Read Bima YAHYA 7 Bible Online

YAHYA 7 - Bima bible

YAHYA 7

¹Sawa'u b̄a ede Ruma Isa lao lampa rero-Na d̄i Galilea. Sia wati ngawana lao aka dana ra rasa Yudea b̄ara dou-dou mana'ekai Yahudi ta aka mane'e hade Sia.

² Wakatu ede wa'ura d̄eni Aruraja Pondok Daun.

³Ndad̄i nggahi arid̄oho-Na d̄i Ruma Isa, ”Tu'u wi'ipu hid̄i ake ro laopu aka Yudea, loakud̄u anamori-Mu na'eda rauku karawi-Mu.

⁴Wati wara dou d̄imacilina au rakarawina, nane'esi mbou ngarana. Nggara makarawisi b̄a Ita karawi b̄une ede, sara'a dunia pab̄uaku b̄adena!” (

⁵B̄ara ari-ari ndai-Na wati imbi rauna d̄i Sia.)

⁶”Watipu wakatuna d̄i ru'u b̄a Nahu,” nggahi Ruma Isa d̄i siad̄oho, ”pala d̄i ru'u b̄a nggomid̄oho, sanikina wakatu loa.

⁷Dunia ake wati lu'u b̄a aka da ca'una nggomid̄oho. Pala Nahu wati ca'u romo b̄a dunia, b̄ara Nahu maca'u nggahi d̄i dunia b̄a one ruku ra rawina madab̄ae.

⁸Laopu ndai nggomid̄oho aka ndihakai ede. Nahu wati laoku b̄ara watipu wakatuna d̄i ru'u b̄a Nahu.”

⁹Ndede nggahi Ruma Isa d̄i arid̄oho-Na, ro Sia ngge'e d̄i Galilea.

¹⁰Sawa'u b̄a lao arid̄oho-Na aka ndihakai ede, kai midi-midi Ruma Isa lao kesena wati wara dou mab̄adena.

¹¹Santoi ndiha ede, dou-dou mana'ekai Yahudi mangupa Sia ro sod̄i rerona, ”Tab̄eku Sia?”

¹²Mboto dou manuntu nari mab̄oha Sia. Wara ma nggahi: ”Sia dou nawancuku tahona.” Wara rauja ma nggahi: ”Wati! Sia nakasantuda mboto dou.”

¹³Pala wati kone sab̄ua dou madisa nggahi kana'e mab̄oha Sia b̄ara siad̄oho dahu d̄i dou-dou mana'ekai Yahudi.

¹⁴Wunga sama na'ekai ndiha, Ruma Isa lu'u ade Bait Allah, edempara tampu'una ngoa ra tei.

¹⁵Dou-dou mana'ekai Yahudi mbora poda akana ro nggahina, ”B̄uneku loana dou ake b̄ade mandede mboto, sapodakaina Sia wati paranana sakola?”

¹⁶Cambe b̄a Ruma Isa, ”Rangoa ra tei b̄a Nahu ake laina ngoa ra tei b̄a Nahu, pala ngoa ra tei b̄a Sia ma ranggadu Nahu.

¹⁷Dou ma ngawa b̄atu rakane'e Ruma Hatalla, d̄imab̄ade sab̄ua ngoa ra tei b̄a Nahu ramaina rad̄i Ruma Hatalla atao ramaina rad̄i ndai Nahu.

¹⁸Dou ma mbei ngoa ra tei ndaina nangupaku d̄i lia ra horomakai weki ndaina. Pala dou ma ngupa lia ra horoma d̄i ru'u b̄a Sia ma ranggaduna, dou ede rombo, wati wara kukukeko d̄i sia.

¹⁹Sab̄ua laina la Musa mawa'ura mbeina parenta-parenta Ruma Hatalla d̄i nggomid̄oho? Pala d̄i ade weki nggomid̄oho wati wara ma b̄atuna parenta-parenta ede. B̄ab̄auku nggomid̄oho ne'ekaimu hade Nahu?”

