Read Bima YAHYA 3 Bible Online

YAHYA 3 - Bima bible

YAHYA 3

¹Wara sab̄ua dou mana'ekai agama d̄i ade kalompo dou Farisi ngarana la Nikodemus.

²D̄isab̄ua aimangad̄i sia mai rakana Ruma Isa ro nggahina, ”Pa Guru, madad̄oho b̄ade Ita ranggadu b̄a Ruma Hatalla. B̄ara wati wara sab̄ua dou rau maloa karawi mab̄isa ra guna b̄une rakarawi b̄a Ita, nggara watisi sia rad̄ende ra wa'a b̄a Ruma Hatalla.”

³Cambe b̄a Ruma Isa, ”Imbipu, wati kone sab̄ua dou rau maloa ndad̄i anggota ela Karaja'an Allah, nggara sia watisi d̄i nggana mbali.”

⁴”B̄uneku loana dou mana'e d̄i nggana mbali?” nggahi Nikodemus d̄i Ruma Isa. ”Sab̄ua loaku sia lu'u mbali ade loko inana wa'u b̄a ede d̄i nggana mbali?”

⁵Cambe b̄a Ruma Isa, ”Nancihi poda nggahi Nahu ake: nggara watisi dou d̄i nggana rad̄i oi ro rad̄i Roh Allah, dou ede wati loana ndad̄i anggota ela Karaja'an Allah.

⁶Manusia sacara sarumbu kasana ranggana b̄a dou matuana, pala sacara ade rohani ranggana b̄a Roh Allah.

⁷Aina mbora akamu nggara nggahisi b̄a Nahu: Nggomid̄oho sara'ana pab̄uaku d̄i nggana mbali.

⁸Angi nangemo tab̄era ne'ena; ndai maringa elina, pala wati b̄adeta ratab̄ena maikaina ro tab̄eku laokaina. Ndede rauja lab̄o dou ranggana b̄a Roh Allah.”

⁹”B̄uneku loana ndad̄i lampa rawi ede?” sod̄i b̄a Nikodemus.

¹⁰Cambe b̄a Ruma Isa, ”Nggomi guru d̄i Israel; sab̄ua poda nggomi wati b̄ademu?

¹¹Imbipu: nami nuntu ra nggahimu au rab̄ade b̄a namimpa, ro nami mbeimu nuntu ra nggahi au rawa'u b̄a nami mpa; pala nggomid̄oho wati ngawamu tarima au rangoa b̄a nami.

¹²Nggomid̄oho wati imbimu nggara caritasi b̄a Nahu mab̄oha lampa rawi rad̄i dunia ake; b̄uneku loamu imbi b̄a nggomid̄oho, nggara ngoasi b̄a Nahu d̄i nggomid̄oho lampa rawi mab̄oha saroga?

¹³Wati kone sab̄ua dou maparana ne'e ese saroga, selasi Sia ma londo d̄i dunia, eded̄u Ana Manusia.

¹⁴ Sama b̄une la Musa makane'e sawa romba d̄i salona haju d̄i so sarae, ndede rauja Ana Manusia pab̄uaku d̄i kane'e,

¹⁵loakud̄u samenana nggomid̄oho ma imbi d̄i Sia maraka mori masapodakaina ro ma'ederahid̄i.”

¹⁶B̄ara Ruma Hatalla ndede meci ra ca'una manusia d̄i dunia ake, ndad̄ina Sia mbeina Ana-Na ma kese weki, loakud̄u sanikina dou ma imbi d̄i Sia wati iha lelina, malaisi d̄imaraka mori masapodakaina ro ma'ederahid̄i.

¹⁷B̄ara Ruma Hatalla nggaduna Ana-Na laina d̄imaparesa ncihi ra ncara dunia ake, pala d̄imakasalamana.

¹⁸Dou ma imbi d̄i Sia wati d̄i hukum. Pala dou ma wati imbi wa'ura hukum b̄a Ruma Hatalla, b̄ara sia wati imbina d̄i Ana Ruma Hatalla ma kese weki.

