Read Bima KISAH RASU-RASU 15 Bible Online

KISAH RASU-RASU 15 - Bima bible

KISAH RASU-RASU 15

¹ Wara pila-pila dou rad̄i Yudea lao aka Antiokhia ro ngoa ra teina dou-dou ma'imbi d̄i Antiokhia ede b̄a one siad̄oho watisi sunana b̄une ranggahi b̄a hukum Musa, siad̄oho wati loa d̄ikasalama.

²La Paulus ro la Barnabas wati ca'u podana au ranggahi b̄a dou-dou ede. Cumpukaina katantu lalokai loakud̄u la Paulus ro la Barnabas lab̄o pila-pila dou makalai rad̄i Antiokhia lao aka Yerusalem d̄i nuntukaina masa'ala ede lab̄o rasu-rasu ro dou-dou mana'ekaina ta aka.

³Ela Ruma d̄i Antiokhia lao otona siad̄oho sampe ari mai b̄a kota, edempara siad̄oho laona tancai Fenisia ro Samaria. Ta aka siad̄oho caritana rab̄unena dou-dou malaina Yahudi wa'ura d̄onggo ra mbei weki d̄i Ruma Hatalla. Haba ede nakaneo podaku ade dou-dou ma imbi ta ede.

⁴Wakatu siad̄oho rakara Yerusalem, siad̄oho tarima ao kataho b̄a ela Ruma, ro b̄a rasu-rasu ro dou-dou mana'ekaina. Edempara siad̄oho caritana d̄i dou-dou ede mab̄oha sara'ana ra karawi b̄a Ruma Hatalla kai ncai siad̄oho.

⁵Pala pila-pila dou rad̄i kalompo Farisi ma wa'ura imbi, tu'u kid̄ina ro nggahina, ”Dou-dou bangsa makalaina ma wa'ura imbi ede pab̄uku d̄isuna ro d̄ikau pab̄ua b̄atu hukum Musa.”

⁶Edempara rasu-rasu ro dou-dou mana'ekaina kab̄oro weki d̄imafakakaina lampa rawi ede.

⁷ Ntoi poda siad̄oho weha kali cempe nggahi angi. Cumpukaina tu'u kid̄i la Petrus ro nggahina, ”Cina ra angi! Ndai nggomid̄oho mawa'ura b̄ade b̄a one pila-pila nai ma rawa'u Ruma Hatalla makad̄ale nahu d̄i ade woha nggomid̄oho d̄imangoa ra kahaba Haba Mataho ede d̄i ru'u b̄a dou-dou malaina Yahudi, loakud̄u siad̄oho rau ringa ro imbi.

⁸ Ro Ruma Hatalla ma pata ade manusia wa'ura katadana b̄a one Sia matarima siad̄oho; Sia katadana lampa rawi ede kai mbeina d̄i siad̄oho Roh Allah sama b̄une rambei b̄a Sia d̄i ndai rau.

⁹Ruma Hatalla wati kalai-laina ndai lab̄o siad̄oho. Sia karasona ade siad̄oho, b̄ara siad̄oho imbina.

¹⁰B̄ab̄auku nggomid̄oho ne'ekaimu ao Ruma Hatalla ake kai kaumu mbei pab̄ua d̄ikarawi ma tani d̄i ru'u b̄a dou-dou ma'imbi ake, wa'i ra waro ndai ro ndai rau wati sanggota karawi lampa rawi ede?

¹¹Pala, ndai ta'imbiku ro ndai d̄ikasalama b̄ara anugera Ruma Isa; ndede rauja siad̄oho.”

¹²Ndad̄i midi mena dou ma kab̄oro weki ta ede. Edempara siad̄oho kade'ena la Barnabas ro la Paulus macarita mbalina sara'a lampa rawi mab̄isa ra guna ro lampa rawi-lampa rawi maheba poda rawa'u karawi b̄a Ruma Hatalla kai ncai siad̄oho d̄i ade woha dou-dou bangsa makalaina ma laina Yahudi.

