Read Bima YAHYA 5 Bible Online

YAHYA 5 - Bima bible

YAHYA 5

¹Sawa'u b̄a ede wara ndiha Yahudi, edempara Ruma Isa lao aka Yerusalem.

²D̄i Yerusalem d̄eni lab̄o ”Tad̄a Jimba” wara sab̄ua kolam, ade bahasa Ibrani tangarakai Betesda. Ta ede wara lima mbua rasatampa.

³D̄ihid̄i rasatampa-satampa ede wara mboto dou masupu mamaru ndore; wara ma mbuda, wara ma mpako ra mpedu, wara ma made b̄inci. [Siad̄oho sara'ana nangenaku kanggab̄o oi d̄i kolam ede.

⁴B̄ara wara sakali-sakali mala'eka Ruma londo d̄i kolam ede ro kab̄ona oi. Ro dou masupu ma sarambakaina lu'u d̄i ade kolam ede wakatu kanggab̄o oi d̄imataho sara'a au rasupuna.]

⁵D̄ihid̄i ede wara sab̄ua dou mone ma wa'ura supu tolumpuru waru mba'a ntoina.

⁶Eda b̄a Ruma Isa sia maru ndorena ta aka, ro nab̄adeku b̄a one sia wa'ura ntoi poda supuna; ndad̄i sod̄i b̄a Ruma Isa d̄i sia, ”Sab̄ua mane'e taho nggomi?”

⁷Cambe b̄a dou masupu ede, ”Pa, wati wara dou ta ake d̄imakalu'u mada ade kolam wunga kanggab̄o oina. Ro wunga mada lao aka kolam, dou makalai wa'ura lu'u ulu.”

⁸Edempara nggahi Ruma Isa d̄i sia, ”Tu'ura, hantapu dipimu ro lampara.”

⁹Wunga ede wa'u dou ede tahona. Sia hantana dipi ro lampana. Lampa rawi ede ndad̄ina d̄i ainaina Sabat.

¹⁰ B̄ara ndedena dou-dou mana'ekai Yahudi manggahi d̄i dou ma b̄oupura taho ede, ”Ainaina ake ainaina Sabat. Nggomi wati loamu hanta dipimu.”

¹¹Pala cambe b̄a dou ede, ”Dou ma rakataho mada akana makau mada hanta dipi mada ro lampa.”

¹²”Cousi Sia ma kau nggomi hanta dipi ro lampa?” sod̄i b̄a siad̄oho.

¹³Pala dou ma wa'ura taho ede wati b̄adena douna, b̄ara Ruma Isa wa'ura mbora d̄i woha dou mamboto ede.

¹⁴Edempara Ruma Isa eda angina lab̄o dou ede ade Bait Allah, ro nggahina d̄i sia, ”Ake nggomi wa'ura taho. Aina karawimu dosa wali, b̄ab̄aina iumu lampa rawi ma ipi iha wali.”

¹⁵Ndad̄i dou ede laona edempara ngoana d̄i dou-dou mana'ekai Yahudi b̄a one Ruma Isa ma kataho wea supuna.

¹⁶Ro b̄ara ndedena siad̄oho tampu'u kasusana Ruma Isa, b̄ara Sia katahona dou masupu d̄i ainaina Sabat.

¹⁷Pala nggahi Ruma Isa d̄i siad̄oho, ”Ama-Ku nakarawi ncau sampe ake, ro Nahu karawi rau.”

¹⁸Nggahi ra eli ede nakandad̄iku dou-dou mana'ekai Yahudi naha ne'e hade Sia. Siad̄oho karawina ede, laina b̄ara sapa-Na atora agama mpoa mab̄oha ainaina Sabat, pala b̄ara nggahi rau Sia b̄a one Ruma Hatalla ede Ama-Na; aona Sia kasamana weki-Na lab̄o Ruma Hatalla.

¹⁹Cambe ndake b̄a Ruma Isa d̄i dou-dou ede, ”Imbipu, Ana wati loana karawi au-au kai kuasa ndai-Na. Sia karawina au ra'eda b̄a Sia karawi b̄a Ama-Na. B̄ara au rakarawi b̄a Ama, ede rauku d̄ikarawi b̄a Ana.

²⁰B̄ara Ama nameci ra ca'uku Ana ro katadana d̄i Sia sara'a rakarawi b̄a ndai-Na. Mala Ama d̄imakatada rau-Na ruku ra rawi ma ipi na'e wali, ndad̄ina mbora kai aka nggomid̄oho.

²¹Ama ede nakamori mbaliku dou mamade, ro mbeina d̄i siad̄oho mori masapodakaina ro ma'ederahid̄i; ndede rauja Ana mambei mori ma'ederahid̄i d̄i dou d̄ine'ekai b̄a Sia mbei mori.

²²Ndai Ama wati kancarana cou-cou rau. Sara'ana kuasa d̄i paresa kai ncihi ra ncara wa'ura d̄onggona d̄i Ana-Na.

²³Karawikai b̄a Ama ede loakud̄u samenana dou lia ra horomana Ana b̄une siad̄oho malia ra horomana d̄i Ama. Dou ma wati lia ra horoma Ana wati lia ra horoma rauna Ama ma ranggadu Ana.

