Read Bima YAHYA 18 Bible Online

YAHYA 18 - Bima bible

YAHYA 18

¹Sawa'u b̄a Ruma Isa do'a ndedena, Sia lab̄o anamorid̄oho-Na lao ipa b̄ae b̄a Sori Kidron. Ta ede wara sab̄ua nggaro, Ruma Isa lab̄o anamorid̄oho-Na lu'u ade nggaro ede.

²La Yudas mad̄onggo Ruma Isa d̄i dou-dou ma musu-Na ede, nab̄ade hid̄i ede; b̄ara Ruma Isa wa'ura ntuwu poda kab̄oro weki d̄i hid̄i ede lab̄o anamorid̄oho-Na.

³Edempara la Yudas lao aka hid̄i ede lab̄o wa'ana mboto tentara Romawi ro pila-pila dou majaga Bait Allah rakakai b̄a dou-dou mana'ekai imam ro dou-dou Farisi. Siad̄oho wa'ana d̄aha, ilo ro obo.

⁴Ruma Isa nab̄adeku sara'ana ma d̄imandad̄i d̄i weki ndai-Na. Ndad̄i Sia mai rakana dou-dou ede ro sod̄ina, ”Cou ngupa nggomid̄oho?”

⁵”Isa, dou Nazaret,” cambe b̄a siad̄oho. ”Nahuku Sia,” nggahi Ruma Isa. La Yudas mad̄onggo Ruma Isa d̄i dou-dou ma musu-Na kid̄i ta ede lab̄o siad̄oho.

⁶Wakatu nggahi Ruma Isa d̄i siad̄oho, ”Nahura Sia,” siad̄oho suru menana edempara mbo'ona awa dana.

⁷Sod̄i b̄a Ruma Isa sakali wali d̄i siad̄oho, ”Nggomid̄oho cou ngupamu?” ”Isa dou Nazaret,” cambe b̄a siad̄oho.

⁸”Wa'ura nggahi b̄a Nahu, Nahuku Sia,” nggahi b̄a Ruma Isa. ”Ro nggara napodasi Nahu d̄i ngupa b̄a nggomid̄oho, co'opu siad̄oho ma kalaina ake lao.” (

⁹Kai nggahi ndedena, ndad̄ira au ranggahi b̄a Ruma Isa sawatipu b̄a ede: ”Ama, rad̄i dou-dou rambei b̄a Ama d̄i Mada, wati kone sab̄ua dou ma moda.”)

¹⁰La Simon Petrus ma wa'a sab̄ua peda, olona edempara fati kakorina fiko wana ada dou mana'ekai imam-imam. Ngara ada ede la Malkus.

¹¹ Edempara nggahi Ruma Isa d̄i la Petrus, ”Kalu'u mbalipu pedamu ede d̄i lapina! Sab̄ua kananu b̄a nggomi Nahu wati d̄imanono mo susa ra ncoki rambei b̄a Ama d̄i Nahu?”

¹²Edempara tentara-tentara Romawi lab̄o mana'ekaina ro tentara-tentara Yahudi mawa'u ra leto Ruma Isa.

¹³Sarambakaina siad̄oho lao wa'ana Ruma Isa lao satando d̄i Hanas, riana mone la Kayafas. Kayafas eded̄u dou mana'ekai imam-imam d̄i mba'ana ede.

¹⁴ Ro siaku mangoa ra tei kataho d̄i dou-dou mana'ekai Yahudi b̄a one natahopu sab̄ua dou mamade d̄i ru'u b̄a samenana bangsa.

¹⁵Simon Petrus ro sab̄ua dou anamori makalai mab̄atu slando Ruma Isa. Anamori ma kalai ake napataku b̄a dou mana'ekai imam-imam; ndad̄i sia lu'u b̄atu sama rauna lab̄o Ruma Isa d̄i sarei dou mana'ekai imam-imam,

¹⁶Petrus ngena ta ari lua, d̄i tad̄a. Edempara anamori ma kalai ede lao losa ro nuntuna lab̄o dou siwe ma jaga tad̄a, edempara wa'ana la Petrus lu'u ta d̄ei.

¹⁷Dou siwe majaga tad̄a nggahina d̄i la Petrus, ”Oe, sab̄ua laina nggomi rausi sab̄ua dou ade weki anamori dou aka?” ”Laina,” cambe b̄a la Petrus.

¹⁸Wakatu ede b̄usi ai, ndad̄i ada-ada ro tentara-tentara wa'ura kaleana afi daru ro siad̄oho niruna afi ta ede. La Petrus laona ta aka ro kid̄i niruna afi lab̄o siad̄oho.

¹⁹Sod̄i b̄a dou mana'ekai imam-imam d̄i Ruma Isa mab̄oha anamorid̄oho-Na ro mab̄oha ngoa ra tei-Na.

²⁰Cambe b̄a Ruma Isa, ”Nahu kaca'u nuntu ra nggahi ntiri d̄i tando dou mamboto. Nahu kaca'u ngoa ra tei ncau d̄i uma-uma sambeakai ro d̄i Bait Allah, hid̄i dou Yahudi ranginakaina kab̄oro weki. Nahu watipu parana nggahiku au-au kai macili ro rahasia.

