Read Bima YAHYA 15 Bible Online

YAHYA 15 - Bima bible

YAHYA 15

¹Nggahi wali Ruma Isa, ”Nahuku fu'u anggo ma sapodakaina, ro Ama-Ku eded̄u makarawi nggarona.

²Sanikina sanga Nahu ma wati mbua, nadompoku b̄a Sia, ro sanikina sanga ma mbua, ro'ona d̄ikalao sarundena b̄a Sia loakud̄u nanaha ipi wali mboto wuana.

³Nggomid̄oho wa'ura raso b̄ara ngoa ra tei rambei b̄a Nahu d̄i nggomid̄oho.

⁴Ngge'epu sab̄ua lab̄o Nahu ro Nahu rau mangge'empa sab̄ua lab̄o nggomid̄oho. Sangana wati loana mbua ndaina, selasi nggara nambuipusi d̄i fu'una. Ndede walija nggomid̄oho maloa mbua, nggara ngge'empa sab̄uamu lab̄o Nahu.

⁵Nahuku fu'u anggo, ro nggomid̄oho sanga-sangana. Dou ma ngge'empa sab̄uana lab̄o Nahu ro Nahu lab̄o sia, d̄imambua mboto; b̄ara watisi b̄a Nahu, nggomid̄oho wati loamu karawi au-au.

⁶Dou ma wati mbuipu sab̄uana lab̄o Nahu, d̄ipaki b̄une sanga haju, edempara ndad̄i mango. Sanga-sanga b̄une ede d̄ikab̄oro ro d̄ipaki d̄i ade afi, edempara d̄i ka'a.

⁷Nggomid̄oho mambuipusi sab̄uamu lab̄o Nahu ro rangoa ra tei b̄a Nahu ngge'e d̄i ademu, rahopu d̄i Ama au-au d̄i ne'e b̄a nggomid̄oho; rarahomu ede d̄i mbei wea.

⁸Nggara mbotosi karawi mataho b̄a nggomid̄oho, Ama-Ku d̄i kad̄ese ra kantasa; ro kai ndedena nggomid̄oho poda-poda ndad̄i anamori Nahu.

⁹B̄une Ama mameci ra ca'u Nahu, ndedeku Nahu mameci ra ca'u nggomid̄oho. Pab̄uapu nggomid̄oho ngge'empa mori b̄une dou d̄i meci ra ca'u b̄a Nahu.

¹⁰Nggara kalampasi b̄a nggomid̄oho rakaukai b̄a Nahu, nggomid̄oho ngge'empa to'amu d̄i meci ra ca'u b̄a Nahu, sama b̄une Nahu mangge'empa to'a d̄i meci ra ca'u Ama b̄ara kalampaku rakaukai-Na.

¹¹Sara'ana ake ngoa b̄a Nahu d̄i nggomid̄oho, loakud̄u sana ade Nahu wara d̄i ademu, ro sana ade nggomid̄oho mandad̄i mpuruna.

¹² Akeku d̄i kaukai b̄a Nahu: Meci ra ca'upu d̄i sab̄ua lab̄o masab̄uana, sama b̄une Nahu mameci ra ca'u nggomid̄oho.

¹³Dou ma ipi poda meci ra ca'u sobad̄ohona eded̄u dou ma mbei mori rad̄i ru'u b̄a siad̄oho.

¹⁴Nggomid̄oho eded̄u soba-soba Nahu, nggara karawisi b̄a nggomid̄oho au rakaukai b̄a Nahu d̄i nggomid̄oho.

¹⁵Nggomid̄oho wati walira oukai b̄a Nahu ada, b̄ara ada wati b̄adena au wunga karawi b̄a rumana. Nggomid̄oho d̄i oukai b̄a Nahu soba, b̄ara sara'ana raringa b̄a Nahu d̄i Ama, wa'ura ngoa b̄a Nahu d̄i nggomid̄oho.

¹⁶Laina nggomid̄oho ma kad̄ale Nahu. Nahuku ma kad̄alena nggomid̄oho, ro makau lao nggomid̄oho d̄imambua mamboto — wua-wua ma daloa leli. Ndad̄i Ama d̄imambeina d̄i nggomid̄oho au-au raraho b̄a nggomid̄oho d̄i Sia kai ngara Nahu.

¹⁷Akeku d̄i kaukai b̄a Nahu d̄i karawi b̄a nggomid̄oho: Meci ra ca'upu d̄i sab̄ua lab̄o sab̄uana.”

¹⁸”Nggomid̄oho wati ca'usi b̄a dunia, kawarapu b̄a one Nahu wa'ura ulu daca'u b̄a dunia.

¹⁹Pai nggomid̄oho ntau dunia, nggomid̄oho d̄i meci ra ca'u b̄a dunia kai ntauna. Pala Nahu wa'ura kad̄aleku nggomid̄oho d̄i dunia ake, ndad̄i nggomid̄oho lai walina ntau dunia. B̄ara ndedena dunia wati ca'ukaina d̄i nggomid̄oho.

²⁰ Kawarapu au ranggahi b̄a Nahu d̄i nggomid̄oho, ’Ada wati ncewi na'ena ntewi kaisi lab̄o rumana.’ Nggarasi siad̄oho wa'ura kancokina Nahu, siad̄oho d̄imakancoki nggomid̄oho rau. Siad̄oho nggara nab̄atusi ngoa ra tei b̄a Nahu, siad̄oho nab̄atu rauku ngoa ra tei b̄a nggomid̄oho.

²¹Sara'ana ede d̄i karawi b̄a siad̄oho d̄i nggomid̄oho, b̄ara nggomid̄oho anamori Nahu, b̄ara siad̄oho wati patana Sia ma ranggaduna Nahu.

²²Pai watisi mai Nahu ro wati ngoa sara'ana ede d̄i siad̄oho, siad̄oho wati dosana. Pala ake siad̄oho wati ntauna alasa wali d̄i dosa siad̄oho.

²³Dou ma daca'u Nahu, nadaca'u Ama-Ku.

²⁴Pai d̄i woha siad̄oho Nahu wati karawiku lampa rawi ma watipu karawi b̄a dou makalai, siad̄oho wati dosana. Pala ake siad̄oho wa'ura eda au rakarawi b̄a Nahu, ro siad̄oho wati ca'una Nahu ro Ama-Ku.

²⁵ Pala pab̄uaku ndedena, loakud̄u ndad̄ina au ratunti d̄i ade Buku Hukum siad̄oho, eded̄u: Siad̄oho wati ca'una Nahu kai wati ntauna alasa.’

²⁶Nahu d̄imanggaduna d̄i nggomid̄oho Mabantumu ma rad̄i Ama. Siaku Roh d̄imakatadana lampa rawi mapoda mab̄oha Ruma Hatalla. Namaisi Sia, Sia d̄imanuntu ra nggahi mab̄oha Nahu.

²⁷Ro nggomid̄oho rau pab̄uapu mbeimu nuntu ra nggahi mab̄oha Nahu, b̄ara nggomid̄oho wa'ura sama-samamu lab̄o Nahu ra'aipu saramba wa'una.