Read Bima KISAH RASU-RASU 19 Bible Online

KISAH RASU-RASU 19 - Bima bible

KISAH RASU-RASU 19

¹Wunga mbuipu la Apolos warana d̄i Korintus, la Paulus wunga lampa kalilina dana ra rasa ede edempara rakara d̄i Efesus. Ta aka sia eda angi lab̄ona pila-pila dou ma wa'ura imbi d̄i Ruma Isa.

²Sod̄i b̄a sia d̄i siad̄oho, ”Sab̄ua nggomid̄oho wa'ura tarimamu Roh Allah wakatu nggomid̄oho imbimu d̄i Ruma Isa?” Cambe b̄a siad̄oho, ”Watipu. Nami wati paranamu ringa b̄a one wara Roh Allah.”

³”Nggara ndedesi, kai kandeu karaso auku nggomid̄oho?” sod̄i b̄a la Paulus. ”Kai kandeu karaso Yahya,” cambe b̄a siad̄oho.

⁴ Edempara nggahi la Paulus, ”Yahya kandeu karasokaina dou d̄i katadakaina b̄a one dou-dou ede wa'ura tobana rad̄i dosa-dosa siad̄oho. Pala wunga wakatu ede rau la Yahya ngoana d̄i dou-dou Israel b̄a one siad̄oho pab̄uaku imbina d̄i Dou d̄imamai kento ntewi kaisi sia, eded̄u Ruma Isa.”

⁵Wakatu ringa b̄a siad̄oho ede, siad̄oho d̄ikandeu karaso kai ngara Ruma Isa.

⁶Ro wakatu la Paulus tohona rima ese wawo siad̄oho, Roh Allah makuasakai siad̄oho, edempara siad̄oho tampu'u nuntu ra nggahina ade bahasa ma wati loa ka'ao b̄a dou ro karonggana haba ma ramai ta Ruma Hatalla.

⁷Mboto siad̄oho sara'ana wara takasi sampuru d̄ua dou.

⁸Tolu wura ntoina la Paulus nuntu ra nggahi ncau kai disana d̄i dou-dou d̄i uma sambeakai ro cence ncihi lab̄o siad̄oho d̄i ka'imbikaina siad̄oho mab̄oha Karaja'an Allah.

⁹Pala pila-pila dou d̄i weki dou-dou ede matera tuta ro wati ngawana imbi. D̄itando sara'ana dou makab̄oro weki ta ede siad̄oho kasungge-sunggena ngoa ra tei mab̄oha nia Ruma Hatalla d̄i kasalamana manusia kai ncai Ruma Isa. B̄ara ndedena la Paulus tu'u wi'ina siad̄oho, edempara lao lab̄ona dou-dou ma'imbi d̄i Ruma Isa d̄i hid̄i tei kai la Tiranus. Ta ede saniki ainaina sia sod̄i kali cempe angi lab̄o dou-dou.

¹⁰Sia karawi ncauna lampa rawi ede d̄ua mba'a ntoina sampe sara'a dou ma ngge'e d̄i propinsi Asia, nataho dou Yahudi ro bangsa makalaina, sara'ana nakade'eku nggahi ra eli Ruma.

¹¹Ruma Hatalla karawina lampa rawi mab̄isa ra guna ma heba poda kai la Paulus.

¹²Nggara pasapu atao kae herekai loko ma rawa'u iu kani b̄a la Paulus d̄iwa'a d̄i dou-dou mahengge, supu siad̄oho nambora ro roh seta rau nalosa rad̄i ade siad̄oho.

¹³Wara pila-pila sando Yahudi ma lao rero, mab̄aka kalosa roh seta rad̄i dou-dou. Sando-sando ede coba-coba rauna kani ngara Ruma Isa d̄i b̄aka kalosakaina roh-roh seta ede. Nggahi siad̄oho d̄i roh-roh seta ede, ”Kai ngara Ruma Isa rangoa ra kahaba b̄a la Paulus ede, nahu mab̄aka kalosa nggomi!”

¹⁴Wara pidu dou ana mone sab̄ua dou mana'ekai imam, mangara la Skewa, ma karawi lampa rawi b̄une ede.

¹⁵Pala nggahi roh seta ede d̄i siad̄oho, ”Nahu kapata Isa ro la Paulus rau nahu pataku, pala nggomi ake cou?”

¹⁶Edempara dou ma ralu'ukai b̄a roh seta ede nggoncuna ro kumpana siad̄oho kai mbani poda sampe siad̄oho lao raina rad̄i uma ede kai mboto ncuwu ro lab̄o rondana, b̄ara kani ra lombo siad̄oho rasipa-sipana rad̄i sarumbu siad̄oho.

¹⁷Sara'ana dou Yahudi ro dou bangsa makalaina ma ngge'e d̄i Efesus ringana mab̄oha mandad̄i ede, edempara siad̄oho ndad̄i dahuna. Ndad̄i ngara Ruma Isa nanaha d̄i roi ra wadi b̄a dou.

¹⁸Mboto dou ma wa'ura ndad̄i imbi d̄i Ruma Isa, mai mangakuna d̄i tando dou mamboto ruku ra rawi siad̄oho ntoina.

¹⁹Ro siad̄oho ma biasa kalampa ilimu sihi, kab̄orona buku-bukuna ro ka'ana d̄i tando dou mamboto. Co'i buku-buku ede nggara rekesi sara'ana wara takasi lima mpuru riwu piti salaka.

²⁰Ndedeku kai cara ma heba ede nggahi ra eli Ruma nanaha mbou rero ro nanaha tenggo pangaruna.

