Read Bima KISAH RASU-RASU 14 Bible Online

KISAH RASU-RASU 14 - Bima bible

KISAH RASU-RASU 14

¹La Paulus ro Barnabas na'iuku lampa rawi ma sama d̄i Ikonium. Siad̄oho lao rauna aka uma sambeakai Yahudi ro caru lao nuntu ra nggahina ndad̄ina mboto dou Yahudi ro malaina Yahudi ndad̄i imbi d̄i Ruma Isa.

²Pala dou-dou Yahudi ma wati ngawa imbi, nasad̄u'uku dou-dou malaina Yahudi, ndad̄i siad̄oho nakamaiku iha ade d̄i dou-dou ma imbi d̄i Ruma Isa.

³B̄ara ndedena la Paulus ro la Barnabas ngge'e ntoina ta ede. Ro kai disana siad̄oho nuntu ra nggahi mab̄oha Ruma. Ndad̄i Ruma rau mabukutina b̄a one haba siad̄oho mab̄oha meci ra ca'u-Na ede napodaku; Sia mbeina d̄i siad̄oho kuasa d̄imakarawina lampa rawi-lampa rawi mab̄isa ra guna ro lampa rawi-lampa rawi maheba poda.

⁴Pala dou-dou d̄i kota ede wati ncihi ncao angi d̄i sab̄ua ro ma kalaina; wara ma horu dou-dou Yahudi ro wara mahoru rasu-rasu ede.

⁵Edempara dou-dou Yahudi lab̄o dou-dou mana'ekaina sama-sama lab̄o dou-dou malaina Yahudi makasama weki ne'e kancoki ro mane'e tob̄a kai wadu rasu-rasu ede.

⁶Pala rasu-rasu ede nab̄adeku d̄imandad̄i ede, edempara lao pesona weki aka Listra ro Derbe, eded̄u kota-kota d̄i Likaonia, ro d̄i dana ra rasa d̄i kompe ra peina.

⁷Ta aka siad̄oho ngoa ra kahaba walina Haba Mataho ede.

⁸D̄i Listra waraku sab̄ua dou mone ma made b̄inci ed̄ina ra tampu'u aipu wara wa'una, ndad̄ina sia watipu iuna loa lampa, b̄ara ed̄ina na'ipiku romena.

⁹Ta aka dou ede doho kade'ena nggahi ra eli la Paulus. La Paulus na'edaku b̄ara dou ede na'imbiku ro b̄ara ndedena sia loa d̄i kataho wea supuna. Edempara la Paulus ntanda kab̄aena sia

¹⁰ro kai eli ma na'e nggahi la Paulus, ”Kid̄i mpendera!” Dou ede tu'u nggoncu kid̄ina edempara lampana.

¹¹Wakatu eda b̄a dou mamboto au rakarawi b̄a la Paulus, siad̄oho kanggicana kai nggahi Likaonia, ”Dewa-dewa wa'ura londona d̄i dunia kai pahu manusia.”

¹²Edempara la Barnabas tangarakai b̄a siad̄oho Zeus, ro la Paulus tangarakai b̄a siad̄oho Hermes, b̄ara siaku ma nuntu ra nggahi.

¹³Imam makarawi d̄i hid̄i sambeakai Dewa Zeus ma wara d̄i tando kota, mai wa'ana capi-capi rangga ro b̄unga-b̄unga aka tad̄a lawa kota. Sia nane'eku b̄atu lab̄o dou mamboto ede ne'e d̄onggo ra mbei koroba d̄i rasu-rasu ede.

¹⁴Wakatu la Barnabas ro la Paulus ringana au d̄i ne'e karawi b̄a dou-dou ede, siad̄oho sipa-sipana kani ra lombona ro rai salahona lao aka woha dou mamboto ede, edempara kanggicana,

¹⁵ ”Oe, b̄ab̄auku karawi kai b̄a nggomid̄oho ake? Nami ake manusia rau b̄une nggomid̄oho! Nami waramu ta ake d̄imangoa ra kahaba Haba Mataho d̄i nggomid̄oho loakud̄u nggomid̄oho pakimu lampa rawi-lampa rawi ma wati wara onena ake ro maipu d̄i Ruma Hatalla ma mori, makandad̄ina langi ro dana ro moti ro sara'ana ma wara tad̄eina.

