Read Bima YAHYA 10 Bible Online

YAHYA 10 - Bima bible

YAHYA 10

¹”Nancihi podaku nggahi Nahu ake: Dou ma lu'u ade uma jimba kai nggoncuna kuta, ro wati lu'una kai tad̄a, pala nalu'uku d̄i ncai makalai, dou ede dou mampanga ro dou maparampo.

²Pala dou ma lu'u kai tad̄a, sia edeku ompu jimbana.

³Dou majaga uma jimba nahengga weaku tad̄a ncai d̄i ru'una, ro jimba-jimbana naringa ra kade'eku elina wakatu sia ouna siad̄oho kai ngara cua ndaina ro mad̄ende siad̄oho lao losa.

⁴Sawa'u b̄a jimba-jimba ede wa'a kalosa, ma'ompukaina nalampa ulu, ro jimba-jimba nalampa b̄atuku sia b̄ara siad̄oho napataku elina.

⁵Siad̄oho wati d̄imangawa lampa b̄atu dou makalai, mala narai rad̄i dou ede b̄ara wati patana elina.”

⁶Ruma Isa caritana conto ra ibara ede, pala siad̄oho wati loana ka'ao auku ne'e b̄a Sia.

⁷Ndad̄i nggahi Ruma Isa sakali wali, ”Ncihi poda nggahi Nahu ake: Nahura tad̄a ncai d̄i ru'u b̄a jimba.

⁸Samenana ma mai sawatipu Nahu eded̄u dou mampanga ro dou marampo, pala jimba-jimba wati kade'ena eli siad̄oho.

⁹Nahura tad̄a. Cou-cou malu'u kai ncai Nahu d̄imasalama; sia lu'u losana ro narakaku d̄i ngaha ra nonona.

¹⁰Dou mampanga mai b̄a ne'ena mpangampa, d̄imahade dou, ro d̄imane'e ka'iha mawara. Pala Nahu maiku loakud̄u manusia raka mori maremba poda.

¹¹Nahuku ompu jimba ma taho. Ompu jimba ma taho nambeiku nawana d̄i ru'u b̄a jimba-jimbana.

¹²Dou ra'ufa ma laina ompu jimba ro lai rauna dou mantau jimba-jimba ede, d̄imarai tu'u wi'i jimba-jimba, nggara na'edasi b̄a sia lako doro mamai. Edempara jimba-jimba ede nakumpa ro nakambari mburaku b̄a lako doro.

¹³Dou ra'ufa ede raina, b̄ara sia karawina b̄ara ufa. Sia wati tio katahona jimba-jimba ede.

¹⁴ Nahura ompu jimba ma taho. Sama b̄une Ama mapata Nahu ro Nahu mapata Ama, ndede rauja Nahu mapata jimba-jimba-Ku ro siad̄oho rau napataku Nahu. Nahu kad̄onggo nawa-Ku d̄iru'u b̄a siad̄oho.

¹⁶Mbuipu warana jimba-jimba makalaina ma ntau Nahu rau, pala wati lu'u b̄a kalompo jimba ake. Siad̄oho rau pab̄uaku wa'a rau b̄a Nahu ro siad̄oho rau d̄imakade'e eli Nahu. Siad̄oho sara'ana d̄imandad̄i sab̄ua kalompo lab̄o sab̄ua ompu jimba.

¹⁷Ama mameci ra ca'u Nahu b̄ara Nahu mad̄onggo nawa-Ku, d̄imatarima mbali.

¹⁸Wati kone sab̄ua dou maloana weha rad̄i Nahu. Nahu mad̄onggo kai rakane'e ndai-Ku. Nahu mantau kuasa d̄imad̄onggona, ro mantau kuasa d̄imaweha mbali. Edeku taki ra puta ratarima b̄a Nahu rad̄i Ama-Ku.”

¹⁹B̄ara nggahi ndedekai Ruma Isa, dou-dou Yahudi tampu'ura cence ncihina.

²⁰Mboto ma nggahi, ”Sia lu'ukai b̄a seta! Sia naringu! D̄i aukaimu ringa ra kade'e d̄i Sia?”

²¹Pala wara rauja ma nggahi, ”Dou-dou ralu'ukai b̄a seta wati nuntu ra nggahi ndedena! Sab̄ua naloa seta makandad̄i dou mambuda ndad̄i loa eda?”

²²D̄i Yerusalem dou-dou mawunga kandihana Ainaina Kasahakai Bait Allah. Wakatu ede oru b̄usi.

