Read Bima YAHYA 19 Bible Online

YAHYA 19 - Bima bible

YAHYA 19

¹Edempara Pilatus lu'una ro kauna dou cambo Ruma Isa.

²Tentara-tentara ndawina sab̄ua songko sangaji kai sanga haju rui, edempara kakanina d̄i tuta Ruma Isa. Sawa'u b̄a ede siad̄oho kakanina d̄i Sia jumba keta,

³edempara pila-pila kali maina d̄i Sia ro nggahina, ”Io sangaji dou Yahudi!” Edempara siad̄oho topana Sia.

⁴Sawa'u b̄a ede Pilatus losana sakali wali ro nggahina d̄i dou mamboto ede, ”Tiopu! Nahu mawa'a kalosa Sia d̄i nggomid̄oho, loakud̄u b̄ade b̄a nggomid̄oho b̄a one nahu wati rakaku rawina mancara kone sab̄ua rau d̄i Sia.”

⁵Edempara losa Ruma Isa kai kanina songko sangaji randawi kai rui ro jumba keta. Nggahi Pilatus d̄i siad̄oho, ”Tiopu dou ede.”

⁶Wakatu eda b̄a dou-dou mana'ekai imam ro tentara-tentara ede Ruma Isa, siad̄oho kanggicana, ”Salibpu Sia! Salibpu Sia!” Nggahi Pilatus d̄i siad̄oho, ”Wehapu Sia, ro salibpu b̄a ndaid̄ohomu, nahu wati rakaku eda rawi-Na mancara konena sab̄ua rau d̄i Sia.”

⁷Cambe b̄a dou-dou Yahudi ede, ”Nggahi b̄a hukum madad̄oho, Sia pab̄uaku d̄ib̄ab̄u kai hukuma made, b̄ara Sia mangaku weki-Na Ana Ruma Hatalla.”

⁸Wakatu ringa b̄a Pilatus nggahi ndede siad̄oho, sia nanaha ipi dahu wali.

⁹Ndad̄i sia lu'u mbalina d̄i ade asi ro sawa'u b̄a Ruma Isa wa'a kalu'u, sod̄i b̄a Pilatus d̄i Sia, ”Nggomi ratab̄e maikai-Mu?” Pala wati cambe b̄a Ruma Isa.

¹⁰Ndad̄i nggahi wali Pilatus, ”Nggomi wati ne'emu nuntu lab̄o nahu? D̄ib̄ade-Mu, nahu mantau kuasa d̄imahori Nggomi ro kuasa d̄imasalib Nggomi!”

¹¹Cambe b̄a Ruma Isa, ”Nggara watisi mbei b̄a Ruma Hatalla kuasa ede d̄i nggomi, nggomi wati ntaumu kuasa sama sekali d̄i Nahu. B̄ara ndedena dou ma d̄onggo mbei Nahu d̄i nggomi, nana'epu dosa sia ntewi kaisi nggomi.”

¹²Wakatu ringa b̄a Pilatus ede, sia na'usahaku d̄i horikaina Ruma Isa. Pala dou-dou Yahudi makanggica ntuwu, ”Nggara horisi b̄a Ita Sia, Ita laina soba Kaisar! Dou ma kanahu weki ndaina sangaji, eded̄u musu Kaisar!”

¹³Wakatu ringa b̄a Pilatus nggahi ra eli ede, sia wa'a kalosana Ruma Isa edempara dohona d̄i kadera pengadila d̄i hid̄i ma ngara Dasa Wadu. (D̄i ade bahasa Ibrani ngarana Gabata.)

¹⁴Wakatu ede ne'empara b̄oe sampuru d̄ua aimarai, ainaina sawatipu Ainaina Aruraja Paskah. Nggahi Pilatus d̄i dou-dou ede, ”Ake sangaji nggomid̄oho!”

¹⁵Siad̄oho kanggica walina, ”Hadepu Sia! Hadepu Sia! Salibpu Sia!” Sod̄i b̄a Pilatus, ”Sab̄ua pab̄uaku salib b̄a nahu sangaji nggomid̄oho?” Cambe b̄a dou-dou mana'ekai imam, ”Kaisar ede mpoampa menana sangaji madad̄oho!”

¹⁶Edempara Pilatus d̄onggo mbeina Ruma Isa d̄i siad̄oho d̄isalib. Siad̄oho weha aona Ruma Isa, edempara lao wa'ana Sia.

¹⁷Losa Ruma Isa kai tundu b̄a ndai-Na haju salib lao aka hid̄i ma ngara ”Hid̄i Rangka”. (D̄i ade bahasa Ibrani pehe kai Golgota.)

¹⁸Ta aka Sia d̄isalib. Sama-sama lab̄o Sia wara rauja d̄ua dou makalaina rasalib; sab̄ua dou d̄i sab̄ae ku'i, sab̄ua dou d̄i sab̄ae wana ro Ruma Isa d̄i ade wohana.

¹⁹d̄i haju salib Ruma Isa, kau b̄a Pilatus wi'i ratunti ake: Isa Dou Nazaret, Sangaji Dou Yahudi”.

²⁰Mboto dou Yahudi mabaca ratunti ede, b̄ara hid̄i rasalibkai Ruma Isa ede wati d̄o'ona lab̄o kota. Ratunti ede ade nggahi Ibrani, Latin ro Yunani.