¹³Sawa'u b̄a siad̄oho nggori ngoana ede, nggahi la Yakub, ”Cina ra angi! Takade'epu nggahi nahu.

¹⁴La Simon b̄ou podapu ngoa kab̄aena rab̄unena Ruma Hatalla ra'aipu saramba wa'una katada meci ra ca'u-Na dou-dou malaina Yahudi, kai ne'ena kad̄ale d̄i ade woha siad̄oho dou-dou makalai ma d̄imandad̄i ela-Na.

¹⁵Ede ncihi ncao lab̄o rakarongga b̄a nabi-nabi nggahi ra eli Ruma. B̄ara wara ratunti ndake,

¹⁶ ’Sawa'u b̄a ede Nahu d̄imamai wali,’ nggahi Ruma, ’Nahu d̄imatu'u mbalina uma la Daud ma wa'ura ndumba, ro makataho wea b̄ara ndumbana, edempara katu'u mbali;

¹⁷loakud̄u sara'ana dou ma sewina ede mangupa Ruma, sama-sama lab̄o sara'ana bangsa makalai ma laina Yahudi ma wa'ura ou b̄a Nahu d̄imandad̄i ntau Nahu.’ Ndedeku nggahi b̄a Ruma,

¹⁸ma wa'ura ngoana lampa rawi ede aipu ntoi wa'una.”

¹⁹”Ndad̄i kananu b̄a nahu,” nggahi la Yakub, ”Ndai wati loata kasusa dou-dou malaina Yahudi ede ma d̄onggo wekina d̄i Ruma Hatalla.

²⁰ Pala ndai pab̄uaku tunti sura d̄i siad̄oho ro mangoa ra tei kataho siad̄oho loakud̄u siad̄oho aina ngahana ngaha ra nona najis ma wa'ura d̄onggo ra mbei d̄i berhala, atao ngaha hi'i binata ma made rake'e, atao ngaha ra'a. Ro loakud̄u siad̄oho kad̄o'ona weki d̄i ruku ra rawi ma dab̄ae.

²¹B̄ara hukum Musa wa'ura ntoi rabaca wea d̄i sanikina ainaina Sabat d̄i uma-uma sambeakai, ro d̄i ngoa ra kahaba d̄i sara'ana kota.”

²²Rasu-rasu ro dou-dou mana'ekaina, masama-sama lab̄o sara'ana anggota ela Ruma ede manggahi cumpukaina kad̄alena pila-pila dou d̄i ade weki siad̄oho d̄i ne'e nggadu aka Antiokhia sama-sama lab̄o la Paulus ro Barnabas. Edempara siad̄oho kad̄alena la Silas ro la Yudas ma d̄ipehekai rau Barsabas. D̄ua dou ake eded̄u dou-dou rakad̄ale d̄i ade weki dou-dou ma'imbi d̄i Yerusalem.

²³Sama-sama lab̄o dou ranggadu ede siad̄oho nggadu rauna salela sura ma eli ndake, ”D̄i ru'u b̄a cina ra angi bangsa makalai ma laina Yahudi, ma ngge'e d̄i Antiokhia, Siria ro Kilikia. Salam do'a nami, rasu-rasu ro dou-dou mana'ekaina, eded̄u cina ra angimu.

²⁴Ringa b̄a nami wara pila-pila dou d̄i weki nami ma wa'ura lao d̄i nggomid̄oho ro kakacona ro kadarurana ade nggomid̄oho kai ngoa ra tei b̄a siad̄oho. Sapodakaina nami wati kaumu siad̄oho karawi b̄une ede.

²⁵B̄ara ndedena nami wa'ura mafakamu ro sara'ana satuju d̄i kad̄ale pila-pila dou ro nggadumu siad̄oho d̄i ru'u b̄a nggomid̄oho. Siad̄oho d̄imalao sama-sama lab̄o la Barnabas ro la Paulus rameci ra ca'u b̄a nami.

