Read Bima YAHYA 20 Bible Online

YAHYA 20 - Bima bible

YAHYA 20

¹D̄i ainaina Minggu aimasid̄i, mbuipu rindi ai, la Maria Magdalena lao aka rade. Sia edana wadu rab̄ontokai wa'ura kiri weki d̄i hid̄i b̄ontokai rade ede.

²Edempara sia rai lao ngupana la Simon Petrus ro sab̄ua dou anamori rameci ra ca'u b̄a Ruma Isa, ro nggahina d̄i siad̄oho, ”Ruma wa'ura weha b̄a dou d̄i ade radena, ro nahu wati b̄adeku tab̄e rawi'ikai Sia.”

³Edempara la Petrus ro anamori makalaina ede lao aka rade.

⁴D̄uana ede rai, pala anamori makalai ede ma'ipi roci ntewi kaisi la Petrus, ro sia rongga ulu d̄i rade.

⁵Sia tio cad̄eina d̄i ade rade ro edana salolo mawara ta ede, pala sia wati lu'una.

⁶La Simon Petrus mab̄atu kento, edempara lu'u lalona d̄i ade rade ede. Sia edana salolo mawara ta ede,

⁷pala tob̄e salolo rad̄iki kai tuta Ruma Isa wati warana d̄eni ede malaisi wara raluru d̄i hid̄i makalai.

⁸Edempara anamori ma rongga ulu d̄i rade, lu'u rauna. Sia eda ro imbina. (

⁹Sampe wakatu ede siad̄oho watipu loana ka'ao au ratunti ade Alkitab b̄a one Sia pab̄uaku mori mbalina rad̄i madena.)

¹⁰Sawa'u b̄a ede anamori Ruma Isa dulana.

¹¹La Maria Magdalena makid̄i tatando rade ro nangina. Wunga mbuipu sia nangi, sia tio cad̄eina d̄ei rade,

¹²edempara edana d̄ua mala'eka makani ra lombo malanta. Siad̄oho dohona d̄i hid̄i ratohokai timba Ruma Isa, ma sab̄ua d̄i ao tuta, ro ma kalaina d̄i ao ed̄i.

¹³Sod̄i b̄a mala'eka-mala'eka ede, ”Ina, b̄ab̄au nangikaita?” Cambe b̄a Maria, ”Ruma mada wa'ura weha b̄a dou, ro mada wati b̄adeku Sia rawi'i tab̄e.”

¹⁴Sawa'u b̄a nggahi ndedena, sia tambarina ro edana Ruma Isa makid̄i ta ede. Pala sia wati b̄adena b̄a one ede Ruma Isa.

¹⁵Sod̄i b̄a Ruma Isa d̄i sia, ”Ina, b̄ab̄au nangikaita? Cou ngupa ita?” Kacai b̄a la Maria dou ede mataki tonggu nggaro, ndad̄i nggahi sia, ”Pa, nggara Itasi ma rapesona Sia ta ake, tangoa to'ipu mada tab̄e Ita wi'ikaita Sia, loakud̄u mada maweha-Na.”

¹⁶Nggahi Ruma Isa d̄i sia, ”Maria!” Tambari la Maria d̄i Ruma Isa edempara nggahina kai nggahi Ibrani, ”Rabuni!” (Aona ”Guru”.)

¹⁷”Aina nentimu Nahu,” nggahi Ruma Isa d̄i sia, ”b̄ara Nahu watipu ne'eku ese Ama. Pala laopu d̄i cina ra angi Nahu, ro ngoapu d̄i siad̄oho b̄a one Nahu ake mane'e ese Ama-Ku ro Ama-mu, Ruma Hatalla Ruma-Ku ro Ruma Hatalla Rumamu.”

¹⁸Edempara la Maria lao ngoana d̄i anamori Ruma Isa b̄a one sia wa'ura edana Ruma ro b̄a one Ruma mawa'ura ngoana d̄i sia sara'ana.

¹⁹D̄i ainaina Minggu ede lalo, wakatu wa'ura aimangad̄i, anamori Ruma Isa kab̄oro weki d̄i sab̄ua uma kai tad̄a-tad̄a rakunci, b̄ara siad̄oho nadahuku d̄i dou-dou mana'ekai Yahudi. Wed̄i lalompa mai Ruma Isa ro kid̄ina d̄i woha siad̄oho ro nggahina, ”Salam taho ra ntai d̄i ru'u b̄a nggomid̄oho.”

²⁰Sawa'u b̄a nggahi ndedena, Sia teina d̄i siad̄oho rima ro loko-Na. Wakatu edana Ruma, siad̄oho neo poda adena.

²¹Edempara nggahi Ruma Isa d̄i siad̄oho sakali wali, ”Salam taho ra ntai d̄i ru'u b̄a nggomid̄oho. B̄une Ama ma ranggadu Nahu, ndede rau Nahu manggaduna nggomid̄oho.”

²²Edempara Sia ufina nawa-Na d̄i siad̄oho ro nggahina, ”Tarima aopu Roh Allah.

²³ Nggara nggomid̄oho kangampu weamu dosa sab̄ua-b̄ua dou, Ruma Hatalla rau makangampu weana. Nggomid̄oho nggara watisi kangampu weamu dosa sab̄ua-b̄ua dou, Ruma Hatalla rau wati d̄imakangampu weana sia.

²⁴Tomas (d̄ipehekai la ”Ndua”), sab̄ua dou d̄i ade weki sampuru d̄ua anamori Ruma Isa, wati warana ta ede sama-sama lab̄o ma kalaina wakatu mai Ruma Isa.

²⁵Ndad̄i anamori Ruma Isa ma kalaina manggahi d̄i la Tomas, ”Nami wa'ura edamu Ruma!” Pala cambe b̄a la Tomas, ”Nggara watipusi eda b̄a nahu ra'a paku d̄i rima-Na, watipusi tau b̄a nahu kanggeku d̄i rara'a suwu ede ro watipu tauku rima d̄i loko-Na, wati pehe nahu d̄ima'imbi.”

²⁶Saminggu sawa'u b̄a ede anamori Ruma Isa wara wali d̄i hid̄i ede, ro la Tomas wara rau ta ede. Sara'a tad̄a rakunci. Pala Ruma Isa mai ro kid̄ina d̄i woha siad̄oho, edempara nggahina, ”Salam taho ra ntai d̄i ru'u b̄a nggomid̄oho.”

²⁷Edempara nggahi Ruma Isa d̄i la Tomas, ”Tiopu rima Nahu, ro taupu kanggemu ta ake. D̄alapu rimamu ro taupu d̄i loko Nahu. Aina mbali mbua wali ademu, pala imbipura!”

²⁸Nggahi la Tomas d̄i Ruma Isa, ”Io Ruma Hatalla, Rumaku!”

²⁹Ndad̄i nggahi Ruma Isa d̄i sia, ”Nggomi imbimu b̄ara wa'ura edamu Nahu Taho ra ntika dou ma imbi konena da'eda Nahu!”

³⁰Mbuipu mboto walina lampa rawi mab̄isa ra guna makalaina rakarawi b̄a Ruma Isa d̄i tando anamorid̄oho-Na, pala wati ratunti d̄i ade buku ake.

³¹Pala sara'ana ake ratunti, loakud̄u nggomid̄oho imbimu b̄a one Ruma Isa eded̄u Sangaji Mambei salama, Ana Ruma Hatalla, ro b̄ara imbi d̄i Sia, nggomid̄oho rakakaimu mori.