Read Bima YAHYA 6 Bible Online

YAHYA 6 - Bima bible

YAHYA 6

¹Pila-pila wakatu ntoina sawa'u b̄a ede Ruma Isa lao aka ipa b̄a b̄ae Ndano Galilea, d̄itangara kai rau Ndano Tiberias.

²Sawa'u b̄a ronggana ta aka, mboto dou b̄atu Sia b̄ara siad̄oho wa'ura edana karawi-Na mab̄isa ra guna kai katahona dou-dou masupu.

³Ruma Isa tekana doro to'i, edempara dohona ta ede lab̄o anamorid̄oho-Na.

⁴Wakatu ede wa'ura d̄enira Ainaina Aruraja Paskah Yahudi.

⁵Wakatu eda b̄a Ruma Isa d̄i kompe ra pei-Na, Sia edana dou ma'ipi poda mboto mamai raka Sia. Edempara nggahi Sia d̄i la Filipus, ”Tab̄eku ndai loakai weli d̄i ngaha ra nono, loakud̄u sara'ana dou ake loa ngaha?” (

⁶Ruma Isa wa'ura b̄ade auku d̄ikarawi-Na, pala nggahi ndedekai b̄a Sia b̄ara Sia nane'eku uji la Filipus.)

⁷Cambe b̄a la Filipus, ”Roti maco'i d̄ua ratu piti salaka wati d̄imancihi d̄i ru'u b̄a doud̄oho ake, kone sanikina dou raka sato'impa.”

⁸Sab̄ua dou anamori Ruma Isa ma kalaina, eded̄u la Andreas ari la Simon Petrus, manggahi,

⁹”Ta ake wara ana dou mone mawa'a lima mbua roti ro d̄ua tembe uta. Pala auku aona ede d̄i ru'u b̄a dou mamboto ake?”

¹⁰”Kaupu dou-dou ede doho,” nggahi Ruma Isa. D̄i hid̄i ede wara mboto mpori, ndad̄i dou-dou ede doho d̄i mpori — sara'ana wara kira-kira lima riwu dou mone.

¹¹Edempara Ruma Isa wehana roti ede, edempara rentana do'a syuku d̄i Ruma Hatalla. Sawa'u b̄a ede Sia cengga-cenggana roti ede d̄i dou mamboto. Edempara Sia cengga-cenggana uta ede, ro siad̄oho ngaha ra nonona sampe mbocu podakaina.

¹²Sawa'u b̄a siad̄oho ngaha sampe mbocuna, nggahi Ruma Isa d̄i anamorid̄oho-Na, ”Kab̄oropu mancewi ngaha ra nono ede ai to'ina wara rapaki.”

¹³Edempara siad̄oho kab̄orona sampuru d̄ua wonca b̄ini mancewi ngaha ra nono rad̄i lima mbua roti rangaha b̄a dou mamboto ede.

¹⁴Wakatu eda b̄a dou mamboto rawi mab̄isa ra guna rakarawi b̄a Ruma Isa, nggahi siad̄oho, ”Poda, akeku Nabi rasake ede rapamao mai d̄i dunia!”

¹⁵Ruma Isa nab̄adeku siad̄oho ngawakaina mai d̄i pakasakaina Ruma Isa d̄imandad̄i sangaji siad̄oho. B̄ara ndedena Sia lao pesona weki lao aka dana ra rasa doro to'i.

¹⁶Wunga ne'empara rindi ai, anamori Ruma Isa londo awa ndano.

¹⁷Edempara siad̄oho nentena sampa lao ipa b̄ae b̄a ndano ede nalao aka Kapernaum. Wa'ura rindi ai pala Ruma Isa watipu mai rakana siad̄oho.

¹⁸D̄iwakatu ede ndano natampu'ura na'e galo b̄ara angi na'e.

¹⁹Sawa'u b̄a loja kira-kira lima atao ini kilo mete, siad̄oho edana Ruma Isa mai rakana sampa kai lampana ese wawo oi. Siad̄oho na'ipiku dahuna.

