Read Bima YAHYA 21 Bible Online

YAHYA 21 - Bima bible

YAHYA 21

¹Sawa'u b̄a ede Ruma Isa katadana weki-Na sakali wali d̄i Ndano Tiberias d̄i anamorid̄oho-Na. Ndakeku ndad̄ina:

²D̄isab̄ua ainaina la Simon Petrus, la Tomas d̄ipehekai la Ndua, la Natanael dou Kana d̄i Galilea, ana-ana la Zebedus, ro d̄ua dou anamori Ruma Isa ma kalaina, wunga kab̄oro weki.

³ Nggahi la Simon Petrus d̄imakalaina, ”Nahu kane'e lao wa'u uta.” ”Nami b̄atuja,” nggahi siad̄oho d̄i sia. Edempara siad̄oho lao nentena sampa. Pala sab̄ala ai ede siad̄oho wati rakana au-au.

⁴Wakatu wontu liro, Ruma Isa kid̄i d̄i kengge ndano, pala siad̄oho wati b̄adena b̄a one ede Ruma Isa.

⁵Nggahi Ruma Isa d̄i siad̄oho, ”Anad̄oho, sab̄ua nggomid̄oho wara ntaumu uta?” ”Io watita,” cambe b̄a siad̄oho.

⁶ Nggahi Ruma Isa d̄i siad̄oho, ”Wurapu alamu d̄i sab̄ae wana sampa, peasi nggomid̄oho d̄imaraka uta.” Edempara wura b̄a siad̄oho ala ede, pala wati wa'una hinti mbali b̄ara mboto poda uta tad̄eina.

⁷Nggahi b̄a anamori rameci ra ca'u b̄a Ruma Isa d̄i la Petrus, ”Aka Ruma!” Wakatu ringa b̄a la Simon Petrus b̄a one ede Ruma, sia kanina b̄ajuna (b̄ara sia wati kanina b̄aju) edempara nggoncuna ade oi.

⁸Anamori ma kalaina lampa b̄atuna lao aka kengge ndano kai sampa, ro hinti salahona ala mab̄ini b̄a uta. Siad̄oho wati ipi d̄o'ona lab̄o kengge ndano, kira-kira saratu metempa.

⁹Wakatu siad̄oho londona d̄i sampa, siad̄oho wara edana kama'a afi ro uta ta esena ro roti.

¹⁰Nggahi Ruma Isa d̄i siad̄oho, ”Mai wa'ajapu ta ake pila-pila tembe uta rab̄oupura wa'u b̄a nggomid̄oho.”

¹¹La Simon Petrus ne'ena ese sampa, edempara hinti wa'ana ala d̄ikenggena. Ala ede b̄ini b̄a uta ma na'e-na'e; sara'ana wara saratu lima mpuru tolu tembe. Ro konena mboto ede, alana wati ncipana.

¹²Nggahi Ruma Isa d̄i siad̄oho, ”Mai ngahara.” Wati kone sab̄ua dou d̄i ade anamori-Na madisa sod̄i, ”Ita cou?” B̄ara siad̄oho nab̄adeku b̄a one Sia ede Ruma.

¹³Edempara Ruma Isa mai d̄enina d̄i siad̄oho, wehana roti ede, ro mbeina d̄i siad̄oho. Sia karawina b̄une ede rau kai uta ede.

¹⁴Akeku katolu kalikaina Ruma Isa katadana weki-Na d̄i anamorid̄oho-Na sawa'u b̄a Sia mori mbali rad̄i made-Na.

¹⁵Sawa'u b̄a nggori ngaha siad̄oho, nggahi Ruma Isa d̄i la Simon Petrus, ”Simon, ana la Yona, sab̄ua nggomi ma'ipi meci ra ca'u Nahu ntewi kaisi d̄i siad̄oho ake mameci ra ca'una Nahu?” ”Poda, Ruma,” cambe b̄a la Petrus, ”Ruma mab̄ade b̄a one mada mameci ra ca'u Ruma.” Nggahi Ruma Isa d̄i sia, ”Ntadi katahopu ana-ana jimba-Ku.”

¹⁶Kad̄ua kalikaina sod̄i b̄a Ruma Isa d̄i sia, ”Simon ana la Yona, sab̄uana poda nggomi mameci ra ca'u Nahu?” ”Poda, Ruma,” cambe b̄a la Petrus, ”Ruma mab̄ade mada mameci ra ca'u Ruma.” Nggahi Ruma Isa d̄i sia, ”Ntadi jaga katahopu jimba-jimba-Ku.”

¹⁷Katolu kalikaina nggahi Ruma Isa d̄i sia, ”Simon ana la Yona, sab̄ua napoda nggomi mameci ra ca'u Nahu?” La Petrus ndad̄i lalai adena b̄ara Ruma Isa sod̄ina d̄i sia sampe tolu kali. Ndad̄i cambe wali b̄a la Petrus, ”Ruma, Ruma mab̄ade sara'ana. Ruma mab̄ade mada mameci ra ca'u Ruma!” Edempara nggahi Ruma Isa d̄i sia, ”Ntadi jaga katahopu jimba-jimba-Ku.

¹⁸Ncihi poda nggahi Nahu ake: Wakatu nggomi mbuipu tenggomu, ndai nggomi mahereku rokamu, ro lao b̄era ne'e ndaimu. Pala nggara nggomi mawa'usi tua pea, nggomi d̄ima'ala rimamu, ro dou makalai ma d̄iki nggomi ro mawa'a nggomi tab̄era dane'e kai b̄a nggomi.” (

¹⁹Kai nggahi ra eli ndedena Ruma Isa katadana b̄uneku la Petrus madena peasi d̄imakad̄ese ra kantasana Ruma Hatalla.) Sawa'u b̄a ede nggahi Ruma Isa d̄i la Petrus, ”B̄atupu Nahu!”

²⁰ Wakatu tambari la Petrus, sia edana d̄i kontuna anamori rameci ra ca'u b̄a Ruma Isa. (Sia edeku ma doho d̄eni lab̄o Ruma Isa aipu wakatu ngaha ro masod̄i d̄i Sia, ”Ruma, couku d̄imad̄onggo Ruma d̄i dou-dou mamusu Ruma?”)

²¹Edana sia, sod̄i b̄a Petrus d̄i Ruma Isa, ”Ruma, b̄uneku sia ake?”

²²Cambe b̄a Ruma Isa, ”Misampara ne'esi b̄a Nahu sia ngge'empa morina sampe mai wali kai Nahu, ede laina urusa nggomi. Pala nggomi b̄atupu Nahu!”

²³Ndad̄i mboura haba d̄i ade woha anamori Ruma Isa b̄a one anamori masab̄ua ede wati d̄imamade. Sapodakaina Ruma Isa wati nggahina b̄a one anamori masab̄ua ede wati d̄imamade, malaisi: ”Misampara ne'e b̄a Nahu sia mori sampe mai wali kai Nahu, ede laina urusa nggomi.”

²⁴Anamori ma'edeku ma mbei nuntu ra nggahi mab̄oha mandad̄i ake. Sia rauku ma wa'ura tuntina. Ro ndai b̄adeta b̄a one aura nggahina ede napodaku.

²⁵Mbuipu mbotona lampa rawi makalaina rakarawi b̄a Ruma Isa. Misampara sara'ana ede ratunti sab̄ua-b̄ua, iu b̄a nahu wati wara hid̄ina d̄i sara'a dunia d̄i wi'i kai sara'a buku ma d̄itunti ede.