Read Bima YAHYA 2 Bible Online

YAHYA 2 - Bima bible

YAHYA 2

¹D̄ua nai sawa'u b̄a ede wara ndiha nika aka kota Kana d̄i Galilea, ro ina Ruma Isa wara ta aka.

²Ruma Isa lab̄o anamorid̄oho-Na ra'unda rau d̄i ndihakai ede.

³Wakatu cumpura oi anggo, nggahi ina-Na d̄i Ruma Isa, ”Siad̄oho wa'ura cumpu anggona.”

⁴Cambe b̄a Ruma Isa, ”Ina, ai to'ina kaumu Mada. Watipu raka wakatuna Mada katada-Ku weki.”

⁵Pala ina Ruma Isa manggahi d̄i dou-dou mataki kab̄ua ngaha ra nono, ”Karawipu au ranggahi-Na d̄i nggomid̄oho.”

⁶Ta ede wara ini mbua muja rasadia d̄i ru'u karasokai sarumbu b̄atu ranginakai Yahudi. Sanikina muja ede isina kira-kira saratu lite.

⁷Nggahi Ruma Isa d̄i dou-dou mataki kab̄ua ngaha ra nono ede, ”Isipu muja-muja ede kai oi.” Siad̄oho isi kab̄inina oi d̄i muja-muja ede.

⁸Edempara nggahi Ruma Isa d̄i siad̄oho, ”Ake wehapu sato'i ade oi ede ro lao wa'apu d̄i dou mana'ekai ndiha.” Siad̄oho wa'ana oi ede d̄i dou mana'ekaina ndiha,

⁹ro sia tab̄aina oi ma wa'ura rungka ndad̄i anggo. (Sia wati b̄adena ratab̄ena anggo ede, selasi dou-dou mataki kab̄ua ngaha ra nono ma lua oi edempa ma b̄ade.) Ndad̄i dou mana'ekai ndiha ede lao d̄enina d̄i b̄unti mone,

¹⁰edempara nggahina d̄i sia, ”Ranginakai b̄a dou nasadia uluku anggo ma ipi caru ro dou ra'unda namanta adena nono, ampo kalosa anggo ma biasa. Pala nggomi mawi'iku anggo ma ipi caru sa'ake!”

¹¹Edeku rawi mab̄isa ra guna ma saramba-rambakaina rakarawi b̄a Ruma Isa. Sia karawina ede aka Kana d̄i Galilea. Kai tanda ede Sia natei katadaku d̄ese ra ntasa-Na. Ndad̄i anamorid̄oho-Na imbi d̄i Sia.

¹² Sawa'u b̄a ede Ruma Isa laona aka Kapernaum sama-sama lab̄o ina-Na, arid̄oho-Na ro anamorid̄oho-Na. Siad̄oho ngge'e ta aka sampe pila-pila nai ntoina.

¹³ Wakatu Aruraja Paskah Yahudi wa'ura d̄eni, Ruma Isa lao aka Yerusalem.

¹⁴D̄i Bait Allah d̄i Yerusalem Sia rakana eda dou-dou malanda capi, jimba, ro nasi dara; ro dou-dou macepe piti madoho ta ede.

¹⁵Ruma Isa ndawina cambo kai ai edempara b̄aka kalosa sara'ana binata ede, nataho jimba ro capi rad̄i ade Bait Allah. Meja-meja dou macepe piti ponga b̄a Sia ndad̄ina piti siad̄oho mbari mbura rero.

¹⁶Edempara nggahi Sia d̄i dou malanda nasi dara, ”Hanta peso sara'apu. Aina kandad̄imu Uma Ama Nahu hid̄i landa ra lajokai!”

¹⁷ Ndad̄i kawara b̄a anamorid̄oho-Na d̄i ade ayat Alkitab ake, ”Meci ra ca'u b̄a Mada d̄i Uma-Mu, Ruma Hatalla, maka'a ade-Ku.”

¹⁸Dou-dou mana'ekai Yahudi madaca'u Ruma Isa, nggahi siad̄oho d̄i Sia, ”Coba ndawipu karawi mab̄isa ra guna d̄i katandakai ru'u nami b̄a one Nggomi mantau hak karawi b̄une ake.”

¹⁹ Cambe b̄a Ruma Isa, ”D̄umbapu Uma ake, ro ade wakatu tolu nai Nahu d̄imatu'u mbalina.”

²⁰Edempara nggahi siad̄oho, ”Upampuru ini mba'a ntoina d̄i katu'u kai Bait Allah ake. Ro Nggomi mane'e tu'u mbalina ade wakatu tolu nai?”

²¹Pala Bait Allah ma aona nggahi b̄a Ruma Isa eded̄u sarumbu ndai-Na.

²²Ndad̄i sawa'u b̄a ede, sawa'u b̄a Ruma Isa d̄i kamori mbali rad̄i made, kawara b̄a anamorid̄oho-Na b̄a one lampa rawi ede parana ranggahi b̄a Sia. Edempara imbi kai b̄a siad̄oho d̄i au ratunti d̄i ade Alkitab ro d̄i au ranggahi b̄a Ruma Isa.

²³Wunga mbuipu Ruma Isa wara d̄i Yerusalem wakatu Aruraja Paskah, mboto dou ma'imbi d̄i Sia b̄ara karawi-Na mab̄isa ra guna.

²⁴Pala ndai Ruma Isa wati imbina siad̄oho, b̄ara Sia napataku samenana dou.

²⁵Wati paralu ngoa b̄a dou d̄i Sia mab̄oha cou-cou rau, b̄ara ndai Sia nab̄adeku au ma wara d̄ei ade manusia.