²⁰Pala nggahi Ruma Isa d̄i siad̄oho, ”Aina dahu, ake Nahu!”

²¹Edempara kai sana adena siad̄oho tarima aona Sia lu'u ade sampa, ro wakatu ede wa'u sampa siad̄oho rongga aka hid̄i laokaina.

²²B̄ala aisanai dou mamboto ma mbuipu ngge'e d̄i ipa b̄ae ndano, kawarana weki b̄a one akana cuma wara sab̄ua sampampa ta aka. Siad̄oho b̄ade b̄a one anamori Ruma Isa wa'ura lao kai sampa ede, Ruma Isa wati b̄atuna.

²³Edempara pila-pila mbua sampa rad̄i kota Tiberias mai ro lab̄una d̄eni lab̄o hid̄i dou mamboto ede mangaha roti sawa'u b̄a rentana do'a syuku b̄a Ruma.

²⁴Wakatu eda b̄a dou mamboto ede b̄a one nataho Ruma Isa ro anamorid̄oho-Na watid̄u warana ta ede, siad̄oho rau ne'ena sampa-sampa ede ro laona aka Kapernaum ngupa Ruma Isa.

²⁵Wakatu dou-dou mamboto ede eda angi lab̄o Ruma Isa d̄i ipa b̄ae b̄a ndano, sod̄i b̄a siad̄oho d̄i Sia, ”Pa Guru, b̄une ai Ita rongga ta ake?”

²⁶Cambe b̄a Ruma Isa, ”Poda, nggomid̄oho ngupakaimu Nahu laina b̄ara nggomid̄oho loamu ka'ao rawi mab̄isa ra guna rakarawi b̄a Nahu, pala b̄ara nggomid̄oho wa'ura ngaha sampe mbocumu.

²⁷Aina karawi d̄irakakaimu ngaha ra nono ma loa mpoi ro mbai. Karawipu d̄irakakaimu ngaha ra nono ma wati loa mbai ro ma loa mbei mori masapodakaina ro ma'ederahid̄i. Ngaha ra nono ede d̄i mbei b̄a Ana Manusia d̄i nggomid̄oho, b̄ara Sia wa'ura hanta b̄a Ruma Hatalla, Ama-Na.”

²⁸Edempara sod̄i b̄a siad̄oho d̄i Sia, ”Auku d̄i pab̄ua karawi b̄a madad̄oho loakud̄u madad̄oho karawi rakane'e b̄a Ruma Hatalla?”

²⁹Cambe b̄a Ruma Isa, ”Akeku d̄i ne'e b̄a Ruma Hatalla d̄i nggomid̄oho: imbipu d̄i Sia ranggadu b̄a Ruma Hatalla.”

³⁰”Nggara ndedesi,” nggahi siad̄oho, ”auku bukutina d̄i mbei b̄a Ita loakud̄u madad̄oho eda ro imbi d̄i Ita? Auku d̄i karawi b̄a Ita?

³¹ Wa'i ra waro madad̄oho ngahana manna d̄i so sarae, b̄une ratunti d̄i ade Alkitab, ’Sia mbeina siad̄oho ngaha roti rad̄i saroga.’ ”

³²Edempara nggahi Ruma Isa d̄i siad̄oho, ”Imbipu: Laina la Musa malaisi Ama-Ku ma mbeina d̄i nggomid̄oho roti masapodakaina rad̄i saroga.

³³B̄ara roti rambei b̄a Ruma Hatalla eded̄u Sia ma ralondo ese saroga ro mambei mori d̄i ru'u b̄a manusia d̄i dunia.”

³⁴”Ama,” nggahi siad̄oho, ”mbei ntuwupu d̄i madad̄oho roti ede.”

³⁵”Nahura roti ma mbei mori,” nggahi Ruma Isa d̄i siad̄oho. ”Dou ma mai d̄i Nahu wati d̄imahid̄o wali santoi-ntoina. Ro dou ma imbi d̄i Nahu wati d̄imamango wo'o wali santoi-ntoina.