²⁰Cambe b̄a dou mamboto ede, ”Nggomi ringu! Cou mane'e hade Nggomi?”

²¹Cambe b̄a Ruma Isa, ”Sab̄uampa rawi rakarawi b̄a Nahu d̄i ainain Sabat, ro nggomid̄oho mbora mena akamu.

²² Mbei b̄a la Musa d̄i nggomid̄oho atora suna — konena suna ede sapodakaina wati ramaina rad̄i la Musa, pala ramaina d̄i wa'i ra waro sawatipu la Musa. B̄ara ndedena, d̄i ainaina Sabat rau nggomid̄oho mane'eku suna dou.

²³ Makarawisi ede b̄a nggomid̄oho b̄ab̄aina sapamu atora la Musa mab̄oha suna, b̄ab̄au nggomid̄oho mbanimu d̄i Nahu b̄ara kataho b̄a Nahu weki dou sara'ana d̄i ainaina Sabat?

²⁴Aina kancaramu dou b̄ara dasa ma tada, pala b̄ara kai dasa ma'adi.”

²⁵Edempara wara pila-pila dou Yerusalem manggahi, ”Sab̄ua laina dou akesi rangupa rero d̄i ne'e hade?

²⁶Tio Sia nuntu ra nggahina d̄i tando dou mamboto kai wati wara dou mahakona, ro wati wara dou ma nggahi au-au d̄i Sia! Sab̄ua dou-dou mana'ekai ndaita wa'ura kawarana weki b̄a one Sia ake Sangaji Mambei salama?

²⁷Pala namaisi Sangaji Mambei salama ede, wati kone sab̄ua dou mab̄ade ratab̄e maikai-Na! Sapodakaina ndai wa'ura b̄adeta rad̄i b̄ena dou ake.”

²⁸Edempara, Ruma Isa wunga ngoa ra teina d̄ei ade Bait Allah, Sia nggahi kana'ena, ”Ndad̄i nggomid̄oho mab̄adeku cou Nahu ake, ro ratab̄ena maikai-Ku? Nahu wati maiku kai kane'e ndai-Ku. Nahu ranggadu b̄a Sia ma ntau hak manggadu Nahu, ro Sia loa d̄i imbi. Pala nggomid̄oho wati patamu Sia.

²⁹Nahu pata Sia, b̄ara Nahu ramaiku rad̄i Sia, ro Sia eded̄u ma ranggadu Nahu.”

³⁰D̄iwakatu ede siad̄oho nane'eku wa'u Ruma Isa, pala wati wara ma disa nenti Sia, b̄ara watipu raka wakatuna.

³¹Mboto dou d̄i ade weki dou-dou ede tampu'u imbi d̄i Sia, ro nggahina, ”Nggara namaisi Sangaji Mambei salama ede, sab̄uana loaku Sia karawi mancewi mboto rawi mab̄isa ra guna ntewi kaisi lab̄o dou ake?”

³²Dou-dou Farisi maringa b̄uneku dou mamboto ede manuntu kanari mab̄oha Ruma Isa. B̄ara ndedena, sama-sama lab̄o dou-dou mana'ekai imam, siad̄oho kauna pila-pila dou majaga Bait Allah lao wa'u Ruma Isa.

³³Nggahi Ruma Isa d̄i dou mamboto d̄i ade Bait Allah, ”D̄isamporo walimpa Nahu wara sama lab̄oku nggomid̄oho. Sawa'u b̄a ede Nahu d̄imalao dula mbali aka ma ranggadu Nahu.

³⁴Nggomid̄oho d̄imangupa Nahu, pala wati rakamu eda Nahu; b̄ara nggomid̄oho wati loamu mai d̄i hid̄i tab̄era warakai Nahu.”

³⁵Edempara dou-dou mana'ekai Yahudi cua nggahi d̄i angi ndaid̄ohona, ”Dou ake nane'e lao tab̄eku ndad̄ina d̄i daloakai raka eda b̄a ndai Sia? Sab̄ua Sia nane'eku lao aka dou-dou Yahudi ma ngge'e d̄i dana ra rasa dou d̄i ade woha dou Yunani, ro nangoa ra teiku dou Yunani?