²¹Sawa'u b̄a nggori samenana mandad̄i ede, la Paulus wehana nggahi cumpukaina nane'e lao aka Makedonia ro Akhaya edempara nalao aka Yerusalem. ”Sawa'u b̄a laona ta aka,” nggahi la Paulus, ”nahu pab̄uaku lao rau aka Roma.”

²²Ndad̄i sia kauna d̄ua dou rad̄i dou-dou mabantuna, eded̄u la Timotius ro Erastus d̄imalao aka Makedonia, sia mbuipu ngge'ena pila-pila wakatu ntoina d̄i propinsi Asia.

²³Takasi d̄i wakatu edeku ndad̄ina ngango ra ngora mana'e d̄i Efesus b̄ara ngoa ra tei mab̄oha Ruma Isa.

²⁴B̄ara d̄i kota ede wara sab̄ua dou mataki nded̄e salaka mangara la Demetrius, ma ndawi uma-uma berhala d̄i ru'u Dewi Artemis. Karawi dou ede nakamaiku arujiki ma mboto d̄i ru'u b̄a dou-dou makarawina.

²⁵B̄ara ndedena sia kab̄orona dou-dou makarawina sama-sama lab̄o dou-dou makarawi salaka makalaina, edempara nggahina, ”Cina ra angi! Nggomid̄oho wa'ura b̄ademu b̄a one ndai maraka arujiki rad̄i karawikai ake.

²⁶Ake nggomid̄oho wa'ura eda ro ringa b̄a ndaimu au rakarawi b̄a la Paulus ede. Nggahi sia b̄a one berhala-berhala ra ndawi b̄a manusia lai podana berhala. Ro sia wa'ura mboto dou makandad̄i imbi d̄i ngoa ra teina, laina d̄i Efesus ta ake mpoa, pala ne'empara sara'a dana ra rasa Asia rau.

²⁷Ihana eded̄u b̄a one hid̄i karawikai ndai ake d̄imaraka ngara ma'iha. Ro laina ede mpoa, malaisi uma Dewi Artemis wati d̄i kaco'i rau ro na'e ra ntoruna d̄i tonda-tonda; sapodakaina sia dewi d̄i roi ra wadi b̄a sara'ana dou ma d̄i Asia ro d̄i sara'ana dunia!”

²⁸Ndede ringa b̄a dou-dou ede siad̄oho mbani podana, edempara siad̄oho kanggicana, ”Taho ra ntai d̄i ru'u b̄a Artemis, dewi dou Efesus!”

²⁹Ndad̄i ngango ra ngora ede nanaha na'e sampe d̄i sara'a kota. Edempara kalompo dou-dou mangango ede wa'u ra letona la Gayus ro Aristarkhus, eded̄u dou-dou Makedonia ma lenga lab̄o la Paulus d̄i ade lampa ra laona, edempara randana siad̄oho lao aka stadion d̄i kota ede.

³⁰La Paulus nane'e lu'u b̄atu siad̄oho, pala dou-dou ma'imbi d̄i Ruma Isa ta aka makantana sia.

³¹Pila-pila dou mana'ekaina propinsi Asia ede rau, ma soba angi lab̄o la Paulus, makau ngoa dou d̄i la Paulus loakud̄u sia aina lao katada weki d̄i stadion ede.

³²Wunga wakatu ede dou-dou ma kab̄oro weki d̄i stadion ede wa'ura ndad̄i kaco poda. Wara ma kanggica ndake, wara ma kaggica ndede, b̄ara mboto d̄i weki siad̄oho wati b̄adena b̄ab̄auku siad̄oho kab̄orokaina weki ta ede.

³³Sarundena d̄i ade dou-dou ede makacaina la Aleksander fu'una mandad̄i ede b̄ara siaku rad̄unggi cad̄ei b̄a dou-dou Yahudi. Ndad̄i la Aleksander mbeina isara kai rimana d̄i rahona wakatu d̄i horukaina weki d̄i tando dou-dou ede.

³⁴Pala ndede eda b̄a siad̄oho b̄a one sia dou Yahudi, sama-sama siad̄oho kanggica kana'ena, ”Taho ra ntai d̄i ru'u b̄a Artemis, Dewi dou Efesus!”

³⁵Cumpukaina panitera kota wa'una kamidi dou mamboto ede. Nggahi sia, ”Ela ra dou Efesus! Sanikina dou nab̄adeku b̄a one Efesusku kota majaga ro sandakana uma Dewi Artemis ro wadu raso ma ramab̄u rad̄i langi.

³⁶Wati kone sab̄ua dou maloana kawati lampa rawi ede. B̄ara ndedena midipu ro aina kabare karawi au-au.

³⁷Dou-dou ake, rawa'a b̄a nggomid̄oho ta ake laina b̄ara siad̄oho wa'ura rampona uma berhala atao b̄ara siad̄oho wa'ura kab̄awa ra katunana dewi ndai.

³⁸Nggara la Demetrius lab̄o dou-dou makarawina ede mawara d̄i da'awana d̄i dou, co'opu siad̄oho wa'ana parakarana ede aka pengadila. Pengadila natarima aoku lampa rawi ede ro dou-dou mana'e b̄ora pamarenta rau nangge'empa warana.

³⁹Pala nawara walisi ma kalaina d̄i ne'e b̄a nggomid̄oho, ede pab̄ua d̄i kanggori ade mbolo na'e ma saha.

⁴⁰B̄ara au ramandad̄i d̄i ainaina ake loa d̄i ihakai ndai. Ndai loa d̄i wi'ikai makatu'una ngango ra ngora, b̄ara ndai wati ntauta kone sab̄ua alasa rau d̄i kancihikai ngango ra ngora ake.”

⁴¹Sawa'u b̄a nggahi sara'ana ede, panitera kota ede kauna dou mamboto ede lao dula.