Read Bima YAHYA 4 Bible Online

YAHYA 4 - Bima bible

YAHYA 4

¹Dou-dou Farisi ringana b̄a one Ruma Isa rakana ro kandeu karasona dou mancewi mboto mab̄atu Sia ntewi kaisi lab̄o la Yahya. (

²Sapodakaina ndai Ruma Isa wati kandeu karasona malaisi anamorid̄oho-Na mpa.)

³Wakatu b̄ade b̄a Ruma Isa b̄a one dou-dou Farisi wa'ura ringana lampa rawi ede, Sia tu'u wi'ina Yudea lao mbali aka Galilea.

⁴D̄i ade lampa ra laokaina ede Sia pab̄uaku lampa saina Samaria.

⁵ Ndad̄i ronggara Ruma Isa d̄i sab̄ua kota d̄i Samaria ma ngara Sikhar, wati d̄o'ona lab̄o dana rambei b̄a la Yakub ntoina d̄i la Yusuf anana.

⁶Ta ede wara temba la Yakub. Ruma Isa na'ipiku makina b̄ara lampana, b̄ara ndedena Sia doho d̄i kengge temba. Wakatu ede kira-kira b̄oe sampuru d̄ua aimarai,

⁷ro anamori Ruma Isa wa'ura lao aka kota d̄i welikaina ngaha ra nono. Edempara sab̄ua dou siwe Samaria mai timba oi. Nggahi Ruma Isa d̄i sia, ”Ama ncawa, loa Nahu raho oi nono?”

⁸

⁹ Cambe b̄a dou siwe Samaria ede, ”Ita dou Yahudi, mada dou Samaria; b̄ab̄auku Ita rahokaimu oi nono d̄i mada?” (B̄ara dou Yahudi wati wara d̄apo angina lab̄o dou Samaria.)

¹⁰Cambe b̄a Ruma Isa, ”Pai mab̄ade b̄a nggomi rambei b̄a Ruma Hatalla ro cou maraho nono d̄i nggomi, pasti ndai nggomi d̄imaraho nono d̄i Sia, ro Sia d̄imambei d̄i nggomi oi mamori.”

¹¹Nggahi dou siwe ede, ”Ita wati ntauta b̄oru, ro temba ake na'ipiku d̄eina. Ratab̄e Ita rakakaimu oi mambei mori?

¹²Yakub, ama wa'i ra waro madad̄oho, mambeina madad̄oho temba ake. Ndai sia rau weha oi d̄i nonona ta ake; ndede rauja anad̄ohona ro binata ntadina. Sab̄ua kacai b̄a Ita, Ita mancewi na'e ntewi kaisi lab̄o Yakub?”

¹³”Dou ma nono oi ake d̄imamango wo'o wali,” nggahi Ruma Isa,

¹⁴”pala dou ma nono oi d̄i mbei b̄a Nahu, wati d̄imamango wo'o wali santoi-ntoina. B̄ara oi d̄imbei b̄a Nahu ede d̄imandad̄i mada oi d̄i ade sarumbuna ma sambura losa ro mambei d̄i sia mori masapodakaina ro ma'ederahid̄i.”

¹⁵Nggahi dou siwe ede, ”Ruma, tambei to'ipu mada oi ede, loakud̄u mada wati d̄imamango wo'o wali; ro wati paralu walina mai ta ake d̄i wehakaiku oi.”

¹⁶”Laora, oupu rahimu, edempara dula mbalipu ta ake,” nggahi Ruma Isa.

¹⁷”Mada wati ntauku rahi,” cambe b̄a dou siwe ede. Ncihi romo nggahimu,” nggahi Ruma Isa.

¹⁸”B̄ara nggomi wa'ura nikamu lima kali, ro dou mone ma mori sama lab̄omu ake laina rahimu.”

¹⁹”Ake mada wa'ura b̄adeku Ita sab̄ua dou nabi,” nggahi dou siwe ede.