²⁴Ncihi poda nggahi Nahu ake: Dou ma kade'e kab̄ae nggahi ra eli Nahu, ro na'imbiku d̄i Sia ma ranggadu Nahu, nantau mori masapodakaina ro ma'ederahid̄i. Sia wati d̄i hukum; sia wa'ura hori rad̄i madekaina ro narakaku mori ra woko.

²⁵Imbipu: d̄imamai wakatuna — mala wa'ura raka wakatuna — dou mamade d̄imaringa eli Ana Ruma Hatalla. Ro dou ma ringana d̄imamori.

²⁶B̄une ndai Ama fu'u mori, Sia kandad̄ina Ana-Na fu'u mori rau.

²⁷Sia wa'ura mbeina d̄i Ana-Na hak d̄i paresa ncihi ra ncara, b̄ara Sia Ana Manusia.

²⁸Aina mbora akamu nggomid̄oho ringamu lampa rawi ake, b̄a wakatuna d̄imamai b̄ara sara'ana dou ma wa'ura made naringaku eli-Na,

²⁹ edempara losana rad̄i ade rade. Dou ma wa'ura karawi mataho d̄imamori mbali ru'u mori. Pala dou ma wa'ura karawi madab̄ae d̄imamori mbali d̄i hukum.”

³⁰”Nahu wati loaku karawi au-au kai b̄a kane'e ndai-Ku. Nahu d̄imaparesa ncihi ra ncarampa b̄une rakaukai b̄a Ruma Hatalla. Ro au ranggahi b̄a Nahu adi, b̄ara Nahu wati b̄atu-Ku rakane'e b̄a ndai Nahu, malaisi rakane'e b̄a Ama ma ranggadu Nahu.

³¹Misampara Nahu manuntu ra nggahi mab̄oha weki ndai-Ku, nuntu ra nggahi ede wati loa d̄i imbi.

³²Pala wara dou makalai ma mbei sakasi mab̄oha Nahu, ro Nahu b̄ade b̄a one nuntu ra nggahina ede ncihi.

³³ Nggomid̄oho wa'ura nggadumu dou d̄i la Yahya, ro sia wa'ura mbeina sakasi ma poda mab̄oha Nahu.

³⁴Lampa rawi ede Nahu manggahi, laina b̄ara Nahu maparalu d̄i nuntu ra nggahi manusia, pala loakud̄u nggomid̄oho d̄ikasalama.

³⁵La Yahya ede b̄une ilo ma kalea ro makalosa taroana. D̄isamporo wakatu nggomid̄oho neo ademu tarima taroana ede.

³⁶Pala nuntu ra nggahi Nahu nancewi na'e ntewi kaisi d̄i nuntu ra nggahi la Yahya. Au rakarawi b̄a Nahu ake, eded̄u karawi rakaukai b̄a Ama d̄i Nahu, d̄i bukutikai b̄a one Ama mawa'ura nggadu Nahu.

³⁷ Ro Ama ma ranggadu Nahu mambei sakasi rau mab̄oha Nahu. Nggomid̄oho watipu ringamu eli-Na atao edamu pahu-Na.

³⁸Nggahi ra eli-Na wati rawi'imu d̄ei ademu b̄ara nggomid̄oho wati imbimu d̄i Nahu ranggadu-Na.

³⁹Nggomid̄oho tana'omu Alkitab b̄a kacaimu b̄ara kai caramu ede nggomid̄oho mantau mori masapodakaina ro ma'ederahid̄i. Ro Alkitab ede mambei sakasi mab̄oha Nahu.

⁴⁰Pala nggomid̄oho wati ngawamu mai d̄i Nahu d̄irakakaimu mori ma'ederahid̄i.

⁴¹Nahu wati ngupaku roi b̄a manusia.

⁴²Nahu kapataku Nggomid̄oho. Nahu b̄ade nggomid̄oho wati meci ra ca'umu Ruma Hatalla d̄ei ademu.

⁴³Nahu maiku kai kuasa Ama-Ku, pala nggomid̄oho wati tarima aomu Nahu. Pala maisi dou makalai mai kai kuasa ndaina, nggomid̄oho mangawaku tarima ao sia.

⁴⁴B̄uneku loa imbi b̄a nggomid̄oho, nggara nggomid̄oho ngupamu roi b̄a sasamamu manusia, ro wati usahamu ngupa roi rad̄i Ruma Hatalla ma Kese Weki?

⁴⁵Aina kacaimu Nahu d̄imakancara nggomid̄oho d̄i tando Ama. Justru d̄imakancarana nggomid̄oho eded̄u la Musa, sia ede rane'ekai b̄a nggomid̄oho.

⁴⁶Misakai nggomid̄oho imbimu d̄i la Musa, nggomid̄oho d̄ima'imbi d̄i Nahu, b̄ara mab̄oha Nahu sia tuntina.

⁴⁷Pala nggarasi nggomid̄oho wati imbimu d̄i au ratunti b̄a la Musa, b̄uneku loamu imbi b̄a nggomid̄oho d̄i au ranggahi b̄a Nahu?”