³⁶Auku aona Sia nggahina b̄a one ndai d̄imangupa Sia pala wati d̄imaraka eda Sia ro b̄a one ndai wati loa mai aka hid̄i tab̄era wara kai Sia?”

³⁷ Wakatu ainaina macumpukaina rad̄i ndiha kai ede, eded̄u ainaina ma ipi penti poda, Ruma Isa kid̄ina d̄i ade Bait Allah edempara nggahi-Na, ”Dou ma mango wo'o pab̄uaku mai nonona d̄i Nahu.

³⁸ Mab̄oha dou ma imbi d̄i Nahu, ratunti d̄i ade Alkitab: ’Ratad̄ei adena wara lampa oi ma mbei mori.’ ” (

³⁹Ruma Isa nuntu ra nggahina mab̄oha Roh Allah, ma d̄i tarima b̄a dou-dou ma imbi d̄i Sia. B̄ara wakatu ede Roh Allah watipu rambei; b̄ara Ruma Isa watipu kad̄ese ro kantasa kai made-Na.)

⁴⁰Mboto dou maringa ra kade'e au ranggahi b̄a Ruma Isa, ro d̄i ade weki siad̄oho wara ma nggahi, ”Dou ake pasti Nabi ra ngena b̄a ndai ede!”

⁴¹Ma kalaina manggahi, ”Akeku Sangajai Mambei salama!” Pala wara rau dou ma nggahi, ”Ah, b̄uneku loana Sangaji Mambei salama ramaina rad̄i Galilea?

⁴² D̄i ade Alkitab ratunti b̄a one Sangaji Mambei salama eded̄u londo ra mai la Daud ro d̄imamai rad̄i Betlehem, eded̄u kampo ra mporo la Daud.”

⁴³Cumpukaina dou-dou tampu'ura cence ncihi mab̄oha Ruma Isa.

⁴⁴Wara ma ne'e wa'u Sia, pala wati kone sab̄ua dou rau manenti-Na.

⁴⁵Wakatu dou-dou majaga Bait Allah rakau lao wa'u Ruma Isa mai mbalina, dou-dou mana'ekai imam ro dou-dou Farisi ede sod̄ina d̄i siad̄oho, ”B̄ab̄auku nggomid̄oho wati wa'a ca'arakaimu Sia?”

⁴⁶Cambe b̄a dou-dou majaga ede, ”Watipu parana wara dou manuntu ra nggahi b̄une Sia!”

⁴⁷”Sab̄ua nggomid̄oho wa'ura kasantuda b̄a Sia rau? Nggahi b̄a dou-dou Farisi ede.

⁴⁸”Sab̄ua wara rad̄i dou-dou mana'ekai ndai atao dou Farisi ma'imbi d̄i Sia?

⁴⁹Pala dou mamboto ake, siad̄oho wati b̄adena hukum Musa, ro siad̄oho wa'ura hina b̄a'a b̄a Ruma Hatalla.”

⁵⁰ Sab̄ua dou d̄i ade weki dou-dou Farisi ede eded̄u la Nikodemus ma wa'ura iu mai d̄i Ruma Isa. Nggahi la Nikodemus d̄i dou-dou Farisi ma kalaina,

⁵¹”Nggahi b̄a Hukum, sab̄ua-b̄ua dou wati loa d̄i hukum sawatipu parakarana d̄i ringa ra kade'e ro rakarawina d̄iparesa.”

⁵²”Sab̄ua nggomi rau rad̄i Galilea?” cambe b̄a siad̄oho. ”Paresa lalompa d̄i ade Alkitab! Nggomid̄oho ma'edaku b̄a one wati wara nabi ma rad̄i Galilea!” [

⁵³Sawa'u b̄a ede, sara'ana dou dula d̄i umana.