²⁰Wa'i ra waro madad̄oho manemba Ruma Hatalla d̄i doro to'i ake, pala bangsa Ita manggahi b̄a one d̄i Yerusalem mpa hid̄ina dou manemba Ruma Hatalla.”

²¹”Imbipu,” nggahi Ruma Isa d̄i sia, ”d̄i sab̄ua wakatu dou d̄imanemba Ama, lai walina d̄i doro to'i ake, ro lai rauna d̄i Yerusalem.

²²Nggomid̄oho dou Samaria nembamu ma wati pata b̄a nggomid̄oho, pala nami dou Yahudi manembaku Sia rapata b̄a nami, b̄ara salamakai ramaina rad̄i dou Yahudi.

²³Pala wakatuna d̄imamai, mala wa'ura mai, b̄a one kai kuasa Roh Allah dou-dou d̄imanemba Ama kai Ruma Hatalla ma poda b̄une rakane'e b̄a Ama.

²⁴B̄ara Ruma Hatalla ede Roh, ro kai kuasa Roh Allah mpoampa dou-dou laona nemba Ama b̄une rakane'ekai-Na.”

²⁵Nggahi dou siwe ede d̄i Ruma Isa, ”Mada b̄ade Sangaji Mambei salama (d̄ipehekai Al Masih) d̄imamai. Nggara namaisi Sia, Sia nangoa sara'aku d̄i ndaita.”

²⁶”Nahuku Sia,” nggahi Ruma Isa, ”Nahu ma wunga nuntu ra nggahi lab̄o nggomi ake.”

²⁷Wakatu ede wontu anamori Ruma Isa. Siad̄oho mbora akana edana Ruma Isa manuntu ra nggahi lab̄o dou siwe. Pala wati kone sab̄ua dou d̄i ade weki siad̄oho masod̄i d̄i dou siwe ede, ”Ina au paraluta?” atao masod̄i d̄i Ruma Isa, ”B̄ab̄au Ita nuntu ra nggahimu lab̄o dou siwe ede?”

²⁸Edempara dou siwe ede tu'u wi'ina roana ta ede edempara laona aka kota ro nggahina d̄i dou-dou ta aka,

²⁹”Mai tiopu dou ma rangoa d̄i nahu sara'ana rakarawi b̄a nahu. Sab̄ua napodaku Sia ede Sangaji Mambei salama?”

³⁰Ndad̄i dou-dou ede tu'u wi'ina kota edempara laona d̄i Ruma Isa.

³¹Wunga wakatu ede anamori Ruma Isa recena ngaha Ruma Isa. ”Pa Guru,” nggahi siad̄oho, ”santab̄eta takatenggora weki.”

³²Pala cambe b̄a Ruma Isa, ”Wara ngaha ra nono d̄i Nahu, ma wati b̄ade b̄a nggomid̄oho.”

³³Ndad̄i anamorid̄oho-Na tampu'u sod̄i-sod̄i d̄i angi ndaid̄ohona, ”Sab̄ua wara dou mawa'a ngaha ra nono d̄i ru'u b̄a Sia?”

³⁴Edempara nggahi Ruma Isa, ”Ngaha ra nono Nahu eded̄u b̄atu rakane'e b̄a Sia ma ranggadu Nahu, ro makanggori karawi rad̄onggo-Na d̄i Nahu.

³⁵Nggomid̄oho nggahimu, ’Upa wura walipu oru pako.’ Pala Nahu manggahi d̄i nggomid̄oho: Tio kab̄aepu oma-oma ma wa'ura monca, sadia d̄ipako!

³⁶Dou ma pako wa'ura tampu'u tarima ao ufana ro kab̄orona hasi d̄i mori masapodakaina ro ma'ederahid̄i. Ndad̄i dou ma pari d̄ei ro dou ma pako loa kad̄ihi ade sama-sama.

³⁷Ncihi nggahi peribahasa ake, ’Ma sab̄ua manggud̄a, ma kalaina mapako.’

