Read Bima KISAH RASU-RASU 11 Bible Online

KISAH RASU-RASU 11 - Bima bible

KISAH RASU-RASU 11

¹Rasu-rasu ro dou-dou ma imbi d̄i sara'a Yudea ringana b̄a one dou-dou laina agama Yahudi wa'ura tarima rauna nggahi ra eli Ruma Hatalla.

²Edempara wakatu lao la Petrus aka Yerusalem, dou-dou Yahudi ma wa'ura imbi ede, makancara la Petrus.

³Nggahi siad̄oho, ”B̄ab̄au nggomi laokaimu aka uma dou-dou ma watipu rasuna? Nggomi manaha ngaha sama rauku lab̄o siad̄oho!”

⁴B̄ara ndedena la Petrus ngoa kab̄aena d̄i siad̄oho samenana ma wa'ura ndad̄i, tampu'u aipu saramba wa'una. Nggahi la Petrus,

⁵”Nahu wunga do'aku d̄i kota Yope, edempara eda b̄a nahu d̄i ade nifiku rangoa b̄a Ruma. Nahu edaku wara ma b̄une sando'o kaena ma lembo rakalondo ese langi, matero weki d̄i upa mbua padona, edempara midina d̄i kompe nahu.

⁶Wakatu tio kab̄ae b̄a nahu tad̄eina, nahu edaku binata-binata ma'upa mbua ed̄i, binata-binata daro, binata-binata ma rama ro nasi-nasi daro.

⁷Edempara ringa b̄a nahu sab̄ua eli manggahi d̄i nahu, ’Wajo tu'ura, Petrus! Sambelepu ede ro ngahapu!’

⁸Pala cambe b̄a nahu, ’Wati, Ruma! Watipu iu b̄a mada ngaha ma haram ro manajis.’

⁹Pala eli ede nggahi walina rad̄i langi, ’Au-au rawa'u nggahi b̄a Ruma Hatalla halal aina nggahimu haram.’

¹⁰Eda b̄a nahu lampa rawi ede sampe tolu kali ro cumpukaina sara'ana hanta mbali aka saroga.

¹¹Ncihi ncao wakatu ede rau tolu dou Kaisarea, ma mai weha ao nahu wontu d̄i uma raronggakai nahu.

¹²Edempara kau b̄a Roh Allah nahu lao sama lab̄o siad̄oho kai wati mbali mbua adeku. Ini dou cina ra angi ake rau b̄atuna nahu lao aka Kaisarea, ro nami sara'ana lu'u d̄i ade uma la Kornelius.

¹³Edempara la Kornelius ngoana d̄i nami rab̄unena sia edana sab̄ua mala'eka makid̄i d̄i umana ro nggahina, ’Kaupu dou lao aka Yope d̄ima'ou sab̄ua dou mone ma ngara la Simon Petrus.

¹⁴Sia d̄imakaronggana d̄i nggomi haba d̄imambei salama nggomi ro iwa ra wekimu.’

¹⁵Ro d̄i wakatu nahu tampu'u nuntu ra nggahi ndede,” ndedeku la Petrus tuwuna nuntu ra nggahina, ”Roh Allah maina d̄i siad̄oho, sama b̄une ma ndad̄i d̄i ndai ntoina aipu sarambana.

¹⁶ Edempara kawara b̄a nahu, Ruma maparana nggahina, ’Yahya makandeu karaso kai oi, pala nggomid̄oho d̄i kandeu karaso kai Roh Allah.’

¹⁷Ndad̄i ncihi poda Ruma Hatalla nambei rauku d̄i dou-dou ma wati agama Yahudi ede, mbeina ma sama rambei b̄a Sia d̄i ndai aipu wakatu ndai imbi d̄i Ruma Isa Al Masih. B̄ara ndedena, wati lu'ukai b̄a aka nahu kantaku Ruma Hatalla!”

¹⁸Sawa'u b̄a ringana ede, siad̄oho wati tele walina. Edempara siad̄oho roi ra wadina Ruma Hatalla. Nggahi siad̄oho, ”Nggara ndedesi, dou-dou malaina dou Yahudi d̄i mbei rau wakatu b̄a Ruma Hatalla d̄i tobakaina rad̄i dosa ro kananu katahona mori masapodakaina!”

¹⁹ Sawa'u b̄a hade la Stefanus, dou-dou ma imbi d̄i Ruma Isa tampu'ura d̄i coco rero b̄a dou, ndad̄ina siad̄oho mbari mbura rero. Wara ma rai sampe aka Fenisia, ro wara rau ma rai sampe aka Siprus ro Antiokhia. Siad̄oho ngoa ra kahabana haba ma ramai ta Ruma Hatalla d̄i ru'u b̄a dou-dou Yahudi mpoa.

²⁰Pala d̄i ade dou-dou ma'imbi ede, eded̄u dou-dou Siprus ro Kirene, wara rau dou-dou ma lao aka Antiokhia ro ngoa ra kahabana Haba Mataho mab̄oha Ruma Isa ede d̄i dou-dou malaina agama Yahudi rau.

²¹Kuasa Ruma wara d̄i siad̄oho ndad̄ina mboto dou mandad̄i imbi ro d̄onggona weki ndaina d̄i Ruma.

²²Nuntu ra nggahi mab̄oha mandad̄i ake rongga rau d̄i ela Ruma d̄i Yerusalem. Ndad̄i siad̄oho nggaduna la Barnabas aka Antiokhia.

²³Ro wakatu la Barnabas rongga ta aka, ro edana rab̄une Ruma Hatalla mambei bareka d̄i dou-dou ede, sia na'ipiku neo adena. Edempara sia rahona d̄i siad̄oho loakud̄u poda-poda to'ana d̄i Ruma.

²⁴La Barnabas ake dou ma taho ade ro kuasakai b̄a Roh Allah ro na'imbi podaku d̄i Ruma ndad̄ina mboto dou mab̄atu Ruma.

²⁵Edempara la Barnabas lao ngupana la Saulus aka Tarsus.

²⁶Sawa'u b̄a eda angi lab̄o la Saulus, sia wa'ana la Saulus aka Antiokhia ro samba'a siad̄oho kab̄orona weki lab̄o ela Al Masih ta aka ro ngoa ra tei salahona dou mamboto. D̄i Antiokhia edeku dou-dou ma imbi d̄i Ruma Isa d̄imasarambakaina pehe kai dou-dou ela Al Masih.

²⁷Wakatu ede wara pila-pila dou nabi ma ramai rad̄i Yerusalem lao aka Antiokhia.

²⁸ D̄i ade wekina wara sab̄ua dou mangara Agabus. Kai rundu b̄a Roh Allah sia karonggana nggahi Ruma Hatalla b̄a one d̄i sara'a dunia d̄i mandad̄i wakatu sarahid̄o ma ipi poda. (Ro lampa rawi ede poda ndad̄ina aipu wakatu parenta b̄a Kaisar Klaudius.)

²⁹Ndad̄i Samenana dou ma'imbi Ruma Isa ede kasamana weki bantu d̄i paralu b̄a cina ra angi ma ngge'e d̄i Yudea; cua-cua nggadu b̄e d̄i wa'una.

³⁰Rakasamakai weki ede kalampa rau, edempara la Barnabas ro la Saulus rakakai b̄a siad̄oho d̄imalao otona rabantu ede d̄i dou-dou mana'ekai ela Ruma.