Read Bima KISAH RASU-RASU 24 Bible Online

KISAH RASU-RASU 24 - Bima bible

KISAH RASU-RASU 24

¹Lima nai sawa'u b̄a ede, Dou mana'ekai Imam-Imam mangara Ananias ro dou-dou mana'ekai Yahudi lao aka Kaisarea sama-sama lab̄o sab̄ua dou pengacara mangara Tertulus. Siad̄oho mai satandona Gubernu Feliks ro da'awana la Paulus.

²Wakatu la Tertulus ou kau lu'u d̄i tando, sia b̄ab̄u ro lo'ona la Paulus b̄une ake, ”Pa Gubernu Ma D̄ese Ra Ntasa! Raparenta b̄a Ita dana ra rasa madad̄oho ndad̄i taho. Ro kai loa timba ra lemba Ita rau wa'ura mboto rakataho d̄i ru'u b̄a bangsa madad̄oho.

³Sara'ana ede madad̄oho weha ao kai tarima kasi ro kantaumu co'i ma'ese poda tab̄e-b̄e rau.

⁴Pala b̄aib̄a paki wakatu Ita, mada maraho d̄i Ita ringa to'ipu da'awa madad̄oho ma poro ake.

⁵Madad̄oho mboto rakamu eda dou ake makangango rasa ma bahaya poda. Tab̄e-b̄e sia kamaina ngango ra ngora d̄i woha dou-dou Yahudi ro sia mana'ekaina d̄imakaruku dou-dou Nazaret.

⁶Sia nawa'ura cobana kasampu ra nggele Bait Allah, pala madad̄oho mawa'u ra letona sia. [Madad̄oho mane'e hukum sia kai hukum agama ndai madad̄oho.

⁷Pala mana'ekai tentara eded̄u Lisias mawehana sia d̄i madad̄oho,

⁸ro parentana loakud̄u dou-dou mada'awa sia mai satando d̄i Ita.] Nggara paresasi b̄a Ita dou ake, ndai Ita d̄imaringana d̄i sia mapoda d̄i sara'ana rada'awa b̄a madad̄oho ake d̄i sia.”

⁹Dou-dou Yahudi ma wara ta ede b̄atu rauna b̄ab̄u ra lo'o la Paulus ro makancihina sara'ana ranggahi b̄a la Tertulus.

¹⁰Edempara gubernu ede mbeina isara d̄i la Paulus b̄a one sia loara nuntu. Edempara nggahi la Paulus, ”Mada kab̄ade Ita mandad̄i hakim dana ra rasa ake wa'ura pila-pila mba'a ntoina. B̄ara ndedena mada sana adeku horu weki d̄i tando Ita.

¹¹Ita maloaku paresa kab̄ae b̄a ndai Ita b̄a one wati ncewina d̄i sampuru d̄ua nai ma rawa'u wakatu ede mada laoku aka Yerusalem ne'e lao do'a.

¹²Ro wati warana dou-dou Yahudi ede maraka eda mada macence ncihi lab̄o kone sab̄ua dou rau atao makab̄oro dou d̄imandawi ngango ra ngora nataho d̄i Bait Allah ro d̄i uma-uma sambeakai atao tab̄e-b̄e d̄i ade kota.

¹³Siad̄oho rau wati loana mbei bukuti b̄ab̄u ra lo'o ra da'awa b̄a siad̄oho mada d̄i Ita.

¹⁴Poda mada mangaku d̄i Ita b̄a one mada manemba Ruma Hatalla wa'i ra waro madad̄oho kai ngoa ra tei b̄a Ruma Isa rawi'ikai b̄a siad̄oho ncara. Pala mada mbuipu imbiku d̄i sara'ana ra tunti d̄i ade Buku Musa ro Buku-buku Nabi-nabi.

¹⁵Sama b̄une siad̄oho, mada rau kantau d̄i ne'eku d̄i Ruma Hatalla b̄a one sara'ana dou d̄imamori mbali sawa'u b̄a made — dou-dou mataho, ro dou-dou madab̄ae!

¹⁶B̄ara ndedena mada ne'e podaku, loakud̄u ade mpidaku raso d̄i tando Ruma Hatalla ro raso rau d̄i tando manusia.

¹⁷ Sawa'u b̄a pila-pila mba'a mada wati warana d̄i Yerusalem, mada dula mbaliku ta aka d̄i wa'akaiku piti d̄i bantukai bangsa mada ro d̄i d̄onggo ra mbeiku koroba d̄i Ruma Hatalla.

¹⁸Wakatu karawi b̄a mada ede, siad̄oho rakana eda mada d̄i Bait Allah, sawa'u b̄a mada nggori upacara karaso weki. Wati wara mboto dou maro mada, ro wati wara ngango ra ngora ta ede wakatu ede.

¹⁹Cuma wara pila-pila dou Yahudi ta aka. Dou-dou ede rad̄i propinsi Asia. Siad̄ohoku ma sapodakaina mawara ta ake d̄imancundu ra'eda siad̄oho d̄i Ita, nawarasi da'awa b̄a siad̄oho mab̄oha mada.

²⁰Atao co'opu ndai dou-dou ake mangoana au rarawi ma'iha ra eda b̄a siad̄oho wakatu mada lao wa'a b̄a dou mada d̄i tando Mahkama Agama.

²¹ Siad̄oho narakaku ringa sampu'u eli akempa ranggahi b̄a mada d̄i tando siad̄oho, eded̄u eli: Nahu d̄i paresa d̄i ainaina ake b̄ara nahu imbiku dou-dou mamade d̄i kamori mbali.”

²²Edempara Feliks ma wa'u mboto b̄ade mab̄oha ngoa ra tei Ruma Isa, kanggorina sida parakara ede. ”Nahu d̄imakanggorina parakara ake,” nggahina, ”nawa'usi mai mana'ekai tentara eded̄u Lisias.”

²³Edempara sia kauna perwira ma ntau su'u ra tundu d̄i la Paulus ede, ngge'empa tahana la Paulus, pala aina ipi jaga kapoda sia ro mbeipu iji lengad̄ohona d̄imambei d̄i sia au-au raparaluna.

²⁴Pila-pila nai sawa'u b̄a ede mai la Feliks, lab̄o b̄a weina mangara la Drusila; sia dou Yahudi. Edempara Feliks kauna lao weha la Paulus, edempara Feliks kade'ena nggahi la Paulus mab̄oha imbi d̄i Ruma Isa Al Masih.

²⁵Pala wakatu la Paulus nuntu walina mab̄oha rombo ro ntiri ro wa'una taha nawasu ro mab̄oha hukuma d̄i Ainaina Kiama, Feliks ndad̄i dahu edempara nggahina, ”Nggomi loara lao ake. Nahu d̄ima'ou nggomi wali warasi wakatu.”

²⁶Wakatu ede Feliks nane'eku raka piti d̄i la Paulus. B̄ara ndedena sia ntuwu poda kauna dou weha ao la Paulus d̄imanuntu ra nggahi lab̄o sia.

²⁷Sawa'u b̄a d̄ua mba'a, Perkius Festus macepena Feliks kai b̄ora gubernu. Ro b̄ara Feliks mane'e weha ade dou-dou Yahudi, sia co'o wi'ina la Paulus d̄i ade uma bui.