Read Bima KISAH RASU-RASU 22 Bible Online

KISAH RASU-RASU 22 - Bima bible

KISAH RASU-RASU 22

¹”Ama-ama ro cina ra angi sara'ana! Nahu mangoa d̄i horukai wekiku d̄i nggomid̄oho. Takade'e to'ipu!”

²Wakatu ringa b̄a siad̄oho la Paulus manuntu kai bahasa Ibrani, siad̄oho nanaha midi wali. Edempara la Paulus nuntu walina.

³ ”Nahu dou Yahudi,” nggahi la Paulus, ”nahu rawarakaiku d̄i Tarsus d̄i dana ra rasa Kilikia, pala nahu rakana'e ta ake d̄i Yerusalem ro rangoa ra tei kataho b̄a guru Gamaliel d̄i ade hukum rambei b̄a la Musa d̄i wa'i ra waro ndaita. Sama b̄une cina ra angi sara'ana ta ake d̄i ainaina ake, nahu rau wancu kacaha d̄i ru'u b̄a Ruma Hatalla.

⁴ Nahu makancoki sampe madekaina dou-dou mab̄atu d̄i ngoa ra tei mab̄ou ede. Siad̄oho sara'ana, nataho mamone ro masiwe, wa'u ra leto b̄a nahu ro kalu'u d̄i ade uma bui.

⁵Ndai dou mana'ekai imam-imam ro sara'a Mahkama Agama naloaku nggahi b̄a one nahu wati cowaku. B̄ara siad̄oho edeku ma mbeina d̄i nahu sura d̄i otokai d̄i ru'u b̄a dou-dou Yahudi d̄i Damsyik. Kai sura ede nahu kaloa wa'u ra leto dou-dou ta aka ma imbi d̄i ngoa ra tei ede, ro malao wa'a siad̄oho aka Yerusalem d̄i hukum.”

⁶”Wakatu nahu wunga ade lampakaiku ro ne'era rongga d̄i Damsyik, wakatu aimarai, sab̄ua kalea ma taroa poda wed̄i lalompa maina talangi maheko nahu.

⁷Nahu sujuku awa dana edempara ringa b̄a nahu eli manggahi d̄i nahu, ’Saulus, Saulus! B̄ab̄auku nggomi kancokikaimu Nahu?’

⁸Edempara sod̄i b̄a nahu, ’Cou Ita Ruma?’ ’Nahu Isa dou Nazaret ede ra kancoki b̄a nggomi,’ cambe-Na.

⁹Dou-dou ma wara ta ede masama-sama lab̄o nahu ma'edana kalea mataroa ede, pala siad̄oho wati ringana eli ma nuntu lab̄o nahu.

¹⁰Edempara sod̄i wali b̄a nahu, ’Auku d̄i pab̄ua karawi b̄a mada Ruma?’ cambe b̄a Ruma, ’Tu'ura ro lao lu'upu aka Damsyik. Ta aka peade nggomi d̄i ngoa mab̄oha sara'a d̄i ne'e b̄a Ruma Hatalla d̄i karawi b̄a nggomi.’

¹¹Nahu mbudakaiku b̄ara taroa ma tanggirikai mada ede. Ndad̄i lengad̄ohoku mad̄anda nahu lao lu'u aka Damsyik.

¹²Ta ede wara sab̄ua dou mangara la Ananias. Sia dou ma sale ro nato'a kalampa hukum Musa. Sara'a dou Yahudi ma ngge'e d̄i Damsyik nawancuku horomana d̄i sia.

¹³Sia mai tiona nahu, edempara kid̄ina d̄i kompe nahu ro nggahina, ’Cinaku Saulus, henggapu madamu ro nggomi d̄imaloa eda wali!’ Wakatu ede wa'u hanta pahu nahu, edempara edaku sia.

¹⁴Edempara sia nggahina d̄i nahu, ’Ruma Hatalla wa'i ra waro ndaita wa'ura kad̄alena nggomi loakud̄u nggomi b̄ademu d̄i ne'e-Na, ro ma'eda Ruma Isa, Ada Ruma Hatalla ma karawina rane'e b̄a Ruma Hatalla ro makade'e nggahi ra eli ndai Ruma Isa.

