Read Bima KISAH RASU-RASU 13 Bible Online

KISAH RASU-RASU 13 - Bima bible

KISAH RASU-RASU 13

¹D̄i ade ela Ruma d̄i Antiokhia wara nabi-nabi ro guru-guru, eded̄u la Barnabas, la Simeon d̄i tangarakai la Me'e, la Lukius dou Kirene, la Menahem rakana'e sama lab̄o Sangaji Herodes, ro la Saulus.

²Wakatu siad̄oho wunga sambeana d̄i Ruma ro puasa, nggahi Roh Allah d̄i siad̄oho, ”Kad̄alepu la Barnabas ro la Saulus d̄i ru'u b̄a Nahu mpoampa, loakud̄u siad̄oho karawina rawi rawa'ura katantu b̄a Nahu d̄i ru'u b̄a siad̄oho.”

³Sawa'u b̄a nggori puasa ro do'ana siad̄oho tohona rima ese wawo la Barnabas ro la Saulus edempara nggaduna siad̄oho d̄uana ede.

⁴B̄ara ranggadu b̄a Roh Allah, la Barnabas ro la Saulus lao aka Seleukia. Rad̄i Seleukia siad̄oho loja lao aka Siprus.

⁵Wakatu rongga aka Salamis, siad̄oho karonggana nggahi ra eli Ruma Hatalla d̄i uma-uma sambeakai dou Yahudi. La Yahya Markus mabantuna siad̄oho ade lampa ra laokaina.

⁶Sara'a pulau ede lampa kalili rero b̄a siad̄oho sampe aka Pafos. Ta aka siad̄oho eda angi lab̄o sab̄ua dou Yahudi, mangara la Bar Yesus. Sia dou mataki sihi makanahu weki nabi.

⁷Sergius Paulus, gubernu pulau ede eded̄u soba d̄enina lab̄o dou mataki sihi ede. Gubernu ede eded̄u sab̄ua dou maloa timba ra lemba. Sia ouna la Barnabas ro la Saulus b̄ara sia nane'eku ringa nggahi ra eli Ruma Hatalla.

⁸Pala la Barnabas ro la Saulus wati ca'u b̄a la Elimas dou maloa sihi ede, b̄ara la Elimas (edeku ngarana ade nggahi Yunani) ngupana ncai loakud̄u gubernu ede ai to'ina imbi d̄i Ruma Isa.

⁹Pala la Saulus — ma d̄ipehekai la Paulus — ra kuasakai b̄a Roh Allah, ndad̄ina sia tio kab̄aena dou maloa sihi ede,

¹⁰edempara nggahina, ”Oe, dou mana'e kukukeko, nggomi madab̄ae! Nggomi musu samenana ma taho. B̄ab̄auku nggomi wati ne'ekaimu dengga ka'iha rania Ruma Hatalla d̄imakasalama manusia?

¹¹Ake tiopu, Ruma d̄imahukumna nggomi! Nggomi d̄imandad̄i mbuda, sampe nggomi wati loamu eda wali taroa liro samporo wakatu.” Wakatu ede wa'u la Elimas iuna wara apu ma me'e mab̄onto madana, ndad̄ina sia lampa d̄aro ngupana dou d̄imad̄andana.

¹²Wakatu eda b̄a gubernu ede au ma wa'ura ndad̄i, sia imbina d̄i Ruma Isa, b̄ara sia na'ipiku ca'una d̄i ngoa ra tei mab̄oha Ruma.

¹³Rad̄i Pafos, la Paulus ro lengad̄ohona lojana lao aka Perga d̄i Pamfilia. Ta ede la Yahya Markus tu'u wi'ina siad̄oho, edempara dula mbali aka Yerusalem.

¹⁴Rad̄i Perga, siad̄oho lampa ra lao walina lao aka Antiokhia d̄i Pisidia, edempara d̄i ainaina Sabat siad̄oho lao dohona d̄i ade uma sambeakai.

