Read Bima KISAH RASU-RASU 16 Bible Online

KISAH RASU-RASU 16 - Bima bible

KISAH RASU-RASU 16

¹La Paulus lao lampa walina aka Derbe, edempara lao walina aka Listra. Ta ede wara sab̄ua dou ma'imbi d̄i Ruma Isa mangara la Timotius. Inana dou Yahudi, ma wa'ura imbi d̄i Ruma Isa; pala amana dou Yunani.

²D̄iwoha dou-dou ma'imbi ma ngge'e d̄i Listra ro Ikonium, la Timotius na'ipiku mbouna kai sab̄ua dou ma taho ade.

³Ne'e b̄a la Paulus la Timotius b̄atuna sia; b̄ara ndedena sia sunana la Timotius. Sia karawina ede, b̄ara dou-dou Yahudi d̄i dana ra rasa ede sara'ana b̄ade b̄a one ama la Timotius dou Yunani.

⁴D̄isanikina kota ralaokai b̄a siad̄oho, siad̄oho karonggana d̄i dou-dou ma imbi d̄i au ranggahi cumpukai mawa'ura katantu b̄a rasu-rasu ro dou-dou mana'ekaina d̄i Yerusalem. Siad̄oho ngoa ra tei katahona d̄i dou-dou ma wa'ura imbi ede loakud̄u b̄atuna atora-atora ede.

⁵Ndad̄i ela Ruma ede nanaha tenggo imbina, ro saniki ainaina nanaha mboto orena.

⁶Roh Allah wati kauna la Paulus ro la Silas ngoa ra kahabana nggahi ra eli Ruma Hatalla d̄i propinsi Asia. Ndad̄i lampa ra lao siad̄oho tuwu walina lao aka dana ra rasa Frigia ro Galatia.

⁷Wakatu rakara d̄i kahampakai Misia, siad̄oho cobana lu'u aka propinsi Bitinia, pala Roh Ruma Isa makantana siad̄oho lao ta aka.

⁸Ndad̄i siad̄oho lampa b̄atuna Misia ro lao lalona aka Troas.

⁹Aimangad̄ina, d̄i Troas, la Paulus edana lampa rawi rakarongga b̄a Ruma. D̄i ade edana ede sia edana sab̄ua dou Makedonia makid̄i d̄i tandona ro raho poda-podana loakud̄u sia laona aka Makedonia d̄i bantukaina siad̄oho.

¹⁰Sawa'u b̄a la Paulus rakana eda lampa rawi ede, nami sadia lalo weki d̄i laokai aka Makedonia. B̄ara kai imbi podamu nami wehamu nggahi ra eli cumpukaina b̄a one Ruma Hatalla makauna nami ngoa ra kahabamu Haba Mataho ede d̄i ru'u b̄a dou-dou ta aka.

¹¹Nami tu'u wi'imu Troas ro loja lalomu lao aka Samotrake, ro b̄ala aisanai laomu aka Neapolis.

¹²Rad̄i ede nami laomu aka Filipi, sab̄ua kota kabupaten d̄i sarambana d̄i propinsi Makedonia. Filipi eded̄u rajaja b̄a karaja'an Roma. Ta aka nami ngge'emu pila-pila nai ntoina.

¹³Wakatu ainaina Sabat nami laomu aka kengge sori ari mai b̄a tad̄a lawa kota, b̄ara iu b̄a nami ta aka wara hid̄i sambeakai d̄i ru'u b̄a dou Yahudi. Edempara nami doho ro nuntu ra nggahimu lab̄o dou-dou siwe ma kab̄oro weki d̄i hid̄i ede.

¹⁴Sab̄ua dou d̄i ade weki siad̄oho eded̄u sab̄ua dou madaga kaena keta, ngarana la Lidia dou Tiatira. Sia nameci ra ca'uku Ruma Hatalla, edempara Ruma makaruku wea adena loakud̄u sia tarima aona au rangoa ra tei b̄a la Paulus d̄i sia.

¹⁵La Lidia ro sara'a iwa ra weki d̄i umana d̄ikandeu karaso. Sawa'u b̄a kandeu karaso sia undana nami. Nggahi sia, ”Nggara iusi b̄a itad̄oho mada poda-poda wa'ura imbiku d̄i Ruma Isa, mai ronggapu d̄i uma mada.” Edempara sia kau paksana nami loakud̄u nami b̄atu au rarahona.

¹⁶D̄isab̄ua ainaina wakatu nami wunga laomu aka hid̄i do'akai, nami eda angi lab̄omu sab̄ua dou siwe; sia ada dou. Dou siwe ede kuasa kai b̄a roh seta ma loa takasi rawi d̄imandad̄i kento. Kai tiona mori dou, dou siwe ede mbeina laba ma na'e d̄i ru'u b̄a rumad̄ohona.

¹⁷Dou siwe ede lampa b̄atu ntuwuna la Paulus ro nami lab̄o kanggica salahona, ”Dou-dou ake ada Ruma Hatalla Ma D̄ese Ra Ntasa! Siad̄oho maina d̄imangoa nggomid̄oho b̄uneku nggomid̄oho loakaimu salama!”

¹⁸Pila-pila nai ntoina dou siwe ede kanggica ncauna b̄une ede. La Paulus mbanina, ndad̄ina tambari sia edempara nggahina d̄i roh ede, ”Kai ngara Ruma Isa Al Masih nahu maparenta nggomi losa d̄i ade dou siwe ake!” Wakatu ede lalo roh ede tu'u wi'ina dou siwe ede.

