Read Bima YAHYA 17 Bible Online

YAHYA 17 - Bima bible

YAHYA 17

¹Sawa'u b̄a nggahi ndedena, Ruma Isa d̄ongana ese langi ro nggahina, ”Ama, ake wa'ura raka wakatuna. Kad̄ese ra kantasapu Ana-Mu, loakud̄u Ana-Mu makad̄ese ra kantasa rauna Ama.

²Ama wa'ura mbeita kuasa d̄i samenana ela manusia d̄i Ana, loakud̄u Sia mbeina mori masapodakaina ro ma'ederahid̄i d̄i samenana dou rambei b̄a Ama d̄i Sia.

³Akeku mori masapodakaina ro ma'ederahid̄i; loakud̄u dou mapata Ama, sab̄uampa Ruma Hatalla ma poda, ro mapata Ruma Isa Al Masih ranggadu b̄a Ama.

⁴Mada wa'ura kad̄ese ra kantasaku Ama ese wawo dunia ake kai kanggoriku karawi rakau kai b̄a Ama d̄i Mada.

⁵Ama! Kad̄ese ra kantasa to'ipu Mada ake d̄i Ama, kai kad̄ese ra kantasa rakantau b̄a Mada sama lab̄o Ama sawatipu kandad̄i dunia ake.

⁶Mada wa'ura kapata weaku Ama d̄i dou-dou rad̄i dunia ake rawa'u mbei b̄a Ama d̄i Mada. Siad̄oho eded̄u ntau Ama, ro Ama wa'ura mbeita siad̄oho d̄i Mada. Siad̄oho wa'ura b̄atuna nggahi ra eli Ama.

⁷Ake siad̄oho wa'ura b̄ade b̄a one sara'a rambei b̄a Ama d̄i Mada ramaina ta Ama.

⁸Wa'ura karongga b̄a Mada d̄i siad̄oho nggahi ra eli Ama rambei b̄a Ama d̄i Mada; ro siad̄oho wa'ura tarimana. Siad̄oho nab̄adeku b̄a one Mada poda-poda ramaiku ta Ama ro siad̄oho imbi b̄a one Ama ma ranggadu Mada.

⁹Mada do'aku d̄i ru'u b̄a siad̄oho. Mada wati do'aku d̄i ru'u b̄a dunia malaisi d̄i ru'u b̄a dou-dou ma wa'ura mbei b̄a Ama d̄i Mada, b̄ara siad̄oho eded̄u ntau Ama.

¹⁰Samenana ntau Mada eded̄u ntau Ama rau; ro samenana ntau Ama eded̄u ntau Mada rau. Mada d̄i kad̄ese ra kantasa d̄i woha siad̄oho.

¹¹Ake Mada mai d̄i Ama. Mada wati ngge'e waliku d̄i dunia; pala siad̄oho wara d̄i dunia. Ama ma raso! Jagapu siad̄oho kai kuasa ngara Ama, eded̄u ngara ma rawa'u mbei b̄a Ama d̄i Mada — loakud̄u siad̄oho ndad̄i sab̄ua, sama b̄une Ama lab̄o Mada rau sab̄ua.

¹² Wakatu mbuipu Mada sama lab̄o siad̄oho, Mada wa'ura jagaku siad̄oho kai kuasa ngara Ama — ngara rambei b̄a Ama d̄i Mada. Mada wa'ura jagaku siad̄oho lab̄o wati kone sab̄ua dou rau d̄i ade weki siad̄oho mamoda, selasi sia pab̄ua d̄imamoda romo; loakud̄u ndad̄ira au ratunti ade Alkitab.

¹³Ake Mada maiku d̄i Ama. Sara'ana ake nggahi b̄a Mada wakatu Mada mbuipu d̄i dunia; loakud̄u siad̄oho iu podana neo ade Mada.

¹⁴Mada wa'ura karonggaku d̄i siad̄oho nggahi ra eli Ama, ro dunia madaca'u siad̄oho, b̄ara siad̄oho laina ntau dunia, sama b̄une Mada laina ntau dunia.

¹⁵Mada wati rahoku loakud̄u Ama maweha siad̄oho d̄i ade dunia ake, pala raho b̄a Mada loakud̄u Ama majagana siad̄oho rad̄i La Madab̄ae.

¹⁶Sama b̄une Mada laina ntau dunia, siad̄oho rau laina ntau dunia.

¹⁷Kandad̄i to'ipu siad̄oho ntau rakalai b̄a Ama kai ncai lampa rawi mapoda; nggahi ra eli Ama edeku lampa rawi mapoda.

¹⁸B̄une Ama mawa'ura nggadu Mada d̄i dunia, ndede rauja Mada manggadu siad̄oho d̄i dunia.

¹⁹D̄iru'u pentikai b̄a siad̄oho, Mada mad̄onggo weki kai ntau rakalai Ama, loakud̄u siad̄oho rau mandad̄i ntau rakalai Ama kai ncai lampa rawi mapoda.

²⁰Laina d̄i ru'u b̄a siad̄oho mpoa Mada do'aku. Mada do'a d̄iru'u b̄a dou-dou ma imbi d̄i Mada b̄a nuntu ra nggahi b̄a siad̄oho ake.

²¹Mada maraho nemba Ama, loakud̄u siad̄oho sara'ana mandad̄i sab̄ua, b̄une Ama masab̄ua lab̄o Mada, ro Mada lab̄o Ama. Raho-raho to'impa siad̄oho ndad̄i sab̄uana lab̄o Ndaita loakud̄u dunia imbina b̄a one Ama ma ranggadu Mada.

²²Mada wa'ura mbeiku siad̄oho d̄ese ra ntasa rambei b̄a Ama d̄i Mada, loakud̄u siad̄oho ndad̄i sab̄uana, sama b̄une Ndaita masab̄ua rau;

²³Mada lab̄o siad̄oho, ro Ama lab̄o Mada; loakud̄u siad̄oho poda-poda sab̄uana. Ndad̄i dunia d̄imab̄ade b̄a one Ama ma ranggadu Mada, ro b̄a one Ama mameci ra ca'u siad̄oho b̄une Ama mameci ra ca'u Mada.

²⁴Ama, Mada ne'eku loakud̄u siad̄oho, rambei b̄a Ama d̄i Mada, wara sama lab̄ona Mada d̄i hid̄i warakai Mada, loakud̄u siad̄oho edana d̄ese ra ntasa Mada; eded̄u d̄ese ra ntasa rambei b̄a Ama d̄i Mada, b̄ara Ama mameci ra ca'u Mada sawatipu kandad̄i dunia ake.

²⁵Ama ma adi! Dunia wati patana Ama, pala Mada kapata Ama; ro dou-dou ake nab̄adeku b̄a one Ama ma ranggadu Mada.

²⁶Mada wa'ura katadaku ngara Ama d̄i siad̄oho; ro Mada kakarawi ncau b̄une ede, loakud̄u meci ra ca'u Ama d̄i Mada nangge'empa d̄i ade siad̄oho lab̄o Mada masab̄ua lab̄o siad̄oho.”