Read Bima YAHYA 1 Bible Online

YAHYA 1 - Bima bible

YAHYA 1

¹Aipu sarambakaina, sawatipu kandad̄i dunia, Nggahi Ra Eli wa'ura wara. Nggahi Ra Eli wara malab̄o Ruma Hatalla ro Nggahi Ra Eli sama lab̄o Ruma Hatalla

²Ra'aipu saramba wa'una Sia wara sama-sama lab̄o Ruma Hatalla.

³Sara'ana rakandad̄i kai ncai Sia, ro rad̄i sara'ana ma wara, wati kone sab̄ua rau rakandad̄i watisi b̄ara Sia.

⁴Nggahi Ra Eli ede fu'u mori, ro mori mambei taroa d̄i ru'u b̄a manusia.

⁵Taroa ede nakataroaku d̄i rindikaina, ro rindi ede wati wa'una hade taroa ede.

⁶ Maira dou ranggadu b̄a Ruma Hatalla, la Yahya ngarana.

⁷Sia mai ngoa ra kahabana mab̄oha taroa ede, loakud̄u imbi b̄a sara'ana dou.

⁸Ndai sia laina taroa ede, sia d̄i makaronggampa.

⁹Taroa masapodakaina ma kataroa samenana manusia, maina d̄i dunia.

¹⁰Nggahi Ra Eli Ruma wara d̄i dunia, dunia rakandad̄i kai ncai Sia, pala dunia wati patana Sia.

¹¹Sia maina d̄i dana ra rasa ndai-Na pala bangsa-Na wati tarimana Sia.

¹²Pala wara rau dou ma tarima Sia ro imbi d̄i Sia; siad̄oho mbei-Na hak mandad̄i ana Ruma Hatalla,

¹³ranggana laina rad̄i manusia, b̄ara mori mab̄ou ede ramaina rad̄i Ruma Hatalla.

¹⁴Nggahi Ra Eli wa'ura ndad̄i manusia, Sia ngge'ena d̄i woha ndaita, ro ndai wa'ura edata d̄ese ra ntasa-Na. D̄ese ra ntasa ede weha ao b̄a Sia kai Ana makese weki b̄a Ama. Kai ncai Sia ndaita loa eda Ruma Hatalla ro meci ra ca'u-Na d̄i ndai.

¹⁵La Yahya mai d̄imandad̄i sakasi-Na, sia ngoa ra kahabana: ”Akeku Sia ranggahi b̄a nahu: Sia d̄imamai kento ntewi kaisi nahu, pala nancewi na'e ntewi kaisi nahu, b̄ara sawatipu wara nahu, Sia wa'ura wara.”

¹⁶Sia b̄ini b̄a meci ra ca'u; wati d̄imacumpu, Sia mambei bareka ndaita.

¹⁷Hukum Ruma tarima b̄a ndai kai ncai la Musa. Pala anugera ro lampa rawi mapoda rakatada kai ncai Ruma Isa Al Masih.

¹⁸Wati wara ma parana eda Ruma Hatalla, selasi Ana makese weki b̄a Ama, ma sama lab̄o Ama ro rapu poda lab̄o Sia. Sia edeku ma katadana Ama d̄i ndaita.

¹⁹Dou-dou mana'ekai Yahudi d̄i Yerusalem kauna imam-imam ro dou-dou Lewi lao aka la Yahya ro sod̄i d̄i sia, ”Nggomi ake cou?”

²⁰La Yahya nggahi ntirina, ”Nahu laina Sangaji Mambei salama.”

²¹ ”Nggara ndedesi, nggomi ake couku?” sod̄i b̄a siad̄oho. ”Sab̄ua nggomi ake la Elia?” ”Laina,” cambe b̄a la Yahya. ”Sab̄ua nggomi ake Nabi rasake ede?” sod̄i b̄a siad̄oho wali. ”Laina,” cambena.

²²”Nggara ndedesi, ngoapu d̄i nami cou nggomi ake,” nggahi siad̄oho, ”loakud̄u cambe b̄a nami d̄i dou-dou ma rakau nami. Auku nggahi b̄a nggomi mab̄oha weki ndaimu?”

²³ Cambe b̄a la Yahya, ”Nahura sia ranggahi b̄a Nabi Yesaya: ’Dou ma nggahi nggao d̄i so sarae: Kapiripu ncai d̄i ru'u b̄a Ruma.’ ”

²⁴Dou-dou rakakai b̄a dou Farisi

²⁵masod̄i, ”Nggara laina nggomi Sangaji Mambei salama, laina la Elia, lai rauna Nabi rasake ede, b̄ab̄au nggomi kandeu karasokaimu dou?”

²⁶Cambe b̄a la Yahya, ”Nahu makandeu karaso dou kai oi. Pala d̄i woha nggomid̄oho wara dou ma wati pata b̄a nggomid̄oho.

²⁷Sia mai kento ntewi kaisi nahu, pala kone d̄imasalo'a ai sapatu-Na nahu wati patuna.”

²⁸Sara'ana ede ndad̄ikaina d̄i Betania, tawela ele b̄a Sori Yordan hid̄i la Yahya kandeu karasokaina dou.

²⁹B̄ala aisanai, la Yahya edana Ruma Isa mai rakana sia. Edempara nggahi la Yahya, ”Tatiopu, Akaku Ana Jimba Ruma Hatalla ma kamborana dosa dunia.