²¹Ndad̄i b̄ab̄auku nggomi sod̄ikaimu Nahu? Sod̄ipu d̄i siad̄oho ma wa'ura ringa ngoa ra tei b̄a Nahu. Pasti siad̄oho nab̄adeku au ranggahi b̄a Nahu.”

²²Wakatu nggahi ndede Ruma Isa, sab̄ua dou tentara ta ede matopa-Na ro nggahina, ”Disa poda Nggomi nuntu b̄une ede d̄i dou mana'ekai imam-imam!”

²³Cambe b̄a Ruma Isa, ”Nggara nggahisi b̄a Nahu au-au ma ncara, nggahi wa'upu ta ake auku mancarana! Pala nggara nggahisi b̄a Nahu ede napodasi, b̄ab̄au nggomi topakaimu Nahu?”

²⁴Edempara Hanas makau wa'a Ruma Isa randante d̄i Dou Mana'ekai Imam-Imam ngarana Kayafas.

²⁵La Simon Petrus mbui ngge'epu kid̄i niruna afi ta ede. Nggahi dou-dou d̄i sia, ”Sab̄ua laina nggomi rausi anamori dou aka?” Pala la Petrus wati mangaku, nggahina, ”Laina!”

²⁶Sab̄ua dou ada dou mana'ekai imam-imam, eded̄u iwa ra weki dou ma rafati kakori b̄a la Petrus fikona, manggahi, ”Sab̄ua laina eda b̄a nahu nggomi d̄i nggaro ede masama-sama lab̄o Sia?”

²⁷Edempara la Petrus wati mangaku walina, ”Wati,” — ro ncihi ncao wakatu ede koko janga.

²⁸Aimasid̄i-sid̄i poda siad̄oho lao wa'ana Ruma Isa rad̄i uma Kayafas lao aka asi gubernu. Ndai dou-dou Yahudi wati lu'una d̄i ade asi, loakud̄u siad̄oho wati ndad̄ina naji kai cara agama, b̄ara siad̄oho nane'e b̄atu ngaha ngaha ra nono Paskah.

²⁹B̄ara ndedena Pilatus losa rakana siad̄oho ro sod̄ina, ”Auku b̄ab̄u ra lo'o b̄a nggomid̄oho d̄i dou ake?”

³⁰Cambe b̄a siad̄oho, ”Pai Sia watisi wara ncarana, madad̄oho wati d̄imawa'a Sia d̄i Ita Gubernu.”

³¹Nggahi Pilatus d̄i siad̄oho, ”Wehapu Sia ro paresapu ncihi ra ncara Sia b̄a nggomid̄oho kai b̄atu hukum ndaimu!” Pala dou-dou Yahudi ede macambena, ”Madad̄oho wati loa hukum made dou.” (

³² Ake ndad̄ikaina loakud̄u ndad̄ira au ranggahi b̄a Ruma Isa mab̄oha cara Sia d̄imamade.)

³³Pilatus lu'u mbali d̄i asi ro ouna Ruma Isa, edempara sod̄ina, ”Sab̄ua poda Nggomi Sangaji dou Yahudi?”

³⁴Cambe b̄a Ruma Isa, ”Sab̄ua sod̄imu ake ramaina tandai nggomi atao wara dou makalai ma wa'ura ngoamu mab̄oha Nahu?”

³⁵Cambe b̄a Pilatus, ”Sab̄ua nahu ake dou Yahudi? Ma d̄onggo Nggomi d̄i nahu eded̄u bangsa ndai-Mu ro dou-dou mana'ekai imam. Au rawa'u karawi b̄a Nggomi?”

³⁶Nggahi Ruma Isa, ”Karaja'ana Nahu, laina rad̄i dunia ake. Pai Karaja'ana Nahu rad̄i dunia ake, dou-dou-Ku d̄ima'usaha kapodana loakud̄u Nahu b̄ab̄aina d̄id̄onggo d̄i dou-dou mana'ekai Yahudi. Pala ncihi romo Karaja'an-Ku laina rad̄i dunia ake!”

³⁷Edempara sod̄i b̄a Pilatus d̄i Sia, ”Nggara ndedesi, Nggomi sangaji?” Cambe b̄a Ruma Isa, ”Nggomi manggahi b̄a one Nahu ake sangaji. Nahu ranggana ro maiku d̄i dunia ake d̄i ru'u sab̄uampa d̄i ne'e, eded̄u mambei nuntu ra nggahi mab̄oha lampa rawi mapoda. Dou ma rad̄i lampa rawi mataho ede naringaku Nahu.”

³⁸Sod̄i b̄a Pilatus d̄i Sia, ”Auku aona lampa rawi mapoda?” Edempara Pilatus losa walina rad̄i asi ro nggahina d̄i dou-dou Yahudi, ”Nahu wati rakaku rawina mancara kone sab̄ua rau d̄i Sia.

³⁹Pala ranginakai b̄a nggomid̄oho, nahu maca'u hori sab̄ua dou rabui d̄i Ainaina Aruraja Paskah. Sab̄ua mangawa nggomid̄oho loakud̄u nahu mahori sangaji dou Yahudi d̄i ru'u b̄a nggomid̄oho?”

⁴⁰Cambe b̄a siad̄oho kai kanggica kana'ena, ”Wati, aina Sia, pala la Barabas!” (Barabas eded̄u sab̄ua dou parampo.)