Read Bima KISAH RASU-RASU 20 Bible Online

KISAH RASU-RASU 20 - Bima bible

KISAH RASU-RASU 20

¹Sawa'u b̄a ka'ada'ana d̄i Efesus taho mbali, la Paulus kab̄orona ela Ruma ro kau kapoda ade siad̄oho. Edempara sia raho weki d̄i ela Ruma ede edempara sia laona aka Makedonia.

²Sia lao lambana dana ra rasa Makedonia ro mboto ngoa ra tei katahona d̄i dou-dou ma imbi d̄i Ruma Isa ta aka d̄i mbei katenggokaina siad̄oho. Edempara sia laona aka Yunani.

³tolu wura ntoina sia ngge'ena ta aka. Edempara sia wunga ka'ambina weki ne'e loja lao aka Siria, wara haba b̄a one dou-dou Yahudi mawunga mafaka ne'e hade sia. B̄ara ndedena kananu b̄a sia dula mbali tancai Makedonia.

⁴La Sopater ana la Pirus dou Berea lao samana lab̄o sia; ndede rauja la Aristarkhus ro la Sekundus dou Tesalonika, ro la Gayus dou Derbe. Ndede rau la Timotius, la Tikhikus ro Trofimus, dou-dou propinsi Asia.

⁵Siad̄oho lampa uluna edempara ngenana nami d̄i Troas.

⁶Sawa'u b̄a Aruraja Roti Mawati ntau B̄uha, nami loja walimu tu'u wi'i Filipi. Lima nai sawa'u b̄a ede nami kab̄oro weki wali lab̄o siad̄oho d̄i Troas. Ta aka nami ngge'emu saminggu.

⁷Aimangad̄i sapatu nami kab̄oro weki ne'e ngaha sama kai cara sa'e ra ari. La Paulus nuntu ra nggahina lab̄o dou-dou, b̄ara naisi sia ne'e lao. Sampe b̄oha ai la Paulus mbuipu nuntuna lab̄o dou-dou ede.

⁸D̄i ade b̄ili ma'esena, hid̄i kab̄oro kai weki nami ede, wara mboto ilo.

⁹Sab̄ua dou mone sampela mangara Eutikhus doho tantonga. B̄ara la Paulus wati dengga-denggana nuntu ra nggahi, dou mone sampela ede ndad̄i ei poda madana sampe sia maruna d̄i ntonga ede, edempara mab̄una tampu'u d̄i tingka katolukaina. Wakatu hanta b̄a siad̄oho sia wa'ura made.

¹⁰Pala la Paulus londo la'awana edempara maru ndorena ese wawo sarumbu dou mone sampela ede ro pohuna. Nggahi la Paulus, ”Aina dahu, sia mbuipu morina!”

¹¹Edempara la Paulus ne'e mbalina ta ese, edempara cengga-cenggana roti ro ngaha sama-samana. Sawa'u ntoi nuntu ra nggahina lab̄o dou-dou sampe aimasid̄i, la Paulus edempara laona.

¹²Dou-dou mawa'a kadula dou mone sampela ede kai ka'ada'an mori aka umana. Siad̄oho na'ipiku neo ade ro nawancuku d̄ihi adena.

¹³Nami laomu aka kapa edempara lao loja ulumu aka Asos d̄imalao weha aomu la Paulus d̄i kapa ta aka. Sia wa'ura ato kandedena b̄ara sia d̄imalao ta aka kai ncai lampa dana.

¹⁴Sawa'u b̄a eda angi d̄i Asos, la Paulus ne'e rocina ese kapa edempara nami lojamu lao aka Metilene.

¹⁵Ta aka nami loja wali raumu, ro b̄ala aisanai nami rongga aka hid̄i ma ncao tando lab̄o Khios. D̄ua nai sawa'u b̄a ede nami ronggamu d̄i Samos ro sanai sawa'u b̄a ede nami rongga d̄i Miletus.

¹⁶La Paulus nawa'ura nggahi wati ne'ena sai d̄i Efesus, b̄ab̄aina paki wakatu d̄i dana ra rasa Asia. Sawa'u-wa'ukaina sia ne'ena rongga roci d̄i Yerusalem d̄i Aruraja Pentakosta.

¹⁷Rad̄i Miletus la Paulus nggaduna haba aka Efesus rahona dou-dou mana'ekai ela Ruma ta aka mai eda angi lab̄o sia.

¹⁸Wakatu rongga siad̄oho, nggahi la Paulus d̄i siad̄oho, ”Cina ra angi mab̄adeku rab̄unena nahu moriku salama ake d̄i woha nggomid̄oho ratampu'u ainaina sarambakaina rongga nahu d̄i Asia.

¹⁹Kai kab̄awa weki ro kai mboto oi mada, nahu karawiku d̄i ru'u Ruma d̄i woha susa ra ncoki d̄i iu b̄a nahu b̄ara nia madab̄ae dou-dou Yahudi.

²⁰Nggomid̄oho mab̄adeku b̄a one nahu wati mbali mbua adeku ngoa d̄i nggomid̄oho auku ma ntau one d̄i ru'u b̄a nggomid̄oho. Nahu mangoa ra tei nggomid̄oho d̄i sanikina mbolo kai weki ro d̄i uma-uma.

