Read Bima KISAH RASU-RASU 17 Bible Online

KISAH RASU-RASU 17 - Bima bible

KISAH RASU-RASU 17

¹La Paulus ro la Silas lampa ro lao walina kai ncai aka Amfipolis ro Apolonia edempara rongga d̄i Tesalonika. Ta aka wara uma sambeakai dou Yahudi.

²Ndad̄i la Paulus lao rauna aka uma sambeakai ede — b̄une ra nginakaina karawi b̄a sia nawarasi sab̄ua uma sambeakai dou Yahudi — edempara weha kali cempe nggahi ra eli lab̄o dou-dou ta ede mab̄oha ayat-ayat Alkitab. Sia karawina ede tolu kali ainaina Sabat mawati wara helana.

³Kai dasa ayat-ayat Alkitab sia tarangkana ro mbeina bukuti b̄a one Sangaji Mambei salama rasake b̄a Ruma Hatalla paraluku susa ra ncokina ro mori mbali rad̄i madena. ”Ruma Isa ngoa ra kahaba b̄a nahu d̄i nggomid̄oho ede, Siaku Sangaji Mambei salama rasake ede,” nggahi la Paulus.

⁴Pila-pila dou mandad̄i imbi edempara b̄atuna la Paulus ro la Silas; ndede rau mboto dou-dou Yunani ma dahu d̄i Ruma Hatalla, ro mboto wali dou-dou siwe rakaco'i b̄a dou.

⁵Pala dou-dou Yahudi nahiana. Siad̄oho ouna dou-dou ma lampa datantu rero d̄i ncai-ncai ro ndawina kalompo dou makangango rasa. Edempara siad̄oho kangangona d̄i sara'ana kota ede ro lao deina uma dou ma'imbi ma ngara la Yason d̄i ngupakaina la Paulus ro la Silas, b̄ara siad̄oho nane'eku wa'a kalosa la Paulus ro la Silas satando d̄i dou mamboto.

⁶Pala wakatu wati raka eda b̄a siad̄oho la Paulus ro la Silas, siad̄oho randana la Yason ro pila-pila dou ma'imbi makalaina d̄i tando dou-dou mana'ekai b̄ora ma kuasa d̄i kota ede. Kanggica siad̄oho, ”Dou-dou ake kakaco rerona! Ake kota ndai rau maikai b̄a siad̄oho rau,

⁷ro la Yason wa'ura tarimana siad̄oho d̄i umana. Siad̄oho sara'ana sapana atora-atora Kaisar Roma, b̄ara siad̄oho manggahi b̄a one wara wali sangaji makalai ma ngara Isa.”

⁸Kai nggahi ra elina ede siad̄oho kandad̄ina ngango dou mamboto ro dou-dou mana'ekaina d̄i kota ede.

⁹Edempara dou-dou mana'ekaina ede kauna la Yason ro dou-dou ma'imbi ma kalaina ede cola piti co'i d̄i horikai. Sawa'u b̄a ede siad̄oho ampo d̄i hori.

¹⁰Aimangad̄i ede dou-dou ma'imbi d̄i kota ede kauna la Paulus ro la Silas lao aka Berea. Sawa'u b̄a ronggana ta ede, la Paulus ro la Silas laona aka uma sambeakai Yahudi.

¹¹Dou-dou d̄i Berea nancewi taho adena ntewi kaisi lab̄o dou-dou d̄i Tesalonika. Kai neo adena siad̄oho kade'ena haba mab̄oha Ruma Isa, ro sanikina ainaina siad̄oho baca katantuna Alkitab d̄i b̄adekaina sab̄ua ngoa ra tei la Paulus ede napodaku.

¹²Mboto d̄i ade weki siad̄oho ma'imbi d̄i Ruma Isa, ro wati sato'ina dou-dou Yunani ra kaco'i b̄a dou, ma imbi; nataho dou siwe ro dou mone.

¹³Wakatu ringa b̄a dou-dou Yahudi d̄i Tesalonika b̄a one la Paulus mangoa ra kahaba rauna nggahi ra eli Ruma Hatalla d̄i Berea, siad̄oho rau maina d̄i Berea, ro sad̄u'una dou-dou ro kandad̄ina darura dou-dou ta ede.

¹⁴Cina ra angi d̄i Berea ede lao oto rocina la Paulus aka kengge moti, pala la Silas ro la Timotius mbuipu ngge'ena d̄i kota ede.

¹⁵Sawa'u b̄a la lao otona la Paulus sampe aka Atena, cina ra angi ede dula mbali aka Berea kai wa'ana nggahi ranggadu la Paulus loakud̄u la Silas ro la Timotius b̄atu kento rocina sia.

¹⁶Wunga mbuipu la Paulus ngenana la Silas ro la Timotius d̄i Atena, ncoki adena eda kota ede b̄ini b̄a berhala-berhala.

¹⁷B̄ara ndedena d̄i uma sambeakai, la Paulus weha kali cempe nggahi ra eli angi lab̄o dou-dou Yahudi ro dou-dou makalaina ma nemba Ruma Hatalla ta ede. Ndede rauja d̄i amba-amba sanikina ainaina sia weha kali cempe nggahi angi lab̄o sanikina dou ma wara ta ede.

