Read Bima KISAH RASU-RASU 1 Bible Online

KISAH RASU-RASU 1 - Bima bible

KISAH RASU-RASU 1

¹ Teofilus ma d̄ese ra ntasa, D̄i ade buku nahu ma sarambakaina wa'ura tarangka sara'a b̄a nahu au rakarawi ro ngoa ra tei b̄a Ruma Isa ra'aipu Sia tampu'u karawi-Na,

²sampe ainaina Sia kane'e ese saroga. Sawatipu Sia ne'ena ese saroga, kai kuasa Roh Allah Sia mbeina ngoa ra teina d̄i rasu-rasu-Na rakad̄ale b̄a Sia.

³Sawa'u b̄a made Sia, santoi upa mpuru nai Sia ntuwu katadana kai cara ma tada poda d̄i rasu-rasu ede b̄a one Sia poda-poda morina. Siad̄oho edana Sia, ro Sia nuntu lab̄ona siad̄oho mab̄oha Karaja'an Allah.

⁴ Ro wakatu Sia kab̄oro weki lab̄o siad̄oho, Sia mbeina parenta ake d̄i siad̄oho, ”Aina peso wekimu d̄i Yerusalem. Ngenapu ta ede sampe Ama mambeimu au rawa'u sake-Na, eded̄u ma wa'ura ngoa b̄a Nahu d̄i nggomid̄oho ntoina.

⁵ B̄ara la Yahya makandeu karaso dou kai oi, pala pila-pila nai wali nggomid̄oho d̄ikandeu karaso kai Roh Allah.”

⁶Wakatu kab̄oro weki rasu-rasu ede lab̄o Ruma Isa, sod̄ikai b̄a siad̄oho d̄i Sia, ”Ruma, sab̄ua ake Ruma mane'e katu'u mbali Karaja'an bangsa Israel?”

⁷Cambe b̄a Ruma Isa, ”Ama ndai Nahu d̄imakatantuna ainaina ro wakatuna. Ede wati paralu d̄ib̄ade b̄a nggomid̄oho, b̄ara ede mantau hak eded̄u Ama.

⁸ Pala nggomid̄oho d̄imaraka kuasa, nggara Roh Allah nawa'usira mai d̄i nggomid̄oho. Ro nggomid̄oho d̄imandad̄i sakasi-sakasi d̄iru'u b̄a Nahu d̄i Yerusalem, d̄isara'ana Yudea, d̄i Samaria, ro sampe d̄i sumpu dunia.”

⁹ Sawa'u b̄a nggori nggahi ndede Ruma Isa, Sia rahanta lao ese saroga d̄itando mada siad̄oho, ro apu mab̄onto Sia d̄itando mada siad̄oho.

¹⁰Wunga siad̄oho mbuipu ntandana ese langi, wunga Ruma Isa kane'e ese Saroga, wed̄i lalompa d̄ua dou makani malanta kid̄i d̄i kompe siad̄oho.

¹¹”Oe, dou-dou Galilea,” nggahi dou d̄uana ede b̄ab̄auku nggomid̄oho ngge'empa kid̄imu ta ede ntandamu langi? Ruma Isa, ra'eda b̄a nggomid̄oho rakane'e ese saroga ede d̄itando nggomid̄oho, d̄imamai wali b̄une cara ede ra'eda b̄a nggomid̄oho akande.”

¹²Edempara rasu-rasu ede dula mbalina aka Yerusalem rad̄i Doro to'i Zaitun. Doro to'i ede hid̄ina kira-kira sakilo mete d̄o'ona lab̄o Yerusalem.

¹³ D̄i Yerusalem siad̄oho laona aka uma hid̄i numpakai siad̄oho, edempara ne'ena ese b̄ili ma ese. Rasu-rasu ede, eded̄u la Petrus ro la Yahya, Yakub ro la Andreas, Filipus ro la Tomas, Bartolomeus ro la Matius, la Yakub ana la Alfeus, Simon Patriot ro la Yudas ana la Yakub;

¹⁴Sara'ana ede naca'u kasab̄ua ade kab̄oro weki do'a sama. Siad̄oho do'a sama lab̄ona dou-dou siwe wara Maria ina Ruma Isa, ro ari-ari Ruma Isa.

¹⁵D̄isab̄ua ainaina, aipu siad̄oho wunga kab̄oro weki — wara kira-kira saratu d̄ua mpuru dou ma mai ta ede — la Petrus tu'u kid̄i ne'e nuntu. Nggahi sia,

¹⁶”Cina ra angi! Au ratunti d̄i ade Alkitab, ede pab̄uaku ndad̄ina. Ntoina kai ncai la Daud, Roh Allah wa'ura ngoana mab̄oha la Yudas, dou mana'ekaina d̄i dou-dou ma wa'u ra leto Ruma Isa ede.

¹⁷La Yudas eded̄u sab̄ua dou rad̄i ade weki ndaita, ro sia wa'ura kad̄ale rau d̄imakarawi sama-sama lab̄o ndaita.” (

¹⁸ La Yudas ake wa'ura rakana dana radena ra'ufa kai d̄i rawina ma dab̄ae. Sia mab̄u ro madena kai ncea lokona sampe losa sara'a isi lokona.

¹⁹Sara'a dou ma ngge'e d̄i Yerusalem nab̄ade mab̄oha lampa rawi ede. B̄ara ndedena d̄i ade bahasa siad̄oho, siad̄oho tangarakaina dana ede Akeldama, aona ’Dana Ra'a’.)

²⁰ ”B̄ara d̄i ade buku Zabur wara ratunti ndake, ’Co'opu hid̄i ngge'ekaina ndad̄i lingi; aina kone sab̄ua dou rau mangge'e tad̄eina.’ Wara ratunti ndake rau, ’Co'opu b̄orana weha b̄a dou makalai.’

²¹ B̄ara ndedena, pab̄uaku wara sab̄ua-b̄ua dou ma b̄atu ndai mandad̄i sakasi b̄a one Ruma Isa wa'ura mori mbali b̄ara madena. Dou ede pab̄uaku sab̄ua dou d̄i ade weki dou-dou ma sama-sama ncau lab̄o ndai aipu wakatu ndai b̄atuta Ruma Isa tab̄era laokaina, aipu la Yahya tampu'una kandeu karasona dou sampe wakatu Ruma Isa rakane'e ese saroga rad̄i woha ndai.”

²³Edempara dou-dou ma wara ta ede, kalu'una ngara d̄ua dou, eded̄u la Yusuf ma d̄i pehekai rau Barsabas (sia d̄ipehekai la Yustus rau), ro la Matias.

²⁴Edempara siad̄oho do'ana. Nggahi siad̄oho, ”Ruma, Ita mab̄adeku ade sara'ana dou. La Yudas wa'ura mab̄u d̄i b̄orakaina eded̄u rasu ro nawa'ura made. Ndad̄i tateipu d̄i la madad̄oho, couku d̄i ade d̄ua dou ake d̄ikad̄ale b̄a Ruma d̄i mbei taki ra puta ede macepe la Yudas.”

²⁶Sawa'u b̄a ede ngara d̄uana ede d̄ikab̄o, edempara undi mab̄u b̄oha ngara la Matias. Ndad̄i sia d̄ihanta ndad̄i rasu d̄imab̄atu sama-sama lab̄o sampuru sab̄ua dou rasu ma kalaina.