¹⁶Aipu wakatu ntoina Ruma Hatalla co'ona bangsa-bangsa mori b̄atu rakane'e ndai siad̄oho.

¹⁷Pala Sia wati nefana mbei bukuti-bukuti mab̄oha weki ndai-Na, eded̄u kai karawina mataho. Sia mbeina ura rad̄i langi ro hasi dana d̄i wakatu oruna. Sia mbeina d̄i nggomid̄oho ngaha ra nono ro kasana weana ademu.”

¹⁸Pala kai nggahi ra eli ede mbuipu nggonggi rauna rasu-rasu ede tapana dou-dou ede mad̄onggo ra mbei koroba d̄i siad̄oho.

¹⁹Pila-pila dou Yahudi ma mai rad̄i Listra rad̄i Antiokhia d̄i Pisidia ro rad̄i Ikonium mapangaruna dou-dou mamboto ede ndad̄ina dou mamboto ede mahoruna siad̄oho. Siad̄oho tob̄ana la Paulus kai wadu, edempara randa kalosana sia ari mai b̄a kota. Kacai b̄a siad̄oho sia wa'ura made,

²⁰pala wakatu dou-dou ma imbi ta ede makid̄i hekona, sia tu'una ro lu'u mbalina aka kota. B̄ala aisanai sia laona aka Derbe sama-sama lab̄o la Barnabas.

²¹D̄i Derbe, la Paulus ro la Barnabas ngoa ra kahabana Haba Mataho ede ro mboto dou mandad̄i imbi d̄i Ruma Isa. Sawa'u b̄a ede siad̄oho dula mbalina aka Listra, edempara laona aka Ikonium, edempara laona aka Antiokhia d̄i Pisidia.

²²D̄i kota-kota ede siad̄oho katenggona ade dou-dou mab̄atu Ruma Isa ro ngoa ra tei katahona siad̄oho loakud̄u siad̄oho ngge'empa imbina d̄i Ruma Isa. ”Ndai pab̄uaku mboto iu susa ra ncoki ulu wa'u, ampona ndai loa iu mori sana d̄i Karaja'an Allah,” ndedeku rasu-rasu ede ngoa ra teina d̄i dou-dou ma'imbi d̄i Ruma Isa d̄i kota-kota ede.

²³Ro d̄i sanikina ela Ruma, la Paulus ro la Barnabas hantana dou-dou mana'ekaina d̄i ru'u b̄a ela Ruma ede. Edempara kai do'a ro puasana, siad̄oho d̄onggona dou-dou mana'ekaina ede d̄i Ruma ra imbikai b̄a siad̄oho ede.

²⁴Sawa'u b̄a ede la Paulus ro la Barnabas lampa lao walina, siad̄oho lampa saina dana ra rasa Pisidia ro sampe aka Pamfilia.

²⁵Ro sawa'u b̄a siad̄oho ngoa ra kahabana nggahi ra eli Ruma Hatalla d̄i Perga, siad̄oho laona aka Atalia.

²⁶Rad̄i ede siad̄oho lojana dula mbali lao aka Antiokhia. Edeku kota hid̄i siad̄oho ntoina rad̄onggo d̄i rahama Ruma Hatalla, loakud̄u siad̄oho karawina lampa rawi ma wunga ake wa'ura kanggori b̄a siad̄oho.

²⁷Wakatu rongga aka Antiokhia, siad̄oho kab̄orona dou-dou rad̄i ela Ruma ede, edempara caritakaina sara'ana rakarawi b̄a Ruma Hatalla kai siad̄oho. Siad̄oho carita rauna mab̄oha rab̄unena Ruma Hatalla wa'ura henggana ncai loakud̄u dou-dou malaina Yahudi imbina d̄i Ruma Isa.

²⁸D̄i kota ede la Paulus ro la Barnabas ngge'e ntoina lab̄o dou-dou ma'imbi.