³⁰Sia edeku ranggahi b̄a nahu d̄imamai kento ntewi kaisi lab̄o nahu, pala nancewi na'e ntewi kaisi lab̄o nahu, b̄ara sawatipu wara nahu, Sia wa'ura wara.

³¹Sawatipu ede, nahu wati b̄adeku cou Sia ede. Sapodakaina nahu mai kandeu karasoku dou kai oi loakud̄u bangsa Israel patana Sia.”

³²La Yahya nuntu ra nggahi rauna ake, ”Nahu edaku Roh Allah londona b̄une nasi dara ma ramai rad̄i langi edempara midina ese wawo Sia.

³³Wakatu ede nahu watipu b̄adeku cou Sia. Pala Ruma Hatalla ma kauna nahu kandeu karaso kai oi wa'ura nggahina d̄i nahu, ’Ma'edasi b̄a nggomi Roh Allah malondo, edempara midina ese wawo sab̄ua dou, Sia edeku ma d̄imakandeu karaso kai Roh Allah.’

³⁴Nahu wa'ura eda madaku Sia,” nggahi la Yahya, ”ro nahu manuntu ra nggahi b̄a one Siara Ana Ruma Hatalla.”

³⁵B̄ala aisanai la Yahya wara d̄i hid̄i ede wali lab̄o d̄ua dou anamorina.

³⁶Wakatu eda b̄a sia Ruma Isa lampa saina ta ede, nggahi sia, ”Tatiopu! Akaku Ana Jimba Ruma Hatalla.”

³⁷D̄ua dou anamori la Yahya maringa nggahi ra eli ede, edempara lao b̄atuna Ruma Isa.

³⁸Ruma Isa tambari-Na, ro edana siad̄oho mawunga lampa b̄atu Sia. Sod̄i b̄a Sia, ”Au ngupamu nggomid̄oho?” Cambe b̄a siad̄oho, ”Rabi, tab̄eku Rabi ngge'ekaita?” (’Rabi’ aona Guru.)

³⁹”Mai tiopu b̄a ndaimu,” nggahi Ruma Isa. Siad̄oho lao samana lab̄o Sia ro edana tab̄era ngge'ekai Sia. Wakatu ede b̄oe upa aimambia. Ainaina ede siad̄oho ngge'e lab̄o Sia.

⁴⁰Sab̄ua dou d̄i ade d̄ua dou ede ma wa'ura ringa au ranggahi b̄a la Yahya ro sawa'u b̄a ede lao b̄atuna Ruma Isa, eded̄u la Andreas, ari la Simon Petrus.

⁴¹Lao roci la Andreas ngupana la Simon, arina ede, ro nggahina d̄i sia, ”Nami wa'ura eda angimu lab̄o Mesias!” (Mesias sama lab̄o Al Masih, eded̄u: Sangaji Mambei salama.)

⁴²La Andreas lao otona la Simon d̄i Ruma Isa. Ruma Isa tio kab̄aena la Simon, edempara nggahina, ”Nggomi Simon, ana la Yona. Nggomi d̄i pehekai la Kefas.” (Kefas sama lab̄o Petrus, aona: doro wadu.)

⁴³B̄ala aisanaina Ruma Isa nane'e lao aka Galilea. Sia eda angi lab̄ona la Filipus, ro nggahi-Na d̄i sia, ”Mai b̄atupu Nahu!”

⁴⁴La Filipus ma ramai rad̄i Betsaida, eded̄u hid̄i ngge'ekai la Andreas ro la Petrus.

⁴⁵Filipus eda angi lab̄o la Natanael ro nggahina d̄i sia, ”Nami wa'ura rakamu eda dou rapehe b̄a la Musa d̄i ade Buku Hukum Allah, ro rangoa ra kahaba b̄a nabi-nabi. Sia eded̄u Ruma Isa rad̄i Nazaret, ana la Yusuf.”

⁴⁶Pala cambe b̄a la Natanael, ”Sab̄ua nawara ma taho ma ramai rad̄i Nazaret?” ”Mai tiopu b̄a ndaimu,” cambe b̄a la Filipus.

⁴⁷Ruma Isa edana Natanael mamai, edempara nggahina mab̄oha sia, ”Tiopu, akaku dou Israel masapodakaina. Wati wara mapalasu d̄i sia.”

⁴⁸”Buneku loa pata b̄a Ita mada?” sod̄i b̄a la Natanael d̄i Ruma Isa. Cambe b̄a Ruma Isa, ”Sawatipu ou b̄a la Filipus nggomi, Nahu wa'ura edaku nggomi awa wombo fu'u ara aka.”

⁴⁹”Pa Guru,” nggahi la Natanael, ”Ita eded̄u Ana Ruma Hatalla! Itaku Sangaji bangsa Israel!”

⁵⁰Nggahi Ruma Isa, ”Nggomi imbimu, b̄a nggahi Nahu d̄i nggomi b̄ara Nahu wa'ura edaku nggomi d̄iwombo fu'u haju ara? Lampa rawi-lampa rawi ma ipi ncewi na'e ntewi kaisi lab̄o ede d̄i eda b̄a nggomi!”

⁵¹ Nggahi wali Ruma Isa, ”Poda, imbipu, nggomi d̄ima'eda langi mahengga weki, ro mala'eka-mala'eka Ruma Hatalla mane'e londo d̄i Ana Manusia.”