¹⁸Guru-guru mab̄atu Epikuros ro mab̄atu Stoa macence ncihi lab̄o sia. Pila-pila dou d̄i ade weki siad̄oho manggahi, ”Dou ake au b̄adena? Ilimuna sato'impa, pala sia wale asana!” Pila-pila dou makalaina manggahi, ”Sia nangoa ra kahabaku mab̄oha berhala-berhala bangsa makalaina.” Nggahi ndedekai siad̄oho, b̄ara la Paulus manuntu ra nggahi mab̄oha Ruma Isa ro mab̄oha mori mbali sawa'u b̄a made.

¹⁹Edempara siad̄oho lao wa'ana la Paulus aka hid̄i mbolokai d̄i Doro to'i Areopagus. Ta aka nggahi siad̄oho d̄i sia, ”Nami mane'e b̄ade tana'o mab̄ou rangoa ra kahaba b̄a nggomi ede.

²⁰B̄ara nggomi makatadana lampa rawi d̄i mborakai b̄a aka d̄i ringa b̄a fiko nami. B̄ara ndedena nami mane'e b̄ade aona.” (

²¹B̄ara sara'ana dou-dou Atena ro dou-dou malu'u ma ngge'e ta ede nawancuku ca'una kampoi wakatu mantaru d̄i kade'ekaina ro nuntu ra nggahi mab̄oha lampa rawi-lampa rawi ma b̄ou.)

²²Wakatu la Paulus kid̄i d̄i tando dou-dou ma kab̄oro weki d̄i Areopagus ede, nggahi la Paulus, ”Oe dou-dou Atena! Eda b̄a nahu b̄a one nggomid̄oho d̄i ade sara'ana lampa rawi nggomid̄oho nawancuku to'amu d̄i agama.

²³B̄ara wakatu lampa kalili b̄a nahu kotamu ro tio kab̄ae b̄a nahu hid̄i-hid̄i sambeakaimu, nahu eda rauku sab̄ua hid̄i d̄i d̄onggo ra mbeikai korba; d̄i hid̄i ede ratunti, ’D̄iru'u b̄a Ruma Hatalla Ma Wati D̄ipata.’ Ya, Ruma Hatalla ranemba b̄a nggomid̄oho pala wati patamu Sia, Siaku rangoa ra kahaba b̄a nahu d̄i nggomid̄oho.

²⁴ Ruma Hatalla ma kandad̄ina dunia ake lab̄o sara'ana isina, Sia Ruma makuasa kai langi ro dana. Sia wati ngge'ena d̄i ade uma-uma berhala randawi b̄a manusia.

²⁵Sia wati paralu rauna bantu b̄a manusia, b̄ara Siaku ma mbei mori ra woko ro nawa ro sara'ana mawara d̄i manusia.

²⁶Rad̄i sab̄ua dou manusia Sia ndawina sara'ana bangsa ro kauna siad̄oho mid̄i d̄i samenana dunia. Sia rauku ma katantuna aipu saramba wa'una, b̄une aiku ro tab̄eku siad̄oho loakaina mori.

²⁷Ruma Hatalla karawina ede loakud̄u siad̄oho ngupana Sia. Raho-raho to'impa siad̄oho eda angi lab̄ona Sia d̄i wakatu siad̄oho ngupa rerona Sia. Pala sapodakaina Ruma Hatalla wati d̄o'ona ro rad̄i cua-cua ndaita.

²⁸B̄une ranggahi dou, ’Ndai mori ro rukuta ro wara d̄i dunia ake b̄ara kuasa Sia.’ Sama rau ranggahi b̄a pila-pila dou marawa patu. Nggahi siad̄oho, ’Ndai sara'ana eded̄u ana-ana-Na.’

²⁹B̄ara ndai eded̄u ana-ana Ruma Hatalla, ndai wati loata wi'ikai Ruma Hatalla sama b̄une patung randawina kai masa ro salaka ro wadu randawi kai b̄atu loa manusia.

³⁰Jaman sampula ndai ede wa'ura nefa b̄a Ruma Hatalla, pala ake Sia kauna sara'ana dou d̄i sara'ana dunia tobana rad̄i dosa-dosa siad̄oho.

³¹B̄ara Sia wa'ura katantuna wakatu d̄i paresakai sara'ana dunia ake kai adi. Taki ra puta ede d̄ikalampa b̄a sab̄ua dou ra wa'u kad̄ale b̄a Ruma Hatalla d̄i ru'u b̄a ede. Ro loakud̄u sara'ana dou imbi podana d̄i lampa rawi ede, Ruma Hatalla wa'ura kamori mbalina dou ede rad̄i madekaina!”

³²Wakatu ringa b̄a dou-dou ede mab̄oha mori mbali sawa'u b̄a made, wara d̄i ade weki siad̄oho maharikai la Paulus. Wara rau ma nggahi, ”Nami mane'e ringa wali nggomi nggahimu mab̄oha lampa rawi ake.”

³³Edempara la Paulus tu'u wi'ina hid̄i mbolokai ede.

³⁴Pala wara d̄i ade weki siad̄oho malu'u ta la Paulus ro imbina d̄i Ruma Isa, d̄i ade wekina ede eded̄u: La Dionisius anggota majelis Areopagus, ro sab̄ua dou siwe mangara la Damaris, ro pila-pila dou wali.