²⁶D̄ua dou ake eded̄u dou-dou ma wa'ura te'e nawana b̄ara Ruma ndai Ruma Isa Al Masih.

²⁷Ndad̄i, nami manggadu la Yudas ro la Silas d̄i nggomid̄oho. Ndai siad̄ohoku makarongga lalona d̄i nggomid̄oho haba ratunti ade sura ake rau.

²⁸Roh Allah wa'ura satujuna — ro nami rau satuju — loakud̄u nggomid̄oho b̄ab̄aina mbei su'u ra tundu ma ncewi tani ntewi kaisi lab̄o su'u ra tundu ma paralu akempa:

²⁹aina ngahamu ngaha ra nono ma wa'ura d̄onggo ra mbei d̄i berhala; aina ngaha ra'a, aina ngaha hi'i ma made rake'e, ro kad̄o'opu wekimu d̄i lampa rawi ma dab̄ae. Nggara kad̄o'osi wekimu d̄i lampa rawi ede, nggomid̄oho wa'ura karawimu lampa rawi ma taho. Sandede wa'umpa, salam!”

³⁰Sawa'u rojo d̄i laokaina, siad̄oho rakakai ede laona aka Antiokhia. Ta aka siad̄oho ou sara'ana anggota ela Ruma kab̄oro weki edempara karonggana sura ede.

³¹Wakatu baca b̄a ela Ruma sura ede, siad̄oho neo poda adena b̄a isi sura ede ma rerena ade siad̄oho.

³²La Yudas ro la Silas, eded̄u nabi rau, ntoi nuntuna lab̄o cina ra angi ma imbi d̄i Antiokhia ede d̄ikau kapoda ade ro d̄i disakai d̄i ru'u b̄a siad̄oho.

³³Sawa'u b̄a la Yudas ro la Silas ngge'e ta aka pila-pila wakatu ntoina, dou-dou ma'imbi d̄i Antiokhia ede nggadu mbalina siad̄oho ro kauna siad̄oho karongga salam d̄i dou-dou ma ranggaduna siad̄oho. [

³⁴Pala la Silas nane'e ngge'e d̄i Antiokhia.]

³⁵La Paulus ro la Barnabas ngge'e rau pila-pila wakatu ntoina d̄i Antiokhia. Ta aka siad̄oho ngoa ra teina ro ngoa ra kahabana nggahi ra eli Ruma sama-sama lab̄o dou mamboto makalaina.

³⁶Wati ntoina sawa'u b̄a ede nggahi la Paulus d̄i la Barnabas, ”Mai ndai tadula mbaliku lao lamba cina ra angi ma imbi d̄i Ruma Isa d̄i samenana kota tab̄era ngoa ra kahaba b̄a ndai nggahi ra eli Ruma; loakud̄u eda b̄a ndai b̄une haba siad̄oho.”

³⁷La Barnabas nane'eku wa'a la Yahya Markus,

³⁸ pala iu b̄a la Paulus wati tahona wa'a la Markus, ma wati ngawa karawi sama lab̄o siad̄oho ro matu'u wi'i siad̄oho d̄i Pamfilia.

³⁹Edempara la Paulus ro la Barnabas nacence ncihi angi poda, ndad̄i cumpukaina siad̄oho ncengga lampana: La Barnabas wehana la Markus ro lao lojana lab̄o sia aka Siprus.

⁴⁰La Paulus kad̄alena la Silas edempara lao lab̄ona sia sawa'u b̄a cina ra angi ma d̄i Antiokhia ede d̄onggona siad̄oho d̄i rahama Ruma.

⁴¹Siad̄oho rau lao kalilina Siria ro Kilikia; ta aka siad̄oho ngoa ra tei d̄i tenggokai ela Ruma.