²¹Nggahi dou-dou mana'ekai imam d̄i Pilatus, ”Aina tunti ’Sangaji dou Yahudi’, malaisi tatuntipu, ’Dou ake manggahi, Nahu Sangaji Dou Yahudi.’ ”

²²Pala cambe b̄a Pilatus, ”Ma wa'ura ratunti b̄a nahu, wati loa d̄irungka.”

²³Sawa'u b̄a tentara-tentara ede nggori salibna Ruma Isa, siad̄oho wehana kani ra lombo-Na. Kani ra lombo ede cengga upana: cua-cua raka mena ru'u ndaina. Siad̄oho weha rauna jumba-Na. Jumba ede watira nda'una — ramuna tampu'u ta esena sampe ta awana.

²⁴ Nggahi mena tentara ede d̄i sab̄ua dou lab̄o masab̄uana, ”Aina dompo-dompo b̄a ndai jumba ake. Mai ndai ta'undiku loakud̄u b̄ade couku d̄imaloana raka.” Lampa rawi ede ndad̄ina loakud̄u ndad̄ira b̄une ratunti ade Alkitab, eded̄u: ”Siad̄oho macengga-cenggana kani ra lombo-Ku, ro ma'undi d̄i ru'u jumba-Ku.” Ro poda romo tentara-tentara ede karawina b̄une ede.

²⁵D̄eni lab̄o salib Ruma Isa kid̄i ina Ruma Isa, ina nto'i-Na, la Maria wei la Klopas, ro la Maria Magdalena.

²⁶Wakatu eda b̄a Ruma Isa ina-Na ro sab̄ua anamori rameci ra ca'u b̄a Sia makid̄i ta ede, nggahi Sia d̄i ina-Na, ”Ina ake ana Ita.”

²⁷Edempara nggahi Ruma Isa d̄i anamori-Na ede, ”Ede Inamu.” Tampu'u wakatu ede anamori ede matarima ina Ruma Isa d̄i ngge'e lab̄ona d̄i umana.

²⁸ Ruma Isa nab̄adeku b̄a one ake wa'ura nggori sara'ana, ro loakud̄u au ratunti d̄i ade Alkitab loa ndad̄ina, nggahi Sia, ”Nahu mango wo'oku.”

²⁹Ta ede wara sab̄ua mangko b̄ini b̄a oi anggo ma ngonco. Edempara sab̄ua wunta taka rad̄eta kai oi anggo ngonco ede, ro rad̄iki kai salona haju naru, edempara d̄etana d̄i wiwi Ruma Isa.

³⁰Edempara nela b̄a Ruma Isa oi anggo ede edempara nggahina, ”Wa'ura nggori!” Edempara Sia okona tuta-Na ro madena.

³¹Dou-dou mana'ekai Yahudi wati ne'ena timba dou-dou rasalib ede ngge'e tero weki d̄i haju salib d̄i ainaina Sabat, au walipu sakali ake Sabat ede Ainaina Aruraja mapenti poda. B̄ara ainaina rasalibkai Ruma Isa hinana sawatipu ainaina Sabat ede, dou-dou Yahudi rahona iji d̄i Pilatus d̄i fokakai ed̄i-ed̄i dou-dou ma wa'ura salib ro kalondo timba-timba ede rad̄i haju salib.

³²Edempara tentara-tentara ede lao foka uluna ed̄i d̄ua dou ra salib sama lab̄o Ruma Isa.

³³Wakatu siad̄oho rakara d̄i Ruma Isa, siad̄oho edana Sia wa'ura made. Ndad̄i siad̄oho wati fokana edi-Na.

³⁴Pala loko Ruma Isa runcakaina b̄uja b̄a sab̄ua dou tentara ade weki tentara-tentara ede; ro losa lalompa ra'a ro oi.

³⁵Dou ma eda madana mandad̄i ede, siaku ma ngoa ra kahabana lampa rawi ede, loakud̄u nggomid̄oho imbi raumu. Ro nuntu ra nggahi ede napodaku, ro sia nab̄adeku b̄a one ede napodaku.

³⁶ Lampa rawi ede ndad̄ina loakud̄u ndad̄ira au ratunti ade Alkitab, eded̄u, ”Wati kone sab̄ua peke-Na d̄ifoka”.

³⁷ D̄i ade Alkitab rau ratunti: ”Siad̄oho d̄imantandana Sia rawa'u runca b̄a siad̄oho”.

³⁸Sawa'u b̄a ede la Yusuf dou Arimatea rahona iji d̄i Pilatus d̄i loakaina weha timba Ruma Isa. (Yusuf eded̄u anamori Ruma Isa kai wati tadana, b̄ara sia nadahuku d̄i dou mana'ekai Yahudi.) Pilatus mbeina iji d̄i sia, ndad̄i sia lao wehana timba Ruma Isa.

³⁹ Nikodemus, ma ntoina parana maina d̄i Ruma Isa wakatu aimangad̄i, lao sama rauna lab̄o la Yusuf. Nikodemus mawa'a marakani lo'i d̄upa ro haju gaharu — sara'ana wara kira-kira tolu mpuru kilogram mbotona.

⁴⁰D̄ua dou ede mawehana timba Ruma Isa edempara pontekaina salolo sama-sama lab̄o marakani lo'i mamengi ede kai b̄atu ranginakai umbu dou Yahudi.

⁴¹D̄i hid̄i Ruma Isa rasalib wara sab̄ua nggaro. D̄i ade nggaro ede wara sab̄ua rade b̄ou, ma watipu rakani umbu kai dou.

⁴²B̄ara rade ede d̄eni, ro ainaina Sabat ne'empara tampu'u, siad̄oho umbuna Ruma Isa ta aka.