Read Bima YAHYA 13 Bible Online

YAHYA 13 - Bima bible

YAHYA 13

¹Sanai sawatipu Ainaina Aruraja Paskah, Ruma Isa nab̄adeku b̄a one wa'ura wakatauna Sia tu'u wi'ina dunia ake d̄ilao mbalikaina aka Ama-Na. Sia nameci ra ca'uku dou-dou ma ndad̄i ntau-Na d̄i dunia, ro Sia nangge'empa meci ra ca'una siad̄oho sampe cumpukaina.

²Ruma Isa ro anamorid̄oho-Na wunga ngaha sambiana. Ibilis wa'ura kalu'una niana ede d̄i ade la Yudas ana la Simon Iskariot d̄id̄onggokaina Ruma Isa d̄i dou-dou ma musu-Na.

³Ruma Isa nab̄adeku b̄a one Ama-Na wa'ura d̄onggo mbeina sara'ana kuasa d̄i Sia. Sia nab̄ade rauku b̄a one Sia ramaina ta Ruma Hatalla ro d̄imadula mbali d̄i Ruma Hatalla.

⁴B̄ara ndedena Sia kid̄i, runcu jumba-Na, ro d̄ikina kai here loko d̄i loko-Na.

⁵Sawa'u b̄a ede Sia luana oi d̄i ade sab̄ua basi, edempara tampu'una waca wea ed̄i anamorid̄oho-Na ro kamangona kai here loko rad̄iki d̄i loko-Na.

⁶Rakara Sia d̄i la Simon Petrus, ma nggahi, ”Ruma, wati lu'ukai b̄a aka Ruma ma waca wea ed̄i mada?”

⁷Cambe b̄a Ruma Isa, ”Ake nggomi wati loamu ka'ao au rakarawi b̄a Nahu ake, pala peasi nggomi d̄imaloa ka'ao.”

⁸”Aina, Ruma,” nggahi la Petrus d̄i Ruma Isa, ”Ai to'ina Ruma mawaca wea ed̄i mada!” Pala cambe b̄a Ruma Isa, ”Nggara watisi waca b̄a Nahu nggomi, nggomi wati wara campo au-aumu lab̄o Nahu.”

⁹Nggahi la Simon Petrus, ”Nggara ndedesi, Ruma, aina ed̄i mada mpoa, pala rima ro tuta mada rau!”

¹⁰”Dou ma wa'ura ndeu, nawa'ura raso sara'ana,” nggahi Ruma Isa d̄i la Petrus. ”Sia wati paraluna d̄i karaso wali; selasi ed̄ina. Nggomid̄oho ake wa'ura raso, pala wati sara'ana.” (

¹¹Ruma Isa wa'ura b̄ade couku d̄imad̄onggo Sia d̄i dou-dou ma musu-Na. B̄ara ndedena nggahi Sia, ”Nggomid̄oho ake wa'ura raso, pala wati sara'ana.”)

¹² Sawa'u b̄a Ruma Isa waca weana ed̄i siad̄oho, Sia kani mbalina jumba-Na ro doho mbalina. Edempara nggahi Sia d̄i siad̄oho, ”Sab̄ua maloa ka'ao b̄a nggomid̄oho au rakarawi b̄a Nahu d̄i nggomid̄oho b̄oupu ake?

¹³Nggomid̄oho oumu Nahu Guru ro Ruma. Ro poda nandedeku.

¹⁴Nggara Nahu ake Ruma ro Guru nggomid̄oho mawaca wea ed̄imu, nggomid̄oho pab̄ua raupu waca kali cempe ed̄i angimu.

¹⁵Nahu mambei conto mataho ake d̄i nggomid̄oho, loakud̄u nggomid̄oho karawi raumu au rakarawi b̄a Nahu d̄i nggomid̄oho.

¹⁶ Nancihi poda nggahi-Ku ake: Sab̄ua dou ada wati ncewi na'ena d̄i rumana, ro sab̄ua dou ranggadu wati ncewi na'ena d̄i dou ma ranggaduna.

¹⁷Nggara wa'usi b̄ade b̄a nggomid̄oho sara'ana ake, taho ra ntika nggomid̄oho makarawisi.

¹⁸ Au ranggahi Nahu ake laina mab̄oha nggomid̄oho sara'ana. Nahu b̄ade cou-cou ma wa'ura kad̄ale b̄a Nahu. Pala au ratunti ade Alkitab, pab̄uaku ndad̄ina, eded̄u ’Dou ma ngaha sama lab̄o Nahu, d̄imad̄onggo Nahu d̄i dou-dou ma musu Nahu.’

¹⁹Lampa rawi ede karongga b̄a Nahu d̄i nggomid̄oho ake, sawatipu ndad̄ina, loakud̄u ndad̄ina lampa rawi ede peasi, nggomid̄oho d̄ima'imbi b̄a one Nahuku Sia ma d̄i pehe kai NAHU WARA.