³⁸Nahu makau nggomid̄oho lao pako d̄i oma ma watira karawi b̄a nggomid̄oho; dou makalai wa'ura karawi ta aka, ro nggomid̄oho matarima laba rad̄i karawikai siad̄oho.”

³⁹Mboto dou Samaria ela ra dou kota ede ma'imbi d̄i Ruma Isa, b̄ara nggahi dou siwe ede, ”Sia manggahina d̄i nahu sara'a rakarawi b̄a nahu.”

⁴⁰Ndad̄i wakatu dou-dou Samaria ede eda angina lab̄o Ruma Isa, siad̄oho raho kapodana loakud̄u Sia ngge'e lab̄o siad̄oho. Ndad̄i Ruma Isa nge'e ta ede d̄ua nai ntoina.

⁴¹Edempara ncewi mboto wali dou ma'imbi d̄i Ruma Isa b̄ara au rangoa ra tei b̄a ndai Sia d̄i siad̄oho.

⁴²Siad̄oho nggahina d̄i dou siwe ede, ”Nami ma'imbira ake, laina b̄ara ngoa au rangoa b̄a nggomi d̄i nami, pala b̄ara ndai nami wa'ura ringamu d̄i Sia, ro b̄ademu b̄a one poda Sia Mambei salama dunia.”

⁴³Sawa'u b̄a d̄ua nai ngge'ena d̄i Sikhar, Ruma Isa lao aka Galilea.

⁴⁴ Ndai Ruma Isa nawa'ura nggahi, ”Sab̄ua dou nabi wati horoma b̄a dou d̄i dana ra rasa ndaina.”

⁴⁵ Pala wakatu Sia rongga d̄i Galilea, dou-dou ta aka weha aona Sia kai sana ade, b̄ara siad̄oho wara d̄i Yerusalem wakatu Ainaina Aruraja Paskah, ro wa'ura eda sara'ana rakarawi b̄a Ruma Isa.

⁴⁶ Edempara Ruma Isa dula mbali aka Kana d̄i Galilea, tab̄era Sia parana rungkana oi ndad̄i anggo. D̄i kota ede wara sab̄ua dou mab̄ora pamarenta, anana mawunga supu d̄i Kapernaum.

⁴⁷Wakatu ringa b̄a sia b̄a one Ruma Isa wa'ura mai d̄i Galilea ra'aka Yudea, sia lao rakana Ruma Isa ro rahona d̄i Ruma Isa mai d̄i Kapernaum d̄imakataho wea anana ma ne'era made.

⁴⁸Nggahi Ruma Isa d̄i dou mab̄ora pamarenta ede, ”Nggara watisi eda b̄a nggomid̄oho rawi mab̄isa ra guna, nggomid̄oho wati imbimu.”

⁴⁹”Ruma,” cambe b̄a dou mab̄ora pamarenta ede, ”ta mai roci to'ipu sawatipu ana mada madena.”

⁵⁰Nggahi Ruma Isa d̄i sia, ”Laora anamu wa'ura taho.” Dou ede na'imbiku d̄i nggahi ra eli Ruma Isa, edempara sia laona.

⁵¹D̄iwoha ncai, adad̄ohona mai d̄i sia ro ngoa ra kahabana, ”Ana Ita wa'ura taho.”

⁵²Edempara sod̄i b̄a sia d̄i siad̄oho b̄oe pila ana dou ede tampu'u tahona. Cambe b̄a siad̄oho, ”Awina kira-kira b̄oe sab̄ua aimarai mbora henggena.”

⁵³Edempara ama ana dou ede kawarana b̄a one wakatu ede Ruma Isa manggahi d̄i sia, ”Anamu wa'ura taho.” Ndad̄i sia ro samenana iwa ra wekina imbi d̄i Ruma Isa.

⁵⁴Edeku rawi mab̄isa ra guna makad̄uakalikaina rakarawi b̄a Ruma Isa d̄i Galilea sawa'u b̄a Sia maina rad̄i Yudea.