³⁶Pala b̄une ranggahi Nahu d̄i nggomid̄oho, konena nggomid̄oho wa'ura edamu Nahu, nggomid̄oho wati imbimu.

³⁷Samenana dou rambei b̄a Ama d̄i Nahu d̄imamai d̄i Nahu. Nahu wati tula aoku cou-cou ma mai d̄i Nahu.

³⁸B̄ara Nahu londoku rad̄i saroga, laina d̄imakarawi b̄era ne'e ndai-Ku, malaisi rakane'e b̄a Sia ma ranggadu Nahu.

³⁹Ro akeku rakane'e b̄a Sia ma ranggadu Nahu: loakud̄u rad̄i sara'ana dou rad̄onggo d̄i Nahu, wati kone sab̄ua dou rau mamoda; pala loakud̄u Nahu makamori mbali siad̄oho d̄i Ainaina Kiama.

⁴⁰Poda akeku rakane'e b̄a Ama Nahu: Loakud̄u sara'a ma ra'eda Ana ro imbina d̄i Sia ma ntau mori masapodakaina ro ma'ederahid̄i, ro Nahu d̄imakamori mbali wakatu Ainaina Kiama.”

⁴¹Dou-dou Yahudi tampu'u bada red̄e d̄i Ruma Isa, b̄ara nggahi Sia: ”Nahuku roti ma ralondo ese saroga.”

⁴²Nggahi siad̄oho, ”Sab̄ua laina ake Isa, ana la Yusuf? Nami mapataku ina ro ama-Na! B̄uneku loana Sia nggahi b̄a one Sia ralondona ese saroga?”

⁴³Edempara nggahi Ruma Isa d̄i siad̄oho, ”Aina bada red̄e.

⁴⁴Wati kone sab̄ua dou maloa mai d̄i Nahu, nggarasi Ama ma ranggadu Nahu, wati wa'ana sia d̄i Nahu; ro cou ma mai, d̄ikamori mbali b̄a Nahu d̄i Ainaina Kiama.

⁴⁵ D̄i ade Buku Nabi-nabi ratunti ndake: ’Sara'ana dou d̄i ngoa ra tei b̄a Ruma Hatalla.’ Ndad̄i sara'ana dou ma ringa Ama ro tana'ona d̄i Sia, maina d̄i Nahu.

⁴⁶Ede laina aona b̄a one wara dou ma wa'ura eda Ama. Cuma Sia ma ramai ta Ruma Hatalla, mawa'ura eda Ama.

⁴⁷D̄ib̄ademu: dou ma imbi, nantau mori masapodakaina ro ma'ederahid̄i.

⁴⁸Nahura roti ma mbei mori.

⁴⁹Wa'i ra waromu ngahana manna d̄i so sarae ro siad̄oho made rau.

⁵⁰Pala wati ndedena lab̄o roti ma londo rad̄i saroga; dou ma ngaha roti ede wati d̄imamade.

⁵¹Nahura roti ma londo rad̄i saroga — roti ma mbei mori. Dou ma ngaha roti ake d̄imamori santoi-ntoina. Roti d̄i mbei b̄a Nahu d̄i mori ra wokokai manusia d̄i dunia eded̄u hi'i Nahu.”

⁵²Ringana ede, dou-dou Yahudi cence ncihi angi ndaina. ”B̄uneku loana dou ake mbei hi'i-Na d̄i ngaha ndaita?” nggahi siad̄oho.

⁵³Edempara nggahi Ruma Isa d̄i siad̄oho, ”Imbipu: Nggarasi nggomid̄oho wati ngahamu hi'i Ana Manusia ro nonomu ra'a-Na, nggomid̄oho wati poda-poda d̄imamori.

⁵⁴Dou ma ngaha hi'i Nahu ro nono ra'a Nahu nantau mori masapodakaina ro ma'ederahid̄i ro Nahu d̄imakamori mbali siad̄oho d̄i Ainaina Kiama.