²¹Nataho d̄i ru'u b̄a dou-dou Yahudi ro d̄i ru'u b̄a dou-dou bangsa makalaina rangoa ra kawara ncau b̄a nahu loakud̄u siad̄oho tobana rad̄i dosa-dosana ro maina d̄i Ruma Hatalla, ro imbi d̄i Ruma Isa.

²²Ake d̄i to'akai parenta Roh Allah, nahu malao aka Yerusalem. Ro nahu wati b̄adeku au d̄imandad̄i d̄i ru'u b̄a nahu ta aka.

²³Nahu cuma b̄adeku b̄a one d̄i sanikina kota, Roh Allah wa'ura ngoa kapodana d̄i nahu, b̄a one nahu d̄imalu'u bui ro d̄imasusa ra ncoki.

²⁴ Pala nahu wati kade'eku d̄i moriku ake, sura nahu loaku kanggoriku taki ra puta ra'imbikai b̄a Ruma Isa d̄i nahu ro sura nahu to'aku sampe cumpukai moriku d̄imakahaba Haba Mataho ede mab̄oha anugera Ruma Hatalla.

²⁵Nahu wa'ura mai lambaku cina ra angi sara'ana ro wa'ura ngoa ra kahaba rauku mab̄oha Karaja'an Allah. Ake d̄i iu b̄a nahu wati d̄ima'eda angi lab̄o nggomid̄oho wali.

²⁶B̄ara ndedena nahu mangoa poda-poda d̄i nggomid̄oho d̄i ainaina ake b̄a one nawarasi d̄i weki nggomid̄oho ma leli peade, ede laina ncara nahu.

²⁷Watipu iu b̄a nahu peso weki d̄i ade taki ra puta nahu d̄i ngoa kab̄ae tantukaiku nggomid̄oho samenana rancana Ruma Hatalla.

²⁸Pab̄uapu nggomid̄oho sandaka weki ndaimu ro sandaka raupu sara'ana ela Ruma ma wa'ura d̄onggo ra mbei b̄a Roh Allah d̄i nggomid̄oho d̄i sandakamu; b̄ara nggomid̄oho wa'ura hanta d̄imandad̄i dou masandaka ela Ruma ede. Pab̄uapu nggomid̄oho sandakamu ela Ruma Hatalla ede b̄une ompu jimba masandaka jimbana, b̄ara Ruma Hatalla wa'ura kandad̄ina ela Ruma ede ntau ndai-Na kai mboho ra'a Ana ndai-Na.

²⁹Sawa'u b̄a lao nahu pasti d̄imamai lako doro-lako doro ma nggange d̄i ade woha nggomid̄oho. Ro dou-dou rasandaka b̄a nggomid̄oho ede d̄i ngaha b̄a lako doro ede.

³⁰Kone d̄i ade weki nggomid̄oho rau d̄imawontu dou-dou d̄i ma ngoa ra kahabana haba ma wati podana. Siad̄oho karawi ndedena loakud̄u dou-dou ma wa'ura imbi d̄i Ruma Isa ndad̄i santuda ro b̄atuna siad̄oho.

³¹B̄ara ndedena jaga-jagapu! Kawarapu b̄a one tolu mba'a ntoina kai mboto oi mada, aimarai aimangad̄i nahu wati wara denggaku ngoa ra tei d̄i sanikina dou d̄i ade weki nggomid̄oho.

³²Ake nahu mad̄onggo ra mbeina nggomid̄oho d̄i Ruma Hatalla loakud̄u Sia ma sandakana nggomid̄oho ro loakud̄u nggomid̄oho nentimu d̄i haba rahama Ruma Hatalla. Ruma Hatalla mantau kuasa d̄i katenggokaina nggomid̄oho ro mbeina d̄i nggomid̄oho bareka-bareka ma wa'ura sadia wea b̄a Sia d̄i ru'u b̄a sara'a Ela-Na.

³³Watipu iu b̄a nahu ne'eku piti atao kani ra lombo d̄i sab̄ua dou rau.

³⁴Ndai nggomid̄oho mab̄adeku, b̄a one kai tenggo ra wale ndai nahu, nahu karawiku d̄i paralu b̄a nahu ro lengad̄ohoku ma b̄atu lab̄o nahu.

³⁵D̄i ade sara'ana lampa rawi nahu wa'ura mbeiku conto mataho d̄i nggomid̄oho b̄a one kai karawi kapoda ade b̄une ake pab̄uaku bantumu dou-dou ma wati tenggo. B̄ara ndai pab̄uaku kawara d̄i au ranggahi b̄a ndai Ruma Isa, ’Nataho ra ntikapu mbei ntewi kaisi weha ao.’ ”

³⁶Sawa'u b̄a la Paulus nggori nuntu ra nggahina, sia sujuna lab̄o siad̄oho sara'a edempara do'ana.

³⁷Siad̄oho sara'ana nangi ro pohuna la Paulus ro nggahina salama taho ra ntai ade lampa ra laokai la Paulus.

³⁸Siad̄oho nawancuku ncoki adena, ma'ipi poda b̄a nggahi la Paulus b̄ara siad̄oho wati d̄ima'eda sia wali. Edempara siad̄oho lao otona sia sampe aka kapa.