Read Bima KISAH RASU-RASU 12 Bible Online

KISAH RASU-RASU 12 - Bima bible

KISAH RASU-RASU 12

¹D̄i ade wakatu ede rau Sangaji Herodes tampu'ura kancokina anggota-anggota ela Ruma.

²Kai rakaukai b̄a sia, la Yakub sa'e la Yahya rahade kai peda.

³Wakatu eda b̄a Herodes b̄a one ruku ra rawina ede nakasanaku ade dou-dou Yahudi, sia karawi walina b̄une ede; sia kauna dou wa'u ra leto la Petrus rau. Lampa rawi ede ndad̄ina wakatu Aruraja Roti Mawati ntau B̄uha.

⁴ Sawa'u b̄a wa'u ra leto, la Petrus kalu'u ade uma bui. Upa regu tentara rakaukai jaga la Petrus ta ede — cua-cua regu wara upa dou anggota tentara. Sawa'u b̄a nggori aruraja Paskah, ede ampona paresa la Petrus d̄i tando ela ra dou.

⁵Ndad̄i la Petrus tau d̄i uma bui; pala anggota-anggota ela Ruma nado'a ncauku kai adena mapoda-poda d̄i Ruma Hatalla d̄i ru'u b̄a la Petrus.

⁶D̄i'aimangad̄i sawatipu Herodes lao wa'ana la Petrus aka tando ela ra dou, la Petrus maru randante kai d̄ua mbua rante rahapi b̄a d̄ua dou tentara majagana. D̄itad̄a uma bui, wara dou-dou majaga rauna.

⁷Wed̄i lalompa mala'eka Ruma makid̄i ta ede ro sab̄ua taroa makancilo d̄i ade kama uma bui ede. Mala'eka ede kad̄o-kad̄ona la Petrus sampe tu'ukaina. Edempara nggahi mala'eka ede, ”Oe, tu'u rocipu!” Wakatu ede wa'u mab̄u rante b̄esi d̄i rima la Petrus.

⁸Sawa'u b̄a ede nggahi mala'eka ede, ”Kanipu kani ra lombomu ro d̄ikipu ai sapatumu.” Ndad̄i la Petrus kanina b̄aju ro d̄ikina ai sapatuna. Edempara nggahi wali mala'eka ede, ”Kanipu jumbamu ro lampa b̄atupu nahu.”

⁹Edempara la Petrus lampa b̄atuna mala'eka ede losa rad̄i ade uma bui. Pala la Petrus wati kawarana weki b̄a one au ma wunga karawi b̄a mala'eka ede eded̄u poda-poda ndad̄ina. Kacai b̄a la Petrus ede eded̄u ra'eda ade nifina.

¹⁰Wakatu siad̄oho kalalona hid̄i jagakai masaramba ro makad̄uana, siad̄oho rakara d̄i tad̄a b̄esi, ma ne'e laokai aka kota. Tad̄a ede hengga weki ndaina, edempara siad̄oho losana ro lampana aka ncai makarombo. Wed̄i lalompa mala'eka ede tu'u wi'ina la Petrus.

¹¹Sawa'u b̄a ede la Petrus ampona kawara weki au ma wa'ura ndad̄i d̄i weki sia, edempara nggahi sia, ”Ake nahu wa'ura b̄adeku b̄a one Ruma poda-poda wa'ura nggaduna mala'eka-Na d̄i horikaina nahu ade kuasa kai Herodes ro d̄i samenana au-au d̄i ne'e karawi b̄a bangsa Yahudi d̄i nahu.”

¹²Sawa'u b̄a kawarana weki d̄i lampa rawi ede, la Petrus laona aka uma la Maria, ina la Yahya ma d̄ipehekai rau Markus. Ta ede mboto dou makab̄oro weki mawunga do'a.

¹³Toke b̄a la Petrus tad̄a ma'arina, edempara sab̄ua dou ada siwe mangara la Rode, mai d̄imahengga tad̄a.

¹⁴Sia napata laloku eli la Petrus. B̄ara neo adena, sia rai lu'u mbali rocina watipu henggana tad̄a, edempara ngoana d̄i dou-dou ta ede b̄a one la Petrus wara ta ari lua.

¹⁵”Nggomi maringuku!” nggahi b̄a siad̄oho. Pala la Rode nateleku b̄a one ede poda-poda la Petrus. Edempara nggahi siad̄oho, ”Ede mala'ekana!”

¹⁶Wakatu ede la Petrus nanaha toke ntuwuku tad̄a. Edempara wakatu hengga b̄a siad̄oho tad̄a, ro edana la Petrus siad̄oho namidi poda adena.

¹⁷La Petrus mbeina isara kai rimana loakud̄u siad̄oho aina kana'e eli, edempara sia ngoana rab̄unena Ruma wa'a kalosana sia ade uma bui. Edempara nggahi sia, ”Ngoapu lampa rawi ake d̄i la Yakub ro d̄i cina ra angi makalai rauna.” Sawa'u b̄a ede la Petrus tu'u wi'ina hid̄i ede ro laona aka hid̄i makalai.

¹⁸B̄ala aimasid̄i ndad̄i ngango d̄i ade weki tentara majaga. Siad̄oho darura poda adena mab̄oha au ma wa'ura ndad̄i d̄i la Petrus.

¹⁹Edempara kau b̄a Herodes dou lao ngupa la Petrus, pala siad̄oho wati rakana eda sia. Ndad̄i Herodes kauna dou loakud̄u sod̄i dou-dou majaga ede sawa'u b̄a ede d̄i hade. Sawa'u b̄a ede Herodes lao tu'u wi'ina Yudea ro ngge'ena pila-pila wakatu ntoina d̄i Kaisarea.

²⁰Herodes na'ipi podaku mbanina d̄i dou-dou Tirus ro Sidon. B̄ara ndedena siad̄oho sama-sama mai satandona d̄i sia. Sarambakaina siad̄oho siwina la Blastus mana'ekai asi Herodes, ndad̄ina sia horuna siad̄oho. Edempara siad̄oho lao satandona Herodes, edempara rahona d̄i angikai, b̄ara dana ra rasa siad̄oho namori d̄i ngaha ra nono rad̄i dana ra rasa Herodes.

²¹D̄isab̄ua ainaina ma wa'ura katantukai, Herodes kanina kani ra lombo sangaji kaina edempara dohona d̄i kadera sangaji ro tampu'una padato d̄i tando ela ra dou.

²²Ela ra dou ma wunga kade'e ro ringa mena ede nggahi kana'ena, ”Ake eli dewa, laina eli manusia!”

²³Wakatu ede wa'u mala'eka Ruma topana Herodes, b̄ara sia wati horomana d̄i Ruma Hatalla. Herodes ngaha b̄a koli edempara madena.

²⁴Edempara nggahi ra eli Ruma Hatalla nanaha mbou rero ro nanaha tenggo.

²⁵Sawa'u b̄a la Barnabas ro la Saulus kanggorina taki ra puta siad̄oho, siad̄oho lao dulana rad̄i Yerusalem kai wa'ana la Yahya Markus sama-sama lab̄o siad̄oho.