²³Ruma Isa wunga lampana d̄i katere Salomo d̄i ade Bait Allah,

²⁴wakatu mai dou-dou Yahudi kab̄oro weki d̄i kompe Ruma Isa. Nggahi siad̄oho, ”Sampe b̄une aiku Nggomi co'omu nami mbali mbua ade? Tangoa ntiri to'ipu, Nggara Nggomi poda-podasi Sangaji Mambei salama.”

²⁵Cambe b̄a Ruma Isa, ”Wa'ura nggahi b̄a Nahu d̄i nggomid̄oho, pala nggomid̄oho wati imbimu. Karawi rakawi b̄a Nahu kai ngara Ama-Ku, mabukutina mab̄oha Nahu.

²⁶Nggomid̄oho wati imbimu b̄ara nggomid̄oho wati lu'una d̄i golonga jimba-jimba Nahu.

²⁷Jimba-jimba-Ku nakade'eku eli Nahu. Nahu kapata-Ku siad̄oho, ro siad̄oho nab̄atuku Nahu.

²⁸Nahu mambei siad̄oho mori masapodakaina ro ma'ederahid̄i, ro d̄i ru'u santoi-ntoina siad̄oho wati d̄imaleli. Wati wara kone sab̄ua dou maloana weha rampa d̄i rima Nahu.

²⁹Ama-Ku, ma wa'ura mbeina siad̄oho d̄i Nahu, mancewi ese rad̄i samenana. Ro wati wara kone sab̄ua dou maloana weha rampa siad̄oho d̄i ade rima Ama.

³⁰Nahu ro Ama eded̄u sab̄ua.”

³¹Edempara dou-dou Yahudi weha walina wadu d̄i tob̄akaina Ruma Isa.

³²Pala nggahi Ruma Isa d̄i siad̄oho, ”Nggomid̄oho wa'ura edamu Nahu makarawi mboto lampa rawi mataho, rakau kai b̄a Ama d̄i Nahu. Rad̄i samenana lampa rawi ede, ma b̄eku ma kamaikaina nggomid̄oho mane'e tob̄a Nahu kai wadu?”

³³ Cambe b̄a dou-dou Yahudi ede, ”Laina b̄ara karawi-Mu ma taho ede d̄i ne'e tob̄akai b̄a nami Nggomi kai wadu, pala b̄ara Nggomi i'a ra b̄a'amu Ruma Hatalla. Nggomi sab̄ua dou manusia, mane'e kandad̄i weki ndai-Mu Ruma Hatalla.”

³⁴ Edempara cambe b̄a Ruma Isa, ”Sab̄ua laina d̄i ade Buku Hukum nggomid̄oho ratunti: Nggahi Ruma Hatalla, ’Nggomid̄oho eded̄u berhala’?

³⁵Ndai wa'ura b̄ade b̄a one au ratunti d̄i ade Alkitab d̄imangge'e santoi-ntoina. Ndad̄i, nggara Ruma Hatalla matangara kai ’berhala’ d̄i dou-dou ma tarima nggahi ra eli-Na,

³⁶b̄ab̄auku nggomid̄oho nggahikaimu Nahu ma'i'a ra b̄a'a Ruma Hatalla b̄ara Nahu nggahiku Nahu Ana Ruma Hatalla? Nahu poda rakad̄ale b̄a Ama ro nggaduna d̄i dunia.

³⁷Nggara watisi karawi b̄a Nahu rakaukai b̄a Ama, aina imbimu d̄i Nahu.

³⁸Pala b̄ara Nahu makarawina, imbipu d̄i au rakarawi b̄a Nahu ede, konena nggomid̄oho wati ne'emu imbi d̄i Nahu. Kai ndedena nggomid̄oho b̄ade ro loa ka'ao b̄a one Ama ngge'empa sab̄uana lab̄o Nahu, ro Nahu ngge'empa sab̄ua lab̄o Ama.”

³⁹Siad̄oho mane'e usaha wali wa'u Ruma Isa, pala Sia hori weki d̄i siad̄oho.

⁴⁰ Ruma Isa dula mbali lao aka ipa b̄ae b̄a Sori Yordan, d̄i hid̄i la Yahya ntoina kandeu karasona dou, edempara ngge'ena ta aka.

⁴¹Mboto dou mamai d̄i Sia. Nggahi siad̄oho, ”Yahya wati karawina lampa rawi mab̄isa ra guna, pala sara'a ranggahina mab̄oha dou ake napodaku.”

⁴²Edempara mboto dou ta aka ma'imbi d̄i Ruma Isa.