Read Bima KISAH RASU-RASU 18 Bible Online

KISAH RASU-RASU 18 - Bima bible

KISAH RASU-RASU 18

¹Sawa'u b̄a ede la Paulus tu'u wi'ina Atena ro laona aka Korintus.

²Ta ede sia eda angi lab̄ona sab̄ua dou Yahudi mangara la Akwila dou dana ra rasa Pontus. Akwila b̄oupura maina d̄i Italia lab̄o weina la Priskila. Siad̄oho maina aka Korintus b̄ara Kaisar Klaudius wa'ura kauna sara'ana dou Yahudi losa rad̄i Roma. La Paulus lao lambana siad̄oho d̄uana,

³edempara ngge'ena ta ede lab̄o siad̄oho ro karawi sama-samana lab̄o siad̄oho, b̄ara ngupakai ngaha siad̄oho sama b̄une la Paulus, eded̄u ndawi kemah.

⁴Pala sanikina ainaina Sabat, la Paulus lao nuntu ra nggahi lab̄o dou d̄i uma sambeakai d̄i kandad̄ina dou-dou Yahudi ro dou-dou Yunani, imbi d̄i Ruma Isa.

⁵Sawa'u b̄a Silas ro Timotius rongga rad̄i Makedonia, la Paulus kanina sara'a wakatuna d̄i ngoa ra kahabakaina haba ma ramai ta Ruma Hatalla d̄i dou-dou Yahudi b̄a one Ruma Isa edeku Sangaji Mambei salama rasake b̄a Ruma Hatalla.

⁶Pala b̄ara dou-dou madaca'u ro makasungge-sunggena, ndad̄i la Paulus mafura kalub̄u d̄i kani ra lombona d̄i katandakaina d̄i siad̄oho b̄ara rawina ma ncara. Nggahi sia, ”Nggara ihasi nggomid̄oho, ncara ndaimu! Nahu wa'ura hori rimaku! Tampu'u ake nahu d̄imalao aka dou-dou laina Yahudi.”

⁷Edempara la Paulus tu'u wi'ina siad̄oho ro lao ngge'ena d̄i uma ma d̄i kompe uma sambeakai ede. Uma ede uma sab̄ua dou ma laina Yahudi, pala sia nanembaku Ruma Hatalla. Ngara dou ede la Titius Yustus.

⁸Pala Krispus, dou mana'ekai uma sambea ede lab̄o sara'ana iwa ra wekina imbi d̄i Ruma Isa. Ro mboto rau dou-dou Korintus makalaina maringa haba rakarongga b̄a la Paulus, ro siad̄oho na'imbiku d̄i Ruma Isa edempara kandeu karaso.

⁹D̄isab̄ua aimangad̄i d̄i ade sab̄ua nifina rambei b̄a Ruma, nggahi Ruma d̄i la Paulus, ”Aina dahumu! Nuntu ra nggahi ntuwupu aina midi.

¹⁰B̄ara Nahu mad̄ende ra wa'ana nggomi. Wati kone sab̄ua dou rau maloana karawi ma dab̄ae d̄i nggomi, b̄ara mboto dou d̄i kota ake eded̄u dou-dou Nahu.”

¹¹B̄ara ndedena la Paulus ngge'ena d̄i Korintus samba'a ini wura ntoina ro ngoa ra teina nggahi ra eli Ruma Hatalla d̄i siad̄oho.

¹²Wakatu Galio mandad̄i gubernu Akhaya, dou-dou Yahudi kasab̄uana weki d̄i aokaina la Paulus ro lao wa'ana sia aka kanto pengadila.

¹³Siad̄oho ncunduna b̄ab̄u ra lo'o ake, ”Dou ake pangaruna dou mamboto loakud̄u nemba Ruma Hatalla kai cara ma wati ncihi ncao lab̄o hukum Musa!”

¹⁴Wunga ne'e cambe b̄a la Paulus, Galio wa'ura nggahina d̄i dou-dou Yahudi, ”Oe dou-dou Yahudi! Nggara rada'awa ake sab̄ua ra sapana atora atao sab̄ua lampa rawi ma'iha, poda nahu patu d̄imasaba ringa da'awamu ake.

