Read Bima KISAH RASU-RASU 21 Bible Online

KISAH RASU-RASU 21 - Bima bible

KISAH RASU-RASU 21

¹Nami raho weki d̄i dou-dou mana'ekai ela Ruma d̄i Efesus ede, edempara tu'u wi'imu siad̄oho. Edempara nami loja laomu aka pulau Kos; ro b̄ala aisanai nami ronggamu d̄i pulau Rodos. Ta ede nami loja walimu lao aka lab̄u Patara.

²D̄i Patara, nami edamu kapa ma ne'e lao aka Fenisia. Ndad̄i nami ne'emu kapa ede edempara laomu

³ro lojamu sampe eda b̄a nami pulau Siprus d̄i sab̄ae ku'i nami; pala nami loja walimu lao aka Siria. Nami lab̄umu d̄i Tirus, b̄ara ta ede kapa ranente b̄a nami nakalondora wuana.

⁴D̄ihid̄i ede nami lambamu dou-dou ma imbi d̄i Ruma Isa, ro ngge'e lab̄omu siad̄oho saminggu ntoina. Kai rangoa b̄a Roh Allah siad̄oho ngoa ra tei katahona la Paulus b̄ab̄aina lao aka Yerusalem.

⁵Pala sawa'u b̄a cumpu wakatuna nami ngge'emu ta ede, nami tu'u wi'imu siad̄oho ro nami lampa ra lao walimu. Siad̄oho sara'ana sama-sama lab̄o wei ro anana lao otona nami sampe ari mai b̄a kota. Ta aka takengge moti, nami sara'ana doho sujumu ro sambeamu.

⁶Sawa'u b̄a ede nami japatanga angi, edempara nami ne'emu ese kapa ro siad̄oho rau lao dula aka umana.

⁷Nami loja ntuwumu tampu'u d̄i Tirus sampe aka Ptolemais. Ta aka nami lao lambamu cina ra angi ma imbi, d̄i mbeikaimu salam d̄i siad̄oho, edempara ngge'emu sanai lab̄o siad̄oho.

⁸ B̄ala aisanai nami lao walimu, edempara rongga d̄i Kaisarea. Ta ede nami lao rakamu dou guru Injil ma ngara la Filipus, edempara ngge'e d̄i umana. Sia eded̄u sab̄ua dou d̄i ade weki pidu dou rakad̄ale d̄i Yerusalem.

⁹Upa dou ana siwe sampelana, wa'ura mbei loa ra b̄ade b̄a Ruma Hatalla d̄i ngoa ra kahabakai haba ma ramai ta Ruma Hatalla.

¹⁰ Sawa'u b̄a pila-pila wakatu ntoina nami ta aka, maimpara sab̄ua dou nabi ma ramai d̄i Yudea ma ngara la Agabus.

¹¹Sia maina d̄i nami edempara wehana herekai loko la Paulus. Kai herekai loko ede sia d̄ikina ed̄i ro rima ndaina edempara nggahina, ”Akeku ranggahi b̄a Roh Allah: Dou mantau herekai loko ake d̄i d̄iki b̄une ake d̄i Yerusalem b̄a dou-dou Yahudi, ro d̄id̄onggo d̄i dou-dou malaina Yahudi.”

¹²Wakatu ringa b̄a nami ede, nami lab̄o sara'ana cina ra angi ma ngge'e d̄i Kaisarea ede maraho poda-poda d̄i la Paulus loakud̄u sia aina lao aka Yerusalem.

¹³Pala cambe b̄a sia, ”Auku onena nggomid̄oho nangimu b̄une ake kandad̄ikaimu leli ade nahu? Nahu wa'ura sadiaku laina d̄i wa'u ra leto mpoa ta aka, pala kone d̄imamade rau b̄ara Ruma Isa.”

¹⁴La Paulus wati ngawana kade'e rangoa b̄a nami, ndad̄i nami watid̄u kantamu sia. ”Co'opu kane'e b̄a Ruma mpa d̄imandad̄i,” nggahi mena b̄a nami.