²⁰ Nancihi podaku nggahi Nahu ake: Cou matarima ao dou ranggadu b̄a Nahu, natarimaku Nahu. Ro cou matarima Nahu, natarimaku Sia ma ranggadu Nahu.”

²¹Sawa'u b̄a nggahi ndedena Ruma Isa, Sia na'ipiku lalai ade-Na. Edempara Sia nggahina, ”Ncihi poda nggahi-Ku ake: Sab̄ua dou d̄i ade weki nggomid̄oho d̄imad̄onggo Nahu d̄i dou-dou ma musu Nahu.”

²²Anamori-Na ntanda angi menana kai mbora mena akana b̄ara wati b̄adena couku makasu ede.

²³Anamori ma ipi meci ra ca'u b̄a Ruma Isa doho d̄i kompe Ruma Isa.

²⁴La Simon Petrus mambei isara d̄i sia, loakud̄u sia masod̄i d̄i Ruma Isa couku makasu-Na.

²⁵Ndad̄i anamori ede doho peduna d̄i Ruma Isa, ro sod̄ina, ”Couku sia, Ruma?”

²⁶Cambe b̄a Ruma Isa, ”Dou d̄i mbei b̄a Nahu roti rad̄eta b̄a Nahu ade mangko, siaku douna.” Edempara Ruma Isa wehana sadompo roti, d̄etana d̄i ade mangko; edempara mbeina d̄i la Yudas ana la Simon Iskariot.

²⁷Sawa'u b̄a la Yudas tarimana roti ede, Ibilis lu'una d̄i adena. Edempara nggahi b̄a Ruma Isa d̄i sia, ”Karawi rocipu au d̄i ne'e karawi b̄a nggomi.”

²⁸Wati kone sab̄ua dou d̄i ade weki siad̄oho ma doho ngaha ra nono ta ede maloa ka'ao b̄ab̄auku Ruma Isa nggahi ndedekaina d̄i la Yudas.

²⁹Wara ma kacai Ruma Isa makau la Yudas weli au-au d̄i paralu d̄i ngaha ndihakai ede, atao mbei piti d̄i ru'u b̄a dou mancoki mori — b̄ara la Yudas eded̄u dou manenti piti kas siad̄oho.

³⁰Sawa'u b̄a la Yudas tarimana roti ede, sia losa lalona. Ai wa'ura rindi.

³¹Sawa'u b̄a lao la Yudas, nggahi Ruma Isa, ”Ake Ana Manusia d̄i kadese ra kantasa, ro Ruma Hatalla d̄i kad̄ese ra kantasa kai ncai Sia.

³²Nggara Ruma Hatalla d̄i kad̄ese ra kantasa kai ncai Sia, Sia rau d̄i kad̄ese ra kantasa b̄a Ruma Hatalla kai weki ndai-Na. Mala Ruma Hatalla d̄imakad̄ese ra kantasa rocina Sia.

³³ Ana-ana-Ku, Nahu wati d̄imangge'e ntoi wali lab̄o nggomid̄oho. Nggomid̄oho d̄imangupa Nahu, pala b̄une rawa'u nggahi b̄a Nahu d̄i dou-dou mana'ekai Yahudi, ndede rau d̄i nggahi b̄a Nahu d̄i nggomid̄oho; aka hid̄i d̄i laokai b̄a Nahu, nggomid̄oho wati loamu maikai.

³⁴ Lampa rawi b̄ou d̄i mbei b̄a Nahu nggomid̄oho: Meci ra ca'upu d̄i sab̄ua lab̄o masab̄uana. Sama b̄une Nahu mameci ra ca'u nggomid̄oho, ndede rauja nggomid̄oho pab̄uaku meci ra ca'u kali cempe angimu.

³⁵Nggara nggomid̄oho macua meci ra ca'usi angimu, samenana dou d̄imab̄ade b̄a one nggomid̄oho anamori Nahu.”

³⁶”Ruma, Ruma mane'e lao tab̄eku?” sod̄i b̄a la Simon Petrus d̄i Ruma Isa. Cambe b̄a Ruma Isa, ”Tab̄era laokai Nahu, nggomi wati loamu lao b̄atu ake. Nggomi d̄imab̄atu kento Nahu.”

³⁷”Ruma, b̄ab̄auku mada wati loaku b̄atu Ita ake?” sod̄i b̄a la Petrus wali. ”Mada karela made d̄i ru'u b̄a Ruma!”

³⁸Cambe b̄a Ruma Isa, ”Sab̄ua poda nggomi marela made d̄i ru'u b̄a Nahu? D̄ib̄ademu, sawatipu koko janga peasi, nggomi wa'ura tolu kali nggahimu b̄a one nggomi wati patamu Nahu!”