¹⁵Pala ake eded̄u cence ncihi mab̄oha nggahi ra eli ro ngara-ngara ro hukum-hukum ndaimu! Ndad̄i nggomid̄ohoku ma pab̄ua kanggorina. Nahu wati ne'eku paresa lampa rawi-lampa rawi b̄une ake!”

¹⁶Edempara Galio b̄aka kalosana siad̄oho.

¹⁷Ndad̄i siad̄oho wa'una la Sostenes, dou mana'ekai uma sambea ede, ro b̄oena sia d̄i tando meja pengadila. Pala Galio wati poda kade'ena d̄i lampa rawi ede.

¹⁸ Sawa'u b̄a ede la Paulus mbuipu ngge'e ntoina d̄i Korintus. Edempara sia ngoa wi'ina d̄i dou-dou ma'imbi ta ede, edempara lao lojana lab̄o la Priskila ro Akwila lao aka Siria. D̄i Kengkrea, la Paulus b̄oruna honggona rawi'i kanaruna b̄ara ra sakena d̄i Ruma.

¹⁹Wakatu rongga d̄i Efesus, la Paulus tu'u wi'ina la Priskila ro la Akwila, edempara lu'una d̄i uma sambeakai ro weha kali cempe nggahi ra eli angi lab̄o dou-dou Yahudi ta ede.

²⁰Siad̄oho rahona loakud̄u sia ngge'e ntoi walina lab̄o siad̄oho, pala sia wati ngawana.

²¹Kone ade ndedena, wakatu sia ne'era lao, nggahi sia, ”Nggara nakausi b̄a Ruma Hatalla, nahu d̄imamai wali ta ake.” Sawa'u b̄a nggahi ndedena, sia lao tu'u wi'ina Efesus.

²²Sawa'u b̄a londona d̄i Kaisarea, sia laona aka Yerusalem d̄i mbeikaina salam d̄i ela Ruma ta ede, edempara lampa walina lao aka Antiokhia.

²³Sawa'u b̄a ngge'ena ta ede pila-pila wakatu ntoina, sia lao lamba walina dana ra rasa Galatia ro Frigia d̄i katenggokaina imbi dou-dou mawa'ura imbi.

²⁴Wunga wakatu ede, maimpara aka Efesus sab̄ua dou Yahudi ra warakaina d̄i Aleksandria, ngarana la Apolos. Sia nawancuku loana nuntu ra nggahi ro naloa ka'ao poda isi Alkitab,

²⁵ro wa'ura ngoa ra tei kataho d̄i patakaina ngoa ra tei mab̄oha Ruma Isa. Ndad̄i kai kapoda ade sia ngoa ra tei kab̄aena mab̄oha Ruma Isa, kone ampode kandeu karaso b̄a Yahya mpoampa b̄adena.

²⁶Kai disana la Apolos tampu'una nuntu ra nggahi d̄i uma sambeakai ro wakatu ringa b̄a la Priskila ro la Akwila rangoa ra teina, siad̄oho wa'ana sia aka umana. Ta aka siad̄oho ngoa kab̄ae walina d̄i sia kai mancihi wali mab̄oha nia Ruma Hatalla d̄imambei salama manusia kai ncai Ruma Isa.

²⁷Edempara la Apolos nane'eku lao aka Akhaya. Ndad̄i dou-dou ma imbi d̄i Ruma Isa d̄i Efesus tuntina sura d̄i ru'u cina ra angina ma'imbi d̄i Akhaya loakud̄u siad̄oho ngawana tarima ao la Apolos. Ro wakatu Apolos rongga d̄i Akhaya, rabantuna palasi na'ipiku wara onena d̄i dou-dou ma b̄ara rahama Ruma Hatalla wa'ura imbi d̄i Ruma Isa.

²⁸B̄ara kai wancu wibawa, la Apolos kakoana dou-dou Yahudi d̄i ade cence ncihina d̄i tando dou mamboto. Ro sia mbeina bukutikai ayat-ayat rad̄i ade Alkitab b̄a one Ruma Isaku Sangaji Mambei salama rasake ede.