¹⁵Sawa'u b̄a ngge'emu ta ede pila-pila wakatu ntoina, nami kamocimu barang-barang nami, edempara laomu aka Yerusalem.

¹⁶Pila-pila dou cina ra angi d̄i Kaisarea lao sama rauna lab̄o nami d̄imalao otona nami aka uma la Manason, b̄ara d̄i uma sia ede d̄i ronggakai nami. (Manason eded̄u dou Siprus ma wa'ura ntoi imbi d̄i Ruma Isa.)

¹⁷Wakatu nami rongga d̄i Yerusalem, cina ra angi ta ede weha aona nami kai sana adena.

¹⁸B̄ala aisanai la Paulus lao samana lab̄o nami lao lamba la Yakub; sara'a dou-dou mana'ekai ela Ruma wara ta ede rau.

¹⁹Sawa'u b̄a mbei salam d̄i siad̄oho, la Paulus caritana d̄i siad̄oho sara'ana rakarawi b̄a Ruma Hatalla kai ncai sia d̄i ade woha dou-dou malaina Yahudi.

²⁰Sawa'u b̄a ringana carita la Paulus, siad̄oho sara'ana roi ra wadina Ruma Hatalla. Edempara siad̄oho nggahina d̄i la Paulus, ”Cina Paulus! Ndaimu pab̄uapu b̄ade b̄a one wa'ura riwu-riwu dou Yahudi ma imbi d̄i Ruma Isa. Siad̄oho eded̄u dou-dou mato'a b̄atu hukum Musa.

²¹Ro ake siad̄oho ringana b̄a one ndaimu mangoa ra tei d̄i sara'ana dou Yahudi ma ngge'e d̄i woha bangsa makalaina, loakud̄u horina hukum Musa. Ndaimu d̄imangoa ra tei kataho siad̄oho loakud̄u siad̄oho aina sunana anad̄ohona atao b̄atu rawi rasa ranginakai b̄a dou Yahudi.

²²Ake dou-dou Yahudi ma wa'ura imbi ede tantu d̄imaringa b̄a one ndaimu wa'ura wara ta ake. Ndad̄i, b̄uneku ake?

²³ B̄atupu ngoa ra tei kataho b̄a nami. Wara upa dou ta ake mawa'ura ndawi sake d̄i Ruma.

²⁴Ya, ndaimu pab̄uapu lao karawi upacara karaso sarumbu sama-sama lab̄o siad̄oho, ro cola weapu siad̄oho loakud̄u honggo siad̄oho loa d̄ib̄oru. Kai ndedena d̄imatada d̄i sara'an dou b̄a one au raringa b̄a siad̄oho mab̄oha ndaimu wati podana, b̄ara ndai raumu makalampa hukum Musa.

²⁵ Pala mab̄oha dou ma laina Yahudi ma wa'ura imbi d̄i Ruma Isa, nami wa'ura nggadumu sura d̄i siad̄oho mab̄oha nggahi ra eli nami b̄a one siad̄oho wati loana ngaha ra nono ma wa'ura d̄onggo ra mbei d̄i berhala, wati loana ngaha ra'a, atao ngaha binata ma made rake'e; ro wati loana karawi lampa rawi ma dab̄ae.”

²⁶Ndad̄i la Paulus lao lab̄ona upa dou ede edempara karawina upa cara karaso sarumbu sama-sama lab̄o siad̄oho d̄i b̄ala aisanaina. Edempara siad̄oho lu'una d̄i Bait Allah d̄i ngoakaina pila nai walipu upacara karaso sarumbu ede nggorina ro koroba d̄i ru'u b̄a cua-cua ndai siad̄oho d̄i d̄onggo ra mbei.

