Read Bima KISAH RASU-RASU 10 Bible Online

KISAH RASU-RASU 10 - Bima bible

KISAH RASU-RASU 10

¹D̄i Kaisarea wara sab̄ua dou mone mangara la Kornelius. Sia nab̄ora kapten ”Tentara Italia”.

²Sia dou ma dahu d̄i Ruma Hatalla ro sara'a iwa ra wekina nado'a nembaku Ruma Hatalla. Sia mboto bantuna dou-dou Yahudi ma ncoki mori, ro sia nado'a ncau d̄i Ruma Hatalla.

³D̄isab̄ua ainaina kira-kira b̄oe tolu aimarai sia eda kab̄aena rakatada b̄a Ruma, sab̄ua mala'eka Ruma Hatalla mamai ro ouna sia, ”Kornelius!”

⁴Kornelius ntandana d̄i mala'eka ede kai dahuna, edempara nggahina, ”Io b̄uneta Ruma?” Cambe b̄a mala'eka ede, ”Do'amu ro ncera ra mbura ademu wa'ura tarima b̄a Ruma Hatalla ro Ruma Hatalla nakawaraku nggomi.

⁵Ake kaupu lao dou aka Yope ou la Simon ma ngara d̄ondona la Simon Petrus.

⁶Sia wunga ronggana d̄i uma dou mataki karaka huri mangara la Simon, ma ngge'e d̄i kengge moti.”

⁷Sawa'u b̄a lao mala'eka manuntu lab̄o la Kornelius ede, ou b̄a la Kornelius d̄ua dou ada d̄i umana ro sab̄ua dou anggota tentara mataki jagana ma to'a.

⁸Kornelius ngoana d̄i siad̄oho au ma wa'ura ndad̄i, edempara kauna siad̄oho lao aka Yope.

⁹B̄ala aisanai, siad̄oho wunga ade lampakaina lao aka Yope ro ne'empara rongga, la Petrus ne'ena ese uma nane'e do'aku.

¹⁰Edempara sia nahid̄o podaku ro nane'e ngaha. Wunga ka'ambi wea ngaha ra nono, sia edana rakatada b̄a Ruma.

¹¹Sia edana langi mahengga weki ro wara b̄une kaena ma lembo rakalondo ca'awa dunia, matero weki d̄i upa mbua padona.

¹²Ta'adena wara mboto pahu binata ma'upa mbua ed̄i, sara'a pahu binata ma rama ro nasi-nasi daro.

¹³Edempara wara eli manggahi d̄i sia, ”Petrus, tu'ura! Sambelepu ro ngahapu!”

¹⁴Cambe b̄a la Petrus, ”Wati, Ruma! Watipu iuku la mada ngaha au-au ma haram atao najis.”

¹⁵Pala eli ede manggahi wali d̄i sia, ”Au ranggahi b̄a Ruma Hatalla halal, aina wi'ikai b̄a nggomi ede haram.”

¹⁶Ra'eda ade rangoa b̄a Ruma ede katada mbodana sampe tolu kali, edempara kaena ede hanta weki lao aka saroga.

¹⁷La Petrus nadarura adena kananuna auku aona rad̄i rakatada b̄a Ruma ede. Wunga mbuipu la Petrus kananuna, dou-dou rakaukai b̄a la Kornelius rakana uma la Simon ro siad̄oho wa'ura wara d̄i tando tad̄a ncai.

¹⁸Edempara siad̄oho ouna dou ro sod̄ina, ”Sab̄ua ta ake wara dou ma rongga, ma ngara la Simon Petrus?”

¹⁹Wunga mbuipu la Petrus usaha ncauna d̄i b̄adekaina auku aona ra eda ade rangoa b̄a Ruma ede, nggahi Roh Allah d̄i sia, ”Oe Petrus, wara tolu dou mawunga ngupa nggomi.

²⁰Wajo londo rocipu ro aina mbali mbua ademu b̄atumu siad̄oho, b̄ara Nahu ma rakakai siad̄oho.”

²¹Edempara la Petrus londona ro nggahina d̄i dou-dou ede, ”Nahu dou rangupa b̄a nggomid̄oho. Au maimu nggomid̄oho?”

²²Cambe b̄a siad̄oho, ”Io, Kapten Kornelius kakai madad̄oho mai ta ake. Sia dou ma taho ro nadahu d̄i Ruma Hatalla, ro nahoroma ipiku b̄a sara'ana dou Yahudi. Sab̄ua mala'eka Ruma Hatalla makauna sia raho Ita maipu d̄i umana b̄ara do'ana wa'ura cambe, sia rakau ringa ra kade'e au ranggahi b̄a Ita d̄i sia.”

²³Edempara la Petrus kauna siad̄oho lu'u maru wa'una ta ede. B̄ala aisanai la Petrus tu'una ro lao sama lab̄o siad̄oho. Pila-pila dou ma'imbi rad̄i Yope b̄atu rauna.

²⁴Sanai sawa'u b̄a ede siad̄oho ronggara aka Kaisarea. Ta aka siad̄oho wa'ura ngena b̄a la Kornelius lab̄o iwa ra wekina ro lenga-lenga taho lab̄ona ra'undana.

²⁵Wakatu rongga la Petrus, la Kornelius mai weha aona sia ro sujuna d̄i tando la Petrus.

²⁶Pala la Petrus mabantuna sia tu'u kid̄i, edempara nggahina, ”Tu'ura! Ndai nahu manusia rau.”

²⁷Wunga mbuipu nuntuna lab̄o la Kornelius, la Petrus lu'una d̄i ade uma. Ta ede sia edana mboto dou makab̄oro weki.