¹⁵Sawa'u b̄a baca wea Buku Musa ro Buku Nabi-nabi, dou-dou mana'ekaina uma sambea ede kauna sod̄i dou d̄i la Paulus ro lengad̄ohona, ”Cina ra angi, nggara warasi d̄i ngoa ra teimu d̄i ru'u b̄a dou-dou ake, dod̄oku takaronggapu ngoa ra tei ede.”

¹⁶La Paulus kid̄i lalona, edempara mbeina isara kai rimana, edempara nggahina, ”Cina ra angiku bangsa Israel ro samenana cina ra angi ma kalaina mawara ta ake ma to'a d̄i Ruma Hatalla! Coba taringa ra kade'epu nggahi ra eli nahu:

¹⁷ Ruma Hatalla dou bangsa Israel wa'ura kad̄alena wa'i ra waro ndaita, ro kandad̄ina bangsa ake bangsa ma na'e aipu wakatu siad̄oho ngge'ena d̄i Mesir kai dou lai rasa. Edempara kai kuasana ma na'e ra ntoru Ruma Hatalla wa'a kalosana siad̄oho d̄i Mesir.

¹⁸ Sia nasabaku d̄i ruku ra rawi siad̄oho d̄i so sarae upa mpuru mba'a ntoina.

¹⁹ Pidu mbua bangsa kaleli b̄a Sia d̄i dana ra rasa Kana'an d̄i cengga-cenggakaina dana ra rasa ede d̄i ru'u b̄a bangsa Israel loakud̄u bangsa ede d̄imandad̄i ntau siad̄oho.

²⁰ Sara'ana ede ndad̄ina 450 mba'a ntoina. Sawa'u b̄a cengga dana ra rasa Kana'an ede, Ruma Hatalla mbeina d̄i siad̄oho hakim-hakim. Hakim macumpukaina eded̄u Nabi Samuel

²¹ Edempara siad̄oho rahona sab̄ua dou sangaji. Ruma Hatalla mbeina d̄i siad̄oho la Saul ana la Kis rad̄i suku bangsa Benyamin d̄imandad̄i sangaji siad̄oho upa mpuru mba'a ntoina.

²² Sawa'u b̄a Ruma Hatalla kalondona b̄ora sia, Ruma Hatalla hantana la Daud d̄imandad̄i sangaji siad̄oho. Ro akeku ra nggahi b̄a Ruma Hatalla mab̄oha la Daud, ’Nahu wa'ura rakaku la Daud ana la Isai ede sab̄ua dou makasana wea ade-Ku. Siaku dou d̄imakarawina rakane'e b̄a Nahu.’

²³Rad̄i londo ra mai la Daud edeku Ruma Hatalla masadiana d̄i ru'u b̄a bangsa Israel sab̄ua dou Sangaji Mambei salama, b̄une rasake-Na. Ro Ruma Isa edeku Sangaji Mambei salama ede.

²⁴ Sawatipu Ruma Isa kalampana taki ra puta-Na, la Yahya wa'ura nggahina d̄i dou-dou Israel loakud̄u siad̄oho tobana rad̄i dosa-dosa siad̄oho ro d̄i kandeu karaso.

²⁵ Ro d̄enimpara cumpukai karawina, nggahi la Yahya d̄i dou-dou, ’Couku nahu ake nggahi b̄a nggomid̄oho? Nahu laina Dou ra ngena b̄a nggomid̄oho. Kawarapu, Dou ede d̄imamai sawa'u b̄a nahu; kone d̄imahengga wea sapatu-Na nahu wati patuna.’

