄ese ra ntasa Karaja'an Allah.”

²⁸ Kira-kira saminggu sawa'u b̄a Ruma Isa ngoa ra teina lampa rawi ede, Sia wa'ana la Petrus, la Yahya, ro la Yakub ese sab̄ua doro ne'e lao do'a.

²⁹Wunga mbuipu Ruma Isa do'ana ta ede, lai pahu-Na ro kani ra lombo-Na ndad̄i lanta kancilo.

³⁰Wed̄i lalompa d̄ua dou, eded̄u la Musa ro la Elia makatada weki kai taroa rad̄i saroga. Siad̄oho nuntu ra nggahi lab̄ona Ruma Isa mab̄oha made-Na ma watid̄u ntoi wali d̄ikalampana d̄i Yerusalem.

³¹

³²Wakatu ede la Petrus ro lengad̄ohona wunga maru, pala wed̄i lalompa tu'una, ro edana Ruma Isa mataroa ro d̄ua dou ede makid̄i lab̄o Sia.

³³Wakatu d̄ua dou ede ne'ena tu'u wi'i Ruma Isa, nggahi la Petrus d̄i Ruma Isa, ”Pa Guru, sana poda ndai wara ta ake. Taho madad̄oho d̄imatu'u tolu mbua kema: sab̄ua d̄i ru'u b̄a Ita, sab̄ua d̄i ru'u Musa ro sab̄ua wali d̄i ru'u b̄a Elia.” (Petrus nggahi ndedekaina kai wati loana ka'ao au ranggahina ede.)

³⁴Wunga mbuipu nuntu ra nggahi la Petrus, mai lalo apu, ro b̄ontona siad̄oho, ndad̄i siad̄oho dahuna.

³⁵ Edempara d̄i ade apu ede wara ringa eli ma nggahi, ”Akera Ana-Ku rakad̄ale b̄a Nahu. Ringa ra kade'epu Sia!”

³⁶Sawa'u b̄a dengga eli ede, siad̄oho edana Ruma Isa kese-Na ta ede. Anamori Ruma Isa namidimpa edana sara'ana ede, ro wati ngoana kone d̄i cou-cou rau mab̄oha au rawa'u eda b̄a siad̄oho.

³⁷B̄ala aisanai Ruma Isa ro tolu dou anamori-Na londona rad̄i doro ede, ro mboto dou mamai d̄i Ruma Isa.

³⁸Sab̄ua dou mone d̄i ade weki dou mamboto ede makanggica, ”Pa Guru, tabantu tio to'ipu ana mada — sia ana mada sab̄uampa menana!

³⁹Namai deisi b̄a roh seta ede sia, sia nakanggica sadeka lalompa ro sarumbuna kiro sampe kabubu oi fela d̄i asana. Roh ede nakancoki ncauku sia ro wati ngawana losa d̄i sia!

⁴⁰Wa'ura raho b̄a mada anamori Ita d̄imab̄aka kalosa roh ede, pala siad̄oho wati loana.”

⁴¹Cambe b̄a Ruma Isa, ”Heba poda nggomid̄oho ake! Nggomid̄oho poda-poda mancara rawi ro wati imbimu! Sampe b̄une aiku Nahu pab̄uaku ngge'e sama lab̄o nggomid̄oho ro sabakai d̄i nggomid̄oho? Mai wa'apu anamu ta ake!”

⁴²Ana dou ede wunga lampana lao aka Ruma Isa, roh seta ede b̄atena ana dou to'i ede ro kandad̄ina sarumbuna kiro. Pala Ruma Isa kauna roh seta ede losa ro taho lalona ana dou ede. Edempara ana dou ede d̄onggo mbalina d̄i amana.

⁴³Sara'ana dou midi adena eda kuasa Ruma Hatalla ma ipi na'e. Wakatu dou-dou mbuipu midi adena eda sara'a rakarawi-Na, nggahi Ruma Isa d̄i anamorid̄oho-Na,

⁴⁴”Tio kab̄aepu ro aina nefa nggahi ra eli-Ku ake: Ana Manusia d̄i d̄onggo mbei d̄i kuasa manusia.”