²⁸Edempara nggahi sia d̄i siad̄oho, ”Ndai nggomid̄oho mab̄adeku b̄a one dou Yahudi nakantaku b̄a agamana mai lamba atao kab̄oro weki lab̄o dou-dou bangsa makalai. Pala Ruma Hatalla wa'ura katadana d̄i ndai nahu b̄a one nahu wati loa wi'ikai najis atao haram d̄i cou-cou rau.

²⁹B̄ara ndedena wakatu nggomi kaumu nahu mai, nahu wati tani adeku mai. Ndad̄i ake nahu ne'eku b̄ade b̄ab̄auku kaukaimu mai nahu.”

³⁰Cambe b̄a la Kornelius, ”Tolu nai ma wa'ura kalalo, kira-kira wakatu b̄une ake, mada wunga do'aku d̄i uma b̄oe tolu aimambia. Wed̄i lalompa sab̄ua dou mone makid̄i d̄i tando mada. Kani ra lombo dou ede nab̄ura kancilo.

³¹Nggahi sia, ’Kornelius! Ruma Hatalla wa'ura ringana do'amu ro nakawaraku ncera ra mbura ademu.

³²Ndad̄i kaupu dou lao aka rasa Yope ou dou ma ngara la Simon Petrus. Sia wunga ronggana aka uma sab̄ua dou mataki karaka huri ma ngara la Simon; uma ede d̄i kengge moti.’

³³B̄ara ndedena mada kau rociku lao dou d̄ima'ou Ita. Ro Ita taho poda ademu maimu ta ake. Ake madad̄oho sara'ana wa'ura kab̄oro weki ta ake d̄i tando Ruma Hatalla d̄imakade'e sara'ana rakaukai b̄a Ruma Hatalla Ita ngoa d̄i madad̄oho.”

³⁴ Edempara nggahi la Petrus, ”Ake nahu poda-poda kab̄adera b̄a one Ruma Hatalla karawina d̄i samenana dou sama.

³⁵Dou ma dahu d̄i Ruma Hatalla ro karawina ma ncihi, dou ede natarimaku b̄a Ruma Hatalla, wati kab̄aena sia bangsa au.

³⁶Cina ra angi wa'u b̄adeta isi haba rakarongga b̄a Ruma Hatalla d̄i bangsa Israel. Haba ede eded̄u mab̄oha Haba Mataho mab̄oha dame kai ncai Ruma Isa Al Masih, eded̄u Ruma samenana dou.

³⁷Nggomid̄oho wa'ura b̄ade au ma wa'ura ndad̄i d̄i samenana Yudea, eded̄u tampu'u d̄i Galilea sawa'u b̄a kandeu karaso rakaukai b̄a la Yahya.

³⁸Nggomid̄oho mab̄adeku b̄a one Ruma Hatalla wa'ura kad̄alena Ruma Isa dou Nazaret ede ro mbeina d̄i Sia Roh Allah ro kuasa. Nggomid̄oho b̄ade raumu b̄a one Ruma Isa ede lao rerona d̄imakarawi mataho; Sia katahona sara'ana dou ra kuasakai b̄a Ibilis, b̄ara Ruma Hatalla mad̄ende ra wa'ana Sia.

³⁹Nami akeku dou-dou ma wa'ura eda madamu samenana au-au rakarawi b̄a Sia d̄i dana ra rasa dou Yahudi ro d̄i Yerusalem. Kone ade ndedena siad̄oho masalibna ro hadena Sia.

⁴⁰Pala d̄i ainain ma katolukaina Ruma Hatalla makamori mbalina Sia wali rad̄i madena ro katadana Sia d̄i manusia;

⁴¹wati d̄i sara'ana dou, malaisi d̄i nami mpoampa ma wa'ura kad̄ale ulu b̄a Ruma Hatalla d̄imandad̄i sakasi-sakasi-Na: Nami ngaha ronono lab̄o Sia sawa'u b̄a Sia mori mbali rad̄i madena.

⁴²Ro Sia makauna nami ngoa ra kahaba Haba Mataho ede d̄i dou-dou ro mambei sakasi b̄a one Siaku rahanta b̄a Ruma Hatalla d̄imandad̄i Hakim d̄i ru'u b̄a dou-dou mambuipu mori ro d̄i ru'u b̄a dou-dou ma wa'ura made.

⁴³Sara'ana nabi-nabi manuntu mab̄oha Sia. Nggahi siad̄oho b̄a one sara'ana dou ma imbi d̄i Ruma Isa, d̄ikangampu wea dosana kai kuasa ma ramai ta Ruma Isa.”

⁴⁴Wunga mbuipu la Petrus nuntu ra nggahina, Roh Allah londo ro kuasakaina d̄i sara'ana dou-dou ma ringa haba ede.

⁴⁵Dou-dou Yahudi ma imbi d̄i Ruma Isa ro lao b̄atuna la Petrus rad̄i Yope, sara'ana dou midi adena eda Ruma Hatalla mambei rauna Roh-Na d̄i dou-dou bangsa makalai ma laina Yahudi.

⁴⁶B̄ara ringa b̄a siad̄oho dou-dou ede manuntu ra nggahi kai mboto pahu nggahi ro maroi ra wadi na'e ra ntoru Ruma Hatalla. Edempara nggahi la Petrus,

⁴⁷”Tatiopu, dou-dou ake wa'ura rakana Roh Allah b̄une ndaita. Ndad̄i sab̄ua naloa dou kanta rero siad̄oho d̄i kandeu karaso kai oi?”

⁴⁸Edempara la Petrus kauna siad̄oho d̄i kandeu karaso kai ngara Ruma Isa Al Masih. Sawa'u b̄a ede raho b̄a siad̄oho loakud̄u la Petrus ngge'e lab̄o siad̄oho pila-pila nai wali ntoina.