²⁶Cina ra angi londo ra mai Ibrahim, ro sara'ana cina ra angi ma kalaina ta ake ma to'a d̄i Ruma Hatalla! Ruma Hatalla wa'ura nggaduna d̄i ndai haba makasalama ede;

²⁷b̄ara dou-dou ma ngge'e d̄i Yerusalem ro dou-dou mana'ekaina siad̄oho wati kawarana weki b̄a one Siaku mambei salama ede. Siad̄oho wati loana ka'ao ngoa ra tei b̄a nabi-nabi ra baca wea d̄i sanikina ainaina Sabat, ndad̄ina siad̄oho hukumna Ruma Isa. Pala justru kai karawina b̄une ede siad̄oho makandad̄ina b̄a one au rakarongga b̄a Ruma d̄i ade nifi nabi-nabi ede d̄imandad̄i.

²⁸ Konena siad̄oho wati loana raka eda au-au rau d̄i Sia ma patu d̄i b̄ab̄u kai hukuma made, pala siad̄oho rahona d̄i Pilatus loakud̄u Sia d̄i hade.

²⁹ Ro sawa'u b̄a siad̄oho kanggori sara'a karawina b̄une ra tunti ade Alkitab mab̄oha Sia, siad̄oho kalondona timba-Na d̄i haju salib, edempara toho wi'ina Sia d̄i ade rade.

³⁰Pala Ruma Hatalla makamori mbali-Na rad̄i madena.

³¹ Edempara pila-pila nai ntoina Sia mai katadana weki d̄i dou-dou ma wa'ura mai lab̄o Sia rad̄i Galilea lao aka Yerusalem. Siad̄oho edeku ma wunga ake mandad̄i sakasi-sakasi d̄i ru'u b̄a Sia d̄i bangsa Israel.

³²Ndad̄i, ake nami makaronggana Haba Mataho ede d̄i ru'u b̄a nggomid̄oho: Au ma wa'ura sake b̄a Ruma Hatalla d̄i wa'i ra waro ndai,

³³ ede wa'ura karawi b̄a Sia d̄i ndai kai kamori mbalina Ruma Isa rad̄i madekaina. B̄ara ade Zabur ma kad̄uakaina wara ra tunti, ’Nggomiku Ana-Ku, d̄i ainaina ake Nahu wa'ura ndad̄i Ama-Mu.’

³⁴ Ruma Hatalla wa'ura kamori mbalina Sia rad̄i madekaina. Ake Sia wati d̄ima'iu wali made d̄i ade rade. Mab̄oha lampa rawi ede nggahi Ruma Hatalla, ’Nahu d̄imambei Nggomi sake maraso ro Nahu wati d̄ima'ingkana, ma wa'ura sake b̄a Nahu d̄i la Daud.’

³⁵ Ndede rau d̄i ade ayat makalai nggahina, ’Nggomi wati co'omu Ada-Mu ma to'a ede mbai d̄i ade rade.’

³⁶La Daud wa'ura made ro d̄i umbu rau sama-sama lab̄o wa'i ra warona, sawa'u b̄a sia karawina au rakaukai d̄i sia b̄a Ruma Hatalla. Timba la Daud rau wa'ura leli mpoi sara'ana.

³⁷Pala Ruma Isa, rakamori mbali b̄a Ruma Hatalla d̄i ade madekaina, Ruma Isa ede wati leli cumpuna.

³⁸B̄ara ndedena cina ra angi, pab̄uapu nggomid̄oho b̄ademu b̄a one kai Ruma Isa ake haba mab̄oha kangampu wea dosa d̄i ngoa ra kahaba d̄i nggomid̄oho; nggomid̄oho pab̄uapu b̄ademu b̄a one sanikina dou ma imbi d̄i Sia, d̄i hori wea sara'a dosana ma wati loa fura kai ncai parenta Ruma Hatalla rakarongga b̄a la Musa.

