Read Bima KISAH RASU-RASU 23 Bible Online

KISAH RASU-RASU 23 - Bima bible

KISAH RASU-RASU 23

¹Ntanda kab̄ae b̄a la Paulus anggota-anggota mahkama ede edempara nggahina, ”Cina ra angiku! Sampe d̄i ainaina ake nahu wati iuku wara rawiku mancara d̄i Ruma Hatalla d̄i ade mpidaku mab̄oha mori ra woko nahu.”

²Wakatu nggahi ndede la Paulus, dou mana'ekai Imam-imam eded̄u Ananias kauna dou ma kid̄i d̄i kompe la Paulus topa asa la Paulus.

³ Edempara nggahi la Paulus d̄i dou mana'ekai imam-imam ede, ”Ruma Hatalla pasti d̄imatopana nggomi, dou mamunafik ma ca'u coro-coro raso! Nggomi dohomu ta ede maparesa nahu b̄unera kaukai b̄a hukum Musa, sapodakaina ndai nggomi masapana hukum ede kai kaumu dou matopa nahu!”

⁴Dou-dou ma d̄i sab̄ae la Paulus manggahi d̄i la Paulus, ”Nggomi makab̄awa ra katunaku dou mana'ekai imam-imam Ruma Hatalla!”

⁵ Cambe b̄a la Paulus, ”Oh, nahu wati b̄adeku, cina ra angi b̄a one sia dou mana'ekai imam-imam. Poda d̄i ade Alkitab wara ra tunti, ’Aina nggomi kab̄awa ra katunamu dou mana'ekai bangsamu.’ ”

⁶ Eda b̄a la Paulus b̄a one sarundena d̄i ade anggota-anggota mahkama ede dou-dou Saduki ro sarunde walina dou-dou Farisi. B̄ara ndedena nggahi sia d̄i mahkama ede, ”Cina ra angi! Nahu dou Farisi, londo ra mai Farisi. Nahu raparesa ta ake b̄ara nahu imbiku b̄a one dou-dou mamade d̄imamori mbali.”

⁷Wakatu nggahi ndede sia, dou-dou Farisi ro dou-dou Saduki ede tampu'u cence ncihina, ndad̄ina sida ede mbi'a ndad̄i d̄ua kalompo. (

⁸ B̄ara dou-dou Saduki manggahi b̄a one dou mamade wati d̄imamori mbali, b̄a one wati wara mala'eka, ro roh-roh wati wara rauna; dou Farisi na'imbiku d̄i sara'ana ede.)

⁹Ndad̄i wontumpara ngango ra ngora ma heba. Pila-pila dou Farisi ma ndad̄i guru-guru agama makid̄i ro mawati ca'u poda-poda. Nggahi siad̄oho, ”Nggahi b̄a nami dou ake wati wara ncarana kone sato'i! Kombi poda wara roh atao mala'eka ma nuntu lab̄o sia!”

¹⁰Ngango ra ngora ede ndad̄i ipi poda ndad̄ina dou mana'ekai tentara ede nadahuku nggara la Paulus kalembi b̄a siad̄oho. Ndad̄i sia kauna tentarad̄ohona lao weha la Paulus d̄i woha dou-dou ede ro lao wa'a sia aka kanto.

¹¹D̄i'aimangad̄i sawa'u b̄a ede Ruma Isa makid̄i d̄i kompe la Paulus ro nggahina, ”Katenggopu ademu! Nggomi wa'ura mbeimu sakasi mab̄oha Nahu d̄i Yerusalem. Nggomi peade pab̄uapu mbeimu sakasi ede d̄i Roma rau.”

¹²Aimasid̄i poda d̄i b̄ala aisanaina, dou-dou Yahudi tampu'u mafaka. Siad̄oho sumpana wati d̄imangaha atao nono nawatipusi siad̄oho hadena la Paulus.

¹³Wara ncewi upa mpuru dou ma kab̄oro weki d̄i mafakakaina ede.

¹⁴Siad̄oho laona d̄i dou-dou mana'ekai imam ro dou-dou mana'ekai Yahudi ro nggahina, ”Nami wa'ura sumpa sama-samamu, wati d̄imangaha ra nono au-au watisipu hade b̄a nami la Paulus.

¹⁵Ake nggomid̄oho lab̄o anggota-anggota Mahkama Agama pab̄ua rocipu nggadu sura d̄i dou mana'ekai tentara Roma ede d̄i rahokaimu sia wa'a mbali la Paulus satando d̄i nggomid̄oho, b̄une-b̄uneta nggomid̄oho mane'e paresa wali parakarana kai ncewi taho wali. Ro nami mawa'ura sadia hade sia sawatipu sia ronggana ta ake.”

¹⁶Pala mafaka siad̄oho ede ringa b̄a ana amancawa la Paulus. Edempara sia laona aka kanto ro ngoana lampa rawi ede d̄i la Paulus.