¹⁹Wakatu kawara weki rumad̄ohona b̄a one ncai d̄i ru'u b̄a siad̄oho d̄i rakakaina piti mamboto wa'ura mbora, siad̄oho wa'u ro letona la Paulus ro la Silas, edempara randana d̄uana ede aka lapanga lao satando d̄i palisi.

²⁰Siad̄oho lao wa'a satandona la Paulus ro la Silas d̄i dou-dou mana'e b̄ora pamarenta Roma, edempara nggahina, ”Dou-dou ake dou Yahudi. Siad̄oho ndawina ngango d̄i kota ndai.

²¹Siad̄oho kauna dou karawi rabiasakai b̄a rasa ma wati ncihi ncao lab̄o hukum-hukum ndai, dou-dou Roma. Ndai wati loata tarima atao b̄atu karawi rabiasakai b̄a rasa ede!”

²²Dou mboto rau nab̄atu kalembi la Paulus ro la Silas; ro dou-dou mana'e b̄ora pamarenta sipa-sipana kani ra lombo d̄i sarumbu d̄ua rasu ede edempara kauna cambo dou siad̄oho d̄uana ede.

²³Sawa'u b̄a nggori cambo ka'ipina siad̄oho, siad̄oho kalu'u ade uma bui. Dou mana'ekai uma bui kauna tonggu kataho siad̄oho.

²⁴B̄ara rakaukai ede, dou mana'ekai uma bui ede matau siad̄oho ade uma bui ma d̄ei podana, ro ndantena ed̄i siad̄oho d̄i haju balo.

²⁵Kira-kira samana'e ai la Paulus ro la Silas wunga do'ana ro rawa roi ra wadina d̄i ru'u Ruma Hatalla. Dou-dou ra bui ma kalai rauna wunga kade'ena rawa siad̄oho.

²⁶Wed̄i lalompa mai epu ma na'e poda, sampe dasa uma bui ede kanggad̄o rau. Sara'ana tad̄a uma bui hengga weki ro rante randante kai sara'ana dou ra bui mbisa sara'a.

²⁷Dou mana'ekai uma bui ede wed̄i adena edempara tu'una. Wakatu eda b̄a sia tad̄a-tad̄a uma bui mahengga weki, sia olona peda d̄i ne'ekaina hade weki ndaina b̄ara sia kacaina dou-dou rabui wa'ura lao rai sara'a.

²⁸Pala la Paulus kanggica kana'e podana, ”Aina hade weki ndaimu! Nami sara'ana mbuipu wara ta ake!”

²⁹Dou mana'ekai uma bui ede rahona ilo edempara rai d̄eina, ro kai b̄ib̄i sarumbuna sia sujuna d̄i tando la Paulus ro la Silas.

³⁰Edempara sia wa'a kalosana siad̄oho ro nggahina, ”Cina ra angi, auku d̄i karawi b̄a nahu loakud̄u nahu d̄ikasalama?”

³¹Cambe b̄a la Paulus ro la Silas, ”Imbipu d̄i Ruma Isa! Nggomi d̄imasalama — nggomi ro sara'ana dou d̄i umamu!”

³²Edempara la Paulus ro Silas ngoa kab̄aena nggahi ra eli Ruma d̄i dou mana'ekai uma bui ede ro d̄i sara'ana dou ma wara d̄i umana.

³³D̄i'ai mab̄oha ede wa'u, dou mana'ekai uma bui ede wa'ana siad̄oho edempara karasona suwu-suwu siad̄oho. Edempara sia ro sara'ana dou d̄i umana d̄i kandeu karaso.

³⁴Edempara sia wa'ana la Paulus ro la Silas d̄i umana ro mbeina ngaha ra nono d̄i siad̄oho. Sia ro sara'a iwa ra wekina na'ipiku neo adena b̄ara siad̄oho ake na'imbiku d̄i Ruma Hatalla.

³⁵B̄ala aisanai aimasid̄i, dou-dou mana'ekai b̄ora pamarenta Roma kauna lao palisi aka uma bui d̄imakaronggana parenta loakud̄u la Paulus ro la Silas d̄ihori.

³⁶Dou mana'ekai uma bui ede ngoana ede d̄i Paulus. Nggahi sia, ”Cina ra angi, dou-dou mana'ekai b̄ora pamarenta wa'ura mbeina parenta d̄ihorikai ndaid̄ohomu. Ake ndaid̄ohomu loara lao dula. Selama taho ra ntai d̄i ncai!”

³⁷Pala nggahi la Paulus d̄i dou-dou palisi ede, ”Nami dou Roma. Kai wati d̄i paresa, nami wa'ura cambo d̄i tando dou mamboto ro kalu'u ade uma bui. Ro ake siad̄oho kauna lao nami kai midi-midi? Nami wati ngawamu! Kaupu mai ndaina dou-dou mana'e b̄ora pamarenta ede ta ake d̄imahorina nami.”

³⁸Palisi-palisi ede lao ngoana ede d̄i dou-dou mana'ekai b̄ora pamarenta Roma. Wakatu ringa b̄a dou-dou mana'e b̄ora ede b̄a one la Paulus ro la Silas dou Roma, siad̄oho ndad̄i dahu.

³⁹Edempara siad̄oho lao rahona kangampu d̄i la Paulus ro la Silas, edempara lao otona siad̄oho d̄uana losa d̄i ade uma bui, ro rahona loakud̄u siad̄oho lao peso weki rad̄i kota ede.

⁴⁰La Paulus ro la Silas tu'u wi'ina uma bui ede edempara laona aka uma la Lidia. Sawa'u b̄a eda angina lab̄o dou-dou ma'imbi ta aka, ro mbeina samanga d̄i siad̄oho, la Paulus ro la Silas laona.