³⁹

⁴⁰B̄ara ndedena nggomid̄oho pab̄uapu tio kab̄aemu, ai to'ina ndad̄ina d̄i nggomid̄oho au ranggahi b̄a nabi-nabi ake,

⁴¹ ’Kade'e kab̄aepu, oe nggomid̄oho ma ca'u kab̄awa ra katuna! Nggomid̄oho d̄i midi ademu, edempara mademu! b̄a one jamana ake wunga wara d̄i karawi b̄a Nahu ma ndai nggomid̄oho wati d̄ima'imbina, konena wara dou mangoa kab̄aena d̄i nggomid̄oho.’ ”

⁴²Wakatu la Paulus ro la Barnabas tu'u wi'ina uma sambeakai ede, dou-dou d̄i uma sambeakai ede rahona d̄i siad̄oho mai wali d̄i ainaina Sabat makento, d̄imangoa kab̄ae walina mab̄oha lampa rawi ede.

⁴³Sawa'u b̄a losa dou-dou d̄i ade uma sambeakai ede, la Paulus ro la Barnabas lampa b̄atu b̄a dou Yahudi mamboto ro dou bangsa makalai ma wa'ura lu'u agama Yahudi. Edempara rasu-rasu ede ngoa ra tei katahona siad̄oho loakud̄u siad̄oho w'i kai weki ntuwuna d̄i rahama Ruma Hatalla.

⁴⁴D̄i'ainaina Sabat makentona ede, ne'empara sara'ana dou d̄i kota ede, mai kade'ena nggahi ra eli Ruma.

⁴⁵Wakatu eda b̄a dou-dou Yahudi dou mamboto ede, siad̄oho na'ipiku hiana adena. Siad̄oho kab̄awa ra katunana la Paulus ro wati ca'una kade'e d̄i sara'a ranggahina.

⁴⁶Pala kai ipi disa wali la Paulus ro la Barnabas nuntu ntirina. Nggahi siad̄oho, ”Nggahi ra eli Ruma Hatalla pab̄uaku d̄ikarongga ulu d̄i nggomid̄oho. Pala b̄ara nggomid̄oho wati ne'emu tarimana, nggomid̄oho wa'ura katantu b̄a ndaimu b̄a one nggomid̄oho wati patuna matarima mori masapodakaina ro ma'ederahid̄i. Ro ake nami matu'u wi'i nggomid̄oho ro lao aka bangsa makalai.

⁴⁷ B̄ara akeku rakaukai b̄a Ruma d̄i nami; nggahi Ruma, ’Nahu mawa'ura katantuna nggomi d̄imandad̄i taroa d̄i ru'u b̄a dou-dou bangsa makalai ma laina Yahudi, loakud̄u nggomid̄oho kamaimu salama d̄i ru'u b̄a sara'ana bangsa.’ ”

⁴⁸Wakatu dou-dou bangsa makalaina ma laina Yahudi ringana ede, siad̄oho na'ipiku neo adena, edempara roi ra wadina d̄i nggahi ra eli Ruma. Ro dou-dou ma wa'ura katantu b̄a Ruma Hatalla d̄imaraka mori masapodakaina ro ma'ederahid̄i, dou-dou ede na'imbiku.

⁴⁹Nggahi ra eli Ruma mbou rero tab̄e-b̄e rau d̄i samenana dana ra rasa ede.

⁵⁰Pala dou-dou mana'ekai kota ede ro dou-dou siwe d̄i kalompo dou-dou mana'e b̄ora ma dahu d̄i Ruma Hatalla, sad̄u'u b̄a dou-dou Yahudi. Siad̄oho kamaina musu b̄a dou d̄i la Paulus ro la Barnabas, ro katesana siad̄oho d̄uana rad̄i dana ra rasa ede.

⁵¹ Ndad̄i rasu-rasu ede furana kalub̄u d̄i ed̄i siad̄oho d̄i tando dou-dou ede d̄i kawarakaina, edempara laona aka Ikonium.

⁵²Dou-dou ma'imbi d̄i Antiokhia na'ipiku neo adena ro kuasakai b̄a Roh Allah.