⁵⁵B̄ara hi'i Nahu poda-poda ngaha ra nono, ro ra'a Nahu poda-poda oi nono.

⁵⁶Dou ma ngaha hi'i Nahu ro manono ra'a Nahu, nangge'empa sab̄uana lab̄o Nahu, ro Nahu sab̄ua lab̄o sia.

⁵⁷Ama ma mori ede, ma ranggadu Nahu ro Nahu rau mori rad̄i Ama. Ndede rau ro dou ma ngaha hi'i Nahu d̄imamori rad̄i Nahu.

⁵⁸Akeku roti ma londo rad̄i saroga: laina roti b̄une ra ngaha b̄a wa'i ra waromu. B̄ara sawa'u b̄a ngahana roti ede, siad̄oho namade rau. Pala dou ma ngaha roti ake d̄imamori santoi-ntoina.”

⁵⁹Sara'ana ede nggahi b̄a Ruma Isa wakatu Sia ngoa ra tei-Na d̄i uma sambeakai d̄i Kapernaum.

⁶⁰Sawa'u b̄a ringana nggahi ra eli Ruma Isa ede, mboto d̄i ade weki anamorid̄oho-Na manggahi, ”Tana'o ake na'ipiku tanina. Couku ma wa'una tarima!”

⁶¹Ndai Ruma Isa nab̄adeku b̄a one anamorid̄oho-Na mabada red̄e mab̄oha lampa rawi ede. Ndad̄i nggahi Sia, ”Sab̄ua nggomid̄oho ma'iha ade b̄ara nuntu ra nggahi ede?

⁶²B̄uneku ndad̄ina peasi nggara edasi b̄a nggomid̄oho Ana Manusia ne'e mbalina d̄i hid̄i-Na masarambakaina?

⁶³Ma kandad̄ina manusia mori eded̄u Roh Allah. Tenggo ra wale manusia wati wara onena. Nggahi ra eli ranggahi b̄a Nahu d̄i nggomid̄oho ake eded̄u nggahi ra eli Roh Allah ro nggahi ra eli ma mbei mori.

⁶⁴Pala wara rau d̄i ade weki nggomid̄oho ma wati imbi.” (Ruma Isa wa'ura b̄adena d̄i ai saramba wa'una cou-cou ma wati ne'e imbi, ro couku d̄imad̄onggo Sia d̄i dou-dou ma musu-Na.)

⁶⁵Edempara nggahi wali Ruma Isa, ”b̄ara ndedena Nahu mangoana d̄i nggomid̄oho b̄a one wati kone sab̄ua dou maloa mai d̄i Nahu, nggara watisi rakane'e b̄a Ama.”

⁶⁶Tampu'u wakatu ede mboto dou mab̄atuna matu'u wi'i Sia, ro wati ngawa walina b̄atu Sia.

⁶⁷Edempara sod̄i b̄a Ruma Isa d̄i sampuru d̄ua anamorid̄oho-Na, ”Sab̄ua nggomid̄oho rau mane'e wi'i paki Nahu?”

⁶⁸ ”Ruma,” nggahi la Simon Petrus d̄i Sia, ”d̄i couku madad̄oho laokaimu? Nggahi ra eli Ruma mambei mori masapodakaina ro ma'ederahid̄i.

⁶⁹Madad̄oho wa'ura imbi poda-poda b̄a one Ruma dou maraso ranggadu b̄a Ruma Hatalla.”

⁷⁰Cambe b̄a Ruma Isa, ”Sab̄ua laina Nahu ma rakad̄ale nggomid̄oho sampuru d̄ua dou ake? Pala sab̄ua dou d̄i ade weki nggomid̄oho eded̄u seta!”

⁷¹Aona nggahi Ruma Isa eded̄u la Yudas ana la Simon Iskariot. B̄a konena la Yudas sab̄ua dou d̄i ade weki sampuru d̄ua dou anamori Ruma Isa, sia d̄imad̄onggo Ruma Isa d̄i dou-dou ma musu-Na.