⁴⁵Pala anamori Ruma Isa wati loana ka'ao nggahi ra eli-Na ede. Lampa rawi ede wati katadana d̄i siad̄oho loakud̄u siad̄oho wati loana ka'ao. Pala siad̄oho nadahuku sod̄i lampa rawi ede d̄i Sia.

⁴⁶ D̄i ade weki anamori Ruma Isa wontu cence ncihi mab̄oha couku d̄i ade weki siad̄oho ma ipi na'e.

⁴⁷Ruma Isa nab̄adeku kananu siad̄oho, b̄ara ndedena Sia wehana sab̄ua ana dou to'i ro kakid̄ina ana dou to'i ede d̄i kompe-Na.

⁴⁸ Edempara nggahi Sia d̄i anamorid̄oho-Na, ”Dou ma tarima ana dou ake b̄ara Nahu, aona natarimaku Nahu. Ro dou ma tarima Nahu, natarimaku Sia ma ranggadu Nahu. B̄ara dou ma ipi to'i d̄i ade weki nggomid̄oho, sia edeku ma ipi na'e!”

⁴⁹Nggahi la Yahya, ”Ruma, madad̄oho edamu dou mab̄aka kalosa seta kai ngara Ita, ro kanta b̄a madad̄oho, b̄ara sia laina anggota ndaita.”

⁵⁰”Aina kantamu sia,” nggahi Ruma Isa d̄i la Yahya ro anamori-Na ma kalaina, ”b̄ara dou ma taho ro nggomid̄oho, aona nahoruku nggomid̄oho.”

⁵¹Ne'empara raka wakatuna Ruma Isa d̄i kane'e ese saroga, Sia wehana nggahi cumpukaina nalao aka Yerusalem.

⁵²Edempara Sia kauna lao ulu dou. Dou-dou rakau b̄a Sia lao ede, edempara lu'una d̄i sab̄ua kampo d̄i Samaria d̄i sadia menakaina au-au d̄i ru'u b̄a Ruma Isa.

⁵³Pala dou-dou d̄ikampo ede wati ngawana tarima ao Ruma Isa, b̄ara tada poda Sia wunga laona aka Yerusalem.

⁵⁴ Edempara wakatu anamori Ruma Isa, eded̄u la Yakub ro la Yahya b̄adena mab̄oha lampa rawi ede, nggahi siad̄oho, ’Ruma, sab̄ua ngawa Ita, madad̄oho d̄imaraho afi londo rad̄i langi d̄imakaleli dou-dou ake?”

⁵⁵Tambari Ruma Isa, edempara nggahikaina d̄i siad̄oho.

⁵⁶Sawa'u b̄a ede siad̄oho laona aka kampo ma kalai.

⁵⁷Ruma Isa ro anamorid̄oho-Na wunga lampa walina, wara dou manggahi d̄i Ruma Isa, ”Pa, mada ne'e b̄atu Ita tab̄era laokai Ita!”

⁵⁸Cambe b̄a Ruma Isa, ”Lako doro nantau karombo, ro nasi nantau sob̄u, pala Ana Manusia wati ntauna hid̄i d̄i ndorekaina.”

⁵⁹Edempara nggahi Ruma Isa d̄i sab̄ua dou ma kalai, ”B̄atupu Nahu.” Pala nggahi dou ede, ”Pa, takau to'ipu mada dula wa'u d̄i ma'umbu ama mada.”

⁶⁰Cambe b̄a Ruma Isa, ”Co'opu dou mamade na'umbumpa ndaina dou mamade. Pala nggomi, laopu ro ngoa ra kahabapu d̄i sanikina hid̄i mab̄oha Haba Mataho eded̄u mab̄oha Karaja'an Allah.”

⁶¹ Wara rau sab̄ua dou makalaina ma nggahi, ”Pa, mada ne'e b̄atu Ita, pala takau to'i wa'upu mada dula wa'u d̄i ngoa wi'ikaiku dou d̄i umaku.”

⁶²Nggahi Ruma Isa d̄i dou ede, ”Dou ma wa'ura tampu'u rawi tolo, edempara tambarina, wati patuna mandad̄i anggota ela Karaja'an Allah.”