¹⁹Sia rada'awa kai dasa ake: Taroa ede wa'ura maina d̄i dunia, pala manusia nancewi ca'uku d̄imarindi ntewi kaisi lab̄o taroa, b̄ara ruku ra rawi siad̄oho madab̄ae.

²⁰Sanikina dou ma karawi madab̄ae, nadaca'u d̄i taroa; sia wati ngawana mai d̄i taroa, loakud̄u ruku ra rawina ma dab̄ae wati tadana.

²¹Pala dou ma karawi rakane'ekai b̄a Ruma Hatalla, maina d̄i taroa loakud̄u ndad̄i tadana b̄a one au rakarawina ede eded̄u rakane'e Ruma Hatalla.

²²Sawa'u b̄a ede Ruma Isa ro anamorid̄oho-Na lao aka Yudea. Sia ngge'ena ta aka pila-pila wakatu ntoina lab̄o siad̄oho ro kandeu karasona dou.

²³ Wakatu ede la Yahya watipu lu'una d̄i ade uma bui. Sia kandeu karasona dou d̄i Ainon, wati d̄o'ona lab̄o Salim, b̄ara ta aka wara mboto oi. Dou-dou mamai d̄i sia, ro sia kandeu karasona siad̄oho.

²⁵Pila-pila dou anamori la Yahya tampu'u cence ncihi lab̄o dou Yahudi mab̄oha atora karaso sarumbu.

²⁶Siad̄oho laona d̄i la Yahya, ro nggahina, ”Pa Guru, sab̄ua mbuipu kawara b̄a Ita dou ma sama lab̄o Ita d̄i ipa b̄ae b̄a Sori Yordan ede, raturu tei b̄a Ita d̄i madad̄oho ntoina? Sia ake nakandeu karaso rauku, ro sara'ana dou nalao rakaku Sia!”

²⁷Cambe b̄a la Yahya, ”Manusia wati loana ntau au-au nggara watisi rambei b̄a Ruma Hatalla d̄i sia.

²⁸ Ndai nggomid̄oho wa'ura ringamu nggahi nahu, ’Nahu laina Sangaji Mambei salama. Nahu ranggadu ulu ntewi kaisi lab̄o Sia.’

²⁹B̄unti siwe eded̄u ntau b̄unti mone. Soba b̄unti mone ede nakid̄i dampimpa ro nakade'eku, ro naneo adena nggara naringasi eli b̄unti mone. Ndede rauja lab̄o nahu. Ake nahu neo poda adeku.

³⁰Siaku ma pab̄ua naha penti, ro nahu nanaha kura penti.”

³¹Ma ramai ese mai nancewi eseku d̄i sara'ana. Ma ramai d̄i dunia lu'u golonga dou dunia, ro nuntu ra nggahi mab̄oha lampa rawi dunia. Sia ma ramai ese mai nancewi na'e d̄i sara'ana.

³²Sia nuntu ra nggahina mab̄oha au rawa'u ra'eda ro ringa-Na, pala wati kone sab̄ua dou ma'imbi d̄i nggahi ra eli-Na.

³³Dou ma imbi d̄i nuntu ra nggahi-Na ede, namangakuku b̄a one Ruma Hatalla mancihi.

³⁴B̄ara dou ranggadu b̄a Ruma Hatalla nakaronggaku nggahi ra eli Ruma Hatalla, b̄ara Ruma Hatalla wa'ura mbei kancihina Roh-Na d̄i sia.

³⁵ Ama nameci ra ca'uku Ana-Na, ro wa'ura d̄onggo ra mbeina sara'a kuasa d̄i Sia.

³⁶Dou ma imbi d̄i Ana ede d̄imaraka mori masapodakaina ro ma'ederahid̄i. Pala dou ma wati to'a d̄i Ana ede wati d̄imaraka mori. Sia d̄i hukum b̄a Ruma Hatalla santoi-ntoina.