¹⁷Edempara ouna b̄a la Paulus sab̄ua dou perwira ro nggahina d̄i sia, ”Lao wa'apu ana dou sampela ake d̄i dou mana'ekai tentara; wara d̄i ngoa b̄a sia ake d̄i dou mana'ekai tentara ede.”

¹⁸Perwira ede lao wa'ana ana dou sampela ede d̄i dou mana'ekai tentara ro nggahina, ”La Paulus, dou rabui ede, ma'ou mada ro kauna wa'a b̄a mada ana dou sampela ake d̄i tando Ita; sia wara d̄i ngoana.”

¹⁹Nenti b̄a dou mana'ekai tentara rima ana dou sampela ede, edempara wa'a lao kalaina sia d̄i sab̄ae uma ro sod̄ina, ”Au ne'emu ngoa b̄a nggomi d̄i nahu?”

²⁰Cambe b̄a ana dou sampela ede, ”Dou-dou Yahudi wa'ura mafakana d̄i rahokaina Ita lao wa'a la Paulus d̄i tando Mahkama Agama naisi, siad̄oho nacoro-coro ne'e paresa wali parakara ma'ipi taho wali.

²¹Pala ai to'ina b̄atu b̄a Ita raraho b̄a siad̄oho ede, b̄ara wara ncewi upa mpuru dou ma wunga cili weki d̄imatapa aona sia d̄i ncai. Siad̄oho sara'ana wa'ura sumpana wati d̄imangaha ra nono sawatipu siad̄oho hadena la Paulus. Ake-ake siad̄oho wa'ura sadiana; ngena cambe b̄a Itampa.”

²²Nggahi dou mana'ekai tentara ede, ”Aina ngoamu d̄i cou-cou rau b̄a one nggomi wa'ura mai ngoamu ake d̄i nahu.” Edempara sia kauna lao dula ana dou sampela ede.

²³Edempara dou mana'ekai tentera ede ouna d̄ua dou perwira, edempara nggahi sia d̄i siad̄oho, ”Sadiapu d̄ua ratu tentara sama-sama lab̄o pidu mpuru tentara manente jara ro d̄ua ratu tentara mawa'a b̄uja d̄imalao b̄oe ciwi aimangad̄i ake wa'u aka Kaisarea.

²⁴Sadia raupu jara d̄i nente la Paulus ro wa'a sia kai salama rongga d̄i Gubernu Feliks.”

²⁵Edempara dou mana'ekai tentara ede tuntina sura ma nggahi ndake,

²⁶”Ma d̄ese ra ntasa Gubernu Feliks. Salam rad̄i Klaudius Lisias!

²⁷Dou ake wa'ura wa'u ra leto b̄a dou-dou Yahudi ro d̄i sato'impa siad̄oho hadena sia, nggara watisi mai mada ro tentara ro kasalama sia; b̄ara ringa b̄a mada sia dou Roma.

²⁸B̄ara mada ne'eku b̄ade au sapodakaina rawina mancara ra b̄ab̄u ra lo'okai b̄a siad̄oho d̄i sia, ndad̄i wa'a b̄a mada sia d̄i Mahkama Agama siad̄oho.

²⁹Palasi sia wati karawina au-au ma patu d̄ihukum kai hukuma made atao d̄i bui. Rab̄ab̄u b̄a siad̄oho d̄i sia wara hubunga lab̄o hukum-hukum agama ndai siad̄oho.

³⁰Edempara wara dou mangoa d̄i mada b̄a one wara niana madab̄ae rad̄i dou-dou Yahudi d̄i sia. Ndad̄i mada nggadu laloku sia d̄i Ita Gubernu. Ro mada wa'ura kauku dou-dou mab̄ab̄u ra lo'ona mawa'a da'awa b̄a siad̄oho sia d̄i Ita.”

³¹Ndad̄i anggota-anggota tentara ede kalampana taki ra puta siad̄oho. Siad̄oho wehana la Paulus edempara wa'ana sia aimangad̄i ede wa'u sampe aka Antipatris.

³²B̄ala aisanai siad̄oho co'ona tentara manente jara lampa wali lab̄o la Paulus, ro ndai siad̄oho dula mbali aka kanto.

³³Wakatu tentara manente jara sampe d̄i Kaisarea, siad̄oho karonggana sura ede d̄i gubernu, edempara d̄onggona la Paulus d̄i sia.

³⁴Sawa'u b̄a nggori baca b̄a gubernu sura ede, sod̄i b̄a sia d̄i la Paulus dou tab̄e sia. Wakatu b̄ade b̄a sia b̄a one la Paulus dou Kilikia,

³⁵nggahi sia, ”Taho! Nahu d̄imaparesa parakaramu, napodasi dou-dou mada'awana nggomi wa'ura rongga ta ake.” Edempara sia kauna loakud̄u Paulus bui d̄i ade asi Herodes.