²⁷Aipu wakatu pidu nai ede ne'empara nggori, pila-pila dou Yahudi rad̄i Asia ma'edana la Paulus d̄i ade Bait Allah. Edempara siad̄oho sad̄u'una dou mamboto, edempara nenti la Paulus

²⁸Ro kanggica salahona, ”Oe dou-dou Israel, bantu to'ipu! Akeku douna malao rero mangoa ra tei d̄i sara'ana dou ngoa ra tei-ngoa ra tei ma wati ncihi ncao lab̄o bangsa Israel, madaca'u hukum Musa ro madaca'u Bait Allah ake. Ro ake wali nanaha wa'aku dou-dou malaina Yahudi lu'u d̄i Bait Allah ro kasampu ra nggelena hid̄i ma raso ake!” (

²⁹ Nggahi ndedekai siad̄oho b̄ara siad̄oho wa'ura edana Trofimus dou Efesus ede d̄i kota sama-sama lab̄o la Paulus; ro kacai b̄a siad̄oho wa'ura wa'ana sia d̄i ade Bait Allah.)

³⁰Sara'ana kota ndad̄i ngango ra ngora, ro sara'ana dou rai-rai kanggudu mena weki. Siad̄oho wa'u ra letona la Paulus ro randa kalosana sia d̄i ade Bait Allah. Wakatu ede wa'u tad̄a Bait Allah kempa.

³¹Wunga mbuipu dou-dou makatu'u ngango ra ngora ede ne'e hade la Paulus, ngoa b̄a dou d̄i dou-dou mana'ekai tentara Roma b̄a one sara'a Yerusalem wunga ngangona.

³²Dou mana'ekaina tentara ede ou lalona pila-pila dou perwira ro tentara edempara lao rocina lab̄o siad̄oho d̄i hid̄i ngango ra ngorakai ede. Wakatu eda b̄a dou mamboto ede dou mana'ekai tentara ro tentara-tentarana, siad̄oho denggana nduku la Paulus.

³³Dou mana'ekai tentara ede lao rakana la Paulus edempara wa'una sia, ro kauna dou leto sia. Edempara sod̄i b̄a dou mana'ekai tentara ede mab̄oha couku la Paulus ede ro au rakarawina.

³⁴Cambe b̄a sarunde dou ede ndake ro sarunde walina macambe ndede. Ka'ada'ana nawancuku kacona ndad̄ina dou mana'ekai tentara ede wati loana b̄ade au sapodakaina ma ndad̄i. B̄ara ndedena sia parentana loakud̄u la Paulus lao wa'a aka kanto.

³⁵Wakatu wa'a b̄a siad̄oho sia sampe aka a'u, dou-dou makatu'u ngango ra ngora ede mbani poda ndad̄i la Paulus pab̄uaku d̄i wa'a kalei b̄a tentara-tentara.

³⁶Siad̄oho lampa b̄atu b̄a dou-dou makatu'u ngango ra ngora ede makanggica, ”Hadepu sia!”

³⁷Wunga ne'e lu'u ade kanto, nggahi la Paulus d̄i dou mana'ekai tentara ede, ”Sab̄ua loa mada manuntu samporo lab̄o ndai ita?” ”Sab̄ua nggomi maloa nuntu Yunani?” sod̄i b̄a dou mana'ekai tentara ede.

³⁸”Nggara ndede, nggomi laina dou Mesir ede ntoina mandawina ngango ra ngora edempara wa'a raina upa riwu dou makangango rasa mawa'a d̄aha lu'u d̄i so sarae?”

³⁹Cambe b̄a la Paulus, ”Mada dou Yahudi; mada dou kota Tarsus, kota ma penti d̄i Kilikia. Takau to'ipu mada d̄imanuntu ra nggahi lab̄o dou-dou ede.”

⁴⁰Ndad̄i sawa'u b̄a la Paulus kau nuntu ra nggahi, la Paulus kid̄ina d̄i a'u, edempara mbeina isara kai rimana. Sara'ana dou ndad̄i midi mena. Edempara la Paulus nuntu lab̄ona siad̄oho kai nggahi Ibrani. Nggahi la Paulus,