¹⁵Nggomi d̄imandad̄i sakasi d̄imangoa ra kahaba d̄i sara'ana dou ra'eda ro ringa b̄a nggomi.

¹⁶Ake ai walina ngena ntoimu. Tu'ura, ro mbei wekimu d̄ikandeu karaso. Nggahipu d̄i Ruma Hatalla loakud̄u nggomi d̄ihori wea dosa-dosamu.’ ”

¹⁷”Nahu dula mbaliku aka Yerusalem, ro wakatu nahu wunga do'aku d̄i Bait Allah, nahu kuasakai b̄a Roh Allah.

¹⁸Nahu edaku Ruma; Sia nggahina d̄i nahu, ’Tu'u wi'i rocipu Yerusalem, b̄ara dou-dou ta ake wati d̄imatarima ao ra kahabamu ede mab̄oha Nahu.’

¹⁹Nggahi nahu, ”Ruma, siad̄oho nab̄ade podaku b̄a one mada mawa'ura lu'u d̄i uma-uma sambeakai d̄imawa'u ra leto siad̄oho ro manduku dou-dou ma imbi d̄i Ita.

²⁰ Ndede rauja wakatu ada Ita la Stefanus rahade, ndai mada wara ta ede ro satuju sia d̄i hade. Madaku ma tongguna kani ra lombo dou-dou ma hade sia.’

²¹Pala nggahi wali Ruma d̄i nahu, ’Laompa b̄ara Nahu d̄imakau lao nggomi d̄i hid̄i ma d̄o'o d̄i dou-dou malaina Yahudi.’ ”

²²Dou-dou mbuipu ringana nuntu ra nggahi la Paulus, pala d̄i eli ma cumpukaina ede siad̄oho kanggica kana'e podana, ”Hadepu dou b̄une ede. Sia wati tahona d̄i wi'i kamori!’

²³Wunga kanggicana, siad̄oho hambuna jumbana, ro mbari mbura kalub̄u wa'a b̄a angi.

²⁴Ndad̄i dou mana'ekai tentara Roma ede makauna dou lao wa'a la Paulus aka kanto loakud̄u sia d̄iparesakai katoku d̄i b̄adekai b̄ab̄auku dou-dou Yahudi kanggica ndedekaina d̄i sia.

²⁵Pala wakatu la Paulus wa'ura d̄iki d̄i ne'e cambo, nggahi la Paulus d̄i perwira ma kid̄i ta ede, ”Sab̄ua loa cambo sab̄ua dou ela ra dou Roma sawatipu sia d̄i paresa?”

²⁶Ringana ede, perwira ede laona aka dou mana'ekai tentara ro nggahina, ”Sab̄ua ake d̄i karawi b̄a Ita? Dou ake dou Roma!”

²⁷Edempara dou mana'ekai tentara ede laona d̄i la Paulus ro nggahina, ”Ngoajapu, sab̄ua poda nggomi dou Roma!” ”Io,” nggahi la Paulus, ”mada dou Roma.”

²⁸Nggahi rau dou mana'ekai tentara ede, ”Mada ndad̄iku dou Roma kai cola nggaliku!” Cambe b̄a la Paulus, ”Pala mada ranggana kai dou Roma.”

²⁹Wakatu ede wa'u anggota-anggota tentara ma ne'e paresa la Paulus ede, suruna ro dou mana'ekai tentara ede ndad̄i dahu b̄ara sia wa'ura ndante la Paulus, sapodakaina la Paulus dou Roma.

³⁰Dou mana'ekai tentara Roma ede nane'e podaku b̄ade auku sapodakaina makandad̄ina dou-dou Yahudi kancarana la Paulus. B̄ara ndedena b̄ala aisanai sia ouna dou-dou mana'ekai imam ro Mahkama Agama mai kab̄oro weki. Edempara la Paulus hori b̄a dou rantena, edempara wa'a d̄i tando siad̄oho sara'ana.